Read Ignaciano Lucas 16 Bible Online

Lucas 16 - Ignaciano bible

Lucas 16

¹Ema Jesús eneichuware maichapa ena maimitureana: “Matiari'i ema achane riku, matiari'i'i ema maye'e nákenumuri ena músuana, técha'i tamutu eta máima'akeneana ema mákenu. Tási'a, masamairikapa ema mákenu eta mamapachichijisiraipa'i eta máima'akeneana.

²Taka'e, máichu'apa. Mayaserekapa: ‘¿Tája'a takayema eta juka nusamauchavi'i eta pimapachichijisira'i eta níma'akeneana? Tiuri, vitupaekene'ayare tamutu, taicha waipa nuwara'a pímiyanawa eta nuye'e.’

³Taka'e, ema nákenumuri ena músuana ichapeine'i eta mapanereresira'i: ‘¿Tája'ainapapuka nícharakawayare puiti? Ema nákenu tikuchukanuinapa taye'e eta juka nématanerepi'i. Ichape eta nutsiri'akarewayare. Titsiri'akare'iware nuyasesereka'ini eta nunikakene.

⁴Tiuri, ani nuka'eyare. Eta nichimaviraya ena tijakapanuanaya te nakuchukanupa te nemataneni.’

⁵Taka'e, máichu'awakapa namutu ena tikanteveana'i maye'e ema mákenu. Taka'e, mayaserekapa ema máinapuiru'i: ‘¿Áyana eta pinteve'i maye'e ema nákenu?’

⁶Ema achane majikapapa: ‘Nukanteve'i maye'e, cien juruma eta aceite vinikasa.’ Taka'e, ema nákenumuri ena músuana máichapa: ‘Júka'i eta pifirmaru'i. Waipa piwachachaima'i eta cien lata. Sinkuentaine lata eta pinteveyare.’

⁷Mayaserekaware ema apana: ‘Pítiyapa, ¿áyana eta pinteve'i?’ Taka'e, ema achane majikapapa: ‘Cien lata eta arusu.’ Ema nákenumuri ena músuana maichapa: ‘Júka'i eta piye'e wale pifirmaru'i. Waipa piwachachaima'i tamutu. Ochenta lata, eta pinteveyare.’

⁸Ema mákenuini maechapa eta máichakeneana'i ema maye'eni nákenumuri ena músuana, ma'asulupayachapa eta maechemaraiwa, taichavene eta maitusira'i makatiuchawaka ena kanteveanaini'i. Ene naka'e'i ena achaneana máimatira'ana'i ema Viya. Ena tiápajupanawana'iware eta náitusira'i eta tayanirawa. Nakachurika'i ena té'ikana'i ema Viya.

⁹“Puiti numetaka'eyare, eti ekaima'akene'ipuka, ekajiyare te napaucha'epuka ena tikamunuwana'i. Taka'e, te ítekapapa te máwasa ema Viya, tiúriyare eta ítekapiraya, ánaki ejákapainapa eta táitsiwayare.

¹⁰“Nákani tiúri'i eta náechapajirisira'i jákani, ene taka'eyare'i eta táuriwayare eta náechapajirisirayare. Nákanisera wa'i tiúri'i eta náechapajirisira'i jákani ánichichakene'i, éneyareichu'iware wa'i tiúrima'i eta náechapajirisirayare eta kamurikene'i.

¹¹Taicha te wa'i tiúri'i eta ekatupara'aira'i échapajirikaya, eta wa'ichu tishiwacha ¿waipaine'ipuka tituparaka'ema'i eta échapajirika'ini eta tasiwachakenecha?

¹²Te wa'i, ítaura'iyare te jákani apaye'eana, ¿naja'apuka tijaraka'eya eta eye'eya?

¹³“Najina emanaina musu, táurika'ini apinanaina'ini ena viákenuana, taicha vémunakapanayare'i ema émana, tási'a ema apana, apaesaineya eta vémunasiraya, wáipainapa tisuapakarema'i ema. Tási'a, ema apana, apaesaineya eta vémunasira. Ene taka'e'i eta juka víma'akeneana, wa'i vikuisapa ta'apasamurecha'avi eta plata. Machu ta'apapirika'avi eta vémunasira'i ema Viya.”

¹⁴Ena fariséuana, nasamaraka'i eta juka máimiturapiana'i ema Jesús. Tási'a, nakaeka'ipa eta nasamira'i ema. Taicha tétavikawa'i eta tawayuasirawaka'i ena eta plata.

¹⁵Ema Jesús máichawakapa: “Eti epiyakawa'i iúri'i eta ímairawa'i naye'e ena achaneana. Émasera ema Viya máimati'i eta esamureana. Makatianaka'i ichape ema eta apimira'era'i.

¹⁶“Eta naimiturapianaini'i ena nainapureanaini'i profetanaini ticheku'apa eta maítekapira'i ema Juan tikachasirikara'i, étapa taepaninewa'i eta Arairu maechejiriruwa, eta masiapiraina ena te mawasa ema Viya akenuka te anuma, taicha nanutu nawara'a tisiapa taye'e.

¹⁷“Maejerarepana eta táitavira eta anuma, étapa eta apake'e, etasera eta wanairipiana wa'i tetavikawaima'i eta tasuapakarewa'i.

¹⁸“Mákani achane, te máinajikapuka esu mayena, tási'a mave'a esu apana esena, ema tikapekaturaipa'i. Takutikene mákani apanaware achane mave'apa esu esena máinajiru'i ema suima, éneichuware tikapekaturaipaware.

¹⁹Matiari'i ema achane mawayucha'i eta marrikuwa. Tétavikawa'i táurinawa'i eta makamuiri'aira, tijanunu'akanecha. Tamutu'i sácheana máicha eta tinikakare tiurinisikene'i.

²⁰Matiari'iware ema apana achane paure tikaijare Lázaro. Tikajuma'i, amairi'a'i karachacha'a eta majuma. Téja'apairika'i ema tamutu sácheana te mapajakura ema riku.

²¹Ema maka paure tiyasesereka'i eta manikayare'i eta máemacharajiana ema riku. Waipa marata'a'ini makatiuchawa'ini eta táeverasira'i eta tamukuana eta makarachana.

²²Jena sacheana'i títekapapa eta máepenira'i ema paure. Nárajapapa ena ángeleana; náepanapa eta máchanewa, namapa te mávi'a'i ema Abraham. Taka'e, tépenawarepa ema riku, tiúrinaware eta náekarira'i.

²³“Eta máepenira'i ema riku, tiyanapa te makatajiwaiyayare'i. Máima'apa eta mávi'a'i ema Abraham, tási'a émapa ema Lázaro te machakaya.

²⁴Taka'e, tipiarakapa: ‘¡Tata Abraham, pájapanunu! Piwanesinanu ema Lázaro máechipaikaini apaesachicha eta mawauki te une, máekasarechapana eta nunene. Taicha nukatajiwaiya'i eta te juka návi'a'i táijurekene yuku.’

²⁵Émasera ema Abraham majikapapa: ‘Nuchicha, te achanevicha'a, tétavikawa'i eta piúrikakarewa'i. Tájina pákamunu'ini eta pítaresira'i. Émasera ema Lázaro, ichapemuri'i eta makatajiwaira'i te achaneicha'a. Puítisera ema majakapaipa'i eta máurikakarewa'i. Piti pikatajiwaipa.

²⁶Takutikene máituji'i eta mánukuiraina'ini eta ara piye'e. Pítipa wá'iware pítujikawaima'i pítekapaucha'avi ani te juka viávi'a'i víti, taicha jukari'i eta tíchejimiraucha'avi'i eta viánukuiraina'ini, máituji'i eta mayana'ini.’

²⁷“Ema rícu máichawarepa: ‘Pikatajikanusera, piwanesinanuini mayana ema Lázaro te mapena ema tata,

²⁸mametapana'ini ena sinkukeneana nuparapenaveana, eta náeñauchirawaina ena, apaesa wá'ini nakuiteka'ini te juka návi'a'i nuti nukatajiwaiya'i.’

²⁹Ema Abraham máichapa: ‘Ena, nakaye'epa eta majure'i ema Moisés, etapa eta najure'i ena apamuriana profetana: ¡narata'a téchejikurekana, nasuapaware!’

³⁰Ema rícu majikapawarepa: ‘Tata Abraham, Tiúripana'isera'ipukaini mayana'ini ema émana máepenakene, eta naye'e ena nuparapenaveana, mametapanawaka'ini. Németeaka téñauchawawaneanaya.’

³¹Émasera ema Abraham máichawarepa: ‘Te wá'ipuka nakusuapa'ini eta Takapika'ukene Ajureka, taka'eyare'i eta namasuapirayare mákani máechepure'i máepenakene'i.’ ”