Read Ignaciano Lucas 17 Bible Online

Lucas 17 - Ignaciano bible

Lucas 17

¹Ema Jesús mametamuri'awarepa ena máimitureana: “Yátupi eta wa'i téjiakawaima'i eta tímiakipaikayare taye'e eta pekatu ena achaneana. ¡Ichapesera eta náikuñayare nákani táemesiawanayare náimiakipaisiraya nákani apamuriana!

²Tiuripana vitinuka'ini taye'e eta mari, vechipaikapaini te ichapeama une, mákani tímiakipaikaya te pekatu ema émana amaperuchicha.

³¡Eta taka'e, échapawaya eti! Machu ímiakipaika ena amaperuana. “Te'esera te maejekapawapuka ema piparape pechejirikaya, te'esera te maechawa eta maichakeneana'i pajapanu.

⁴Tayanapane siéte'enapuka máejekapawa te étana sache, máeñeuchawasera eta piye'e te maka'epuka: ‘Waipa napechawaima'i nejekapawa piye'e’, tituparakavi pijapanuyare.”

⁵Tiuri, ena apústuleana nayaserekapa ema Jesús: — Tata Viákenu, viwara'a ichapena'ini eta vikasiñairawaya eta piye'e.

⁶Taka'e, ema Jesús majikapawakapa: — Étisera, te yátupikenena'ini ákasiñawa'ini me Viya, tayanapane ánichichainaichu'ini, takuti'ipukaini eta táki eta mustaza, tamutuyare erata'a. Étaipa eta jákani yukuki, te ewara'apuka ekayejeka, erata'ayare'i. Te íchapuka: ‘Piyejekawa eta te juka, piyana pisukuchawa te ichape une’, tási'a, eta yukuki tisuapa'enapa.

⁷“Étaipa ema mákani achane te tikamusura'i, te mási'apaipapuka ema musu te wáma'i eta majaneasira'i eta waka, te tísa'a'ipuka, te títekapapa te peti, ema mákenu ¿wáipaine'i maichaima'i: ‘Yarepa pinika te mesa’?

⁸Matátáuchayarechucha mawaneka ema musu émaina máepiyaka eta tinikakare, máenikayare ema mákenu, tási'a, máichainapuka: ‘Tiuri, nítanesipa. Pítipawapa pinika.’

⁹Wáipaine'iware ma'asulupayachaima'i ema mamusura eta máitauchira'i eta mawana'iana'i.

¹⁰Ene eka'e'i eti, ekuti ema musu. Te ítauchapa tamutu eta ewana'iana me Viya, eka'enapa: ‘Viti músuana'i wa'i vikunachakaréma'i. Takarichu'i vicha eta viwana'iana'i’ ”

¹¹Tímiyanawaware tipaika ema Jesús, makaiju'epa eta Jerusalén. Máetavikawakapaipa eta awasareana te Tinapaika te Galilea étapa eta Samaria:

¹²Te máitekapauchapa eta apana awasarechicha, tiúchujikanapa ena diéskeneana ajairana tikajumana eta karachacha'a. Nakapayakapa ema. Wá'isera náemeña'awa'ini ena, nayere'ichucha

¹³taka'e, napiarakapa ema Jesús: — ¡Tata Jesús Nazareno, pájapanu'avi, pikatajika'avi, pikanaraka'avi eta vijuma!

¹⁴Taka'e, ema Jesús máesenikawakapa. Tási'a, máichawakapa: — Eyana, ímerekawa te namira'u ena tuparairukana apaesa náimamaraka'e. Énainapa nametajirika eta iúriwaipa, enarasiraipa'i eta ejumanaini'i. Nasuapawane'i ena. Tási'a, eta nayanira'i, tinarakanapaipa.

¹⁵Taka'e, ema émana, eta máimairawa'i eta manarasiraipa'i, tichawapa te mávi'a'i ema Jesús. Tipiarakapaipa'i muraka eta makunachira'i,

¹⁶matupirupa tépuyuka'i te mamira'u ema Jesús, tétipaikapa makaitekapa eta mamira te apake'e, mamaverarasirawa'i eta ma'asulupayachira'i. Ema maka achane, samaritano.

¹⁷Ema Jesús máichapa: — Takutima'i diésna'i ena nukanararuana'i. ¿Tavi'a navi'a ena apamuriana nuévekeneana?

¹⁸Makarichu'i tichawa ema maka apawasana, makunachapaipa ema Viya.

¹⁹Taka'e máichapa ema achane: — Péchepuka, piyana pichawa; pinarakaipasera táichavene'i eta pikasiñairanu'i.

²⁰Ena fariséuana nayaserekaware ema Jesús, tájamu'uyarepuka eta taitekapiraya eta mawasa ema Viya akenuka te anuma, tási'a majikapamuriwakapa: — Eta táitekapiraya eta mawasa ema Viya akenuka te anuma, wa'i namutuima'i naima'a eta maitekapiraya.

²¹Wa'i waka'ema'i: ‘Makaipa’, waka'epapukaini ‘Maena'i ánaki’, taicha eta mawasa ema Viya akenuka te anuma, matiari'ipa ani eye'e.

²²Máichawakapa ena máimitureana: — Tatiari'iyare eta sachewayare eta ekaimairunuiraya. Tétavikawaya eta ewarairaya íja'uchawa íma'anu nuti Manerejirunu'i ema Viya.

²³Naka'enapapuka: ‘Makaipa’, waka'epapuka'ni ‘Maena'i ánaki’, wá'isera ekusuapawaka ena. Wá'iware ekue'ikawaka.

²⁴Taicha takutiyare eta térameka, eta maítesirayare ema Machicha ema Ajaira. Tamikauchayare eta anuma étapa eta apake'e, jena sacheyare.

²⁵Tatiwayaresera katajiwanumayare. Naépuruyare ena achaneana natiari'ikeneana'i puiti.

²⁶Takutiyare eta akane eta náija'uchirawa'i tépenana ena achaneana machamurianaini ema Noé, enetaka'eyare eta sacheana eta machavirayare ema machicha ema achane.

²⁷Ena achaneana tinikanainecha, téranainecha, náematane, tási'a tímarerekanaware ena nachichanaveana, wa'i naeñamawa'ini eta náimaira'i ema Noé eta masiapira'i taye'e eta ichapekene pakure, taka'e te titekapapa eta ichapekene tikiwa namutupa tepenana.

²⁸Ene naka'e'iware akane ena achaneana machamuriana ema Lot. Tinikairi'iana'iware ena, tíwacharekana, térarakawana, tíjararerekana, téwakana. Tepiyarerekanaichucha eta petiana;

²⁹té'esera te majunijikapa ema Lot eta awasare Sodoma, tíja'uchawapa tikiwapa eta yuku tikasiriki azufre tiási'a'i te anuma, takapapajikawakapa namutu.

³⁰Ene taka'eyare eta machavirayare ema machicha ema achane.

³¹“Te jena sácheyare, mákani tachimararuyare te canchón, tási'a te tatiari'ipuka eta mayereruwa te taju'e eta mapena waipa makuchawaikene'awa maepana, tási'a mákani tachimararuyare te wáma'i, waipa makuchawaikeke'awa maepana eta mamuiri'a.

³²Échaichu'i eta suíchararakawa'i esu mayenaini ema Lot.

³³Mákanisera téñama'i eta máitaresira, émajiwayare tikamitiekene'awaya eta máitaresira; émasera mákani táimikapakapuka, ema títujikawayare tiúchuku'ayare'i eta máitaresirayare.

³⁴“Te jena yátiyare, natiari'iyare ena apinana te naechawara'i timakana'i, ema émana tiáramikareyare tiára. Esu apana sunasinapa.

³⁵Te apinana'ipuka ena esenana tiyuwarekana'ipuka. Éneichuware esu esuna tiáramikareya tiára, esu apana sunasinapa.”

³⁶Te apinana'ipuka ena ajairana te wáma'i, ema émana nichu'ayare, ema apana manasiyarewa.

³⁷Taka'e nayaserekapa: — Tata, ¿távi'apuka táitauchiawayare eta juka? Tási'a ema májikapapa: — Te jákani taurujisiawa'i eta sipukiana, eta tavi'a'i eta taniru taepenakene.