Read Ignaciano Lucas 2 Bible Online

Lucas 2 - Ignaciano bible

Lucas 2

¹Taka'e, te jena sácheana, ema emperador Romano Augusto, makawanairipipa nakuchuka eta wanairipi, nakatupairayare namutu ena achaneana te awasareana.

²Táinapuiru'i eta nakatupaira'i maicha ema tuparairuka Quirinio taye'e eta Siria.

³Taka'e tiyananapa namutu ena achaneana te náwasapaichu, te náuchusineana eta nakatupairayare'i. Nasuapayare'i eta wanairipi.

⁴Taka'e, tiyanapa ema José. Tiúchukapa ena taye'e eta awasare tikaijare Nazaret te Galilea, nakaiju'epa eta awasare tikaijare Belén, te Judea, eta máwasaini'i ema akenukaini rey David, eneichuware máwasa'i ema José, taicha ema José mámariekene'i ema David. Tiyananapa tikatupanayare'i.

⁵Tiyananapa ánaki kajuanayare'i mámapa esu mayena María, esusera tikajaripaipa'i.

⁶Títekapanapa te Belén. Tájinaipasera távirawaina'ini te pétiana náitekapi'a'ini taicha. Taka'e, esu María tiyuritikawaipa eta sukajera eta suínasirayare'i.

⁷Taka'e, tinákapa jena yati. Suínakapa ema amuya suárachicha'i, suáyuruakapa te mámaratataji, sukaivekapa ema amuya alauchu sukaivekapa taye'e eta pesebre, taicha tajinaipa'i tavirawaina'ini taye'e eta naitekapirare'i.

⁸Te wáma'i, tachakaya eta awasare Belén, natiari'i'i ena janeapairikana. Ena, najaneaka'i eta naye'eana uvesana te jena yátikene'i.

⁹Tiáramikarepa tímerekawa ema ángele mawaneru'i ema Viya. Jé'esare, tamikauchamurine'i ena janeapairikana. Eta majaraiwa'i ema tiáramekanaine ena.

¹⁰Tási'asera, ema ángele máichawakapa: “Wa'i ekupika, yare, juka'i eta tímitekanu'i nuti numetapana'eyare. Tétavikawa táurisamurekarewaya naye'e namutu ena achaneana:

¹¹Puiti te jena awasare Belén, máwasaini ema rey David, tiúchukaipa ema Tikatiura'iyare eye'e emutu eti. Ema, tikaijare Cristo Tataya.

¹²Eta, nímikutiarachina'eyare: Echimapayare ema amuya tikayuru'a'i te mámaratataji, tíveka'i te taju'e ta peti tapena eta sárareana.”

¹³Tási'a, tíja'uchawapa tímerekawana ena kamurikeneana ángeleana. Najira'i eta majira'u ema Viya te anuma. Ánipa naka'e:

¹⁴“¡Tétávika vikunachira'i ema Viya vimutu viti viávi'ana'i te anuma! ¡Jé'eware puiti, tiúrikawanainapa ena achaneana te juka apake'e, ena manerejiruana'i makatajiruana'i ema Viya!”

¹⁵Te tiyananapa ena ángeleana, tichawana te anuma. Ena pástuleruana tepanawanapa naichakaka'i: — Viyana te Belén. Víma'apana eta juka mametaru'avi'i ema ángele, mawaneru'i ema Viya Viákenu.

¹⁶Taka'e, titátajianapaipa'i tiyanana. Jé'esareine'i, te títekapanapa, nachimapaine'i esu María émapa ema José. Ema amuya tíveka'i ema te tanisirare eta sarareana.

¹⁷Te náima'apa, tépanawanapa náemechapa. Amairipa'ipa naecha eta mametarapiana'i ema ángele eta máuchusiraipa'i ema amuya.

¹⁸Taka'e namutu ena tisamana'i, náramine'i eta nametarapiana'i ena pástuleruana.

¹⁹Esu María supanerekene'aine'i te susamure tamutu eta juka susamakeneana'i.

²⁰Taka'e, ena pástuleruana tichawanapa te najanearesi'a'i eta uvesana. Te napaisirapa'i te achene nájirauchapaipa na'asulupayachapaipa ema Viya, eta naimaira'i nasamira'i, tamutu titauchawa'i eta máechejiriruwa'i ema ángele.

²¹Te úchukenepa sache eta máuchusira'i ema amuya, nanakapa eta maikutiara ema, taka'e, nanakapa eta máijareyare Jesús. Eta máimijarechakene'i ema ángele te sukajariyarepa esu maena María.

²²Taka'e te tiratawapa eta tatupa eta sache'i, eta suínasira'i esu María, tiyananapa te Jerusalén. Eta tímiyanawaka'i ena, náimerepanayare'i ema amuya te mamira'u ema Viya.

²³Naicha'i eta juka, taicha taka'e'i eta taechejiriruwa eta Ajureka: Májure'i ema víyara'aini Moiséini, “Te ajairapuka ema mákani suárachicha esu esena, ímerekayare maye'e; ema Viya.”

²⁴Éneichuware naitauchayare'i eta apana wanairipi maye'e ema Viya, esu súkani esena arainaka'i, suíjarakasichanupana eta api'ina paluma; te wá'ipuka, apina paluma suítatikeneana, ama'iruchichana.

²⁵Matiari'i'i te Jerusalén ema achane tikaijare Simeón, tétavikawa'i eta máuriwa, tipikaura'i ema. Émaichu máwa'aru'i ema Machanewa Viya.

²⁶Ema Machanewa Viya mametaka'i ema Simeón eta wicha'a tépenawanema'i ema, táicha máimatinumayare'i ema Cristo mawaneru'i ema Viya.

²⁷Te jena sache, ema Machanewa Viya mawanekapa ema achane Simeón mayana te templo; taka'e, títekapanapa ena tikachichana ema Jesús. Námapaipa ema amuya. Náitauchayare'i eta wanairipiana taicha eta máuchusira'i ema suárachicha'i,

²⁸Te máima'apa ema Simeón ema amuya, mave'apa, majupakapa. Tási'a, makunachaine'i ema Viya. Maka'epa:

²⁹“Puiti, Tata, titauchawapa tamutu eta pimetarunu'i: nuwara'apa nunaraka te juka apake'e, nuti piwanara.

³⁰Nímatipa ema tikatiura'ikeneyare'i,

³¹ema, tímatikareya picha taye'e eta awasareana, tikawasana'i te tamutu awasareana,

³²tíjara'ineware taye'e eta awasareana ema, timikauchawakaya ena apamuriana tikawasana te Israel.”

³³Náramine'i ena tikachichana eta máechejiriruwana'i ema Simeón maye'e ema amuya.

³⁴Taka'e, ema Simeón mayaseakapa ema Viya eta náuriwaina ena. Taka'e, máichapa esu María esu maena ema amuya Jesús: — Píma'a, ema maka amuya, matuparakasiwa'i eta máimituresiraya eta máechejiriruwana ema Viya. Natiari'iyaresera kamuriana ena vijaneanana israelítana énajiwayare tíchawanayare, taicha naepuruyare,

³⁵Étainapa takaecheraiyaya eta napanereruana te nasamureana. Éneichuware, numetakavi piti María: Ichape eta pikatisamurewayare, taicha píma'ayare eta máichararakawayare ema pichicha. Tímikutijirikawayare tayuwaraka'ini eta pisamure eta tumare.

³⁶Sutiari'i'iware esu ésuna esena ichavikachicha. Tikametarairura'i esu. Tikaijaru'i Ana. Ema suíyaini tikaijaréni Penuel. Esu, mámariekene'i ema víyara'aini Aser. Eta suámaperuwa'i esu, siete añu eta sukachanera'i ema suímaini;

³⁷Ochenta y cuatro añuipa'i eta suépenaimawa'i. Sunasikene'i sukapena'i esu te templo, tamutu'i sácheana, yátiana, tíjima'i, tiyujaraka'i esu.

³⁸Títekapanecha esu Ana. Supauchapa sukunachaine'i ema Viya, su asulupayachapa. Sukametarairupa maye'e ema amuya Jesús. Suéchejisi'a'i ema naye'e ena tisuapajira'iana tikuchapana'i eta máitekapirayare te Jerusalén.

³⁹Tiuri, náitauchapa tamutu eta mawanairipiana ema Viya eta te takapika'ukene. Taka'e, tichawanapa eta te Nazaret te Galilea, te náwasaichu'i ena.

⁴⁰Taka'e, ema amuya Jesús tiúrijuru'i. Túme'i. Téchemara'i'i, tamutu maecha, taicha mamunawa'i me Viya.

⁴¹Tiuri, tamutu añuana te Páskuamu'uana, eta naye'erepi ena tikachichana ema amaperu Jesús, tiyananayare'i taye'e eta awasare Jerusalén.

⁴²Taka'e, ema Jesús, te makaye'epa doce añu, tatuparakaipa'i ena tikachichana náimerepanayare'i ema, námayare'i taye'e eta Jerusalén, náimimatichayare'i eta piesta.

⁴³Tiuri, te jena táekenerapa eta piesta, tichawanapa te napena. Tíminasichawapasera ema amaperu Jesús eta te Jerusalén. Eta napaisirapa'i te achene, wa'i náejiakawane'ini ena tikachichana.

⁴⁴Taicha náimijacha'i matiari'ipa'i ema te namuri ena achaneana nakachanekeneanapa'i. Etanaipa'i sache eta napaisira'i, napaenumawapa náejiaka'i ema. Te jena kapere'ikenepa, natanukapa te namuri ena najaneanana nakachanekeneanapa'i,

⁴⁵Májinasera náichimawa'ini. Taka'e, tichawanawarepa te Jerusalén, natanupanayare'i ema.

⁴⁶Taka'e, te jena mapanakenepa sache eta natanusira'i, napaenumawapa náetupiaka'i ema Jesús taye'e eta templo. Makachanemuri'i, téjaka'i te namuri ena máestroana. Masamararakawaka'i, mayaseremuri'awaka'i ema apanaware.

⁴⁷Ichapeine'i eta náramira'i namutu eta náimaira'i eta máechemaraiwa'i, taicha táuriwapa'i eta majikapirawakapa'i ena, taicha eta máechemaraiwa'i.

⁴⁸Taka'e, tiáramiwanaine'i ichape ena tikachichana te náetupiakapa. Tási'a, suíchapa esu maena: — Nuchicha, ¿tája'a takayema picha'avi'i? Ichapemuri eta vikañamarasirawa'i pícha. Vitanujirikavi'i, nuti éñipa eñi piya.

⁴⁹Ema Jesús majikapapa: — ¿Tája'a takayema, eta etánujirikanu'i? ¿Wá'ipuka écha'ini eti eta návi'aira'i eta ani. Níchayare eta máemataneana ema Tata?

⁵⁰Énasera wa'i nakaikutiara'ini eta makayemakeneana'i ema nachicha Jesús.

⁵¹Taka'e, tiyananapasera tichawana te náwasa'i Nazaret. Ema Jesús, tisuapajira'i'i naye'e ena tikachichana. Esu maena María tamutu'i supanerekene'a'i te susamure eta juka susamakeneana'i.

⁵²Taka'e, ema Jesús tijurukapaipa, tijuru'akapaipaware eta máke'e, takachanepa'isera eta máitupajijiasirawa'i. Máimikataka'i ema Viya. Tétavikawa'iware eta náemunasira'i ema, ena achaneana.