Read Ignaciano Lucas 20 Bible Online

Lucas 20 - Ignaciano bible

Lucas 20

¹Jena sache'i tímiturekawarepa ema Jesús eta te mapena ema Viya naye'e ena achaneana, máechejisi'a'i eta Arairu máechejiriruwa. Títekaparakanapa ena tachutiri'ana ena tuparairukana, ena escriwánuana énapa ena nakachanepa'i ena viyakara'ana,

²taka'e naichapa: — ¿Nája'asika tiwanekavi'i? ¿Nája'a tituparakavi'i picha eta juka píchakeneana?

³Ema Jesús majikapawakapa: — Nuti apanaware nuyasereka'eyare. Ejikapanuyaresera.

⁴¿Nája'apuka tiwaneka'i ema Juan, eta máikachasirisira'i ema Viya, énapuka ena achaneana?

⁵Enajikakanapa tiákapaemajirikakanapa: “Te vémuna'akawa vicha mawaneru'i ema Viya, ema maka'énapapuka: ‘¿Tási'a wá'iyapa esuapa'ini ema?’

⁶Taicha, wa'i taurika'ini vémuna'akawa vicha émajiwaichucha eta máitesira'i, taicha ena achaneana kuyayakare nakápaka'avi, taicha namutu'i nasuapa'i ema Juan, eta emaira'i profeta.”

⁷Tási'a, najikapapa eta namaechira'i ena, naja'a'ipuka ema tiwaneka'i ema Juan eta maikachasiripanira'i.

⁸Taka'e ema Jesús majikapawakapa: — Nuti apanaware, wá'iware numetaka'ema'i nája'apuka ema tijarakanu'i eta juka nutupara'a'i.

⁹Tási'a tépanawapa ema Jesús máechejikawaka'i ena achaneana. Nuwara'a nímikutichina'eyare: “Matiari'i ema achane, tikaewaru'i kamuri eta uwa te máesane. Tási'a máijarakapa ena achaneana pártirariuanayare'i, tási'a tiyanapa te apana awasare.

¹⁰Taka'e, te títekapapa eta kaje taya'aira'i eta uwa, máimiwanerekapa ema mamusura nayaseapanawakayare'i ena pártirariuana'i eta maye'eyare'i ema tikaye'e, énasera tisemauchawanaichucha, nakaratakapa náe'apa ema wanairuka'i. Tichawapa ema, tájina náijaraka'ini.

¹¹Taka'e, ema tikaye'e máimiwanerekawarepa ema apana mamusura, éneichuware náume'awarepa ema wanairukaini'i, náe'awarepa, tájina náijaraka'ini.

¹²Mápechawarepa máimiwanerekawarepa ema apana mamusura, éneichuware náe'awarepa ema wanairukaini'i, najarachapa, nákijikapa te aneka.

¹³“Taka'e ema tikaye'e eta apake'e maka'epa: ‘¿Tája'apuka nícharakawayare? Nuwanekayare ema nuchicha némunarukene'i, émainapapukaini napikaucha'ini.’

¹⁴Te'esera te náima'apa ema machicha ema tikaye'e eta úwakiji, naka'emuripa: ‘Émainapapuka tikaye'eyare ema maka eta maima'akeneana ema maiya, yare vikapaka apaesa tánasipa viye'ena eta maye'eya'ini.’

¹⁵Taka'e nakaratakapa, nakuchukapa taye'e eta úwakiji, tási'a nakapakapa. “¿Tási'a tája'apuka máicharakawakayare ena, ema tikaye'e eta úwakiji?

¹⁶Waipa májapanuwakaima'i, makapakawakaya ena pártirarioana'i, máijarakainapa ena apamuriana.” Te nasamapa eta juka naka'emuripa: — ¡Eta juka wa'i titauchawaima'i!

¹⁷Ema Jesús máesenimuri'awakapa, tási'a máichawakapa: — Taka'e ¿taja'asika takayemakene'i eta Ajureka?: ‘Ena tépiyarekara'iana eta peti, tasapi'apa náepuru'i eta mari táikuchi'i tatumearayare eta peti.’

¹⁸Nákani testapaikawana te taina'u eta mari tevetutujikanayare, te etainapuka temirika eta mari te ina'u emajupaya.

¹⁹Ena tachutiri'ana naye'e ena tiyujarakara'iana, tási'a énapa ena escriwánuana nawara'ainipa náija'uchayare'ini nakarataka ema Jesús, taicha tímatiakawanapa ena eta énaira'i tayunakawaka eta máimikutichirawaka'i. Énasera tipikakarakawana'isera naye'e ena achaneana.

²⁰Nawanekapa ena apamuriana ajairana tépiyakawanayarepa'i tiúriana'i te mamira'u ema Jesús, nawaraira'i natanukayare eta tímikaviuchayare'i. Énayarepa timetauchanayare'i maye'e ema akenuka ramano.

²¹Ena nakana, nayaserekapa: — Tata maestro, vímati'i eta tatupiruwaira'i eta pímiturapiana'i. Nájinaware pinerejiruina'ini ena achaneana, tási'a piti pimitukawaka'i eta táurinakene achene tikaiju'e me Viya.

²²¿Tiuripuka viwachacha eta viyase'ana maye'e ema emperador romano, wa'ipuka?

²³Ema Jesús máimatiakawakapa eta tamauriwapa'i eta napanereruana, máichawakapa:

²⁴Níma'aseji, iáminanu étapena eta reale. ¿Nája'a tikaijare eta juka, nája'aware tikawasima'i eta juka mirare eta te juka reale? Ena najikapapa: — Maye'e ema emperador.

²⁵Ema Jesús máichawakapa: — Puiti táurika'i íjaraka ema emperador eta maye'eichu'i ema emperarador, tási'a íjarakaware ema Viya, eta maye'eichu'iware ema Viya.

²⁶Tási'a wa'ikenesera nárata'a'ini náimiakipaika'ini eta nayaseresira'i te namira'u ena achaneana. Táitsiwa'i náramipa eta majikapirawaka'i, taka'e timatinanapa.

²⁷Naka'epaipaware ena apamuriana achaneana saduceoana. Ena nani apana eta náimiturapiana'i; wa'i nasuapa eta náechepusirayare ena náepenakeneana. Taka'e, nayaserekapa ema Jesús:

²⁸— Tata maestro, ema Moisés manakika'i eta Ajureka máechejiriruwa'i eta viye'e, te máepenaekene'a'ipuka ema achane esu mayena, tási'a, nájinaicha'apuka manakiekeneruwaina'ini machichaina'ini; te matiari'i'ipuka mákani maparape'i, mave'ayare esu machinenaekeneni, apaesa émainapuka makachicha eta suye'e, máitsiwaina'ini ema maparapeni.

²⁹Taka'e natiari'i ena siétekeneana tikaparapejirikakana, te títauchawapa ema náechavimuri, máepenaekene'apasera esu mayena. Nájina'i machichaina'ini.

³⁰Ema mae'iruichu

³¹tási'a émapa ema namapananekene ema maparape, máitauchaware esu. Éneichuware máepenaekene'aware. Namutupa ena sietekeneana nave'a'i, tási'asera nájina émanaina'ini mákachicha'ini eta suye'e.

³²Te táekenepa, tépenapa esu esenaini.

³³Taka'e puiti, te apánapapuka eta náitaresirayare ena nani kaparapekakana, ¿nája'apuka ena siétekeneana ema yátupikene'i suímakene'i esu esena, taicha ena siétekeneana namutu'i suímawaka'i?

³⁴Ema Jesús majikapawakapa: — Ena ajairana te juka apake'e natuparakasiwa'i títauchawanayare suye'e esu esena,

³⁵Te apana náitaresira, nákani tikatupara'anayare eta nasiapirayare te anuma te náechepukapa, waipa nákamunuima'i esu esena. Énaipa ena esenana, waipa nákamunuima'i ema ajaira,

³⁶taicha waipa tiápechawaima'i tépenana. Nakutinapa ena ángeleana, yátupinapa machichanaveanainapa ema Viya, taicha ema tikaechepukawaka'i.

³⁷Émaichu'i maka'e'i ema Moisés, timetaka'avi eta májure'i eta yátupira'i eta wa'i tánasi tépena eta náchanewana ena náepenakeneana. Ánaki maka'epa ema Viya, eta émaichu'i ema makasiñakene'i ema Abraham, ema Isaac, émapa ema Jacobo.

³⁸¡Ema Viya, ema técha'i eta náitaresirana ena té'ikana'i, tayanapane eta naépena'ini!

³⁹Taka'e, ena escriwánuana, ena natiari'ikeneana'i náichapa: — Tétupikawa eta juka péchejiriruwa, tata maestro.

⁴⁰Tási'a wáipa napatsikawa'ini nápecha'ini nayasereka'ini.

⁴¹Ema Jesús mayaserekawakapa: — ¿Tajapuka takayema eta naka'e'i, ema Cristo, mámariekene'i ema rey David?

⁴²Émaichu'i ema David taka'e'i eta majure te libro Salmo, taka'e'i: ‘Ema Tata Viákenu máichapa ema Tata Nákenu: Yare péjaka te nuwaure,

⁴³eta pikuchapi'ayare eta nukaepuyusiraya te pimira'u ena tikatianakaviana'i nunakayare te tapeku te piwape.’

⁴⁴Ema David, eta máimijarechira'i ema Cristo Tata Nákenu, ¿tája'apuka takayema eta machichaira'i?

⁴⁵Namutu ena achaneana nasamararaka'i ema Jesús eta máechejisirawaka'i ena máimitureana:

⁴⁶“Échapawayare naye'e ena escriwánuana, taicha tétavikawa'i náurisira'i tiúmaji'ana, nawaraira'i tikapika'uanayare'i eta náechejisiraya te plaza. Takutikene tinerejiurukawana eta táurinakeneana téjasi'akareana, eta te peti naúrujisirarewana ena juriyuana. Étaipa te nanisirana, tikaejakawanaware te távi'ana'i eta tiúrinisipanana tinikakareana,

⁴⁷tási'a takutikene naverejikaware eta napenana ena tépenaimana. Tási'a tiúpiemanawa eta nayujarasira. Énasera tiápajukawanaya eta nakaikuñairaya.”