Read Ignaciano Lucas 23 Bible Online

Lucas 23 - Ignaciano bible

Lucas 23

¹Namutupa téchepumuri'anapa, tási'a námapa ema Jesús te mamira'u ema Pilato.

²Te mamira'u náepiyaekene'apa, naka'emuripa: — Viámapa'i ema maka achane te pimira'u. Mawara'a'i ma'apapirikawakayare'i ena vichanerana. Éneichuware maka'e'i wá'iji táurika'ini viwachacha'ini eta viyase'ana maye'e ema emperador. Éneichuware maka'e'i, eta émaira'iji ema Cristo, ema rey-yare'í.

³Ema Pilato mayaserekapa: — ¿Jé'esareji Rey-vi'i píti naye'e ena juriyuana? — Pitupiruwa'i eta piyaseresiranu'i, — Majikapapa ema Jesús.

⁴Taka'e, ema Pilato máichapa ena tachutiri'ana naye'e ena tiyujarakara'iana, tási'a énapa ena achaneana: — Tájina níma'a'ini maviurewaina'ini, ema maka achane.

⁵Énasera nayurukapa muraka: — Ema maka ichape eta ma'apapisira'i eta napanereruana ena achaneana tikawasana'i te Galilea, étapa ani te Judea.

⁶Eta masamira'i, ema Pilato makayasesererupa te éta'ipuka te Galilea makawasa'i.

⁷Te nametakapa eta étaira'i makawasa ema Jesús, makawanairipipa nama maye'e ema Aluresi, taicha ema Aluresi matiari'i te Jerusalén

⁸Taka'e, tiúrisamureine'i ema Aluresi, eta máimaira'i ema Jesús. Ichapemuri'i eta mawaraira'i máimati, taicha masamairika'i tamutu eta tiáramikareana máichakeneanapa'i.

⁹Ichapemuri'i eta mayaseseresira'i. Émasera ema Jesús, wa'i majikapa'ini.

¹⁰Éneichuware natiari'i'iware ena tachutiri'ana ena tiyujarakara'iana, énapa ena escriwánuana, ichape eta nakamesaira'i eta nametauchira'i.

¹¹Taka'e ema Aluresi, tási'a énapa ena suntarurana, ichapeine'i eta náepuruira'i, tási'a namuriachapa eta muriare tijanunumeka makuti'ipa'i eta mamuriachirawa'i ema rey, táikutiara'i eta nakaeka'ira'i ema. Taka'e, ema Aluresi náimichawapa te mamira'u ema Pilato.

¹²Ema Herodes émapa ema Pilato tikatianakakanaini'i eta náitaresira'i. Étasera te jena sachekene'i tichawapa eta náemunasirakaka'i.

¹³Ema Pilato, makurujimuri'apa ena tachutiri'ana naye'e ena tiyujarakara'iana, énapa ena tuparairukana taye'e eta awasare,

¹⁴Tási'a, máichawakapa: — Eta iámira'i ema maka achane, ímijacha'i ma'apapikawaka'i ena achaneana. Nútisera níma'a'i tájina maviurewaina, eta nuyaseseresira'i te emira'u eta ímijachakene'i eta máejekapirawana'i.

¹⁵Émaipa ema Aluresi máimichavina'avi'i, taicha tájinaware máima'a'ini eta máejekapirawaina'ini. Etaina'ipukaini taviucha'ini eta táimikapaka'ini.

¹⁶Nímiwanereka makaemechara'i, tási'a nukaitikapa.

¹⁷Eta maye'erepi ema Pilato te Páscuamu'uana, makaitikayare'i ema émana makaeratakene.

¹⁸Énasera namutupa tipiararekanapa: — ¡Wa'i wáwara'a máuchuku'a ema Jesús! ¡Émaina máuchuku'a ema Barrabás!

¹⁹Ema Barrabás mávi'a'i te nakaératairare, táimikuñaru'i eta máichira'i eta revolución étapa eta makapa'iwa'i.

²⁰Ema Pilato mawara'aichucha makaitikayare'i ema Jesús, mayaseremuri'awarepa,

²¹Énasera murakapanapaichucha eta napiarasira'i: — ¡Pémetatareka te crusu! ¡Pémetatareka te crusu!

²²Mapa'ekenepa eta mayaseresirawaka'i ema Pilato máichawakapa: — ¿Tája'asika eta maviurewa'i? Nuti tájina wa'i níchimawa eta maviurewaina'ini eta táimikapaka'ini. Tiúrisera, nímiwanerekayare eta makaemechara'i, tási'a, nukaitikapa.

²³Énasera tipiararekanapa, nayaseasiraina eta makaetatairaya te crusu.

²⁴Jé'esareine'i, ema Pilato masuapawakapa eta nayasearapi'i ena tuparairukana,

²⁵emapa makaitika'i ema Barrabás, ema nayasesereru'i táimikuñaru'i eta máichira'i eta revolución étapa eta makapa'iwa'i, makawanairipipa táitauchawa eta nawara'akene'i ena.

²⁶Te námapa ema Jesús te makaetataiyayare'i, napámikapa ema achane tikaijare Simón, tikawasa'i te Cirene, ema, mási'apa'i te máesane, napámikapa ema manaraku'a eta macrusura, tási'a máe'ikapaipa'i te máekene ema Jesús.

²⁷Ichapemuriana ena achaneana té'ikanapa'i. Enaipa ena esenana, tipiararekanapaipa eta náiyairapa'i, taicha eta nakatisamurewa'i, náimararasira'i eta máejapanurawapa'i ema.

²⁸Emasera ema Jesús máesenimuri'apa, máichawakapa: — Wa'i ekuiyauchanu eti esenana tachichanaveana'i eta Jerusalén. Étina íyauchawa, enapa ena echichanaveana.

²⁹Taicha tatiari'iyare eta sachewayare naka'enapa: ‘Tétavikawapa nauriwa ena esenana macheruana. Nájina náimipanerereka'ini, nakajuruka'ini, náenika'ini.’

³⁰Tási'a ena achaneana tijunanainapa te simena, tási'a naka'énapa: ‘¡Takipaikawapaini eta juka yukuki te vina'u!’ ‘¡Étapukaini juka simena viyumurusiawa'ini!’

³¹Apanasika nuti ichapemuri eta nukatajiwaira'i, tájina'ineni taviuchanu'ini. Navetijiyarecha eta nátajiwayare, ena tichana'i eta tamaurikene.

³²Éneichuware natiari'iware ena apinana tiámera'iana makutikeneanayare'i ema Jesús eta makaetatairayare.

³³Te titekapanapa taye'e eta tikaijare tavirare eta Náperana ena Naépenakeneana, tikáetatapa ema Jesús, énapa ena apinana tiámera'iana, ema émana te mawaure, ema apana te sapane.

³⁴Ema Jesús maka'epa: “Tata, pajapanuwaka ena nani, taicha wa'i nákaikutiara'ini eta juka náichiranu'i.” Tási'a ena suntaruana nasuerte'achapa eta mamuiri'aini ema Jesús, eta náijarajirisirakaka'i.

³⁵Natiari'i'i ena achaneana tímararakana'i tamutu. Énaipa ena tuparairukana nakaeka'ijirikaipa ema, naka'eipa'i: — Ema máka, marata'a'i makuchuku'awaka ena apamuriana achaneana, tási'a puiti, émajiwaina makuchuku'awa, te yátupi'ipuka émaira'i ema Cristo, ema manerejiru'i ema Viya.

³⁶Éneichuware ena suntaruana nakaeka'ijirika'iware ema Jesús. Nawara'apa náesichayare'i eta tisisika vino.

³⁷Náichapa: — ¡Te yátupinapuka piti'i rey-vi'i naye'e ena israelita, pítijiwaina pikatiuchawa!

³⁸Tási'a tatiari'i'i eta ajureka te machutichakaya. Ani taka'e'i: “Ema maka, ema Rey naye'e ena juriyuana.”

³⁹Ema émana, ema tiámera'i makaetatakene'i te machakaya, éneichuware ema makaeka'i'i: — ¡Te yátupi'ipuka pítikene'i ema Cristo, pikuchuku'awa pítijiwaina. Tási'a, pikuchuku'aviware viti apanaware!

⁴⁰Émasera ema apana maka'epa: — Wá'ipuka pipika'ini píti ema Viya. Wá'ipuka pécha'i étaichu'i viáwaku'a víti eta juka víkuña'i.

⁴¹Víti, viwachacha'i eta juka vitapirawa'i, taicha ichapekene'i eta véjekapirawana'i. Émasera ema maka achane, tikatajiwa'i tájina'ineni taviucha'ini.

⁴²Taka'e, máichapa: — Jesús, péchanupaini te péjakapa te piáwakureya.

⁴³Ema Jesús májikapapa: — Numetakaviwane, puiti píti nukachaneviyare te paraíso.

⁴⁴Taka'e, te tupiriku'apa, téma'apa eta sache, timapikupa tamutu eta apake'e.

⁴⁵Waipa takaechera'ini eta sache, tíja'uchawapa tétsayumeka'i eta cortina taye'e eta templo. Tikutimekaka eta taetsayumesira'i.

⁴⁶Ema Jesús tipiararekapa muraka, tási'a maka'epa: — Tata, pijakapa eta náchanewa. Te títapirikapa, tépenapa.

⁴⁷Taka'e, ema kapita romano. Te maima'apa eta taichararakawa'i makunachapa ema Viya, maka'epa: — Yátupikeneichuyapa, ema maka achane matapiraware'i.

⁴⁸Namutu ena achaneana natiari'ikeneana'i, eta náimaira'i eta júkana, ichapeine'i eta nakatisamuréwaira'i, té'atupachawanapaipa'i.

⁴⁹Namutu ena timatiana'i ema Jesús, nayerere'i'i eta naimararasira'i. Éneichuware ena esenana, ena té'ikanapa'i te nasi'ainapa te Galilea.

⁵⁰Matiari'iware ema achane tikaijare José. Tikawasa'i te Arimatea te Judea, tipikaura'i'i ema. Tétavikawa'iware eta máuriwa.

⁵¹Masuapa'i ema Jesús, eta émaira'i ema mawaneru'i ema Viya akenuka te anuma, étaipa eta émaira'i téchayare'i namutu ena achaneana,

⁵²ema José, tiyanapa maye'e ema Pilato, mayaseapana'i eta máke'e ema Jesús, mawaraira'i máekarayare.

⁵³Makukupaikapa eta máke'e taye'e eta crusu, máyuruakapa te sáwana tijapu, náiyaraku'apa taye'e eta máekari eta te mari nasekajueru'i. Nájinaicha'a nakaekarasi'ini taye'e.

⁵⁴Titatajianapa taicha wa'i táisapakare'ini náekarareka'ini te yati, wá'iware te tijara'iakaima'i, taicha sawarumu'uyarepa.

⁵⁵Ena esenana té'ikanapa'i ema Jesús te mási'ainapa te Galilea, tiyananapa taye'e eta máekari.

⁵⁶Te tichawanapa te napena. Natsekapa eta perfume mayaji'ayare'i. Ena esenana napikaucha'i eta wanairip'i,