Read Ignaciano Lucas 24 Bible Online

Lucas 24 - Ignaciano bible

Lucas 24

¹te apanapa sache, te tijarara'ichichapa eta lumínkukene'i, tiyananapa ena esenana taye'e eta máekari. Námapaipa eta perfumeana náikurewana'i.

²Te títekapanapa, náima'apa eta mari tájinaipa'i te tapajakura eta máekari,

³tási'a tisiapanapa, wá'isera naima'a'ini eta make'e ema Viákenu Jesús.

⁴Wa'i náimatiekene'a'ini tája'a'ipuka eta máichararakawa'i. Tási'a, náima'apa ena apinana ajairana titupi'ana'i te nachakaya ena. Tijanunukawaka'i eta namuiri'ana.

⁵Tétavikawaine'i eta napisira'i tétipaimuri'anapa. Énasera ena ajairana náichapa: — ¿Taja'a takayema eti, etanuka'i naye'e ena naepenakeneana, ema achanekene'i?

⁶Májinaipa'i ani, téchepukaipa'i te máekari. Échawaichu'i eta makayemakeneana'i te manasikeneicha'a te Galilea:

⁷ema Machicha ema Ajaira naijararekayare'i, naye'e ena tisipekaturara'iana, naemetatarekayare te crusu. Tási'a te mapanakenénapa sache téchepukayare te maekari.

⁸Taka'e ena, enurujine'i náechawane eta máechejiriruwana'i ema Jesús,

⁹tási'a te tichawanapa te máekari, nametakapa tamutu eta juka ena once-keneana apústuleana, tási'a énapa ena apamuriana.

¹⁰Ena tiamana'i eta techakareana, naye'e ena apústuleana éna'i, esu María Magdalena, esu Juana, ésupa esu apanaware María, máena'i ema Santiago, tási'a énapa ena apamuriana esenana.

¹¹Énasera ena apústuleana wa'i nasuapa'ini, náimijachaichucha náepiya'iraiwa'i namaurishiwa'i.

¹²Taka'e ema Pedro tiyanapa tijunapapaipa'i te máekari, te títekapapa máima'apa takarine'i eta sáwanana. Taka'e mapanerekene'aine'i eta juka táichararakawa'i.

¹³Étaichu jena sachekene'i, tipaikanapa'i te achene ena apinana máimitureana ema Jesús. Nási'a'i ena te Jerusalén, nakaiju'eyare'i eta awasarechicha Emaús. Unse kilometro eta tayere'iwa'i.

¹⁴Eta napaisirapa'i nakasamurepaipa'i eta nasamairiru'i. Téchejirikawanapaipa.

¹⁵Eta náechejisi'airapa'i eta juka táichararakawana'i, tiáramikarepa makapayamuri'apa ema Jesús, makachanewakapaipa eta napaisirapa'i.

¹⁶Énasera wa'i náimati'ini, taicha ema wa'i máisapa'ini náimati.

¹⁷Ema Jesús mayaserekawakapa: — ¿Tája'asika eta échejisi'apa'i eta epaisirapa'i? Tichepaikanapa, tíkatisamurewanaine'i,

¹⁸ema émana tikaijare'i Cleofás majikapapa: — ¿Pikarichu'ipuka piti wa'i pécha'ini eta juka, eta piavi'aira'i eta táichararakawa'i te Jerusalén, puiti juka sácheana'i?

¹⁹Ema mayaserekawarepa: — ¿Tája'asika eta téchakare'i? Ena náichapa: — Émara véchejisi'apa'i eta máichawakenewa'i ema Jesús Nazareno, ema profeta máurikeneni'i naye'e ena achaneana. Tamutuini'i tiuri eta máimiturapiana, tétavikawa'iware eta máitupaijiasirawa'i, taicha ema Viya, ema tíjaraka'i tamutu,

²⁰Énasera ena tuparairukana te viáwasa, ena tíjararekana'i naye'e ena apawasana taicha nawara'a'i náimikapaka. Taka'e náetatakapa te crusu.

²¹Víti ichapemuri eta vikasiñawairaini'i eta maye'e, vikuchapawaini'i eta makatiuchira'aviyare'i vimutu viti israelítana. Tamapurujipasera puiti, taicha tépenapa ema. Puiti mapanaipa sache eta táetavisirawa'i eta juka.

²²Íchakenesera te yátikara'ichichapa, tikarameka'avianapa ena esenana vichamuriana'i eta nayatiruira'i, tiyanana'i taye'e eta máekari,

²³waipa nachimapa'ini eta máke'e, tichawanapa timetaka'avianaipa eta náimaira'i ena ángeleana. Nametakawakapaji eta machaviraipa'i títareka ema Jesús.

²⁴Tási'a, tiyanawaneanapa ena apamuriana vichamuriana, te ekari, jé'esareine'i, étaichu'i eta nakayemakeneanapa'i ena esenana. Wa'isera naima'a'ini ema Jesús.

²⁵Taka'e ema Jesús máichawakapa: — ¡Tétavikawapa tájinaira ekaikutiarakenena eti. Wá'iware ákaikutiara'ini eta náechejiriruwana'i ena profetanaini!

²⁶Taka'eyare'i eta makatajiwairayare'i ema Cristo. ¿Wá'iwarepuka ákaikutiara'ini eta taka'eyare'i eta mápanirayare'i ema te máwasa anuma?

²⁷Tási'a, mametakawakapa tamutu eta táechejiriruwana'i eta Takapika'ukene Ajureka, eta táechejisi'aira'i ema. Tépanawapa te májureana'i ema víyara'aini Moisés, étapa eta nájureana'i ena apamuriana profetanaini.

²⁸Títekapananecha taye'e eta awasarechicha nakaiju'ekenepa'i. Mawara'apa ema Jesús majunijikawakayare'ini.

²⁹Énasera nakamesapa, máe'ikawaka'ini te napena, náichapa: — Páka'eine eta ani viye'e, taicha yátinapa eta jena. Tási'a, ema Jesús manasipa eta naye'e.

³⁰Te tiúripa eta tinikakare, mave'apa eta pan, ma'asulupayachapa ema Viya, mayuvetumekapa, máijarakawakapa.

³¹Énewaneine'i náimatiwanepa ena maimitureana. Émasera tíja'uchawapa témitiaka'i te namira'u.

³²Tésenijirikakanapa énajikaka: — ¿Tája'a takayema eta wa'i vímatiwane'ini ichakene te achene? Véjapusamurechapaipa'ineni eta visamirawa'i eta máimitusira'avipa'i taye'e eta Ajureka Takapika'ukene.

³³Enewanepa tichawana te Jerusalén. Te títekapanapa, tisiapanapa taye'e eta návi'a'i ena once-keneana apústuleana, énapa ena apamuriana nachamuriana.

³⁴Tikametakasianaipaware, naka'ewarepa: — Yátupi eta máechepusiraipa ema Jesús. Máima'aipa ema Simón.

³⁵Taka'e ena apinana namétakawarepa eta naichawakenewa'i te achene. Wá'isera vímatiwane'ini. Tapaenumawa te mayuvetukapa eta pan, vímatipa.

³⁶Téchejirikawanaicha'a ena, tíja'uchawapa tímerekawa'i ema Jesús te namuri, máechejikawakapa, ánipa maka'e'i: — Ícharakawa, nuchichanaveana.

³⁷Énasera íchapa eta naramesira, náimijachaichucha kunare'i ema.

³⁸Émasera ema Jesús máichawakapa: — ¿Taja'a takayema íarameka'i? ¿Taja'a takayema wa'i esuapanuwane?

³⁹Íma'a eta juka nuwa'uana, étapa eta níwapeana. Émama'akanu apaesa echa eta nútikenera'i: Eta kunare, tájina táechena, tájinaware táperaina. Wa'i tákuti'ini eta nukake'era'i nuti.

⁴⁰Eta máichirawaka'i eta juka, maimechapa eta mawa'uana, étapa eta máiwapeana.

⁴¹Wícha'asera nasuapa'ini ena, tiúrisamureanaipa'ineni eta náimaira'i, takachane'isera eta napisira'i. Eta taka'e, ema Jesús mayaserekawarepa: — ¿Jarari'ipuka nikakare ani?

⁴²Ena náijarakapa eta nájimaru jima, étasipa wasu eta mápama.

⁴³Majakapawakapa ema, tinikapa te namira'u ena.

⁴⁴Tási'a, maichawakapa: — Eta juka níchawakenewa'i, étara eta numetaru'e'i kape juka nukachanera'éicha'a. Eta taka'eyare'i eta táitauchirawayare'i eta májuchakeneana'i ema víyara'aini Moisés nuti táechejisi'akene'i. Étapa eta nájuchakeneana'iware ena profetanaini, étapa eta Salmo.

⁴⁵Máemechawakaipa'i eta nakaikutiarairayare'i eta táechejiriruwana eta Takapika'ukene Ajureka,

⁴⁶Tási'a, máichawakapa: — Étara eta juka takajukene'i, eta maepenirayare'i ema Cristo. Tási'a téchepukayare'i te maékari te mapanakenenapa sache,

⁴⁷tási'a etayareichu'i námapikayare eta maíjare eta naímitusirayare ena achaneana tikawasana'i te tamutu eta awasareana. Étaipa te juka Jerusalén, emétakawakayare eta náeñauchirawaina me Viya, apaesa makaepa'a eta napekaturana,

⁴⁸eti, nutupararu'eya eta ímituresiraya eta júkana.

⁴⁹Tási'a nuti nuwanekayare eye'e eti eta maikure'e'i ema Nukaiyakene. Étisera enasiyare eta ani, ánaki te awasare Jerusalén, tiamainukawa te ejachapapa eta maitupajijiasirawa ema tiasi'aya te anuma.

⁵⁰Ema Jesús mámamuri'apa te tachachaku eta awasare Jerusalén, te tachakaya'i eta awasarechicha Betania. Makanukechapa eta mawa'uana, mayujarauchawakapa ena.

⁵¹Tási'a te títapirikapa eta mayujarauchirawaka'i, terajikawapa naye'e ena, tási'a tiyanapa te anuma.

⁵²Eta náimaira'i ena eta makanukechirawapaipa'i, tépuyumuri'anapa eta nanekapararesira'i eta mayanira'i. Tási'a tichawanapa taye'e eta Jerusalén, tiúrisamureanapaipa.

⁵³Wa'i náejiakawa'ini taye'e eta templo, tiyujarauchawanaparaka'i, najiraucha'i eta nakunachira'i ema Viya.