Read Ignaciano Lucas 4 Bible Online

Lucas 4 - Ignaciano bible

Lucas 4

¹Ema Jesús, máwa'akaipa ema Machanewa Viya. Tási'a, ema Machanewa Viya máwasamurechira'i, máimitukaipa'i eta mayanirayare'i te máwapa'i wama'i. Majunijikayare'i eta kajakure Jordán.

²Tíjimapa ema Jesús, cuarenta sache, kuarentaware yati, eta mayerewa'i ema Wínaraji mawara'apa makaitsamaraji, masamapa eta máekuawa'i.

³Emasera, ema wínaraji ánipa máicha ema Jesús: — Te yátupinapuka machichavi ema Viya, piwaneka eta juka máriana táepiyakawa eta pan.

⁴Emasera ema Jesús majikapapa: — Eta Takapika'ukene Ajureka ani taka'e: ‘Wa'i tákarichuima'i eta tinikakare takaitarekayare ena achaneana.’

⁵Taka'e, ema wínaraji makaechepukapa tási'a, maimechawarepa tamutu eta ichapekeneana awasareana te juka apake'e,

⁶máichawarepa: — Nuti níjarakaviyare tamutu eta juka awasareana. Pítina nákenuvina ena táwakuana'i eta awasareana, taicha nuti néchawaka'i ena. Nútiware nécha mákani nuwara'akeneyare níjaraka.

⁷Nuti níjarakaviyare tamutu eta juka, pépuyumirauchanusera te numira'u pitsiukanu.

⁸Ema Jesús májikapapa: — Eta Ajureka taka'e'i: ‘Makarichu ema Viya vépuyumirauchaya, makarichuware vikaemataneakayare.’

⁹Taka'e ema Wínaraji mámawarepa ánaki te takapika'ukene awasare Jerusalén, máimiapanapa te táina'u eta templo, tási'a, máichawarepa: — Te yátupina machichavina ema Viya, pémirika te juka anuke'e,

¹⁰Péchaichu'i eta táechejiriruwa eta Ajureka, ani taka'e'i: ‘Ema Viya mawanekayare ena maye'eana ángeleana téchapajirikavianayare tási'a tikaratakavianaya.

¹¹Taicha ena tikaratakavianaya te nawa'uana, apaesa wa'i pikukayutetu te máriana eta te pipaisirayare.’

¹²Ema Jesús májikapawarepa: — Éneichuware taka'e'i eta Takapika'ukene Ajureka: ‘Wa'i pikaitsamarajima'i ema Tata Viya, taicha Piákenu'i ema.’

¹³Taka'e ema Wínaraji majunijikapa ema Jesús taicha tíma'awaipa'i wa'i máituruka'ini makaetema, tási'a tiyanapa tikamitiakawa'i.

¹⁴Taka'e, tépanawapa ema Jesús tipaika te awasareana taye'e eta provincia Galilea. Ichape eta máitupajijiasirawa'i taicha máwa'akapa'i ema Machanewa Viya.

¹⁵Tímiturekapaipa te peti náurujisirarewa ena juriyuana awasareana. Ichapemuri eta nakunachira'i namutu ena tisamararakanapa'i.

¹⁶Ema Jesús tiyanapa te Nazaret, te jena awasare majurusine'i. Jena sache sáwarumu'u, tisiapapa te peti náurujisirarewa ena juriyuana, taicha taka'e'i eta maye'erepi'i, tási'a titupi'apa ema, eta maéchejiku'ayare'i eta Ajureka.

¹⁷Náijarakapa eta libro májure'i ema profetaini Isaías, mavejiakapa eta libro maetupiakapa eta tavi'a'i eta takajukene:

¹⁸“Tiáwa'akanu'i ema Machanewa Viya, Taicha manerejirunuichu'i, namayare eta arairu maechejiriruwa naye'e ena páureana, eta tímitekanu'i, nukaititijikayarewa ena káeratana'i nukaimairirikayarewa ena púchukiana, nukuchuku'ayarewa ena tikatajiwana'i,

¹⁹eta nukametarairu eta juka sacheanayare, tamutuiraya máetupirika ema Viya.”

²⁰Te tamutupa eta máechejikuresira'i ema Jesús, máeratakapa eta libro. Máimichawapa maye'e ema tijanearekara'i, téjakawarepa ema Jesús. Náimararakaipa ena achaneana natiari'ikeneana'i.

²¹Ema tépanawapa téchejika, maka'epa: — Puiti titauchawapa eta taechejiriruwa'i eta Ajureka nímameru'i, eta esamakene'i.

²²Namutu'i tiuri'i eta naechejisira'i maye'e ema Jesús, tási'a nárami'i eta maichakeneana'i. Taka'e naka'epa: — ¿Wa'i émaina ema maka, ema machicha ema José?

²³Ema Jesús majikapawakapa: — Ewara'ainapapuka íchanuyare: ‘Te yátupina píturuekene'a, pípuchawaka ena tikajumana'i te juka.’ Taka'e naichainapa: ‘Víma'aseji piápechawaware pikuchuka te juka piáwasaichu, takuti eta pímereru'i te awasare Cafarnaúm.’

²⁴Tási'a tímiyanawapa maka'e'i: — Nutupiruwa numetaka'e, nájina emanaina profeta majachapakare'ini te mawasa.

²⁵Akane, te matiari'icha'a ema profetaini Elías, mapana añu y medio wa'i takiwa'ini, tási'a, ichapeware eta eku'a. Kamuriana'iware ena tépenaimana israelítana;

²⁶wá'isera mawaneka'ini ema Viya, ema Elías te naye'e ena majaneanana'i. Ánaki te awasare Sarepta, tachakaya'i eta awasare Sidón, máitekapi'ayare suye'e esu esuna'i esena apawasana tépenaima'i.

²⁷Énaipa ena israelítana nakajumakeneana, karachacha'ana'i, te jena sácheana'i te matiari'icha'a ema profetaini Eliseo. Wá'iware énaina'ini makanaraka'ini. Masapi'apa makanaraka'i ema apawasanakene'i tikaijare Naamán, tikawasa'i te Siria.

²⁸Eta juka máichirawaka'i ema Jesús, tisemanapa ena natiari'ikeneana'i, te naurujisirarewana.

²⁹Téchepumuri'anapa ena, nakuchukapa ema Jesús, namapa nakaimiapanapa te tapusi eta anuke'ekene mari, nawara'apa nakamirikayare'i ema.

³⁰Émasera mánukumuri'apa ena, majunijikawakapa.

³¹Ema Jesús tiyanapa te Cafarnaúm, eta awasare taye'e eta Galilea, tási'a tamutu sáwarumu'u máimituka'i ena achaneana.

³²Tási'a ena achaneana naramine'i eta máimiturapiana'i, tétavikawa'i eta máitusira'i taicha mayunapaika'i tamutu.

³³Te peti náurujisirarewa ena juriyuana, matiari'i'i ema achane, máwa'aru'i ema machanewa ema éreana, tipiarareka'i muraka:

³⁴— ¡Pésamirika'avi! ¿Taja'a takayema pimisiaparakawa eta viye'e piti Jesús Nazareno? Piti piteka'i pijarareka'aviya, nuti nimativi, piti Machichavi ema Viya Sántukenevi'i.

³⁵Ema Jesús makajachapa ema éreana, máichapa: — ¡Pámatina pijunijiaka ema maka achane! Taka'e, tíja'uchawapa tiákipaikawa'i te apake'e ema achane. Tási'a majunijiakapa ema, tájinasera máichawa'ini ema achane.

³⁶Tiáramekanaine'i namutu, tási'a naka'emuripa: — ¿Tája'asika takayema eta juka echéjirirukawana? Tétavikawa'i eta máitupajijiasirawa'i ema maka achane, marata'a'i mákijika eta machanewa ema éreana ¡Maichawaka'i iuchuka, ena tiuchukana'i!

³⁷Tási'a naechejisi'apa tamutu eta máichakeneana'i ema Jesús. Énaipa ena tikawasana'i te tinapaika te Galilea.

³⁸Ema Jesús tiúchukapa te peti náurujisirarewa ena juriyuana, tiyanapa te mapena ema Simón. Esu máimase ema Simón, tikajuma'i esu eta muraka fiebre. Náechejiakapa ema Jesús.

³⁹Ema Jesús maetipauchapa eta suye'e esu, tási'a makijikapa eta muraka fiebre, enewanepa táetaviaka'i eta fiebre, tási'a tepanawapa suéchapajirikawakapa.

⁴⁰Te terikayarepa eta sache, namutu ena tiamanapa'i ena nakajumakeneana'i. Apánapaneneji'i eta najumanapa'i namapa eta maye'e ema Jesús, manakapaipa eta mawa'u te náina'uana, makanarakapaipa'i.

⁴¹Maverana'i ena éreanana mákijiruanapa'i te náke'eana ena nakajumakeneana, tipiararekanapaipa eta náuchusirapa'i: — ¡Pítira Machichavi ema Viya! Émasera ema Jesús waipa máisapa'ini náimiyanawa'ini naechejika'ini ena, taicha náimati'i ena, eta émaira'i ema Cristo.

⁴²Te tijara'iyarepa, tiuchukapa ema Jesús taye'e eta awasare. Énasera ena achaneana natanukapa, tási'a nakapayakapa te mavi'a'i. Nawara'ainipa náiminasichayare'ini, apaesa wa'i makuyana'ini,

⁴³émasera ema Jesús máichawakapa: — Éneichuware nukametarairuyare eta mawasa ema Viya akenuka te anuma, nuyaniraya te apanana awasareana, taicha eta nuwana'ichu'i.

⁴⁴Taka'e ema Jesús, tikametarairupaipa eta te petiana náurujisirarewa ena juriyuana, taye'e eta nawasarajiana'i ena juriyuana.