Read Ignaciano Lucas 6 Bible Online

Lucas 6 - Ignaciano bible

Lucas 6

¹Jena sache sáwarumu'u, ema Jesús mapairirimekapa eta isaniti, te tatarakukuji eta sukurekana. Ena máimitureana navepuri'apaipa étajawapa'i eta trigo, navepirakijikapaipa te nawa'uana, tási'a nanikapaipa'i eta taki.

²Taka'e, ena fariséuana nayaserekapa: — ¿Taja'a takayema eti, icha'i, puiti jena sache sáwarumu'u wa'i tísapakare?

³Ema Jesús majikapawakapa: — ¿Wa'i échejiku'a'ini eti eta máichakene'i ema David, eta mapaisirapa'i téku'apaipa, éneichuwa ena té'ikanapa'i?

⁴Tisiapapa te mapena ema Viya, mave'apa eta paneana takapika'ukene'i maye'e'i ema Viya, nanikapa eta, énapa ena makachanekeneanapa'i, eta juka pan nanikasare'i ena tiyujarakara'iana.

⁵Tási'a maka'ewarepa: — Ema Machicha ema Ajaira, maécha'i eta sache nanarasiraya ena achaneana.

⁶Apanawarepa sáwarumu'u, ema Jesús tisiapawarepa te peti náurujisirarewa ena juriyuana. Tási'a tepanawapa tímitureka'i. Matiari'i'i ema émana achane, tépenawa'u'i eta mawa'u wáure.

⁷Tási'a ena escriwánuana, énapa ena fariséuana, najiñañararaka'i ema Jesús, eta maipuchirayare'i ema achane te jena sache sáwarumu'u. Natanunuirika'i eta tiviuchayare'i.

⁸Émasera máimati'i eta napanereruana'i, máichapa ema achane tépenawa'u'i: — Péchepuka, tási'a pitúpi'ayare ani te namira'u. Ema achane téchepukapa, titupi'apa,

⁹tási'a ema jesús mayáserekapa ema apana: — ¿Taja'apuka táurika víchayare te sawarumu'u: víchayare eta táurinakene, étapuka víchayare eta tamaurikeneana? ¿Táurikapuka vipuchawaka ena achaneana? ¿Vikaparekapuka?

¹⁰Taka'e, máesenimuri'apa namutu ena tichayakana'i, tási'a maichapa ema achane: — Pikánukecha eta piwa'u. Ema achane masuapapa tási'a tinarakapa.

¹¹Énasera ena apamuriana ichapeine'i eta nasemira'i, tepanawanapa tiakapaemajirikakanapa eta naichararakayare'i ema Jesús.

¹²Jena sácheana'i, tiyanapa ema Jesús te tápusi eta mari tiyujarakayare'i, tamutu eta yati tiyujaraka'i me Viya.

¹³Te tijara'ipa, maichu'awakapa namutu ena máimitureana. Manerejikapa ena dósekeneana maye'eanayare'i apústule.

¹⁴Ena nani, ena manerejiruana'i: Ema Simón tikaijareware Pedro, émapa ema maparapeichu Andrés, ema Santiago, Juan, Felipe, Bartolomé,

¹⁵ema Mateo, ema Tomás, émapa Santiago, machicha ema Alfeo, émapa ema apanaware Simón, ema naimijarechakene'i, celote,

¹⁶ema Judas, machicha ema Santiago, émapa ema Júlasi Iscariote, ema tíjarareka'i ema Jesús.

¹⁷Ema Jesús tiukupaikapa te tapusi eta mari, te táinunapa'inepa, makachanepa'i ena máimitureana. Tiurujikawanaipa ena ichapemurikeneana achaneana, tiási'ana'i te tinapaika te Jerusalén, te Judea, te'epa tachakayara'ana'i eta Tiro étapa eta Sidón.

¹⁸Eta tímitekana'i ena, nawarai'ra'i nasama ema Jesús, nawara'a'iware makanarakawaka'ini eta najumana, tikatajiwana'i eta máwa'asira'i ema éreana, makanarakawakapasera.

¹⁹Taka'e namutu ena achaneana nawara'a'i náemama'aka ema Jesús, taicha náecha'i eta títupajijiakawa'i ema.

²⁰Ema Jesús máesenimuri'apa ena máimitureana, tási'a máichawakapa: “Tétavikawa eta iurikakarewaya eti paureana, taicha eye'e eta mawasa akenuka te anuma ema Viya.

²¹“Tétavikawa eta iurikakarewaya eti esama'i eta eku'a, taicha tíjaraka'eyare ema eta ewara'akene'i. “Tétavikawa eta iúrisamureakawayare puiti eti íyauchawana'i. Títekapainapasera eta ewapinawairaya.

²²“Tétavikawa eta iurikakarewaya eti, te tikatianaka'e ena achaneana, nawara'ainapa tiákijika'eana. Tipanararaka'eanainapa. Eta juka náichira'eyare'i, táichavene'i eta é'isiranu'i nuti Machichanu ema Ajaira.

²³Ewapinawa, ekurisamurechawachucha taicha eti ejachapayare eta ichapekene íjarakasiya tiasi'a te anuma. Ene naka'e'i eta nakatajiwaira'i ena profetanaini. Naichira'i ena iachukanaveanaini ena naka achaneana.

²⁴“Étisera ¡paure'esami eti rikuana, taicha eti tetavikawaipa eta iúrisamurewana!

²⁵“¡Páure'esami eti esatu'eana'i, taicha ichapenapa eta ékuawaya! “¡Páure'esami eti, ékarairikawa'i, taicha ichapeyare íyairaya, ekatisamurewainapa!

²⁶“¡Páure'esami eti namunaneana'i ena achaneana. Eta taka'e'i eta nakunachirawaka'i ena profetana tépiyakawana'i mawanarana'i ema Viya!

²⁷“Étisera eti, esamanuana'i numetaka'e: Émunakayare nákani tikatianaka'eana'i, eyaseuchare eta náuriwaina.

²⁸Eyaseaka ema Viya eta nayujara'uina nákani téchejikana'i eye'e.

²⁹Te natiari'ipuka nákani náe'a'epuka mákani achane te emira, íjarakachucha éneichuware eta apachakaya eta emira, tási'a te natiari'ipuka nákani naverejikavi eta pepaku'a, pisapaine mamaine, eneichuware eta pikámisa.

³⁰Mákanipa tája'apuka tiyaseakavi, píjarakaya, tási'a mákani tiverejikavi eta píma'akene, wa'i pikukamesa eta náimichaviraina.

³¹Epiyaka eti, eta ewara'akene, eta náuriraya ena apamuriana eta eye'e, tatuparaka'e iúriyare eti eta naye'e.

³²“Te nákarichu émunakawaka eti, ena témunaka'eana'i, tájina ekunachakarewaima'i eta me Viya. Apanasika ena tisipekaturara'iana náicha'ini eta juka.

³³Takutikene, tájinaware ekunachakarewaima'i te takarichu'i icha eta táurikeneana naye'e ena tiúriana'i eye'e. Apanasika títsirijikawana'i ena máimatira'ana'i ema Viya naicha'i eta juka.

³⁴Té'eware nakarichupuka íjaraka nákani títsirijikawana'i te tikapuka'eana, tájinaware takunachakarewaina eta me Viya. Apanasika ena máimatira'ana'i ema Viya tíjarakana ena títsirijikawana'i te tikapurekana.

³⁵Étisera émunakayare ena tikatianaka'eana'i, tási'a íchayarewa eta táurikeneana, tási'a íjarakaware eta nakamukeneana nákani tikapuka'eana. Wa'i ekukuchapa eta náitsirijirapiyare. Eta taka'e'i eta ímereuchirawa eta machicha'eira ema Tata Vikaiyakene. Taicha ema, tétavikawa'i eta máuriwa naye'e namutu, énaipa ena wínarajikeneana máechawara'ana'i.

³⁶Ejapanura'iyarewa, ekutiyare eta majapanuira'avi'i ema Tata Vikaiyakene.

³⁷“Wa'i ekunema'i eta náejekapirawana ena apamuriana, machu étaina táimikuñaka'e eti me Viya. Te máejekapawapuka mákani achane, wa'i ekuwara'a makaikuñawane, apaesa wa'i makuikuñaka'e eti ema Viya. Ejapanu ena téjekapawana eye'e, apaesa majapanu'e ema Viya.

³⁸Íjaraka ena apamuriana, ema Viya tijaraka'eyarewa eti, tímepanawainapa. Etaichu eta íkutiriki'i naye'e ena apamuriana, éneichuware ema Viya maimichawayare eta eye'e eti.”

³⁹Ema Jesús, ánipa taka'e'i eta máimikutichira'i: “¿Narata'apuka tichurukakana ena apinana púchukiana? ¿Wa'ipuka tiákipaikawanayare'i te pusu?

⁴⁰Nájina emanaina ena máimiture, nakutinasi'ini ema maye'e maestro: tapaenumawa te maitawapa eta makarawa'uira'i, makutinapa ema maye'e maestro.

⁴¹“¿Taja'a takayema pikune eta ánichichakeneana máejekapirawan'i ema piparape, tási'a piti wa'i pipanerecha eta táichapewa eta péjekapirawana?

⁴²Tasi'a piti wa'i pipanerecha eta táichapewa eta péjekapirawana, waipaine'i taurikaima'i paka'e nuvinavi eta pisureru te piuki'a, ¿taja'a takayema pipatsikawa'i picha ema pipareipiya? ¡Apimira!, tatiwanuma pive'a eta pisureru te piuki'a, tási'a pimairikainapa tiuri, tási'a pive'asarenapa eta masureru te mauki'a ema pipareapiya.

⁴³Takutikene tímatikare'iware eta tá'iana eta yukukiana, jarari'i eta tinikakareana. Jarari'iware eta wa'i tánikakare.

⁴⁴Éneichuware eta yukuki tímatikare'i eta táurinisiwa'i eta ta'i: wa'i virerekaima'i eta tá'i eta surupia'i te taenaki eta sitavere, tási'a wáipaine'iware taka'ima'i eta narasa'iana eta ijikaki.

⁴⁵Ema achane tiuri, tatupiruwa'i eta máechejisira, taicha tiúri'i eta masamure, tási'a mákanisera achane wínaraji, wa'i tiúrima'i eta máechejisira. Tíñema'ipiwaka'i eta máechejisira, taicha eta tawayucha'i eta tawínarajiwa eta masamure.

⁴⁶“¿Tája'a takayema eta eti échejikanu, ‘Tata, Tata’, eka'epa, tási'a wa'i esuapa'ini eta nuwanairipiana?

⁴⁷Numetaka'eyare, naja'apuka mákani makutiyare ema titekayare nuye'e tísamanuyare, tási'a maichayare eta nuwaneruyare eta nuwanairipiana'i:

⁴⁸nakutiyare'i mákani achane maítuka tikatupiareka eta peti, manakayare'i eta túmeana yukuki emurukiana. Tiúpenawaka'i máicha eta masukukeruana. Jé'esare te járajapapa eta muraka tékatikawa, tiámaki'a eta tikiwa, tisiamapa eta une, wáipasera takaeyayaka'ini eta peti, taicha tiuri'i eta máepiyasira'i.

⁴⁹Émasera tisamanu'i, tási'a wa'i naicha'ini eta nuwanairipiana'i. Ena nakuti'i ema achane máitukara'a tépiyareka peti. Wa'i manaka'ini eta túmeana yukuki, wá'iware táusiapira'ini máicha. Te járajapapa eta muraka tékatikawa, tisiamawarepa eta une, takajimuyakapa eta apake'e. Tíja'uchawapa tiákipaikawa eta peti témitiekenepa tamutu.”