Read Ignaciano Lucas 9 Bible Online

Lucas 9 - Ignaciano bible

Lucas 9

¹Ema Jesús maichu'apa ena dósekeneana maimitureana. Taka'e, máijarakawakapa eta náitupajijiasirawanayare narata'airayare nákijika ena éreanana, narata'airayarewa nakanaraka nákani nakajumakeneana'i.

²Tási'a, mawanekawakapa tikametarairuanayare eta mawasa ema Viya akenuka te anuma. Tikanararekanayarepa'iware nákani nakajumakeneana'i.

³Máichawakapa: — Tájina iámaima'i eta eyereruwa. Wá'iware ekuama eta eniruruku'a te sara'i étapa eta plata, wa'iware ekuama eta taitsiwaina eta emuiri'a, etapa eta eparupewa etapa eta eyupairiki.

⁴Te jákani peti ítekapi'aya, enasinumayare taye'e, tiámainukawa te táitekapa eta iúchusirayare te awasare, epaenumawaya ejunijika eta ítekapi'a'i.

⁵Te wá'ipuka nakujakapa'e te jákani awasare, wá'iware nakuwara'a nakusama'e, iúchukawaneyare. Étatapewachawanumayasera eta máteji te íwapeana, táikutiarayare eta máikuñasirawakayare ema Viya taicha eta namawaraira'i najakapa'e'ini.

⁶Taka'e tiuchukanapa, tiyananapa ena maimitureana. Tamutu napaika eta awasarechichana. Tikametarairuanapaipa'i eta máechejiriruwa ema Viya. Nakanarakapaipaware ena nakajumakeneana.

⁷Ema rey Aluresi masamairikapa tamutu eta tiáramikareana máichakeneana'i. Wáipasera máitukakare'ini, taicha ena apamuriana naka'e'i tichawa'i téchepuka te máekari,

⁸ena apamuriana naka'e'i, náimijacha'i téchepuka ema profetaini Elías, ena apamuriana naka'e'i, ena antivuanaini profetana, téchepukana'i te náekari.

⁹Émasera ema Aluresi maka'epa: — Nútijakaruwa'i nukawanairipi náechatinuka ema Juan. ¿Nája'apuka ema makara nusamairiruasaparaka'i máichira'i eta jukana? Eta taka'e ema Aluresi, mawara'a'i maimati ema Jesús.

¹⁰Te tichawanapa ena apústuleana, nametakapa ema Jesús eta náichakeneana'i. Taka'e ema mámamuri'apa te awasare tikaijare Betsaida.

¹¹Énasera ena achaneana te náechapa eta makaiju'e'i, nakapayapanapa, tási'a ema Jesús majakapawakapa, máechejisi'apa eta mawasa ema Viya akenuka te anuma, tási'a makanarakapa ena nakajumakeneana'i.

¹²Te kapere'iyarepa, nakachakayapa ema Jesús ena dósekeneana máimitureana, tási'a náichapa: — Piwanekawaka ena achaneana nayanapa natanuka eta nanika te awasarechichana vichakayara'ana, taicha ani tajina viviya'ini.

¹³Ema Jesús máichawakapa: — Íjaraka étina eta nanika. Ena nájikapawarepa: — Wa'i tarataima'i, sinkuine eta juka pan, tási'a apikipa eta jima, viyanapuka viwachareka eta tinikakare, apaesa nanika námutu ena achaneana,

¹⁴Ena achaneana, sinku milkeneana eta náichapemuriwa'i. Tási'a, ema Jesús máichawakapa ena máimitureana: — Ewaneka náeja'apaikawaka ena achaneana. Sinkuentawakainapa'i eta náiputsitsisirawaina.

¹⁵Enepasera taka'e'i naicha ena máimitureana, tikaejarekanapa namutu.

¹⁶Taka'e, ema Jesús mave'apa eta sinkukene pan étapa eta apiki jima, máesenikapa te anuma, ma'asulupayachapa ema Viya eta máenisirawakayare'i ena kamurikeneana achaneana, mayuvetu'epa, máijarakapa ena máimitureana, ena náijarakapaipa ena achaneana.

¹⁷Namutupa tinikana, tisatu'eanapa, dóse'ikene eta saye eta tainikacha eta náemacharajiana'i.

¹⁸Jena sache ema Jesús, tási'a énapa ena máimitureana, tiyananapa taye'e eta nayujarasi'ayare'i. Te títawanapa mayaserekawakapa: — ¿Tája'a nakayema ena achaneana. Nája'apuka tímijachanuana'i nuti?

¹⁹Ena najikapapa: — Ena apamuriana náimijachavi'i ema Juan Tíkachasirikara'i. Ena apamuriana tímijachaviana'i ema Elías. Ena apamuriana tímijachaviana'iware ema mákani antivuini profetaini, téchepuka'i.

²⁰Tasi'a eti, ¿nája'a ímijachanu'i nuti? — Mayaserekawakapa. Tási'a ema Pedro majikapapa: — Pítira yátupikenevi'i Cristo.

²¹Émasera ema Jesús, matuparakawapa nakuija nakumetaka eta émaira'i ema Cristo.

²²Taka'e, máichawarepa: — Ema machicha ema achane, matupara'aichu'i ichapemuri eta makatajiwairayare, náepuruyare'i ena naiyakarana, enapa ena tachutiri'ana naye'e ena tiyujarakara'iana enapa escriwánuana. Nakapakayare'i, mapanayaichu'isera sache eta maka'eyare'i eta maepenirayare'i, tási'a tichawayarepa téchepuka.

²³Tási'a máichawakapa namutu: — Nákani nawara'a náe'ikanu, takamunu náinajikawa tamutu eta ti'apapirikawaka'i, náijarakawa puiti jukana sacheana, eta táimikapasiraina eta náe'isiranu'i.

²⁴Taicha mákani téñama'i eta máitaresira, émajiwayare tikamitiekene'awaya. Émasera mákani tíjarakawa'i té'ikanu, tayanapane táimikapaka eta máe'isiranuyare, ema tiúchuku'aya.

²⁵Tájina taiturena mákani achane takaeñamararu eta maima'akeneana te juka apake'e, taicha émajiwayare tikamitiekene'awaya.

²⁶Énaipa nákani timitsiri'anuana'ipuka eta náe'isiranu'i, étapa eta nímiturapiana, eneichuware ema Machicha ema Ajaira titsiri'ayarewa. Te jena sácheyare, námainapaipa eta nujaraiwa, étapa eta majaraiwa ema Tata. Nukachanénapaipa ena Santuana ángeleana.

²⁷Nutupiruwa numetaka'e, eti etiari'ikeneana'i puiti, enerejikawayare, wa'i épenawanema'i, íma'anumaya eta mawasa ema Viya akenuka te anuma.

²⁸Táekenepa eta uchukene'i sache, ema Jesús tiápanapa te anuke'e mari. Tiyujarakayare'i. Mámapa ema Pedro, ema Santiago, émapa ema Juan.

²⁹Eta mayujarasira'i, títsiwachawapa eta máima'i. Apaima'ipa eta mamira étapa eta mamuiri'a, tétavikawapa eta tajapuwa'i tási'a eta tajararasira'i;

³⁰tási'a, tiáramikareanawarepa tímerekawana ena apinana ajairana, téchejirikawana'i maye'e ema Jesús. Ema'i ema Moisés, emapa, ema Elías.

³¹Tétavikawa'i tajararasira'i eta natupi'aiya'i. Náechejisi'aipa'i eta makatajiwairayare'i máepenirayare'i ema Jesús taye'e eta awasare Jerusalén.

³²Tawara'aipaichanéni tímaka ema Pedro énapa ena apinana machamuriana'i. Té'esera te náima'apa eta majaraiwa'i ema Jesús, énapa ena apinana ajairana tiúkupauchana'i.

³³Te máima'apa ema Pedro eta tiyananayarepa ena nani apinana, témeña'awapa. Tási'a, maichapa: — Maestro, ¡tétavikawa táurikakarewa eta viávi'aira'i eta ani! Te piwara'apuka, nepiyaka eta mapa'ina peti: étana pipenaina'ini píti, eta apana mapenaina ema Moisés, eta apana mapenaina ema Elías. Étasera wa'i mapanerecha'ini ema Pedro eta makayemayare'i.

³⁴Tási'a techejikaicha'a'i, tiáramikarepa eta úkaji táepakumuri'a'i ena, tamu'ichawakapa eta úkaji tási'a tipikanaine'i.

³⁵Taka'e nasamawarepa eta ma'u ema Viya, taye'e eta úkaji, ani maka'e'i: — “Ema maka, ema Nuchicha nunerejiru'i némunarukene'i: ema esamayare.”

³⁶Te nasamapa eta ma'u, ema Jesús náima'apa makarine'i. Énasera wa'i nametajirika'ini, naye'e ena apamuriana, eta náima'akene'i.

³⁷Te apanakenepa sache, tiúkupaikanawarepa taye'e eta anuke'ekene mari, natiari'ipaware ena kamurikeneana achaneana, tiyananapa nákapa'i ema Jesús.

³⁸Matiari'i ema émana achane te natarakumuri ena kamurikeneana achaneana. Tipiaraikapa muraka máichapa: — Tata maestro, pikatajikanupaini pípuchinanuini ema maka nuchicha. Émanarakawa'i te numira'u;

³⁹máwa'aru'i ema éreana. Makapiararereka'i, técharipaikawaware tikarisasajakaware. Ichapemuri eta makatajiwaira máicha. Wa'i máwara'a máinajiaka.

⁴⁰Néchejiakawakaipa'ineni ena pimitureana, wá'isera naituruka'ini nakuchuka'ini ema éreana.

⁴¹Ema Jesús majikapapa: — ¡Tétavikawa emasuapajiraiwa eti achaneana! ¡Kúverarekapa eta nukamichira'ena'ini! Piama ani ema pichicha.

⁴²Te témeña'awainipa ema amaperu, ema éreana mákipaikapa te apake'e. Émasera ema Jesús, makajachapa ema éreana, taka'e tinarakapa ema amaperu, tási'a máijarakapa ema maiya.

⁴³Náramirine'i ena achaneana taicha eta tamutuira'i marata'a ema Viya, máitupajijiasirawa'i. Nanasi'icha'a'i napanerekene'a'i ena achaneana eta juka náima'akene'i. Ema Jesús mápechaware mametakawaka ena máimitureana. Ánipa maka'e'i:

⁴⁴— Esama eta juka numetaru'eya, wa'i ekuemitisika: Nuti Machichanu ema achane, járajapainapa eta sácheyare tíjararekanuyare mákani achane naye'e ena tikatianakanuana'i.

⁴⁵Énasera wa'i nákaikutiara'ini eta makayemakeneana'i, taicha émaichu'i ema Viya tíjaraka'i eta wícha'a nákaikutiaraima'i, napikaichucha nayasereka'ini ema Jesús, tája'apuka takayema'i eta máichirawaka'i.

⁴⁶Te táekenepa eta juka, ena máimitureana tiakapaemajirikakanapa, eta nája'apuka ema tikapika'upanaya naye'e ena.

⁴⁷Émasera ema Jesús máimatiakawakapa eta napanereru'i, máichu'apa ema émana amaperuchicha, makatupi'apa te namira'u.

⁴⁸Tási'a, máichawakapa: — Nákani tijakapa'i ema amaperu te níjare, nuti'i tijakapanuana'i, taicha mákani tijakapanu'i nuti, éneichuyare taka'eya eta majakapira'eya ema tiwanekanu'i. Taka'e mákani techapajirika ena apamuriana ema kapika'upanayare.

⁴⁹Ema Juan máichapa: — Tata Maestro, víma'a'i ema achane mákijikawaka'i ena éreanana te píjare takuti'ine'i pítina'ini píjaraka'ini eta máitupajijiasirawa'i. Tási'asera vikawaka'i ema, taicha wa'i viúmuriwaina'ini.

⁵⁰Ema Jesús májikapapa: — Wa'i ekukawaka, taicha mákani wa'i tikatianaka'aviana'i, ena tímikataka'aviana'i.

⁵¹Te jena sácheana'i tiánene'ipaipa títekapa eta mayanirayare'i ema Jesús te anuma. Tási'a, tíjarakawaicha'a eta mayaniranumayare te Jerusalén.

⁵²Makawanairipipa tiyanana ena tínapumirauchanayarepa'i. Titanukanayare'i eta máitekapi'ayare taye'e eta jákani awasare samaria,

⁵³énasera ena samaritanoana wa'i náwara'a'ini najakapa taicha náima'a'i ena eta matupiruirapa'i te Jerusalén.

⁵⁴Taka'e, ena apinana maimitureana, ema Santiago émapa ema Juan, tisemamaju'eanapa eta namajakapira'i ema Jesús. Taka'e, náichapa ema: — Tata Viákenu, ¿piwara'apuka viyasesereka táemirika eta yuku tiási'a te anuma. Étaina táitapaimuri'a ena náenatatajiana, tákuti eta máichakene'i ema profetaini Elías?

⁵⁵Taka'e, ema Jesús máimararakapa ena. Tási'a, makajachawakapa, máichapa: “Tája'a takayema wa'i tétupikawa eta epanereruana. Takutipa wa'i máwa'aru'ena'i ema Machanewa Viya. Nuti Manerejirunu ema Tata wa'i etaina timitekanu nikuñakawaka'i ena achaneana eta timitekanu'i nukatiuchawakayere'i.”

⁵⁶Tási'a, tiánuku'anapa te apachakaya te apana'iware awasare.

⁵⁷Eta napaisirapa'i te achene, nakainunapa ema émana achane, máichapa ema Jesús: — Tata, nuwara'a né'ikavi te jákani piwara'akeneyare piámanu.

⁵⁸Ema Jesús, majikapawarepa: — Eta chuye tikapenajuereka, eta káyureana éneichuwa tikamakajiana, émasera ema Machicha ema Ajaira tájina maviya'ini manarasi'a'ini.

⁵⁹Ema Jesús majikapawarepa ema apana: — Pe'ikanu. Émasera majikapapa: — Tata, nuyaseakavi písapanu'ini nuyana'ini nékarapana ema tikachichanu.

⁶⁰Ema Jesús majikapapa: — Naima'akakaine náekarakakaicha'a ena máecharaireana, piti piyanaya pikametarairuyare eta máechejiriruwa ema Viya.

⁶¹Matiari'iware ema apana énerichuware maka'e'i: — Tata nákenu, nuti nuwara'a né'ikavi. Písapanusera nukametawapananumaya te nupena.

⁶²Ema Jesús majikapaware: — Mákani achane tipaikapa'i téyarekapa'i wa'i tichawaekene'awaima'i mámarairika'ini eta mámakene. Ene pika'eyare piti, wa'i tisiapaima'i te mawasa ema Viya akenuka te anuma.