Read Ignaciano Juan 1 Bible Online

Juan 1 - Ignaciano bible

Juan 1

¹Te táepanirawa'i tamutu, tatiari'ikenepa'i eta Echéjirirukawa, mákani Echéjirirukawa'i makachaneipa'i ema Viya, émakene'i ema Viya.

²Ema makachaneipa'i ema Viya te táepaninewa.

³Taye'e eta Echéjirirukawa tatiari'ipa'i tamutu eta tatiari'ikeneana'i, tamutu eta tatiari'ikeneana, tájina máejekeruina'ini, nájinaware apanaina'ini náepiyaka'ini eta tatiari'ikeneana.

⁴Émaichu'iware tikaitareka'avi'i viti achaneana. Émaichuware tinákapa te viáchanewana eta tamika'u eta vítaresira'i.

⁵Eta juka tijara'i tijanunuka te timapikuana, tási'a eta timapikuana wa'i tarata'a'ini takaema'a'ini.

⁶Matiari'iware ema achane tikaijare'i Juan, mawanekapa ema Viya

⁷Ema títametarekayare'i, apaesa maimereka eta jára'i, apaesa namutu nasuapa eta maichakeneana'i.

⁸Ema Juan, wa'i émaina'ini eta tijara'i, éma'isera timerekayare'i eta tijara'i.

⁹Eta yátupikene'i tijara'i timikaucha'i namutu ena achaneana tiavi'ana'i te juka apake'e.

¹⁰Émaichu'ineni ema Echéjirirukawa matiari'ikenepa'i ani te apake'e, tási'a, émaichu'i ema Viya tepiyaka'i eta apake'e makachane'i ema Echéjirirukawa, nákaini tiavi'ana'i te apake'e wa'i naimati'ini.

¹¹Títeka'i, tiúkupaika'i te juka apake'e, wá'isera najakapa'ini.

¹²Énasera nákani tijachapana'i, tási'a nasuapa'i ema, maijaraka'i, maimikacheracha'i eta yátupikene'i machichanaveana'i ema Viya.

¹³Tási'a ena machichanaveana'i ema Viya, éma'i tinerejika'avi'i. Wa'i étaparakaina'i eta nakachichaira'avi'i ena tikachicha'aviana.

¹⁴Émaichu'ineni ema Echéjirirukawa, tépiyakawapa ajaira'i, tási'ia tikachane'avipa viye'e viti, tási'a vima'a'i eta majaraiwa, majachapakene'i me Maiya, táicha makarichu'i machicha, tetavikawa'i eta yátupikenera'i maemunaraiwa'i.

¹⁵Ema Juan, tímereucha'i ema, maka'e'i “Ema'i ema maka, ema nichakene'i nuti te nuka'enapa, marajapainapa ema tekene'apa'i nuye'e nuti, émasera ichapepanapa eta makapika'uira'i, taicha ema'i mainapure'i nuye'e nuti.”

¹⁶Tetavikawa'i eta yátupikenera'i maemunaraiwa'i, vijachapa'i vimutu eta vijarakasiana taye'e eta apana vijarakasiana,

¹⁷taicha eta wanairipi émara tinaka'i ema Moisés. Yátupikenera'i maemunaraiwa'i ema Jesucristo.

¹⁸Yátupikene, nájina náimati'ini eta máima'i ema Viya, makarichukene ema Machicha, émaichu'ineni ema Viya kachanekakana'i ema Maiya, éma'i tímimaticha'avi'i ema Maiya.

¹⁹Etara eta juka mametarapi'i ema Juan, naye'e ena tuparairukana tikawasana'i te Jerusalén, te nawanekapa ena náewanachana, nayanaucha ema Juan. Eta nayaserepana, najá'a'ipuka ema.

²⁰Ema matupiruwapa eta majikapirawaka'i: — Wá'isera nútina ema tikaijare Cristo.

²¹Nápechawarepa nayasereka: — ¿Nája'avisika píti? ¿Pítipuka ema Profeta Elías? Ema Juan majikapawarepa: — Wa'i nútina. Nápechawarepa nayasereka: — Tási'a ¿Pítipapuka ema apana profeta vikuchapakene'i? Émasera májikapawarepa: — Wa'i nútina.

²²Náichawarepa: — ¿Nája'avikenesika píti? Pimetaka'avichucha nája'avipuka píti. Viwara'a véchayare, apaesa vimetakawaka ena tiwaneka'aviana'i.

²³Ema Juan májikapawarepa: — Nuti nupiaraka'i te mawapa'ikene wama'i: ‘Etserereaka eta mache'u ema Viya’, taicha taka'e'i eta maechejisi'akene'i ema profeta Isaías.

²⁴Ena wanairukana'i naye'e ena fariséuana. Ena techejirikawanaya'i maye'e ema Juan,

²⁵nayaserekapa: — Te wa'ipuka pítina'ini ema Cristo, wa'iware pítina'ini ema profeta Elías, wá'iware pítina'ini ema apana profeta, ¿tája'asika takayema'i eta píkachasirika'i?

²⁶Ema Juan májikapawakapa: — Nuti níkachasika'e'i te une, matiari'ipasera puiti te vitaraku. Étisera wa'i ímati'ini

²⁷tási'a ema títekapaya te nekene nuye'e núti. Nuti wáipaine'i nákaemuñawaima'i nuvejuchupewacha eta maeparupewa.

²⁸Eta mávi'a'i ema Juan, eta máikachasirisine'i eta te tikaijare Betania, te apachara eta kajakure Jordán.

²⁹Te apanapa sache, máima'apa ema Juan eta mapauchirapaipa'i ema Jesús. Taka'e, máichawakapa ena achaneana: “¡Íma'a, márajapa ema Wanairuka me Viya. Ema, tikaepa'ayare eta vipekaturana te juka apake'e!

³⁰Émara ema maka ema néchejisi'akene'i eta eye'e kape juka: ‘Nuti nínapuka'i maye'e ema, émasera matiari'ikeneipa'i eta akane, májinanuicha'a'i nuti. Eta taka'e, tipikauchakarepana'i eta nuye'e.’

³¹Núti'ipa néchejisi'a'i ema, wícha'asera nímati'ini. Numetaka'isera ena israelítana eta nakaikachasiraina, apaesa natsekawa'i eta najakapiraina ema te jákani máimerekawapa.”

³²Ema Juan maimereuchawarepa: “Níma'apa ema Machanewa Viya eta máukupaisira'i te anuma, takutipaine eta paluma, masiapa'akapa ema Jesús.

³³Nuti wicha'aware nimati'ini nája'a'ipuka ema, tási'asera ema tiwanekanu'i nikachasirika te une, maichanupa: ‘Te píma'a ema Machanewa Viya máukupaucha te mápusi mákani achane, pímatiya eta émaira'i ema Nuchicha.’

³⁴Puiti nímatipa ema. Táitusiawa numetaka'e puiti eta émaira'i ema Machicha ema Viya.”

³⁵Te apanawarepa sache, ema Juan matiari'ipaware taye'e eta mávirareasa'i, énapa ena apinana máimitureana.

³⁶Te máima'apa ema Juan, tiánuku'apaipa'i ema Jesús, máichawakapa: — ¡Íma'a, ema maena Jesús, éma'i ema, wanairuka'i me Viya!

³⁷Ena apinana máimitureana ema Juan, eta nasamira'i eta juka, tiyanapa naé'ika'i ema Jesús.

³⁸Ema Jesús téseniekene'awapa. Máima'apa eta naé'isirapa'i, mayaserekawakapa: — ¿Tája'a, eta etanuka'i? Ena najikapapa: — Tata maestro, ¿távi'a eta píkapenaiya'i?

³⁹Ema Jesús májikapawakapa: — Yare, íma'ayare. Taka'e, tiyananapa naimatipa eta mávirare'i. Naítaipa'i, eta jena sache eta návi'aira'i eta maye'e, taicha las kuatruipa'i sache te titekapanapa.

⁴⁰Andrés máijare'i ema mapinane'i, ema tisamana'i ema Juan, ema té'ikapa'i ema Jesús, maparape ema Simón Pedro.

⁴¹Te tichawapa matiwa'i matanuka'i ema maparape Simón, taka'e máichapa: — Víma'aipa'i ema Mesías (eta taechejiriruwa eta juka taka'e'i ema Cristo).

⁴²Taka'e, ema Andrés mámapa ema Simón te mávi'a'i ema Jesús, te máima'apa ema Jesús máichapa: — Piti Simón, machicha ema Juan, nútisera nítsiwachaya eta píjare, níjarechaviya Cefas eta (taechejiriruwa: Pedro).

⁴³Te apanapa sache, ema Jesús tiyanawarepa te tinapaika te Galilea. Ánaki makainunapa ema Felipe. Tási'a, máichapa: — Yare, pé'ikanu.

⁴⁴Ema maka Felipe, eta máwasa'i, eta awasare tikaijare Betsaida, étaichu'iware máwasa'i ema Andrés émapa ema Pedro.

⁴⁵Ema Felipe tiyanapa matanupana'i ema Natanael, tási'a te máetupiakapa, máichapa: — Víma'aipa ema májuekeneru'i ema Moisés, émaichuware ema táechejisi'akene'i eta libro nájureana'i ena profetanaini. Ema tikaijare'i Jesús, machicha ema José, tikawasa'i te Nazaret.

⁴⁶Maka'epa ema Natanael: — Wáipaine'i tiuchukaima'i, tiuri taye'e eta Nazaret. Ema Felipe májikapawarepa: — Yare apaesa pitsamareka.

⁴⁷Te náitekapauchapa, ema Jesús máimararakaipa ema Natanael, maka'epa: — Tétavikawa'i táuriwa'i eta pítaresira'i. Yátupikenevi israelita. Wa'i pítuka piwayuareka.

⁴⁸Ema Natanael mayaserekapa: — ¿Távi'a pímatinenu'i? Ema Jesús májikapapa: — Nímativi'i te wícha'a máetupiakavi'ini ema Felipe, eta máichuiraviyare'i, te piávi'aipa te tápeku eta yukuki higo.

⁴⁹Ema Natanael máichapa: — Maestro, ¡píti'ipa yátupikene Machicha ema Viya, pítira yátupikene Rey-vi'i viye'e viti israelítana!

⁵⁰Ema Jesús majikapapa: — ¿Pisuapanu'i étachuchasera eta juka níchiravi'i eta nímairavi'i te tápeku eta yukuki? Píma'ayarewa eta apana tiáramikareanapana taye'e eta juka.

⁵¹Tási'a, ema Jesús máichawakapa: — Eti íma'ayare eta anuma téjiakayare, énapa ena ángeleana tiúkupauchanuanayare nuti Manerejirunu'i ema Viya.