Read Ignaciano Juan 11 Bible Online

Juan 11 - Ignaciano bible

Juan 11

¹Matiari'i ema achane tikaijare Lázaro, ema, máemunakasare'i ema Jesús. Tikawasa'i taye'e eta awasarechicha tikaijare Betania, náwasa'iware ena maparapenaveana, esu María ésupa esu Marta. Te jena sácheana, tikajuma'i muraka ema achane.

²Esu suka María, ésu'i esu tisipapewacha'i ema Jesús taye'e eta táijiyekene'i perfumeama, suájapewacha'iware te suchutimaka.

³Taka'e, ena nani apinana esenana tikaparapekakana náimiwanerekapa, — Tata, ema pemunakasare tikajuma'i puiticha.

⁴Te máechapa ema Jesús, maka'epa: — Eta juka jumare, wa'i taítaima'i ema Lázaro, matupara'aichusera me Viya, mawaraira'i nímereka eta majaraiwa eta maitupajijiasirawa ema Viya, nímeresirayarewa eta nítupajijiasirawa'i nuti Machichanu ema Viya.

⁵Jé'esare, ema Jesús yátupi'i eta máemunasira'i ema Lázaro, énapa ena esenana maparapenaveana,

⁶Wá'isera mayanawane'ini máima'apana'íni ema máemunakasare, manasicha'a apina'i sache.

⁷Tási'a, te apanapa sache, ema Jesús máichawakapa ena máimitureana: — Viyana víchawa te Judea.

⁸Ena maimitureana naichapa: — Tata maestro, kapeicha'a ena tikatianakaviana'i nawara'a'i tikapakaviana te marija'i, ¿tási'a, puiti piwara'aicha'a piyanayare ánaki naye'e?

⁹Ema Jesús máechejisi'a'i eta mawanekasiwa'i máichawakapa: — Wa'i táeñamawakare'ini, yátupi eta sache tikaye'e duce ura, te vipaika te sachemu'u, wa'i vikáyutetuima'i taicha vímairirika'i taye'e eta tijara'i;

¹⁰nákanisera tipaikana'i te yátimu'u, tikayuteterejianayare'i taicha wa'i náimairirika'ini, taicha nakamunu'i eta tijara'i.

¹¹Taka'e, te táekenepa, maka'ewarepa: — Ema vémunakasare Lázaro máena'i tímaka'i, nuyanayaresera nukajamipanayare.

¹²Ena maimitureana naichapa: — Tata, te tímaka'ipuka ema, étapa táikutiara'i eta matiwareraya tinarakainapa.

¹³Etasera ema Jesús eta maka'era'i taicha tepenaipa'i ema Lazaro, enasera maimitureana naimijachaichucha yátupi'i tímaka.

¹⁴Taka'e ema Jesús matupiruwapa mametakawaka: — Tépenaipa ema Lázaro.

¹⁵Núrisamuresera eta májinanuira'i eta ánaki, tiúripanaya eta eye'e taicha íma'aya eta níchakeneyare apaesa esuapanu. Puiti viyanaya víma'apanayare.

¹⁶Taka'e, ema Tomás ema naimijareru chame, maichapa ena machamuriana maimitureana ema Jesús: — Viyana víti apanaware te nakapakapuka ema, nakapaka'avirinewa víti apanawa.

¹⁷Te titekapapa, ema Jesús waipa machimapa'ini, kuatruipa sache eta maepenira'i naekaraipa'i ema Lazaro.

¹⁸Eta tayere'iwa'i eta awasarechicha Betania tachakaya'i eta Jerusalén, mapana kilómetru'i;

¹⁹kamuriana'isera ena achaneana te napena ena maparapenaveana, esu Marta ésupa esu María. Nakamitisiripana'i apaesa wa'i nakuiya'arakawa'ini ena apinana, eta maepenira'i ema naparape.

²⁰Taka'e, te suéchapa esu Marta eta máitekapirayare'i ema Jesús, tiyanapa suákapa'i, esusera esu María sunasirichu'i te taju'e eta peti.

²¹Taka'e esu Marta suichapa ema Jesús: — Tátachicha, te pitiari'ina'ini eta ani, wa'i ñikuepena'ini eñi nuparapeni.

²²Wá'isera néñamawa, taicha necha'i puiti eñi Viya tijarakaviyare'i tamutu eta piyasearuya.

²³Ema Jesús majikapapa: — Ema piparape, tichawayare títareka te pimira'u.

²⁴Esu Marta suíchawarepa: — Yátupi, Tata, nécha'i eta ñichavirayare títareka te táitekapapa eta sácheyare náechepusiraya ena náepenakeneana.

²⁵Taka'e ema Jesús máichawarepa: — Jé'eware nuti, nukaitarera'i nákani nukaechepureanaya. Táitusiawa numetakavi, nákani tisuapanuanayare, tayanapanepuka náepena, nukaitarekayaresera núti;

²⁶Namutu nákani titarekanaicha'a'i tisuapanuana'i nuti, wa'i tepenanaima'i maichekuarakirenapa eta naitaresira. ¿Pisuapanu eta juka numetaruvi'i?

²⁷Esu sujikapapa: — Yatupi nusuapavi, Tata, pítira yátupikenevi'i Cristo, ñichichavi eñi Viya, pítiripa piti vikuchapakenévi'i píteruyare'i te juka apake'e.

²⁸Te títapirikapa eta suéchejisira'i esu Marta maye'e ema Jesús, tiyanapa suíchu'apana'i esu suparape María, sujajaikapanapa, ánipa suícha'i: — Eñi Maestro ñirari'i eta ani, ñikawanairipi piyanayaréji.

²⁹Te susamapa esu María eta matiari'ira'i ema Jesús, téchepurukawanepa. Tiyanawarepa suákapa'i.

³⁰Taicha ema Jesús wicha'a máitekapa'ini te napena. Manasirichu'i eta te suákapine'i esu Marta.

³¹Eta náimaira'i ena suchimarana eta suéchepusira'i súchusira'i esu María, tiyananapa náe'iekene'a'i. Náimijacha'i ena tiyanayare'i esu te máekari ema suparapeini, tíya'apanayare'i.

³²Taka'e, te suítekapauchapa ema Jesús, esu María sutupirupa tépuyuka'i te máiwapechakaya tási'a, suíchapa: — Tátachicha, te pitiari'ina'ini eta ani wa'i ñikuepena'ini eñi nuparapeni.

³³Taka'e ema Jesús eta maimaira'i esu María eta suiyaira'i enapa ena juriyuana te'ikanapa'i esu, tikatisamurewapa ema apanaware,

³⁴Tási'a, mayaserekapa: — ¿Távi'a ékari'a'i? — Máichapa. Ena najikapapa: — Yare, Tata, píma'a.

³⁵Ema Jesús tiya'apa.

³⁶Taka'e, ena juriyuana naka'epa: — ¡Íma'a, tétavikawa'i eta maemunasira'i!

³⁷Ena apamuriana, ániware naka'e: — Ema maka tikaimairirika'i ema púchuki, ¿tája'apuka takayema wa'i makanaraka'ini ema Lázaruinisami, apaesa wa'i makuepena'ini?

³⁸Taka'e, ichape eta makatisamurewaira'i ema Jesús. Mapauchapa eta ekari nasekajueru'i te mari. Tatiari'iware eta márime taji'ajaka'i eta tapajakura eta ekari.

³⁹Taka'e, ema Jesús mawanekawakapa: — Ekaerajika eta jara tachuji'i eta máekari. Ésusera esu Marta maparape'i eta tepena'i suichapa: — Tata, németeaka tijecheipa jákani taicha kuatruipa'i sache eta ñépenira'i.

⁴⁰Ema Jesús majikapawarepa: — Kápachi numetakavipa, te pisuapanu yátupina, píma'ayare eta makunachakarewa'i ema Viya.

⁴¹Nakaerajikapa eta márime. Tási'a, ema Jesús máesenikapa te anuma, tiyujarakanumapa: — Tata, nu'asulupayachavi eta pisamiranu'i.

⁴²Wá'ikene péñauchanu eta jákani nuyasearuviana. Puiti nuyaseakavi eta pítupaijiásirawa, apaesa náima'a ena nani achaneana natiari'ikeneana'i, apaesa nakunachavi. Náechaware eta pítira'i piwanekanu.

⁴³Te títapirikapa eta mayujarasira'i, tipiaraikapa muraka: — Lázaro, péchepuka eta te jara piávi'a'i. Yare, piúchuka.

⁴⁴Taka'e, ema máepenakeneni'i tiúchukapa. Mámapaichu'i eta máyuru'ana'i eta liensome, étapa eta máepakamira'i. Tási'a, ema Jesús maichawakapa: — Evejapuaka eta máyuru'ana'i, apaesa mayana te mapena.

⁴⁵Taka'e, ena suchimarana'i esu María, eta náimaira'i eta juka máichakene'i ema Jesús, kamurianaine'i ena tisuapana'i ema.

⁴⁶Natiari'isera ena apamuriana, tiyananapa naye'e ena fariseona, tikatianakana'i ema Jesús. Nametakapa eta maichakeneana'i.

⁴⁷Taka'e, ena tuparairukana náimichu'apa namutu ena juéseana, tikurujikakanapa. Naka'epa: — ¿Tája'a vícharakawayare, tátanaveana? Ema maena achane, tétavikawa'i eta máitupaijiasirawa'i máicha'i eta tiáramikareana.

⁴⁸Wa'i táurika'ini vísapa'ini máimiyanawa'ini, machu námuturiana náe'ika ena achaneana, masapi'ainapapuka nasuapayare ema. Nárajapainapapuka ena akenukana rumanuana eta ani. Nákipaisina'avinapapuka eta viáwasa. Nasapi'ainapapuka tiverejika'avianayare eta viáwakureana'i.

⁴⁹Matiari'i ema achane tikaijare'i Caifás. Ema'i ema ichapekene'i tiyujarakara'i te jena añu'i. Taka'e, máichawakapa ena: — Eti wa'i ímatiekene'a eta víchararakawayare,

⁵⁰Németeaka nuti tiúripana máepena ema émanaina achane mawachareka eta náitaresiraina namutu ena apamuriana achaneana.

⁵¹Eta juka máechejiriruwa'i ema Caifás, wá'ineni étaina'ini táicha'ini eta máechemaraiwa'ini ema. Eta'i eta émaira'i ema ichapekene'i tiyujarakara'i te jena añu'i. Manakasamureruichu'i ema Viya eta máechejisi'a'i eta máepenirayare ema Jesús náichavene ena israelítana,

⁵²étasera juka máepenirayare'i ema Jesús, mawacharekainapa eta naviurewa'i namutu nákani machaneranayare'i ema Viya, te apánapanenejikeneana awasareana. Wa'i tákarichu'ini eta naviurewana ena israelítana. Taicha te táekenenapa, mawara'a'i makurujimuri'ayare'i, étamurianayare'i namutu ena.

⁵³Taka'e, takutipa eta napanereru'i ena tuparairukana eta nakapasirayare ema Jesús.

⁵⁴Eta taka'e, ema Jesús waipa máimerekawa'ini eta te Jerusalén. Majunijikapa eta Judea. Tiyanapa eta te máwapa'i apake'e tachakaya eta awasare tikaijare Efraín. Manasipanapa ánaki, enapa ena máimitureana.

⁵⁵Taka'e, semanayare eta Pascua, napiestara ena israelítana. Namutu ena achaneana tiávi'ana te apanana awasareana tiyanarakanapa taye'e eta Jerusalén, tisipa'akawanayare'i.

⁵⁶Taka'e, ena achaneana nakunepaipa'i ema Jesús. Eta návi'aira'i te templo, téchejirikakanaipa: — ¿Tája'a ekayema? ¿Títekayarepukaji ema Jesús puiti juka piéstaya? Wa'ipuka.

⁵⁷Enaipa ena tuparairukana tiwanerekanapa ena tikuneanayare ema Jesús. Te matiari'inapuka, nametapanayarepa ena tuparairukana. Tási'a, ena náimikaratakayarepa.