Read Ignaciano Juan 12 Bible Online

Juan 12 - Ignaciano bible

Juan 12

¹Seisirine'i sache eta piéstayare'i eta Pascua. Tichawawarepa ema Jesús taye'e eta awasarechicha Betania, máwasa'i ema Lázaro, ema makaechepure'i te máekari.

²Kaparujianapa náenikayare'i ema Jesús. Ema Lázaro makachane'i te mesa eta nanisira'i.

³Taka'e, esu María suámapaipa eta táijiyekene perfumeama te suépusapewachapa. Tétavikawa'i eta tasiwachawa'i. Taka'e, suépusapewachapa ema Jesús, suájipewachapa te suchutimaka. Énewaneine tainikajuecha eta peti eta táijiyewa'i.

⁴Taka'e, matiari'i ema Julasi. Ema maka émarichu tíjararekayare'i ema Jesús, maka'epa:

⁵— Tája'a takayema wá'iwareyapa takaijararekasi'ini eta juka táijiyeamakene tasiwachakene'i perfume, takutiwacha'i eta etana añu eta vikaematanera, vive'a'ini eta kamurikene plata, tási'a, vímikatasi'a'ini ena páureana.

⁶Ema maka Júlasi, wa'i étaina'ini eta majapanuiraina'ini ena páureana. Étachuchaneni mawaraira'i mayumuruka eta plata, taicha ema tiámera'i'i. Títekapa émaichu'iware tiúnarekara'i eta plata.

⁷Ema Jesús máichapa: — Pésamirika esu suka esena. Suíchacha'a esu eta suwara'akene, taicha níkumunuichu'i eta juka taye'eyare'i te nukaekarakasipa.

⁸Ena páureana, tamutuchucha sácheana eta ekachanerawakayare ena. Nútisera wa'i nánasikenema'i eta eye'e.

⁹Taka'e, kamuriana ena tisamairikana'i eta matiari'ira'i ema Jesús te Betania. Tiyananapa náima'apanayare'i. Éneichuware náima'apanayare'iwa ema Lázaro, ema máechepure'i te máekari.

¹⁰Taka'e, ena tuparairukana napanerechawarepa nakapakayare'i ema Lázaro,

¹¹taicha émavene'i tícha'i eta nasuapiraipa'i ema Jesús ena kamurikeneana achaneana. Waipa nasuapa'ini eta nawanairipiana ena tuparairukana.

¹²Te apanapa sache, ena nani achaneana táimiyana'i eta piéstayare'i eta Pascua, nasamajirikapa eta máitekapirayare'i ema Jesús taye'e eta awasare.

¹³Tiúrisamureanaine'i. Eta náurisamurewa'i, nave'apa eta tajuru eta káchipaka. Tiyananapa nákapa'i ema. Eta napiarasirapa'i, ánipa naka'e: — ¡Pikatiucha'avi Tata! ¡Pikatiucha'avi Tata! ¡Asulupaya piti wanáirukakenevi'i me Viya, pítira Rey-vi'i taye'e eta Israel!

¹⁴Ema Jesús tikaperapa'i eta burriku eta masiapira'i, taicha ene taka'e'i eta táechejiriruwa'i eta Takapika'ukene Ajureka:

¹⁵“Eti ekawasana'i te Jerusalén, waipa ekupika, taicha márajapa ema eye'eyare Rey; tímatikareyare'i ema, tikaperayare eta burrikuchicha; mámapa'i eta iúritaresirayare taka'e'i eta Takapika'ukene Ajureka.”

¹⁶Eta tetaepaninewa, wa'i nakaikutiara'ini ena máimitureana tamutu etajuka, tasi'asera te taekenepa eta maechepusira'i ema Jesús, tapaenumawapa napanerecha eta takayemakene tamutu'i tikaju'i etajuka maichakeneana'i ema.

¹⁷Tiuri puiti, ena apamuriana achaneana tímararakanaipa ema Jesús eta makaechepusira'i ema Lázaro te máekari, náechajisi'aipa'i ena eta náima'akene'i.

¹⁸Eta taka'e, ena kamurikeneana'i achaneana, tiyanana'i nákapa'i ema, taicha nawara'a'i náimati ema tícha'i eta tiáramikare.

¹⁹Tási'a, eta náimaira'i ena fariséuana eta kamurianaira'i ena tiákapana'i, náichakakapa: — Wá'ichara víturukaima'i. Íma'a, ¡tétavikawa'i eta nasimutuwa'i ena té'ikana'i ema!

²⁰Natiari'iware ena apamuriana achaneana apajuekuru'ana taye'e eta Jerusalén. Éneichu'i ena tímitekana'i tiyujarapanana'i te jena piéstaira'i.

²¹Tiyananapa napaucha'i ema vichamuri Felipe, ánipa taka'e eta nayaseasira'i: — Tata, viti apanawa viwara'a vímati ema Jesús.

²²Taka'e, ema Felipe tiyanapa mametaka'i ema Andrés. Tási'a, ena apinana tiyananapa nametapana'i ema Jesús.

²³Tási'a, ema Jesús máichawakapa: — Jé'eware puiti, tiáne'ipa eta népeniraya nuti Manerejirunu'i ema Viya. Nápechawayaresera nítareka, apaesa nukunachakareyare eye'e.

²⁴Nutupiruwa numetaka'e, te wa'i vikuewaka eta ewaraki te apake'e, wa'i téjapakaima'i. Té'esera véwaka'i, tétavikawaya eta táejapasiraya.

²⁵Mákanisera téñamawa'i eta máitaresira, émajiwayare tikamitiekene'awayare; mákanisera tíjarakawayare eta máe'isiranuyare, eta te juka apake'e, tiúchuku'ayare ema, máichekuarakireyare eta máitaresirayare.

²⁶Éneichuware mákani tiwara'ayare tikaemataneakanu, yátupiyare eta máe'isiranu, tási'a, nuti nukaejakayare ema te néjasi'ayare nuti, ema maka, tétavikawayare eta makunachirayare ema Tata.

²⁷“¡Ichape eta neñamirawa! ¿Taja'apuka nukayemayare? ¿Nuka'eyare: ‘Tata pikatiuchanu eta neñamirawa’? ¡Etasera eta juka tímitekanu'i!

²⁸Tata, pimereka eta pitupaijiasirawa.” Tási'a, tíja'uchawapa nasama'i eta ma'u ema Viya te anuma. Ánipa maka'e: “Nímerekaipa eta nítupaijiasirawa'i. Jé'esare, nápechawayarewa nímerekayare.”

²⁹Taka'e, ena achaneana natiari'ikeneana'i nasama'i eta máechejisira'i ema Viya, wá'isera nákaikutiara'ini, náimijachaichucha tirureka'i; enasera ena apamuriana naimereuchapa: — Ema ángelepuka ema téchejika'i.

³⁰Ema Jesús máichawakapa: — Wa'i nútivenena eta juka na'u esamakene'i, étivene'i mawaraira'i esuapayare.

³¹Étapa juka sacheanayare eta apake'e kayesere'inapa, tási'a ema Wínaraji kakijikasinapa taye'e te juka apake'e.

³²Eta taka'e nuti te nechepukapa te juka apake'e, namutuinapa achaneana nukaechepukawaka.

³³Eta juka máichirawaka'i ema Jesús, maimisamawaka'i eta taichararakawayare'i eta máepenirayare'i.

³⁴Taka'e, ena achaneana najikapapa: — Taicha eta Takapika'ukene Ajureka visama'i eta taechejiriruwa, ema machicha ema Viya wa'i tepenaima'i. ¿Taja'a takayema pika'e piti ema machicha ema Viya nakaechapukaya? ¿Naja'asika ema makara ema machicha'i ema Viya?

³⁵Ema Jesús máichawakapa: — Ekamapurawa esamararakanu mapurare nutiari'icha'a eta eye'e, numikaucha'echa'a taicha ánipine eta juka ímairanuyare, apaesa wa'i ekukayutete taye'e eta timapiku.

³⁶Esuapa eta juka numika'u, ekamapurawa te nutiari'icha'a eye'e, apaesa ima'a eta tijara'i. Te títapirikapa ema Jesús eta máichirawaka'i, tiyanapa majunijimuri'apa, waipa máimerekawa'ini eta naye'e.

³⁷Ichapemuri'i eta náimaira'i ena tikawasana'i eta tiáramikareana máichakeneana'i ema Jesús, wá'ikenesera nasuapa'ini ena;

³⁸Éta'isera títauchawayare'i eta májuchakeneana'i ema profetaini Isaías, ani taka'e'i: “Tata, ¿nája'a tisuapa'i eta péchejiriruwana? ¿Naja'apuka ena maímechaceneana'i eta maítupajijiasirawa'i, ema Tata?”

³⁹Éneichuware ani taka'e'i eta májuchakeneana'i ema Isaías:

⁴⁰“Ema Viya, eta máimaira'i eta namurakasamurewana'i, taicha máipichasikawaka'i eta napanereruana, apaesa waipa nakuima'a wáipaware nakukaikutiara, apaesa waipa nakukasiñanu apaesa nuti waipa nukanaraka'ema'i.”

⁴¹Ema Isaías maka'e'i eta juka, taicha maima'aipa'i eta majaraiwa ema Jesús, tási'a maechejisi'aware.

⁴²Narari'isera ena akenukara'ana tinerejikawanaipa'i ena tisuapana'i ema Jesús, wá'isera náwara'a'ini náimerekawa'ini eta náe'isira'i, napisira'i ena fariseona eta nakijikawaka'ini eta te peti naurujisirarewa.

⁴³Étachucha náurika'i eta nakunachakarewa'i naye'e ena nachamuriana fariseona. Tasapi'apa náepuru'i eta makunachakarewa'i ema Viya.

⁴⁴Ema Jesús tijaranupa eta máechejisirawaka'i ena achaneana, máichawakapa: “Nákani nawara'a'i tisuapanuana, wa'i nakarichuima'i nasuapanu nuti, eneichuware nasuapayare'i ema Tata, ema tiwanekanu'i.

⁴⁵Takutikene nákani tímatinuana'i nuti eta nímiturapiana, náimatipa'iware eta mapanereruana ema Tata ema tiwanekanu'i.

⁴⁶Taicha nuti yátupikenenu'i eta numikauchirawaka'i ena té'ikanuana'i te juka apake'e. Wáipasera tave'aima'i eta timapiku.

⁴⁷Takutikene nuti, wa'i étaina táimitekanu'ini te juka apake'e eta níkuñaka'e'ini eti achaneana. Eta tímitekanu'i, nukuchuku'a'eyare'i.

⁴⁸Nákanisera nasamairikaipa'inénipuka eta néchejiriruwana, wá'isera nasuapanu'ini, nasapi'a tépurunuana'i, murakayare'i eta náikuñayare. Eta náepuruira'i eta néchejiriruwana, étaipa tiviuchawakainapa te jena sacheyare taitekapiraya eta nakayesesere'iraya.

⁴⁹Taicha taicha nuti wa'i nútijiriruwaina'ini eta nímituresira'i; ema'i ema Tata tiwanekanu'i, tíjarakanu'i eta nímiturapianayare'i.

⁵⁰Taicha necha'i eta mawanairipi ema Tata maichekuarakirenapa eta naitaresira. Wa'i nu'apapikaima'i eta maechejiriruwa, nutupiruwa'i numetaka'e eta mametarunu'i ema Tata.”