Read Ignaciano Juan 13 Bible Online

Juan 13 - Ignaciano bible

Juan 13

¹Tiuri, te jena sacheana'i tamira'upaipa'i eta Pascua, ema Jesús máechaipa eta táitekapauchayarepa eta majunijisirayare'i eta juka apake'e. Tiyanayarepa maye'e ema Maiya. Tétavikawa'i eta máemunasirawaka'i ena máimitureana.

²Jé'esare ema Júlasi, máimipanerechaipa ema Wínaraji eta máijararesirayare'i ema Jesús.

³Émasera ema Jesús, máechaipa eta machavirayarepa maye'e ema Maiya, taicha eta másine'i. Émaichu'i ema Maiya tíjaraka'i eta tamutuirayare'i máituruekene'a.

⁴Taka'e, te jena yati, téchepukapa ema Jesús, tivejamu'iakawapa eta mamuiri'a. Tiáyuruñekechawapa te maye'e pañu.

⁵Tási'a, majuku'apa eta une te erepa, tépanawapa masipapewachawaka eta naíwapeana ena máimitureana. Mave'awarepa eta pañu, májapewachawakapaipa.

⁶Tási'a, te makapayakapa ema Pedro, ema wa'i máisapawa'ini eta masipapewachira eta máiwape. Ema máichapa: — Tata maestro, wa'i táurika eta pisipapewachiranuina nuti.

⁷Tási'a, ema Jesús majikapapa: — Puiti, wicha'a pikaikutiara'ini eta takayemakeneana'i eta juka. Achichuinapasera pikaikutiarainapa.

⁸Ema Pedro máichawarepa: — Nútisera, wa'i nisapawaima'i pisipapewachanu. Ema Jesús máichawarepa: — Te wa'i nukusipapewachavi, waipa pítiparakaima'i eta nuye'e.

⁹Ema Simón Pedro máichapa: — Tata, wa'i tákarichuima'i pisipaka eta níwapeana. Éneichuware eta nuwa'uana étapa juka nuchuti.

¹⁰Tási'a, ema Jesús máichawarepa: — Nákani nakavirawa'i, wa'i tákamesaima'i tiápechawana tikasipana. Takarichu tikasipayare'i eta náiwapeana. Eti, epáchi'awakaipa; wá'isera ámutu'ini epáchi'a'ini.

¹¹Ema Jesús máicha'avi'i eta juka wa'i wámutu'ini vipachi'a'ini taicha máimati'i ema tíjararekayare'i.

¹²Te títawapa eta masipapewachirawaka'i, tikamuiri'awarepa eta mamuiri'a. Tási'a, téjakapa te mesa. Máichawakapa: — ¿Ímatiekene'apuka eti eta juka níchira'e'i?

¹³Eti ímijarechanu Tata Maestro, étupika'isera, taicha yátupikenenu'i eta numaestruwa'i.

¹⁴Eta níchira'e'i nuti, eta numaestruwa'i, nusipapewachira'e'i, ene eka'eyare eti eta ítaresiraya. Esipapewachakakayare eta íwapeana.

¹⁵É'ikayare eta juka níchakene'i. Etayareichu eta nímitusira'e'i.

¹⁶Nutupiruwa numetaka'e, najina emanaina ema nakajurure, nakutinasi'ini ema makenu, tási'a najinaware emanaina ema makaewatakene'i mapajupanawa'ini maye'e ema tewataka'i.

¹⁷Te yátupina ekarawa'uinapa eta juka nímiturapiana, tájina íchirawaima'i. Ekunachakareyarewa me Viya eta ítauchiraya.

¹⁸“Nécha'ineni nuti wa'i ámutu'ini esuapanu. Nímati'e'iware eti yátupikeneana nunerejiruana'i. Títauchawayare'isera eta táechejiriruwa'i eta Takapika'ukene Ajureka, ani taka'e'i: ‘Ema néniruasa'i, masapi'a'i tikatianakanu'i.’

¹⁹Puiti nukainapukawa numetaka'e, apaesa te táitauchawapa eta juka numetarapi, ímatinuinapa eta nutira'i.

²⁰Nutupiruwa numetaka'e, nákani tijachapa'eanayare eti nuwaneruana, nuti'i tijakapanuana'i, tási'a nákani tijakapanu'i nuti, najakapa'iware ema tiwanekanu'i.”

²¹Te taekenepa eta juka máichirawaka'i, ema Jesús téñamawaine'i te masamure, tási'a matupiruwapa máichawaka'i: — Nutupiruwa numetaka'e, marari'i ani te etaraku ema tíjararekanuyare.

²²Taka'e, ena maimitureana tiáramekaine'i eta máichirawaka'i. Téseniukijirikakapa. Wa'i naimati'ini nája'a'ipuka ema náichakene'i.

²³Matiari'isera ema émana nachamuri máemunarupana'i ema Jesús. Makachakaya'i ema eta maejasira'i te mesa.

²⁴Taka'e, ema Simón Pedro tiúmatsiukichanupa eta mayasereka'ini nája'a'ipuka ema máichakene'i ema Jesús.

²⁵Tási'a, ema makachakayapa majajaikapa ema Jesús, taka'e mayasereka: — Tata, ¿nája'asika ema pícha'i?

²⁶Ema Jesús májikapawakapa: — Netamukaya ánimechichaya eta pan, ema níjararuyare, émara ema tíjararekanuyare. Taka'e, máechipaejikapa eta pan, máijarakapa ema Júlasi, machicha ema Simón.

²⁷Jé'esareine'i, ema Julasi te majakapapa eta pan, ema wínaraji enewanepa máwasamurecha'i. Tási'a, ema Jesús máichawanepa: — Eta juka pipanereru'i, táitauchawawanepa puítinaichu picha.

²⁸Tási'a najinasera nákaikutiara'ini ena tejakana'i te mesa eta juka máichira'i ema.

²⁹Taicha ema Julasi, ema techa'i eta tarera tavi'a'i eta plata, tási'a ena naímijacha'ichucha ema Jesús mawaneka'i mawacharesirayare'i eta tikutikakana'i taye'eyare'i eta piesta, mákaji'iwarepukaini ena páureana eta plata.

³⁰Te títanesipa ema Júlasi eta manisira'i eta pan, tiyanapa tiúchuka'i. Majunijikawakapa taicha yatikenepa.

³¹Eta máuchusiraipa ema Júlasi eta naye'e ena, ema Jesús máichawakapa: — Títekapapa puiti eta táitauchirawayare, íma'ainapa eti eta máitupajijiasirawa ema Viya, étapa eta nítupajijiasirawayare nuti Manerejirunu'i ema.

³²Nímerekainapa eta máitupajijiasirawa'i ema Tata, ema apana máimerekayarewa eta nítupajijiasirawa'i nuti Machicha, puiti juka sacheanayare.

³³Nuchichanavechichana, ánipine eta juka ekachaneranuyare, nuyanainapa. Eti, etanukanuinapa. Étaichu'i eta numetarapi'i naye'e ena tikatianakanuana, eta níchirawaka'i, wa'i ítujikawaima'i e'ikanu te nukaiju'eyare nuti.

³⁴Puiti nunakikayare eta juka Arairu nuwanairipi eta eye'e. Émunakakayare'i etijikaka. Ekutinuyare'i eta némunasira'e'i nuti. Ene eka'eyare eti apanaware.

³⁵Te yátupina émunakaka, eta tímatiaka'eanayare ena achaneana, étira'i eti nímitureana'i.

³⁶Ema Simón Pedro mayaserekapa ema Jesús: — Tata, ¿távi'ainapa pikaiju'eya? — Majikapawarepa ema Jesús. — Te nukaiju'eyare nuti — wicha'a ítujikawaima'i é'ikanu. Ekapayakanuyaresera, wícha'asera tíja'uchawaima'i.

³⁷Ema Pedro máichapa: — Tata, ¿kúverarekapa wa'i nukurata'a'ini né'ikavi? ¡Nuti níjarakawa népena píchavenena'i píti!

³⁸Ema Jesús májikapapa: — ¿Jé'esare píjarakawa pépena eta pikatiuchiranuya? Puiti juka yati, te tamira'upaicha'a eta táechejisirayare eta warayu, mapa'eyare eta péñauchirawayare.