Read Ignaciano Juan 14 Bible Online

Juan 14 - Ignaciano bible

Juan 14

¹“Wa'i ekueñamawa eti. Ákasiñawa eta me Viya, éneichuware ákasiñawaware eta nuye'e.

²Te mapena ema Tata, kamuri eta tiávirawakare, iávi'ayare eti, taicha íkuchi'i eti. Taka'e, tatuparaka'i nuyanayare nétupirikayare eta iávi'ayare.

³Tási'a te táuripa eta iávi'ayare, nútijapainawarepa, nuchawainapa népana'enapa, apaesa ákachanenu eti taye'e eta návi'ayare nuti.

⁴Eti ímatipa eta nukaiju'eya. Ímatipa'iware eta achene nuyani'ayare.”

⁵Ema Tomás máichapa ema Jesús: — Tata, wá'ira vímati távi'apuka eta pikaiju'eyare, wá'iware vímati eta achene piyani'ayare.

⁶Ema Jesús májikapawarepa: — Nútira né'ikakare'i, núti'ichuwa yátupikenenu'i. Nútiware nukaitarera'i, nájina apanaina ákasiñaima'i eta ítekapirayare me Tata.

⁷Eta ímatiranuipa'i nuti, ímatipa'iware ema Tata, taicha íma'anuipa puiti eta juka nukachanéra'e'i.

⁸Taka'e ema Felipe máichawarepa: — Tata, pímecha'avipaini ema Viya, apaesa viúrisamurepaini eta vímatiraina'ini.

⁹Ema Jesús majikapawarepa: — Ánakiapaipa eta pikachaneranu'i piti Felipe, wícha'akaruware pímatinu. Eti íma'anuipa'i, ímatinuipaware yátupi'i. Tímikutijirikawaipa'i émaina'ini ímararaka'ini ema Tata. ¿Tája'a takayema piwara'aicha'aware nímechavi ema Tata?

¹⁰¿Wá'ipuka pisuapanu'i eta máwa'asiranu'i ema Tata, tási'a, étapa eta náwa'asira'iware nuti apanawa? Eta juka nukayemakeneana'i, wa'i nutijirikawaina'ini. Étara eta máwa'asiranu'i ema Tata, títauchawa'i eta mawara'akeneana'i.

¹¹Esuapanu eta náwa'asira'i nuti ema Tata, étapa eta máwa'asiranu'iware ema. Te vuícha'apuka esuapanu'ini eta numetarapi, étawanerekainasera esuapa eta tiáramikareana'i níchakeneana'i.

¹²Nutupiruwa numetaka'e: Nuyanainapa eta me Tata. Eta taka'e eti yátupi eta esuapiranu'i. Níjaraka'eya eta erata'airaya ekuchuka eta tiáramikareana, ekutinuyare. Jé'esare, eta juka tiápajupanawayare eta takunachakarewa taye'e eta tiáramikareana íchakeneanayare.

¹³Tamutu jákaini eyasearunuyare te nijare nuti, nijaraka'eyare, apaesa ema Machicha, maimecha eta makunachakarewa ema Tata.

¹⁴Nuti níjaraka'eyarewa tamutu jákani eyasearunuanayare te níjare.

¹⁵“Eta esuapiranu'i tímereucha'eya eta yátupira'i eta émunasiranu'i.

¹⁶Tási'a, nuti nuyaseakainapa ema Tata máewataka ema Machanewa Viya. Ema tímikataka'eyare, wa'i tínajiaka'ema'i.

¹⁷Ema tímituka'eyare, máitametakayare tamutu eta yátupikeneana'i, tási'akeneana eta me Tata. Énasera ena achaneana, wa'i tikaijarakasianaima'i, taicha wa'i náwara'a'ini najakapa'ini ema. Étisera ímatiyare ema, taicha máitawakakayare eta máwa'asira'eyare.

¹⁸“Nuti, wá'iware nujunijiaka'éma'i. Nuchawayare eye'e, ekachanenuyarewa.

¹⁹Puiti juka sacheanayare, ena achaneana waipa tíma'anuanaima'i. Étisera íma'anuparakaya, taicha nuchawayare'i nítareka. Eti apanaware ítarekayarewa nícha nuti.

²⁰Te nuchawapa nítareka, échawainapa eti eta máwa'asiranu'i ema Tata, échawainawarepa eta náwa'asira'eware nuti, eti apana iáwa'akanu'iware.

²¹Nákani náimatiyare eta nuwanairipiana, náitauchayarewa, eta tímikaecherachayare eta yátupi'i eta náemunasiranu'i. Tási'a, ichapeyare eta namunawayare me Tata táichavenena'i eta náemunasiranu'i. Nuti apanaware ichapeyarewa eta némunasirawakayare. Tási'a, nímerekawayarewa naye'e.”

²²Ema Julasi (wa'isera émaina ema tijarareka'i ema Viakenu) mayaserekapa: — Tata, ¿vikarichuirayare pímerekawa eta viye'e, tási'a, ena apamuriana achaneana, waipa tíma'avianaima'i?

²³Ema Jesús májikapapa: — Nákani témunakanuana, nasuapayare eta nuwanairipiana'i. Tási'a, ema Tata, tétavikawayare'i eta máemunasirawakaya. Tási'a, vítijapainapa viáwa'akawakayare ena.

²⁴Nákanisera wa'i témunakanuanaima'i, wá'iware nasuapaima'i eta nuwanairipiana. Eta juka nuwanairipiana esamakeneana'i puiti, wa'i tási'akenena'ini te nuchuti. Tási'akene'i me Tata, ema tiwanekanu'i.

²⁵“Nukamapurawa numetaka'e puiti, taicha ánipine eta juka nuka'eyare eta eye'e,

²⁶émasera ema katiura'i Machanewa Viya, mawaneruyare ema Tata te níjare nuti, ema tímikataka'eyare, tikurisamurecha'eyarewa. Éneichu tímituka'eyare, témecha'eyare tamutu eta juka numetarapiana eye'e.

²⁷“Nunakika eta iúriwaya. Nijaraka'e nuti eta iúriwaya, wá'isera nákutinu'ini ena apamuriana achaneana eta nujunijisira'eya. Wa'i ekuwayuchawa eta éñamawairaina. Wá'iware ekupika.

²⁸Tiuri esamanuipa eta nukayemakene eta nuyanirayare, tási'a, étapa eta nuchavirayare eta eye'e. Eta taka'e, te yátupina émunakanu, ewapinawayare'i eta echira'i eta nuyanirayare maye'e ema Tata, taicha ema kachuriakanu'i eta máitupajijiasirawa.

²⁹Nukametarapiwane eta juka, apaesa te íma'a táitauchawapa, esuapainapa yátupi.

³⁰Ánipine puiti eta juka néchejirisirawa'i eta eye'e, taicha áwanepaipa títekapa ema wínaraji, ema yátupi'i tákenu'i eta juka apake'e. Wá'ikenesera títa'akanuima'i nuti,

³¹Nuwara'asera náimatiya ena achaneana eta némunasira'i yátupi ema Tata, tási'a, nítauchaparaka'i tamutu eta mawanairipiana. “Échepuka. Viyana viyejekawa eta te juka.