Read Ignaciano Juan 15 Bible Online

Juan 15 - Ignaciano bible

Juan 15

¹“Nuti'i yátupikene sukureka uwa, tási'a ema Tata, éma'i tijaneaka'i eta sukureka.

²Ema máechuka eta má'irikere'i tatawa. Máepachiakaware eta apana tatawana eta tika'irisi, apaesa taka'ipana.

³Eti epáchi'awakaipa'i, taicha eta nímiturapiana emetakasiwana'i.

⁴Eta taka'e, ímiyanawayare eta iúrujiasiranuyare nuti, takuti eta náwa'asira'e'i eti, apaesa ákuti eta tatawa tika'iriki. Taicha te viyuvetuka eta tatawa eta uwa, waipa tika'ima'i, ene eka'e'i eti, te wa'i ekuimiyanawa iúrujiakanu.

⁵“Nuti nukuti'i eta táenaki'i eta uva. Eti tímikutijirikawa'i nutawa'e'i. Te ímiyanawa iúrujiakanu, ichapemuriyare'i eta ekaemataneasiranuya. Té'esera ákarichu eti, tájina erata'akenéma'i ícha.

⁶Nákani tijunijiakanuanayare, tikutianayare te tikaechu eta tatawaki, tiájikiyare'i. Tási'a, nakurujikainapa, náijuchainapa te yuku.

⁷“Ímiyanawa yátupina eta iúrujiasiranu. Yátupinaware eta ítauchiraina eta nímiturapiana. Tási'a, te eyaseakanupuka jákani ewara'akeneana'i, nuti níjaraka'eya.

⁸Eta juka ímerekaipa eta makunachakarewa'i ema Tata, eta ekaemataneasiranu, apaesa tétavikawainapa eta makunachakarewaya ema. Tási'a, ekaecheraipa'i eta yátupira'i nímiture'e.

⁹Ímiyanawa eta iáwa'asiranu, taicha tétavikawa'i eta némunasira'e'i, takuti'i eta máemunasiranu'i ema Tata.

¹⁰Eta ímiyanirawa esuapira'i eta nuwanairipiana, tijurukapaipa eta ímatira'i eta némunasira'e'i. Takuti eta nítauchira'i nuti eta mawanairipiana ema Tata, nímatipaipa eta máemunasiranu'i ema.

¹¹“Eta juka nímikutiarachira'i, nuwara'a'i iápajuka eta iúrisamurewa'i, tási'akene'i eta iáwa'asiranu'i nuti. Tási'a ekutinuya eta núrisamurewa'i.

¹²Nápecha'e numetaka'e eta juka nuwanairipi eta eye'e: Yátupina eta émunasirakakaina. Ákutinu eta némunasira'e'i nuti.

¹³Ena achaneana, te nawara'a'i náimereka eta náemunasira'i nákani náemunaruana'i, tíjararekawanapuka eta náepenira'i, ena yátupi'i náimereka eta náemunasira'i ema najiriare.

¹⁴Eti yátupikene'i najiriare'e'i, eta ítauchira'i eta nuwanairipiana'i.

¹⁵Wa'i wánaraka'ena nuye'e, taicha ena wanarakana'i wa'i náimatima'i eta mapanereruana'i ema nákenu. Étisera najiriare'e'i, eta taka'e, numetaka'e tamutu eta mapanereruana ema Tata.

¹⁶Wa'i étina'ini enerejikanu'ini eta é'isiranu'i, nuti nunerejika'e'i eti, puiti nutuparaka'e, eyanayare ichapemuriyare eta ekaemataneasiranuyare. Eta taka'e ema Tata tíjaraka'eyare tamutu eta eyasearuanayare te níjare.

¹⁷Nuwara'a ítaucha eta juka nuwanairipiana: Yátupina émunakaka.

¹⁸“Te nakatianaka'e ena achaneana, échawayare eti, wa'i étina'ini nakatianaka, nuti'i nakatianaka'i.

¹⁹Te etainaicha'ini iáwaku'a'ini eta taye'erepiana eta apake'e, ena achaneana témunaka'eanaipa'ini, takuti'ini eta náemunajirisirakaka'i ena. Étasera eta nunerejisira'e'i te nataraku ena achaneana, étapa tiviucha'e'i eta nakatianasira'e'i, taicha ínajikaipa eta máeperajikene taye'e eta apake'e.

²⁰Échawaware eta juka numetaru'e'i: ‘Nájina emanaina ema nakajurure, nakutinasi'ini ema makenu.’ Nuti tikatianakanuana'i, ene eka'eyare'i eti, eta nakatianasira'eyarewa, tási'a te esuapa'ipuka eta nechejiriruwa, éneichuware étijikakayare esuapakakayare.

²¹Eta é'isiranu'i, étaipa tiviucha'eyare tamutu eta juka nakatianasira'enapa, táichavene'i eta wa'i náimati'ini ema tiwanekanu'i.

²²“Takuijaichu'ipukaini naviurewaina'ini ena, te wa'i nukuiteka'ini eta nímitusirawaka'i. Puitisera tájinapa naetserauina taichavene eta napekaturana,

²³taicha nákani tikatichanuana'i, nakatianaka'iware ema Tata.

²⁴Éneichu'iware, takuija'ini taviuchawaka'ini te wa'i nukuimereka'ini eta níchakeneana'i, marata'akene'i máicha'ini mákani apana achane. Étasera náima'aipa'i, wá'ikenesera nasuapa'ini, nanasikene tikatianakanuana'i, nakatianaka'iware ema Tata.

²⁵Étasera taka'eyare'i eta táitauchirawayare'i eta táechejiriruwana eta Ajureka, eta wanairipi naye'e ena: ‘Tájina taviuchanu'ini eta nakatianasiranu'i.’

²⁶“Étasera, te maitekapapa ema katiura'iya, ema nuwaneruyare mási'akeneyare me Tata, nuyaseakaya mawaneka ema Machanewa, ema te máitekapapa, tímereucha'eyare eta yátupikeneana, tímereuchanuyarewa nuti eta eye'e.

²⁷Tási'a eti apanaware ítametakawakayare, taicha tiyereipa eta ekachaneranu'i, tépanawapa te nunérejika'enapa.