Read Ignaciano Juan 17 Bible Online

Juan 17 - Ignaciano bible

Juan 17

¹Te títapirikapa ema Jesús eta máechejisira'i, máesenikapa te anuma, ánipa maka'e: “Tata Nukaiyakene, títekapauchanupa puiti eta táitauchirawayare eta pipanereruana. Nuwara'asera nukunachakareni eta piye'e, tákutini eta nukunachiravi'i píti.

²Yátupi'i eta píjarasiranu'i eta akenukairanuyare, te namira'u namutu ena achaneana. Nukaitaresirayare'iware namutu ena píchu'akeneana'i píjararunuana'i.

³Níjarakayare eta náitaresirayare máichekuarakireyare, ena píjararunuanayare apaesa náimativi, piti Tata pikarichu yátupikenevi'i Viya, nútipa nuti Jesucristo, nuti piwanerunu'i te juka apake'e.

⁴Nuti nímereka'i ena achaneana eta pikunachakarewa'i. Nítauchaipa'i tamutu eta piwanairipiana'i piwara'akene'i níchayare'i.

⁵Puítisera nuchawainawarepa eta piye'e. Píjarakanuyare eta nukunachakarewaya piye'e, takutiyare akane tasinekene, eta návine'i te tépanawainapa eta apake'e.

⁶“Nítamuturukaipa'i eta nímitusirawaka'i ena píchu'akeneana'i píjararunuana'i píti, nímimatichawaka'iware eta piúriwa'i píti. Yátupi'isera eta pichichanaveana'i ena, taicha nasuapa'i eta nímiturapiana píjararunuana'i nuti.

⁷Puítisera náechaipa'i tamutu eta juka nímiturapiana tási'akeneana'i piye'e.

⁸Náechaipa'iware eta yátupikenéra'i eta piwanesiranu'i. Eta taka'e, natupiruwa'i najakapa eta nímitusirawaka'i eta péchejiriruwana.

⁹“Puiti nuyaseakavi, eta pijaneasirawakaina ena píjararunuana'i té'ikanuana'i, taicha pichanerana'i ena. Wa'i énaina nuyaseuchawaka ena masuapajiraira'ana'i te juka apake'e.

¹⁰Tamutu eta nukaye'ekeneana'i, piye'eraware piti. Eta piye'eana piti, nuye'eware nuti; tási'a tikunachanuana'i ichape ena.

¹¹“Nuti nujunijikawakainapa ena píjararunuana. Énasera nanasiyarecha'a te juka apake'e. Nútisera nútijapainapa eta piye'e. Tata Nukaiyakene, piti yátupikenevi'i eta pisantuwa'i. Nuyaseakavi pijaneasinanuwakachucha ena, apaesa náimiyanawa'i eta náurujiasirakakaina, náwa'asirakakayare nákuti'ini eta viáwa'asirakaka'i víti.

¹²Te nukachanemuricha'a nuti te juka apake'e. Ichapemuri'i eta nujaneasirawaka'i ena eta nukachanerawakaicha'a. Eta taka'e'i, wa'i náinajikawa'ini eta náe'isira'avi'i. Émanaichu'i ema téjekapawa'i, ema tijararekanuyare, étasera taka'eyare'i eta táitauchirawayare'i eta Takapika'ukene Ajureka.

¹³“Puiti nútijapainapa, Tata, taye'e eta jara piávi'a'i, eta nukachanerawakaicha'a ena, numetakawaka'i eta pipanereruana, taicha nuwara'a wákutikaka'ini eta viúrisamurewaina.

¹⁴Taicha ena achaneana te juka apake'e, ichapemuri'i eta nakatianasirawaka'i táicha yatupi'i ena waipa taye'eanaina'ini te juka apake'e, tikutinuanaipa'i nuti wa'i taye'enuina'ini te juka apake'e.

¹⁵Wa'i nuyaseakavi eta pivirawakaina'ini te juka apake'e. Nuyaseakavi nuti eta pikatiuchirawakaina'ini maye'e ema wínaraji.

¹⁶Taicha yátupi'i ena waipa taye'eanaina'ini eta juka apake'e, tikutinuanaipa nuti wa'i taye'enuina'ini eta juka apake'e.

¹⁷Píjarakawaka'ini eta náuriwaina'ini eta piye'e, náitusiraina'ini kápachi eta péchejiriruwana yátupikeneana te nasama eta pechejiriruwa.

¹⁸Píti piwanekanu'i nímiturekayare'i eta péchejiriruwana naye'e ena achaneana te juka apake'e, tási'a, nuti nuwanekawakayarewa ena nímitureana, náimituka ena apamuriana achaneana.

¹⁹Puiti, eta némunasirawaka'i ena, níjararekawa nuti, nítauchayare eta piwara'akene'i, nuwara'a ene náka'e'ini ena, yátupina'ini náijarakawa'ini eta nakaemataneasiraviyare'i, yátupina'iwareni nasuapa eta péchejiriruwana yátupikeneana.

²⁰“Wá'iwaresera nakarichu'i ena nuyaseuchawaka'i eta piye'e. Éneichu nuyaseuchawaka ena tisuapanuanayare eta nasamirayare eta naéchejiriruwana ena.

²¹Nuyaseakaviware wá'ini takuitawa'ini eta náurujiasirakakayare ena. Pakutini piti, Tata eta piawa'asiranu'i nuti, tási'a nuti eta piye'e, eneichuware ena nakachane'avi'ini viti, apaesa ena achaneana te juka apake'e náimati'ini yátupina eta piwanesiranu'i.

²²Nuti níjarakawakaipa'i ena eta náitupajijiasirawakayare'i, eta pijararunu'i piti, apaesa nakurujikaka nakuti'ini viti eta émanaira'avi'i:

²³piti piáwa'akanu'i nuti, tási'a, nuti náwa'akawaka'i ena apaesa yátupina'ini ena etanainaichuyare eta napanereruana, apaesa ena apamuriana achaneana te juka apake'e étaina'ini náimatiaraina'ini eta piwanesiranu'i, étapa eta pémunasirawaka'i takuti'i eta pémunasiranu'i nuti.

²⁴“Tata, píti píjarakanu'i, nuwara'a nakachanenu nuti te navi'ayare, apaesa naima'a eta nujaraiwa eta pijarararunu'i, taicha piti pemunakanu'i akaneipa eta takaepiyairayare eta apake'e.

²⁵Tata, yátupikenevi'i eta piuriwa'i, ena achaneana te juka apake'e wa'i náimativi'ini, nútisera nímativi'i, etajuka naecha'i eta piwanesiranu'i

²⁶Nuti nimimaticha'i eta pijare, nimiyanawasera eta nimimatichiraviyare, apaesa eta pemunasiranu'i nuti ena'apanaware najakapa, tási'a nuti apanaware nawa'akawaka ena.”