Read Ignaciano Juan 2 Bible Online

Juan 2 - Ignaciano bible

Juan 2

¹Te mapanakenepa sache eta táetavisirawa'i, natiari'i ena araimana'i te awasare Caná, tinapaika te Galilea.

²Tási'a, ema Jesús tikaichu'asi'iware ema, enapa ena máimitureana.

³Takaimamarapa téchuriakapa eta máeresa'i vino. Esu maena ema Jesús suíchapa: — Téchuriakanapa eta náeresa'i vino.

⁴Ema Jesús majikapapa: — Esena, ¿taja'a takayema pichanu eta juka? Wicha'a titekapa eta ura eta nichirayare.

⁵Esu suíchawakapa ena tésirikana'i: — Esuapayare eti eta ñiwanairipiana.

⁶Tatiari'i ánaki saisi'i tinajana mári'iana. Nayupisareana ena israelítana taye'e eta naye'erepiana. Eta táichape'iwawaka'i eta tinajana, sinku'i lata eta takawaku.

⁷Taka'e, ema Jesús maichawakapa ena tésirikana'i: — Eyana eyereka eta une, ínikachayare eta juka tinajana. Taka'e, nainikakajikawakapa ena eta tinajana.

⁸Tási'a, ema Jesús mawanekawakapa: — Tiuri puiti, eve'a ániamaina, eyana íjaraka ema téchapajirika eta juka piesta. Taka'e, tiyananapa ena, náijarapana'i.

⁹Mave'apa masamaekapa eta une, vínuipa'i eta. Wá'isera máecha'ini ema távi'a'ipuka tási'a'i eta, nakarichu ena tésirikana'i náecha'i eta únera'i. Taka'e ema techa'i eta piesta maichu'apa ema arayena

¹⁰Máichapa: — Namutu ena achaneana, tatiwa tesirikana eta tiúriamapana vino. Tiámainukawa te kamuripa náera ena naichu'akeneana, tapaenumawa náesichapa eta vino wá'ipanaichu táuriama'ini. Pítisera, apana eta piye'erepi, pikaekene'apa eta pesichira eta tiurimapana vino.

¹¹Eta juka táinapuiru'i tiáramikare máimereka'i ema Jesús, taye'e eta awasare Caná. Ichapeine'i eta náramira'i ena tinekapana'i eta juka máimeresira'i eta máitupajijiasirawa'i. Taka'e, ichapeine'i eta nasuapira'i ena máimitureana'i.

¹²Te táekenepa eta juka, viyanawarepa te apana awasare tikaijare Cafarnaúm. Namutupaipa, esu maena, ena maparapenaveana, enapa ena máimitureana. Nanasipa jákani sácheana eta ánaki. Napaenumawapa tiyanana te Jerusalén.

¹³Taka'e, eta jena sácheana'i, tiáne'ipa eta Pascua, napiestara'i ena israelítana. Ema Jesús tiyanapa taye'e eta awasare Jerusalén, enapa ena máimitureana.

¹⁴Te títekapapa, taye'e eta mapena ema Viya. Máima'aine'i ema Jesús ena títsiriperekara'iana eta naplataneana, énapa ena tíjararekana'i eta vuiyeana, eta uvesana, étapa eta palúmana.

¹⁵Eta máimaira'i ena, máepiyakapa eta machikute. Mákijimuri'apa eta naplataneana te apake'e. Máeke'epuichawakapa eta namesarana. Makuchuchujikawakapa namutu, étapa eta sárareana náijarareruana'i.

¹⁶Ena tíjararekara'iana eta paluma máichawakapa: — ¡Ekuchuka eta júkana! ¡Wa'i etaina íkuchi, eta te juka mapena'i ema Tata!

¹⁷Taka'e, ena máimitureana, enewaneine'i naéchapa eta táechejiriruwa eta Ajureka take'e'i: “Máetaviuchira'i eta máimipikauchira'i eta, mapena.”

¹⁸Ena juriyuana nayaserekapa: — ¿Taja'apuka eta pitsamarajiya, te yátupi'ipuka Akenukavi eta pichira'i eta juka?

¹⁹Ema Jesús majikapawakapa: — Te iákipaikayarepuka eti eta juka templo, nútisera nukaechepuka te mapanakenéna sache.

²⁰Ena juriyuana najikapawarepa: — Cuarenta y seis añu, tayerewa'i eta náepiyasira'i eta mapena ema Viya, ¿tási'a piti pikaemuñawa'i pikaechepukayare te mapanakenéna sache?

²¹Eta máichirawaka'i ema Jesús, máechejisi'a'i ema eta táechepusirayare eta máke'e.

²²Eta taka'e, te táekenepa eta máechepusirapa ema Jesús te máekari, naéchawaka'i ena máimitureana eta juka mametarapi'i. Eta taka'e, nasuapaine'i eta táechejisi'aira'i eta Takapika'ukene Ajureka, eta maye'e.

²³Eta manasiraicha'a'i ema Jesús te Jerusalén, te Páskuamu'u, kamuri'i eta tiáramikareana máichakeneana'i. Kamuriana'iware ena achaneana tíma'ana'i.

²⁴Émasera wa'i makasiñawa'ini eta naye'e, taicha máimatiwaka'i ena.

²⁵Taicha ema, tétavikawa'i eta máitupaijiasirawa'i, máimatira'i tamutu eta napanereruana ena achaneana te ama'e eta nasamureana.