Read Ignaciano Juan 3 Bible Online

Juan 3 - Ignaciano bible

Juan 3

¹Matiari'i ema achane té'ikarairika'i ena fariséuana. Tikaijare Nicodemo. Ema maka achane, tétavikawa'i eta makunachakarewa'i taicha maestro'i ema.

²Taka'e, eta jena yátikene'i, ema Nicodemo tiyanapa mapaipiuchapanapa'i ema Jesús. Taka'e, eta náechejirisirawa'i, maka'epa ema Nicodemo: — Tata maestro, vécha'i eta wanairukavi'i me Viya eta juka pítesira'i pímitusira'avipana'i. Taicha nájina apanaina achane títuruekene'aima'i eta juka tiáramikareana píchakeneana'i píti.

³Ema Jesús máichapa: — Puiti nutupiruwa numetakavi mákani achane wa'i tepanawa eta maitaresira wa'i títujikawaima'i tisiapa te mawasa ema Viya akenuka te anuma.

⁴Taka'e, ema Nicodemo wa'i mákaikutiara'ini eta máichira'i ema Jesús. — ¿Wáipaine'i víchawaima'i eta amúya'avina'ini viti ichasiana? ¿Vichawa'iwarepukaini visiapa'ini te suju'e esu tikachicha'avi?

⁵Majikapaware ema Jesús: — Puiti nutupiruwa numetakavi mákani achane wa'i tepanawa eta maitaresira, wa'iware tikaikachasi te une, maye'e emapa Machanewa Viya, wa'i títujikawama'i tisiapa te mawasa ema Viya akenuka te anuma.

⁶Te tiúchuka eta amuya te suju'e esu taena, tímatikare'i eta machichaira'i ema suima. Takutikene'i, mákani achane machicha ema Viya je'eware ema mauchure maye'e ema Machanewa Viya

⁷Wa'i pikuarami eta juka níchiravi'i: ‘Táitaurewakene'i namutu tepanawayare'i eta naitaresira’

⁸Eta juka tímikutijirikawa'i eta tékatikawa, takarichu visama eta takaemaira. Wá'isera vikaikutiara'ini távi'apuka eta tási'a'i. Ene naka'e'i ena máwa'áruanaipa ema Machanewa Viya. Nanasi'ichu eta náima'i, tikaitsiwaipasera eta náitaresira.

⁹Tási'a, ema Nicodemo mápechawarepa mayasereka: — ¿Tája'asika takayema eta juka?

¹⁰Ema Jesús majikapawarepa: — ¿Píti, naye'evi'i Maestro ena Israelitana, wa'iware pímatiekene'a'ini eta júkana?

¹¹Tatupiruwa numetakavi, taicha viti vechejisi'a'i eta vimatikene'i, tási'a viti'ichu'iware vitametaka'i eta vima'akene'i, etisera wa'i esuapa'ini eta vimetasira'e'i.

¹²Te wa'ipuka esuapanu'i eta nechejisi'akene'i, eta taiparakana te juka apake'e. ¿Tavetijipa eta emasuapiranuya te nutupiruwa'i numetaka'e eta táichararakawana'i te anuma?

¹³“Najina nayana'ini nápana'ini te anuma, emachucha ema tiukupaika'i te anuma; ema Machicha ema Ajaira.

¹⁴Tási'a takuti'i, ema víyara'aini Moisés máepiyaka'i eta metal eta táima'i eta kichare. Manaka'i te anuke'e te yukuki. Ene maka'eyare ema Machicha ema Ajaira tikaechepukawaya.

¹⁵Eta níchararakawayare apaesa nukuchuku'apa'i namutu ena nákani tikasiñanuanayarepa'i. Tási'a, máichekuarakirenapa eta náitaresira.

¹⁶Taicha ema Viya, tétavikawa'i eta máemunasira'avi viti achaneana te juka apake'e. Eta máemunasira'avi, máijaraka'i ema makarichukene'i Machicha, eta máukupaisira'i eta ani viye'e. Tíjaraka'aviya eta vítaresiraya máichekuarakinepa eta vitaresira.

¹⁷Taicha ema Viya, wa'i táka'e'ini eta mapanereru'i eta mawánesira'i ema Machicha máikuñaka'avi'ini viti achaneana. Étasera eta tímiteka'i ema, tikuchuku'a'aviyare vimutu.

¹⁸“Nákani tikasiñanayare ema Machicha ema Viya, wa'i tikaikuñanaima'i; nákanisera wa'i nakasiña'ini ema, táimikuñakawakayare'i eta naviurewana'i, taicha wa'i nasuapa'ini ema machicha makarichukene Viya.

¹⁹Taicha wa'i náurika'ini eta tamikauchirawaka'i eta majaraiwa ema Cristo táukupairu'i te juka apake'e. Étachucha náurika eta timapiku, taicha wa'i náwara'a'ini tákaechera'ini eta náichira'i eta tamaurikeneana.

²⁰Taicha nákani tíchana'i eta tamaurikeneana, nakaticha eta majaraiwa ema Viya. Wáipaine'i napauchaima'i, namawaraira'i takaechera'ini eta náichira'i eta tamaurikeneana.

²¹Énasera ena tisuapana'i yátupi eta máechajiriruwa ema Viya, náurikayare'i napaucha eta majaraiwa. Jé'esare tikaecheranasarepa eta machaneranaripa'i ema Viya.”

²²Te táekenepa eta juka, tiyanawarepa ema Jesús, taye'e eta awasarechichana te táunawa eta Tinapaika te Judea. Vé'ika'i viti máimitureana. Vinasipa jákani sácheana eta ánaki. Viti máimitureana víkachasirikaipa ena achaneana tiwara'ana'i náe'ikaya ema Jesús.

²³Tási'a, ema Juan tíkachasirika'iware te jena Enón tachakaya'i eta Salim, taicha ánaki tatiari'i'i eta une. Ena achaneana napaucha'i ema, jé'esare máikachasikawakapaipa'i ena tiwara'ana'i náinajikayare eta napekaturana.

²⁴Eta juka máicha'i ema Juan tamira'upaicha'a eta jena sache eta náeratasirayare'i ema te nakaeratairare.

²⁵Taka'e, te jena sácheana, ema emana juriyu tiyanapa náimiyusemakawakapa ena máimitureana ema Juan, taichavene eta nakaikachasira'i,

²⁶tási'a tiyananapa ena máimitureana nametapana'i ema Juan. — Tata maestro, píma'aini ema maena péchejisi'akene'i kape te tachausi eta juka kajakure Jordán. Ema Jesús pímijarecha Cristo, tíkachasirika'i puiti ema, tási'a je'ewarepa namutupa nae'ika.

²⁷Tási'a, ema Juan majikapawakapa: — Wa'i ekueñamawa. Ema Viya, ema técha'i eta máijarasira'i eta máitukakene'i nákani manerejiruana. Németeaka ema tíjaraka'i ema Viya eta máitupajijiasirawa ema maka Jesús.

²⁸Eti échaichi'i eta numetasira'e'i eta wa'i nútina'ini ema Cristo. Yátupisera nukawana'i'i eta nínapumirauchirayarepa'i ema, numetakawaka ena achaneana natsekawa'i.

²⁹Nuti nímikutijirisina'e te natiari'i ena araimana'i, namutu ena nakaichu'asikeneana tiúrisamureana'i eta náimaira'i ena araimana. Nakunacha'i ema arayena, ene nuka'e'i nuti eta núrisamurewa'i eta nímaira'i puiti eta nakunachira'i ema Jesús.

³⁰Ema, te jákani mapaisi'ayarepa'i, tiápajukawayarepaipa eta makunachakarewaya. Ema, mapaenumawapa tepanawa eta makaemataneasira ema Viya. Nuti nurisamure'i taye'e eta. Nuti, tiáne'ipa eta nítauchirainapa eta nématane. Tási'a, wá'i'ichu nukunachakare nuti.

³¹“Ema Jesús, máimatirine'i tamutu eta táichararakawana'i te anuma taicha mási'akene'i ema te anuma. Víti achaneana viávi'a'i vikawasana'i te juka apake'e, vímati'i étachucha eta táichararakawana'i te juka apake'e, émasera ema Jesús, eta mási'aira'i te anuma, tímati'i tamutu, tiápajupanawa'i eta máitupajijiasirawa'i. Tikachurika'avi'i,

³²tási'a eta, tímiteka'i eta mametasira'avi'i tamutu eta máima'akeneana'i étapa eta masamakeneana te anuma. Nájinayarenisera nasuapa'ini eta makayemakeneana'i.

³³Vítisera viti visuapana'i eta mametarapiana, vímati'i eta yátupi'i eta máechajiriruwana ema Viya mámakeneana'i ema maka Jesús;

³⁴taicha ema, wanairuka'i me Viya, máechejisi'ayare'i eta máechejiriruwana ema Viya. Énerichuware tétavikawa'i eta máimikatasira'i ema Machanewa Viya taicha máwa'aka'i ema.

³⁵Ema vikaiyakene máemunaka'i ema Machicha. Eta taka'e, matuparaka'i eta émairayare'i téchayare tamutu.

³⁶Eta taka'e, nákani tikasiñanayare ema Machicha, maichekuarakireya eta náitaresira. Namutusera ena makasiñara'ana'i ema Machicha ema Viya, wa'i títarekanaima'i, taicha tanasi'i eta naviurewana táichavene'i eta napekaturana'i, tikaikuñanayare'i máitawakakayare.”