Read Ignaciano Juan 5 Bible Online

Juan 5 - Ignaciano bible

Juan 5

¹Te táekenepa eta jukana, tatiari'i'i eta apana piesta eta naúrujisirawana te Jerusalén. Tiyanawarepa ema Jesús.

²Te Jerusalén, tatiari'i'i eta ichape tapaja náimisiapirare eta uvesana. Tatiari'iware eta ichape noke naímijarecha'i Betzatá te hebreo. Tikaye'e'i sinku eta kúlerureana

³Eta návi'a'i ena nakajumakeneana'i púchukiana, masariana, énapa ena murakaki'ana, tivevepaikana'i ena te apake'e.

⁴Namutu ena, tikuchapana'i eta makayamurisira eta une ema ángele. Tási'a, namutu tiyanana téchipapaikawana te une, taicha tímijachawana mákani tínapuka téchipaikawa, takanarakayare'i eta jákani majuma.

⁵Taka'e matiari'i'i ema achane makajumakene. Treinta y uchu añuipa'i eta makatajiwaira'i.

⁶Te máima'apa ema Jesús, ema makajumakene tíveka'i. Máimatiware eta makajumaira'i, mayaserekapa: — ¿Piwara'a pinaraka?

⁷Ema makajumakene májikapapa: — Tata, nájina tikasiapanuima'i taye'e eta noke, te tiyámurieka eta une, tikachuriakanuana ena apamuriana nakajumakeneana.

⁸Ema Jesús máichapa: — Péchepuka pive'a eta pímakaraji tási'a piyanapa.

⁹Énewanepa ema achane tinaraka'i eta majuma, mave'apa eta maiverema, tási'a tepanawapa tipaika'i. Tási'asera, eta jena sache sawarumu'u'i,

¹⁰tikapika'u'i eta jena sache naye'e ena israelítana. Taka'epa, te náima'apa ena tuparairukana, nakajachapa ema. Náichapa: — ¿Tája'a takayema wa'i pipikaucha puiti juka sache takapika'ukene'i? Wa'i vísapa piáma'ini eta pímakaraji puiti juka.

¹¹Ema achane majikapawakapa: — Wa'i nutina tási'a. Ema maka achane tikanarakanu'i, tiwanekanu'i. Máichanu'i: ‘Pive'a eta pímakaraji, piyana pipaika.’

¹²Ena nayaserekapa: — ¿Nája'asika ema tiwanekavi'i: ‘Eta pive'a eta pímakaraji piyana pipaika’?

¹³Émasera ema achane waipa máimati'ini eta máijare ema tikanaraka'i. Wáipaware náetupiakakare'ini ema Jesús te namuri ena kamurikeneana achaneana, taicha majinaipa'i.

¹⁴Té'esera te táekenepa, ema Jesús makapaikapa ema achane te templo, máichapa: — Píma'a, waipa pikuapechawa pikukapekatura, machu tachawauchavi eta pijuma, máchuware pávetiji.

¹⁵Taka'e, ema achane tiyanapa mametapanawaka'i ena tuparairukana eta émaira'i ema Jesús ema tikanaraka'i.

¹⁶Eta taka'e, ena tuparairukana nakatianasira'i ichape ema Jesús táichavene'i eta makanarasira'i te jena sache sáwarumu'u.

¹⁷Emasera ema Jesús maichawakapa: — Ema Tata tamutuchucha sache tikaematane. Ene nuka'eyare'i nuti apana, nítauchayare eta mawanairipiana.

¹⁸Eta nasamira'i ena tuparairukana eta máichirawaka'i, navetijipaicha eta nasemira'i. Nawara'apa nakapakawaneyare'i ema. Eta tiviucha'i eta makanararesira'i te sáwarumu'uana, náimijachira'i máepuru'i eta naye'erepi. Tavetijipaicha eta máimikaecherachirawa'i Machichaira'i ema Viya.

¹⁹Ema Jesús máichawakapa: “Nutupiruwa numetaka'e. Nuti Machicha ema Viya, eta nutupara'ana'i maye'e, wáipaine'i nútijirikawaima'i nícha jákani nuwara'akeneana'i. Nuti nímatiekene'a'i tamutu eta máematanerepi'i ema Tikachichanu.

²⁰Taicha yátupi'i eta máemunasiranu'i ema Tikachichanu. Eta taka'e, tímechanu'i tamutu eta máematanerepiana. Éneichuware tíjarakanuyarewa eta nímechira'eya eta apamuri tiáramikareana. Tiápajukawayare eta táramikarewayare, apaesa iáramineyare.

²¹Ema Tata marata'a makaechepuka ena náepenakeneana, máimichawayare'i makaitarekawakaya. Éneichuwa nuti Machicha, nurata'aware nukaitareka nákani nuwara'akeneanaya, níjaraka eta náitaresiraya.

²²Nukatupara'a'iware maye'e ema Tata eta nímairaya eta nakaikuñairayare namutu ena náejekapawakeneana'i. Waipa émaina'i tíkuñareka ema,

²³taicha mawara'a'i epikauchanu nuti Machicha, tákuti'ichu eta epikauchira'i ema Tata. Nákanisera wa'i tipikauchanuana'i nuti, wá'iware napikauchaima'i ema Tata.

²⁴“Yátupikeneware numetaka'e. Nákani tikakiñanayare tisuapanayare eta néchejiriruwana, nasuapaware eta nukawana'ira'i maye'e ema Tata, ena máichekuarakirenapa eta naitaresira; waipa tikaikuñanaima'i. Taicha ena, tiúchuku'anaipa taye'e eta náikuñayareni.

²⁵Nutupiruwa numetaka'e nuti Machicha ema Viya. Táitekapakenepa puiti juka sacheana, tisamanuanayare ena achaneana, tayanapane tépena'i eta náchanewana. Te nasuapajira'ipuka, nukaitarekawakayare.

²⁶Taicha ema Tata namutu'i marata'a makaitareka. Ene taka'e eta máijarasiranu'i nuti Machicha eta namutuyarewa nurata'a nukaitarekawaka.

²⁷Éneichuware tituparakanu'i eta níkuñasirawakayare, taicha yátupikenenu'i manerejirunu'i.

²⁸Wa'i ekuarami eta juka numetasira'e'i. Járajapayare eta sácheyare eta nasamirayare namutu ena náepenakeneana eta na'u,

²⁹téchepukanainapa namutu te náekariana. Nákani tíchana'i eta táurikeneana, títarekanainapa. Énasera ena tíchana'i eta tamaurikeneana, tikaikuñanainapa.

³⁰“Nuti wa'i nútijirikawaima'i níkuñareka. Nukuchapayare'i eta mawanairipi ema Tata, ema tiwanekanu'i. Taka'e, te níkuñareka, wa'i numapachichijikaima'i, tatupiruwayare'i nícha. Taicha taka'e'i eta mawara'akene'i ema Tata.

³¹Te nákarichu nuti nútijiruwainachuchaini eta nímereruana'i, wa'i tákamesa'ini esuapanu'ini.

³²Wá'isera nukarichuima'i, taicha matiari'i ema apana títametasinanu'i, émaipa ema Juan Tíkachasirikara'i. Nímati'i nuti eta matupiruwa'i eta máichakeneana'i eta tímereuchanu'i.

³³Eti ekawanairipipa nayasereka ema Juan te nája'anu'ipuka nuti. Matupiruwa'isera ema eta majikapirawaka'i eta nútikeneipa'i ema ekuchapakene'i.

³⁴Wá'isera étaparakaima'i eta juka eta matiari'ira'i ema tímereuchanu'i. Eta tikamunukarepana'i eta esuapiranuina, apaesa iúchuku'aiya eti nicha nuti.

³⁵Ema Juan tímikutijirikawa'i timíkaucha'e'i taye'e eta mametarapi'i eta eye'e, te jena sacheana'i esamararasira'i ema. Iúrisamureine'i ichape, taicha eta tamikauchira'e'i eta máechejiriruwa.

³⁶Wá'isera mákarichu eta máimikaecherachiranu'i ema Juan. Jarari'i eta apana táimikaecherachiranu'i, tiápajupanawa'i eta táramikarewa. Taicha nuti nicha eta nématanerepiana máijararunu'i ema Tata.

³⁷Émaipa ema Tata tiwanekanu'i. Wa'i esama'ini eta ma'u, wá'iware íma'aima'i,

³⁸eti wa'i esuapanu'ini nuti mawaneru'i ema. Eta tímereucha'e'i eta wá'iware iúnaka'ini eta máechejiriruwana te esamureana.

³⁹Eti, tamapuruji eta ekarawa'uira'i eta Taka'ukene Ajureka. Ímijachaipapuka eta tikaitareka'eyare'i. Wá'isera ímatiekene'a'ini, wá'iware ákaikutiara'ini eta nútira'i táechejisi'a'i máichekuarakirenapa eta naitaresira.

⁴⁰Eti wa'i áwara'a'ini epauchanu'ini, níjaraka'e'ini eta ítaresiraya máitawakakaina'ini.

⁴¹“Nuti wa'i nákamesa nakunachanu'ini ena achaneana.

⁴²Títekapa, nímati'ewaka'i emutu eti eta emaemunasira'i ema Viya.

⁴³Nuti nuwanekasiwaichu'i me Tata eta nítesira'i. Étisera wa'i esuapanu'ini, wá'iware ejakapanu'ini; té'esera te máiteka'ini mákani apana achane, tímijachawapuka ema ekuchapakene'i, masapi'apukaini ema tisuapakare'ini eta eye'e.

⁴⁴Eti, wa'i esuapanu'ini taicha eta ewaraira'i ekunachakarewa ena achaneana. Esapi'achucha eti wa'i áwara'a'ini ekunachakare me Viya.

⁴⁵Wá'isera nútinayare numetaucha'e eta me Tata. Máima'a'einepa ema Moisés. Ema timetaucha'eyare. Eti ímijachawa'i tikuchuku'a'eyare eta ewaraira'i ítaucha eta mawanairipiana ema, tamapurujinapa.

⁴⁶Te yátupina'ini esuapa'ini eta mametarapiana ema Moiséini, esuapanu'ipukaini nuti táechejisi'akene'i eta májureana'i ema Moiséini.

⁴⁷Wá'isera esuapa'ini eta májuchakeneana'i ema. Tavetijipa eta emasuapiranu'i eta juka numetarapiana eye'e.”