Read Ignaciano Juan 6 Bible Online

Juan 6 - Ignaciano bible

Juan 6

¹Te táekenepa eta juka, ema Jesús, tiyanawarepa te apachara eta Kákiure te Galilea, etaichu'iwasera eta Kákiure Tiberias.

²Kamuriana ena achaneana té'ikanapa'i ema, taicha eta náimaira'i eta tiáramikareana máichakeneana'i eta makanarasirawaka'i ena nakajumakeneana.

³Taka'e ema Jesús tiapanapa te tápusi eta masi'i, tási'a tejakapa makachanewaka'i ena maimitureana.

⁴Te jena sacheana tiane'ipaipa eta Pascua, napiestara'i ena Israelitana.

⁵Te máima'apa ema Jesús ena kamurikeneana achaneana ena té'ikanapa'i, máichapa ema Felipe: — ¿Távi'apuka viwacharesi'aini eta tinikakare, vénisi'a'ini namutu ena achaneana?

⁶Eta juka mayaseresira'i étachuchaneni eta mawaraira'i ema makaikutiarayare'i te tája'apuka makayemayare'i ema Felipe. Taicha ema Jesús máecha'i eta máichakeneyare'i.

⁷Ema Felipe majikapapa: — Takamunu'i wákaye'e'ini eta kamuri plata, apaesa namutupaini vénika'ini.

⁸Tási'a, téchejikapa ema nuchamuri Andrés, maparape'i ema Simón Pedro, máichapa:

⁹— Marari'i ani ema émana amaperu tiámapa'i eta sinkuchicha'i eta pan, apikipa eta jima, ¿wáipaine'isera nárataima'i ena kamurikeneana achaneana?

¹⁰Ema Jesús majikapapa: — Ewaneka náeja'apaika námutu ena achaneana. Tiúrinapa'ichicha'i eta apake'e, tási'a muíjipa'i'iware, taka'e téjakanapa. Sinku milkeneana eta náichapemuriwa'i ena ajairana.

¹¹Taka'e, ema Jesús mave'apa eta páneana. Te tamutupa eta ma'asulupayachira'i ema Viya, maíjarakawakapa. Ténirikapa, maijarakawakapaipa eta pan etapa eta jima, tisimuriwakapaipa eta naijarakawakapa.

¹²Tinikanapa namutu, tisatu'eanapa, nakaemachaicha'aware. Tási'a, ema Jesús máichawakapa ena maimitureana: — Eñupaika eta náemacharajiana'i, machu támapuruji.

¹³Ena ñúpairikanapa, tási'a nakurujikapa eta pan náemacharajiana'i, tainikacha eta dóse'ikene ichape'iana saye.

¹⁴Eta náimaira'i ena achaneana eta juka máichakeneana'i ema Jesús, ichapeine'i nárami. Tási'a, naka'epa: — Emaipa ema maka profeta ema vikuchapakene'i máiteruyare'i te juka apake'e.

¹⁵Tási'a, nawara'apa námayare'ini naye'eyarepa rey. Émasera máimatipa eta napanereru'i. Taka'e, térajikawapa eta naye'e ena. Tiyanapa makarichu'i te tápusi eta mari.

¹⁶Taka'e, te jena kápere'ichichapa, tiyanapa ena máimitureana ema Jesús taye'e eta kákiure,

¹⁷te titekapanapa tiáwaku'apa te pakure. Tiánuekayare'i te apachara eta kákiure. Nakaiju'eyare'i eta awasare Cafarnaúm. Tave'awakapa eta yati eta nánuesira'i. Ema Jesús májina'i makachanepa'ini.

¹⁸Eta nanáusirapa'i, tachimarakapa eta muraka tékatikawa. Tépakukapa muraka eta kákiure.

¹⁹Sinku kilómetruipa'i eta naétupiesira'i, te naíma'apa ema Jesús. Mapaikaekapaipa'i eta une, tási'a ena tipikanapa eta naímaira'i.

²⁰Ema maichawakapa: — ¡Wa'i ekupikanu, nútichucha!

²¹Tiúrisamureanaine'i eta najakapira'i eta máwakuirapa eta te pakure. Tási'a, títekapanecha eta te nakaiju'eyare'i.

²²Te apanapa sache, ena achaneana tiavi'ana'i te apachara eta kákiure, náimatiakapa ena máimitureana eta nakarichuira'i tiánuekana, táicha tájina apanaina'ini pakure, natanuka ema Jesús májina naima'a'ini.

²³Tási'a, taka'epainecha eta apana pakureana, naye'e'i ena tiási'ana'i te awasare Tiberias. Títekapanapa te tachakaya eta nanisine'i eta pan ena kamurikeneana achaneana.

²⁴Taka'e, ena achaneana eta namaimaira'i ema Jesús, énapa ena máimitureana, tiáwaku'anapa te pakureana, tiyananapa nakapayakayare'i te Cafarnaúm, natanusirapa'i ema Jesús.

²⁵Te títekapanapa, ena achaneana te apachara eta kákiure, náetupiakapa ema Jesús. Tási'a, nayaserekapa: — Maestro, ¿tájamu'u pítekapa'i eta ani?

²⁶Ema Jesús maichawakapa: — Nutupiruwa numetaka'e: Eti etánukanupa'i táichavene'i eta nénisira'e'i, nésatu'echira'e'i. Wá'isera ákaikutiara'ini eta nímechira'e'i eta tiáramikareana.

²⁷Wa'isera ekukaeñamarakawa eta etánusira eta enikakenerepi taicha títawayare'i, tatuparaka'isera etanukayare eta tinikakare tikaitareka'eyare'i, máichekuarakiraya eta naitaresira. Etara eta juka níjararu'eyare'i nuti Manerejirunu'i ema Viya, ema Tata manaka'i eta tímereuchanu'i eta yátupira'i nuwanekasiwa'i eta maye'e ema.

²⁸Nayaserekapa: — ¿Tája'apukaini eta mawara'akeneana'i ema Viya eta vikaemataneasira'i ema?

²⁹Ema Jesús májikapawakapa: — Eta mawara'akeneana'i ema Viya íchakeneyare, esuapanuyare nuti mawanerunu'i.

³⁰Taka'e, ena nayaserekawarepa: — ¿Tája'asika eta tiáramikare pímecha'aviyare apaesa visuapavipa? ¿Taja'apuka eta pemataneana?

³¹Eta akane ena viáchukaekeneanaini tinikana'i eta tikaijare maná, ánaki te apake'e máwapa'i. Taicha taka'e'i eta táechejiriruwa'i eta Ajureka: ‘Máenikawaka'i eta tinikakare tiási'a te anuma.’

³²Ema Jesús majikapawakapa: — Nutupiruwaware numetaka'e. Ema Moisés, wa'i émaina'ini makukupaika'ini eta tinikakare. Ema Tata, éma'i tikukupaika'i eta yátupiken'i eta tinikakare tiasi'a te anuma.

³³Puiti ema Tata mawara'a tijaraka'eya eta yátupikene'i tinikakare'i eta tinikakare tiási'a'i te anuma, tikaitarekawakayare'i namutu ena tiavi'ana'i te juka apake'e.

³⁴Ena, nayaseakapa: — Viákenu, pijaraka'aviparaka máeje'aina'ini eta pan.

³⁵Ema Jesús máichawarepa: — Nútira eta pan nukaitareka'eyare'i. Eta taka'e, nákani tisuapanuanayare, waipa tiápechawanaima'i téku'ana, wáipaware timauneanaima'i.

³⁶Étasera eta numetasira'eipa'i, íma'anuipaneni eti, wá'isera esuapanu'ini.

³⁷Namutu nákani tipauchanuanayare, nuti wa'i néwatajikawakaima'i, taicha tási'akeneichu'i me Tata eta máijarasiranu'i.

³⁸Taicha nuti eta núkupaisira'i te anuma, wa'i nutijiriruwaina'ini nícha'ini eta nuwara'akeneana nuti, eta tímitekanu'i nítauchayare'i eta mawanairipiana ema Tata, eta mawánesiranu'i.

³⁹Eta mawara'akene'i ema Tata, eta mawanesiranu'i, nukaitarekayare'i nákani máijararunuanayare'i ema. Nukaechepukayare ena te náekariana te jena sache táitekapapa eta népanirawakayare.

⁴⁰Taicha eta mawara'akene ema Tata, nákaini tima'ana'i ema Machicha ema Viya, tási'a nasuapa'i ema, máichekuarakirenapa eta naitaresira, tási'a nuti nukaechepukainapa te táitekapapa eta sache népanirawakayare nuti.

⁴¹Tási'a, narari'i ena tikaeka'ira'iana eta máichirawaka'i ema Jesús, taicha ema maka'e'i: “Nutira nunikakare'i nasi'akene te anuma.”

⁴²Tási'a naka'epa: — ¿Wa'i émaina ema maka ema Jesús, machicha ema José? Éneichuware vímati'iware esu máena emapa ema maiya. ¿Taja'a takayema eta maka'echejiriruwa'i eta mási'aira'i te anuma?

⁴³Taka'e ema Jesús máichawakapa: — Ámatinapa eta échejijiasirawa.

⁴⁴Nájina tipauchanuima'i nuti, nakarichu nákani máichu'akeneana'i ema Tata, eta taka'e, ena máichu'akeneanayare'i ema, nukaechepukawakayare nuti te táitekapapa eta sache népanirawakayare nuti.

⁴⁵Taicha taka'e'i eta nájure'i ena profetanaini, ani taka'e'i: ‘Náimitukasiwayareichu'i me Viya namutu ena achaneana’ Taka'e, namutu ena tisamana ema Tata tási'a tikarawauana'i maye'e, énara tipauchanuanayare nuti.

⁴⁶“Wa'ineni etaina'ini eta naimairaina'ipukaini ema Tata, ema tima'a'i makarichu ema tiasi'a me Viya.

⁴⁷Nutupiruwa'i numetaka'e, nákani tisuapajira'iana, najachapayare eta máichekuarakirayare eta naitaresira.

⁴⁸Nútira eta pan nukaitarera'i.

⁴⁹Ena iáchukanaveanaini tinikana'i eta maná, eta nanikasare te máwapa'i apake'e. Wá'isera náitareka'ini, namutu'i tépenarakana'i.

⁵⁰Nutisera eta nechejisi'akene'i eta tinikakare, eta tasi'akene te anuma, nákani nanika eta tasi'akene te anuma, wa'i tepenanaima'i.

⁵¹Nutira eta pan tikaitarekara'i, taukupairu'i te anuma, nákani tinikanayare eta neche, máichekuarakireyare eta náitaresiraya, eta juka pan nijararu'eyare eta'i eta neche, taicha nuwara'a takaitarekawaka'ini namutu ena achaneana.”

⁵²Ena juriyuana tiákapaemajirikakanapa: — ¿Tája'a takayema ema maka eta máijarasira'aviya eta vinika'ini eta maeche?

⁵³Ema Jesús máichawarepa: — Nutupiruwa numetaka'e, te épuru'ipuka enika eta neche ema Machicha ema Ajaira, tási'a te épuru'iwarepuka era eta nítine, wa'i maichekuarakirema'i eta ítaresira.

⁵⁴Nákani tinikanayare eta neche, téranayarewa eta nítine, ena máichekuarakireyare eta náitaresira. Tási'a, nuti nukaechepukawakayare te náekariana.

⁵⁵Taicha eta neche yátupikene'i tinikakare'i tikaitarekara'i, éneichu'i eta nítine, yátupikene'iware térakare'i tikaitarekara'i'i.

⁵⁶Nákani tinikanayare eta neche, téranayarewa eta nítine, ena tiáwa'akanuanayare'i nuti. Tási'a nuti náwa'akawakayarewa ena.

⁵⁷Ema Tata tiwanekanu'i, éma'i tikaitarekara'i, tási'a nuti nawa'aka'i ema, taka'e nákani tinikanayare eta neche, máitawakakayare eta náitaresira.

⁵⁸Necheji'a'i eta pan eta taukupairu'i te anuma. Eta juka pan wa'i takuti'ini eta maná eta nanikakene'i ena iáchukanaveanaini eti, eta nanisira'i tepenanaichucha, nákaini tinikana eta juka pan máichekuarakireyare eta náitaresiraya.

⁵⁹Ema Jesús máimitukawakapa eta jukana eta te peti náurujisirarewa ena juriyuana, te Cafarnaúm.

⁶⁰Eta nasamira'i eta máimiturapiana'i, kamuriana ena waipa náwara'a'ini náe'ika'ini ema Jesús, ánipa naka'e'i: — Tikajerapicha eta vikaikutiarairaina'ini eta juka. ¿Nája'apuka ena nasuapa'ini eta pechejiriruwa?

⁶¹Émasera ema Jesús máimati'i eta napanereruana'i ena, mayaserekawakapa: — Páure'e'i eti eta ewara'a ínajika eta e'isiranu taicha eta emakaikutiaraira'i eta nímiturapiana'i.

⁶²Taja'apuka ícharakawa'ini, eta ímairaina'ini ema Machicha ema Ajaira, eta mayanapaini ánaki te mawasa tainapure.

⁶³Eta Machanewa Viya eta kaitareka'avi'i wa'i étaparakaini eta néchekene. Eta juka nímiturapiana, te esuapapa, étara tikaitareka'eya, taicha yátupikenera'i, eta nechejiriruwa'i.

⁶⁴Natiari'icha'asera eye'e eti nákani wícha'a nasuapa'ini. Eta juka makayemakeneana'i ema Jesús, matupiruwa'i eta máichirawaka'i, taicha máimatipa'i eta napanereruana ena tijunijiakanayare'i, émapa ema tíjararekayare'i.

⁶⁵Tási'a, máichawakapa: — Nutupiruwa eta nichira'e'i, nájina narata'aima'i titekana nuye'e, te wa'i émaina tichu'a'e ema Tata.

⁶⁶Eta nasamira'i eta makayemakeneana'i, tínajikawanapa ena kamurikeneanaini'i. Waipa náimiyanawa'ini náe'ika'ini ema Jesús.

⁶⁷Ema Jesús mayaserekawakapa ena dósekeneana máimitureana'i: — ¿Éneichuware eti ewara'awa eyana?

⁶⁸Ema Simón Pedro majikapapa: — Tata maestro, távi'apuka wakaiju'e'ini, eta péchejiriruwana tétavikawa'i eta máichekuarakire eta vitaresira.

⁶⁹Víti vitupiruwa'i eta visuapiravi'i. Vécha'iware eta yátupikeneravi'i Cristo, Machichakenévi'i ema yátupikene'i Viya.

⁷⁰Ema Jesús majikapapa: — Dóse'e'ineni eti nunerejiruana'i, marari'isera ema émana te etaraku, ema máwa'aru'i ema wínaraji.

⁷¹Ema Jesús, máechejisi'a'i ema Júlasi, machicha ema Simón Iscariote. Taicha ema Jesús máimati'i eta émairayare'i tíjararekayare'i, émaichu'ineni ema naumuriwa'i ena máimitureana.