Read Ignaciano Juan 9 Bible Online

Juan 9 - Ignaciano bible

Juan 9

¹Eta mapaisira'i ema Jesús te taju'e eta awasare, máetupiakapa ema achane máimiuchure'i eta mapuchukiwa'i.

²Ena máimitureana, nayaserekapa: — Tata maestro, ¿tája'apuka tiviucha'i ema maka achane eta mapuchukiwa'i te tiuchukapa? ¿Énapuka tiviuchana'i ena tikachichana, té'esera mapekaturaichu'ipuka ema?

³Ema Jesús majikapawarepa: — Wá'ineni etaina taviucha'ini eta mapekatura ema. Enaipa ena tikachichana, wá'iware enaparakaina. Matupara'aichu'i, mawaraira'i nímerekayare'i puiti eta máitupaijiasirawa'i ema Viya.

⁴Nukamapurayare eta sache níchirayare eta máematanerepiana ema Tata eta mawanesiranu'i, taicha jarajapaware eta yati najina tikaematanena.

⁵Tikamapurawakareicha'a eta nutiari'ira'i te juka apake'e, nuti'i namika'u'i ena achaneana.

⁶Te taekenepa eta juka máichira'i, tiátutuikapa te apake'e ema Jesús, máepiyakapa eta tiúrajichicha eta mátuture. Mayaji'aukichapa ema púchuki.

⁷Tási'a, máichapa: — Piyana pikasipaukipana taye'e eta noke tikaijare Siloé (te vechejiriruwa, eta Siloé tikaijare “Wanairuka”). Taka'e ema púchuki tiyanapa tikasipaukipana'i, tási'a te tichawapa tímairikapaipa'i.

⁸Náramine'i ena machakayapenana'i, tási'a énapa ena tímatiana'i eta mapuchukiwaini'i. Tási'a, naka'epa: — ¿Wa'i émaina ema maka, ema puchukini limusneruini?

⁹Najikapapa ena tímatiana'i: — Émara ema maka. Ena apamuriana, naka'ewarepa: — Wa'i émaina. Mawasichucha. Émasera ema achane púchukini'i máichawakapa: — Nútira, nuti púchukinuini'i.

¹⁰Taka'e, nayaserekapa: — ¿Tája'a pícharakawa'i eta pímairisira'i?

¹¹Ema májikapapa: — Ema maena achane tikaijare Jesús, máepiyaka'i eta tiúrajichicha. Tási'a, tiyaji'aukichanupa, tási'a máichanupa: ‘Piyana pikasipaukipana te noque, te Siloé.’ Te nuyanapa nukasipaukipana'i, nímairikaine'i.

¹²Taka'e nayaserekapa: — ¿Távi'asika mavi'a'i ema mákara achane? Tási'a ema majikapapa: — Je'epuka, wa'i necha.

¹³Taka'e jena sache, ema Jesús máichapa eta tiurajichicha, eta makanarasi'ayare'i ema puchuki, étasera jena sache sawarumu'u'i, wa'i turika'ini nakaematane'ini,

¹⁴taka'e námapa ema puchuki naye'e ena fariséuana, taicha natanuka'i ena eta tiviuchayare'i ema Jesús. Táichavene'i eta máipuresira'i te jena sache sáwarumu'ukene'i,

¹⁵tási'a ema púchukini'i nayaserekapa, tája'a'ipuka táicharakawa'i eta máimairirisiraipa'i. Tási'a ema, máichawakapa: — Ema tiyaji'aukichanu'i eta tiuraji. Tási'a, nukasipaukipa, nímairikapa.

¹⁶Narari'isera ena fariséuona naka'epa: — Ema mákara wa'i machaneraina ema Viya, taicha wa'i mapikaucha'ini eta sáwarumu'uana. Ena apamuriana, ániwarepa naka'e'i: — ¿Wáipaine'isera máituruekene'aima'i máicha eta tiáramikareana te yátupina'ini makapekaturara'i'íni? Taka'e, apánapanenejipa eta napanereruana, tiakapaemajirikakanapa ena,

¹⁷tási'a, nápechawarepa nayasereka'i ema achane puchukini'i: — Tiuri puiti tikaimairikavipa, ¿tája'a pikayema piti maye'e ema? Ema, májikapawarepa: — Nuti németeaka éma'i ema profeta.

¹⁸Énasera ena juriyuana, wá'ikene nasuapa'ini eta émaira'i ema púchukini'i. Tási'a, náimichu'apa ena tikachichana'i

¹⁹tási'a nayaserekapa: — Ema maka, ¿ema pichicha? ¿Yátupi'i eta máimiuchure'i eta mapuchukiwa? ¿Tája'a táichararakawa'i eta máimairisira'i puiti?

²⁰Ena tikachichana'i nájikapapa: — Yátupi ema maka, ema vichicha, máimiuchure'iware eta mapuchukiwaini'i,

²¹Wá'isera vécha'ini tája'apuka táicharakawa'i eta máimairirisira'i. Wá'iware vecha nája'apuka tikaimairika'i. Émaina eyasereka, émapa téchinawa'i eta mametasira'eyare.

²²Taka'e'i eta najikapira'i taicha tipikana'i ena nakaikuña'ini, nakakiji'iwaréni te peti náurujisirarewa ena juriyuana taicha ena tikatianakana'i ema Jesús nakuchukapa, taka'e nakawanairipirapa nakuija nasuapa ema Jesús émaira'i ema Cristo.

²³Eta taka'e'i eta náichira'i ema maiya: “Émaina eyasereka, émapa téchinawa'i.”

²⁴Taka'e, ena tuparairukana nápechaware náicha ema achane puchukini. Ánipa naka'epa: — Pátupiruwa pimetaka'avi te máijare ema Viya eta pinárasira'i, vítisera vímati'i ema maena achane tisipekaturara'i.

²⁵Ema majikapawarepa: — Je'epuka, wa'i necha nuti te tisipekaturara'i'ipuka ema. Takarichu nécha'i eta nupuchukiwaini'i nuti, puítisera nímairikaipa máichawakapa.

²⁶Nápechaware nayasereka ena: — ¿Tája'a máicharakavi'i? ¿Maicharakavi'i eta makaimairisiravi'i?

²⁷Majikapawarepa ema: — Kápachi numetaka'eipa, vuicha'akaru esuapanu. ¿Taja'a takayema ewara'a nápepejirika'e eta numetaka'e? ¿Ewara'a'ipukasera é'ikayare ema eti apanaware?

²⁸Taka'e, nakajachapa naichapa: — Pítisera pé'ikaipa'i ema achane Vítisera vé'ika'i ema víyara'aini Moisés.

²⁹Taicha vécha'i eta máechejisi'a'i ema Viya ema Moisés. Émasera ema máenatataji, wa'i vecha távi'apuka mási'a.

³⁰Ema achane majikapawarepa: — ¡Tája'asamiware eti, tiaramikarepa eta ichakene! Eti wa'i echa távi'apuka eta másine'i, nutisera necha'i taicha kaimairikanu'i.

³¹Wá'ipuka echa wáipaine'i tisamakarema'i maye'e ema Viya mákani achane tikapekaturara'i. Nakarichu tisuapakareana'i nákani títauchana'i eta mawanairipiana'i ema Viya.

³²Wá'iware visamairika nákani nakaimairika'ini ema mákani máimiuchure'i eta napuchukiwa.

³³Nuti németeaka te takuija'ini eta wanairukaira'i me Viya ema maena achane, wá'iwa makurata'a'ini maicha eta tiáramikareana máichakeneana'i.

³⁴Taka'e, tisemanapa ena eta máichirawaka'i. Naka'epa: — Píti pétaviurekene'i eta pikapekaturaiwa'i, eta tiviuchavi'i Puiti pisapi'apa piwara'aya pímituka'avi víti. Tási'a, nakuchukapa ema taye'e eta peti naurujisirarewa ena juriyuana.

³⁵Ema Jesús masamairikapa eta nákijisira'i ema máipuchakene'i. Tási'a, te makainunawarepa, máichapa: — ¿Pisuapapuka píti ema Machicha ema Viya?

³⁶Ema achane majikapapa: — Pimetakanupaini Tata, nája'apuka ema Machicha ema Viya, apaesa nusuapa'ini

³⁷Ema Jesús majikapapa: — Pima'anuipa'i: Núti'ipara nuti, píma'akene'i, péchejirunu'i.

³⁸Taka'e, ema achane tépuyukapa te mamira'u ema Jesús. Tási'a, máichapa: — Nusuapavi, Tata.

³⁹Ema Jesús máichawarepa: — Nuti tímitekanu'i te juka apake'e, nímimatichayare ena máimatira'ana'i eta yátupikeneana máechejiriruwana'i ema Viya, apaesa náimatiekene'a, eta juka tímikutijirikawa'i nukaimairikayare'i nákani púchukiana'i taye'e eta máechejiriruwana'i ema Viya. Nákanisera tímijachawana'i téchemara'iana, timairirikana, tiápajupanawainapa eta napuchukiwayare.

⁴⁰Taka'e, ena fariséuana natiari'ikeneana'i te machakaya, eta nasamira'i, nayaserekapa: — ¿Píti pímijacha'aviripapuka púchuki'avi'i, wá'ira púchuki'avina'ini?

⁴¹Ema Jesús majikapawakapa: — Etisera ekutinasi'i ena púchukiana, taicha wa'i ewara'a esuapanu'ini. Tási'a, tanasipa eta eviurewa'i táichavene'i eta epekaturana, te yátupina'ipukaini esuapanu'ini, takuija'ini taviucha'e'ini.