Read Ignaciano Hechos 10 Bible Online

Hechos 10 - Ignaciano bible

Hechos 10

¹Te jena awasare Cesarea matiari'i ema achane tikaijare Cornelio, militar ema achane. Eta máwakure'i ema, kapita, taye'e eta batallón tikaijare Italiano.

²Ema maka achane mapikaucha'i ema Viya. Máimitukawaka'i namutu ena machichanaveana. Éneichuware máimikatakawaka'i ena israelítana páurekeneana, tamutu'i sacheana tiyujaraka'i maye'e ema Viya.

³Te jena sache las tréskenepa kapere'i, ema Cornelio, tíja'uchawapa kaimairurujipa: Máima'apa ema ángele mawaneru'i ema Viya. Másiapauchapa te mavi'a'i ema, máichapa: “¡Cornelio!”

⁴Ema Cornelio tipikaine'i eta máimarasira'i ema ángele. Mayaserekapa: “¿Tája'a piwara'a eta nuye'e, tata?” Ema ángele maichapa: “Ema Viya taitekapaucha'i eta piyujarauchira'i. Étapa eta pímikatasirawaka'i ena tikamunuwana páureana.

⁵Pímiwanereka náepana ema achane tikaijare Simón, eta máchukarapi'iware Pedro. Ema tiávi'a'i puiti te jena awasare tikaijare Jope.

⁶Eta máitekapi'a'i mapena ema apanaware Simón ema náimijarechakenewa Suélareru. Eta mapena'i te tachausi eta ichape une.”

⁷Te tamutupa eta máchejisira'i ema ángele, tiyanapa tichawa. Taka'e, máichu'apa ema Cornelio ena apinana mamusurana. Máichu'aware ema émana masuntarura. Éneichuware tipikaura'i maye'e ema Viya,

⁸Taka'e, mametakawakapa eta mametarapi ema ángele. Máewatakapa taye'e eta awasare Jope.

⁹Te apanapa sache, tiáne'ianapaipa ena wanairukana taye'e eta awasare, te jena las dósekenepa sache, ema Pedro tiápanapa eta te tékene'a piso, tiyujarakayare'i.

¹⁰Téku'aipaicha ema, taicha tájinaicha'a manika'ini, naepiyasinaicha'a'i eta tinikakare manikayare'i. Taka'e, eta mayujarasira'i kaimairurujipa:

¹¹Maima'apa tejiaka'i eta anuma tási'a máima'aware eta tiúkupaikapa'i eta te mávi'a'i ema, takutiyaréni eta ichape sáwana, tikaitiapusiwakapa'i te tapusime.

¹²Kamuri eta sárareana, kichareana, kayureana, támakeneanapa'i eta sáwana, tamutu eta apánapanenejikeneana sárareana.

¹³Tási'a, masamapa ema téchejika'i te anuke'e, máichapa: “Péchepuka, Pedro, pikapaka étanaina sárare pinika.”

¹⁴Émasera ema Pedro, majikapapa: “Wa'i, Tata; tájina nímatiya nunika'ini eta juka vikajachakeneana maeperajiana.”

¹⁵Tiápechawaware máechejika ema Viya, máichapa: “Eta maepachinaru'i ema Viya wa'i pikuimijarecha piti maeperajiana.”

¹⁶Mapa'e eta máechejisira'i ema Viya ema Pedro, taka'e, tichawapa eta sáwana tiápana te anuma.

¹⁷Ema Pedro manasi'icha'a makajarasamúre'i eta mapanerechira'i tája'apuka takayema'i eta makaimairurujira'i máima'akene'i, títekapananecha te tapaja ena wanairukana maye'e ema Cornelio, nakayasesererupaipa eta mapena ema Simón Suélareru.

¹⁸Eta náitekapira'i, nakayasesererupa te éta'ipuka máitekapi'a'i ema Simón eta maijarere'a Pedro.

¹⁹Émasera ema Pedro manasi'icha'a tipanererekaicha'a taicha eta máima'akene'i eta makaimairurujiwa'i. Tási'a, ema Machanewa Viya máichapa: “Pima'a narari'i te juka ena mapanana ajairana titanukavianapa'i.

²⁰Piyana píma'awaka ena, wa'i pikueñamawa eta pé'isirawakayare, taicha nuti nuwanekawaka'i ena.”

²¹Taka'e, ema Pedro, tiúkupaikapa maichapa ena achaneana: — Nútira nuti etánurepa'i eti; ¿tája'a tímiteka'e'i?

²²Tási'a, najikapapa ena: — Tiwaneka'avi'i ema kapita Cornelio, ema achane tipikaura'i maye'e ema Viya. Títaura'iware naye'e ena achaneana, namutu ena israelítana napikaucha náemunakaware ema, puiti víti, vítekapauchavipa, taicha kape juka, ema ángele mawaneru'i ema Viya mametapana'i ema Cornelio máimichu'avi píteka te mapena, apaesa masama eta pimetarapianaya.

²³Taka'e, ema Pedro makasiapawakapa te taju'e, nanasipa jena yati. Maye'e ema Pedro, te apanapa sache, tiyananapa, náe'ikapa ema Pedro ena apamuriana machamuriana tikawasana'i te Jope.

²⁴Te apanakenepa sache, napaenumawapa títekapana te awasare Cesarea, ema Cornelio makuchapaipa'i te mapena, tiúrujikawanaipa ena majaneanana énapa ena máemunakasareana máichu'akeneana'i.

²⁵Te títekapapa ema Pedro te mapena ema Cornelio, tiuchukapa mákapapa máepuyumirauchapa matsiukayarepa.

²⁶Tasi'asera ema Pedro techepukapa, máichapa: — Péchepukachucha pitupi'a, wa'i táurika'ini pitsiukanu, taicha núti'ichu'i pikutikene'i achane.

²⁷Te tamutupa eta maechejisira'i, tisiapanapa te taju'e. Máima'aine kamuriana'i ena náurujiruwana'i.

²⁸Ema Pedro máichawakapa: — Échaichu'i eti, eta viye'erepiana viti israelítana. Wa'i tituparaka'avi visiapamuri'a'e eti apawasana. Émasera ema Viya tiwanekanu'i eta wa'i nukupika eta nusiapamuri'aira'e. Nájinaware nunerejiruima'i nákani tikajachakareana.

²⁹Eta taka'e'i, nítekawanepa. Tiuri puiti, nuwara'a néchaya. ¿Tája'apuka eta tímichu'anu'i?

³⁰Ema Cornelio majikapapa: — Kuatropa sache eta juka níma'akene'i. Te jena kapere'i, las tréspapuka sache, nuti nunasikene'i te juka nupena. Níjima'i, nuyujaraka'iware. Tímerekawa ema achane, tijanunuka eta mamuiri'a.

³¹Máichanupa: ‘Cornelio, ema Viya masama'i eta piyujarasirana. Táitekapaucha'iware eta pímikatasirawaka'i ena tikamunuwana páureana.

³²Pímiwanerekaya náepana ema Simón, eta máchukarapi Pedro. Ema tiávi'a'i te jena awasare Jope. Eta peti máitekapi'a'i ema apanaware Simón ema náimijarechakenewa suélareru. Eta mapena'i te tachausi eta ichape une.’

³³Taka'e, enewanepa nímichu'avi'i. Tájinasera táichirawaina'ini eta pítesira'i. Tímaraka'avi'i ema Viya eta juka viúrujisirawa'i. Viwara'a visamaviya tamutu eta pimetakasiwana'i maye'e ema Viya.

³⁴Tépanawapa tikametarairu ema Pedro. Ánipa maka'e: — Nukaikutiarapa puiti wa'i wákarichu viti israelítana vijakapakare maye'e ema Viya.

³⁵Namutuchucha majakapawaka nákani tipikauchana'i ema, tíchana'iware eta táurikeneana.

³⁶Taicha ema Viya makaitekapa'i eta máechejiriruwa viye'e viti israelítana. Vimetakawakayare nákani tikasiñawana'i maye'e ema Jesucristo. Émara Viákenu vimutu.

³⁷Échaichupuka eti eta táichararakawa'i te viáwasa Judea kape juka táitaresira'i. Te taekenepa maka'epa ema Juan, taikuchi'i eta nakaikachasiwaka.

³⁸Máukupauchapa eta Machanewa ema Viya ema Jesús Nasareno máijararu'i ema Viya. Máwa'akapa ema, máijarakapa eta máitupajijiasirawaya. Taka'e, tépanawapa tikametarairu naye'e ena achaneana. Te mapaisi'apa'i, makanarakawakapa'i ena nakatajiwakeneana máwa'aruana'i ema wínaraji. Marata'a'i ema máicha'i eta juka, taicha ema Viya máimikatakapa'i.

³⁹Tiuri, víti vitametaka'i véchejisi'a eta juka, taicha víma'akene'i tamutu eta máichakeneanapa'i ema Jesús taye'e eta mapaisineanapa'i awasareana te Judea, étapa te Jerusalén, énasera ena tuparairukana nakaticha'i ema; náemetatarekapa te crusu eta náimikapasira'i.

⁴⁰Émasera ema Viya makaechepuka'i te máekari te mapanakenepa sache, tási'a, máimerekaware te vimuri eta machavira'i títareka.

⁴¹Waipa námutu'ini ena achaneana náima'a'ini, vítinecha vitametaka'i taicha viti manerejiruana'i ema Viya, vinekapaekene'a'i tamutu eta vikachanera'i ema Jesús te vinisirana, verirana.

⁴²Taicha tiwaneka'avipa vikametarairuya, vimetakayare eta émaira'i ema Jesús viye'eyare'i Juez viti achaneana énapa ena náepenakeneana.

⁴³Étaipa eta akane namutu ena profetanaini náechejisi'a'i ema Jesús, ánipa naka'e'i, namutu ena tisuapanaya tikasiñanaya ema Cristo, majapanuyare ema Viya taichavene tamutu eta napekaturana.

⁴⁴Tímiyanawaicha'a eta máchejisira'i ema Pedro, tiúkupaikapa ema Machanewa Viya, máwa'akapa namutu ena tisamararakana'i eta mametarairu'i.

⁴⁵Ena te'ikana'i ema Viya tiasi'ana'i te awasare Jope, ena te'ikanapa'i ema Pedro, ichapeine'i eta naramira'i ena, eta mawa'asirawaka'i ema Machanewa ema Viya, wa'ineni juriyuanaina'i ena,

⁴⁶Tíja'uchawapa ena máwa'aruana'i nasamapa techejikana'i apaechejiriruwanapa, eta nakunachaipa ema Viya.

⁴⁷Taka'e ema Pedro maka'epa: — ¿Naja'apuka naichejika'ini eta énewanena'ni nakaikachasi'ini ena nakana, taicha najakapaipa'i ema Machanewa ema Viya, vikuti'ipa viti?

⁴⁸Taka'e, makawanairipipa nakaikachasi namutu te máijare ema Viákenu Jesucristo. Te tamutupa, naichejikapa ema Pedro wa'i makuyanawane'ini taka'e, manasipanapa te jena sácheana eta naye'e.