Read Ignaciano Hechos 11 Bible Online

Hechos 11 - Ignaciano bible

Hechos 11

¹Taka'e, téchakarewanepa te Jerusalén eta nasuapira'i eta máechejiriruwa ema Viya ena apawasana. Tási'a, napanerekene'apa ena apamuriana apústuleana énapa ena náumuriwana'i.

²Étasera te títekapapa ema Pedro te Jerusalén, tiakapaemajirikakanapa ena apamuriana máinajikara'anaicha'a eta naye'erepiana ena israelítana.

³Nayaserekapa: — ¿Tája'a takayema péjirapanawaka'i ena apawasana, písapawaware pinika'i te namesara?

⁴Ema Pedro májikapapa, mametakawakapa eta máichararakawa'i eta mapaisira'i. Máichawakapa:

⁵— Nuti návine'i te awasare te Jope, nuyujaraka'i, tási'a nukaimairurujipa: Níma'apa eta tiúkupaikapa'i tiási'a'i te anuma takutiyaréni eta ichape sáwana. Tikaitiapusiwakapa'i te tapusime, títekapapa te návi'a'i nuti.

⁶Níma'apa eta apánapanenejikeneana sárareana támakeneanapa'i eta sáwana. Tátiari'i eta táiñe'ikeneana sárareana, kichareana, káyureana.

⁷Tási'a, nusamapa eta ma'u ema Viya, máichanupa: ‘Péchepuka Pedro, pikapaka pinika.’

⁸Nuti nujikapapa: ‘Wa'i, Tata, tajina nimaiya'ini nunika'ini eta jukana maeperajiana taiñema'ikeneana.’

⁹Taka'e, tiápechanuware téchejikanu'i ema Viya, máichanupa: ‘Wa'i pikuimijarecha piti, tikajachakareana maeperajiana eta maepachinaru'i ema Viya.’

¹⁰Mapa'e eta juka máechejisiranu'i ema Viya, te tamutupa, tichawapa tiyapa te anuma tamutu.

¹¹Étaichu'i jena ura'i, títekapanapa ena mapanana ajairana, titanukanuanapa'i eta te peti nítekapi'a'i nuti, wanairukana'i ena, nasi'apa'i te Cesarea.

¹²Taka'e ema Machanewa Viya tiwanekanupa né'ikawaka ena, taicha tájina táeñamawakare'ini, éneichuware té'ikanuanapa ena nani sáisikeneana vichamuriana, vimutu'i visiapa'i te mapena ema achane,

¹³ema timetaka'avipa eta máimaira'i ema ángele tiúkupaika'i eta te mapena, titupi'a'i te mamira'u, taka'e máichapa: ‘Pímiwanereka nákani, puiti te awasare te Jope, náepana ema Simón, éneichuware náimijarecha'i Pedro,

¹⁴ema timetakaviyare eta pichararakawayare eta piúchukuiraya píti, esu piyena, tási'a énapa ena pichichanaveana'i.’

¹⁵Te népanawapa néchejikawaka'i, tíja'uchawapa tiúkupaikapa ema Machanewa Viya, naye'e ena, máwa'akawakapa takuti'i eta máwa'asira'avi'i víti te tépanawainapa.

¹⁶Taka'e, néchapa eta makayemakene'i ema Viákenu, ani maka'e'i: ‘Échawaichu, ema Juan máikachasika'i te une ena achaneana. Étisera tíkachasika'eyare ema Machanewa Viya.’

¹⁷Tiuri puiti, ema Viya máijarakawaka'i ena apawasana ema Machanewa Viya, táichavene'i eta náe'isira'i ema Viákenu Jesucristo, takuti'i eta máijarasira'avi'i víti, tási'a, ¿naja'anusika nuti, eta nákapaemacha'ini ema Viya?

¹⁸Taka'e ena machamuriana tikawasana'i te Jerusalén te nasamapa eta juka, timátinanapa. Nakunachaine'i ema Viya, naka'eipa'i: — ¡Yátupi'i eta majakapirawaka'i ema Viya ena apawasana, eta náeñauchirawa'i. Kuti'avianaipa eta, máichekuarakirenapa eta vítaresiraya!

¹⁹Te nakapakapa ema Esteban, tépanawanapa napanajika'i ena apamuriana té'ikana'i ema Jesús, eta taka'e, tijunanapa, te Fenicia, ena apamuriana tiyananapa te Chipre, tási'a étapa te Antioquía. Ánaki, tikametarairuanapa naye'e ena juriyuana, énachuchasera, wa'i nametaka'ini ena apawasana.

²⁰Tási'a, títekapanapa ena te'ikana'i ema Jesús, eta te awasare Antioquía, nasi'apa'i te Chipre étapa te Cirene, énasera tikametarairuanapa eta maéchejiriruwa maye'e ema Viákenu Jesús.

²¹Eta maitupajijiasirawa ema Viákenu maijaraka'i ena, eta taka'e'i, nasuapa'i ena kamurikeneana achaneana, náinajikapaipa eta naye'erepini'i tamaurikeneana, tási'a náe'ikapa ema Viákenu.

²²Te nasamairirikapa ena nachamuriana tikawasanana'i te Jerusalén, eta juka téchakareana'i, naéwatakapa ema Bernabé, eta te Antioquía.

²³Taka'e, te títekapapa ema Bernabé te Antioquía, máima'apa eta máimikatasirawaka'i ema Viya. Tiúrisamureine'i, maechejirikawakapa namutu ena, eta náetumechirakakaina eta náe'isira'i ema Viákenu.

²⁴Taicha ema Bernabé, tétavikawa'i eta máuriwa, máwa'aru'iware ema Machanewa Viya, tisuapajira'i'i, makasiñawaira ema, eta taka'e kamuriana'i ena tisuapana'i té'ikana'i ema Viákenu.

²⁵Te táekenepa eta juka, ema Bernabé tiyanapa te Tarso, matanupanapa ema Saulo,

²⁶tási'a te máetupiakapa, mámapa te Antioquía. Nanasipa ánaki, etana'i añu naka'e eta nakachanerawaka'i ena nachamuriana'i, kamuriana'i ena náimitureana'i. Te Antioquía eta táepaninewa'i eta nakaijarera'i cristianoana namutu ena té'ikana'i ema Jesús.

²⁷Te jena sácheana'i, natiari'i te Jerusalén ena profetana, tiyananapa nakaiju'e te Antioquía.

²⁸Tási'a titupi'apa, ema tikaijare Agabo te namuri ena machamuriana. Makaimitukasikene'i ema, maye'e ema Machanewa Viya. Mametakawakapa eta tatiari'iyare eta eku'a te tamutu eta awasareana. Eta juka táichawakenewa'i, te tupi'aicha'a'i ema akenukaini emperador Claudio.

²⁹Taka'e, ena té'ikana'i ema Jesús tikawasana'i te Antioquía, napanerechainapa náimiamareka eta nanakiruana, náimikatasiraya ena nachamuriana tikamunuwana'i, énaipa ena tikawasana'i te Judea. Tinakikawanapaipa eta narata'akeneya nanakika.

³⁰Taka'e, náimiamarekapa maye'e ema Bernabé émapa ema Saulo, náijarakayare'i ena náiyara'ana te judea.