Read Ignaciano Hechos 14 Bible Online

Hechos 14 - Ignaciano bible

Hechos 14

¹Taka'e, títekapanapa ema Pablo émapa ema Bernabé eta te awasare tikaijare Iconio. Tiyananaware natupiru eta te peti náurujisirarewa ena juriyuana. Tikámetarairuanawarepa, taka'e, kamurianaware ena achaneana tisuapana'i eta nametarairu'i, ena israelítana énapa ena apawasana.

²Wá'isera téjiakawana ena apamuriana juriyuana masuapajiraira'ana'i, nayurukawakapa ena apamuriana achaneana apawasana'i, nawara'apa náimikaticha ena té'ikanaipa ema Viya.

³Eta taka'e, nanasipanapa ena apústuleana, wa'i nayanawane'ini, tiyere'i eta náimituresira'i, taicha nawara'a'i náetumechawakaya eta nakasiñaira'i ema Viakenu. Taka'e, ema Viya máimikatakawaka'i, máijaraka'i eta náichiraya eta tiáramikareana.

⁴Tási'a, típutsimuri'awanapa ena achaneana tikawasana'i taye'e, ena apamuriana náe'ikapa ena israelítana masuapajiraira'ana, ena apamuriana náe'ikapa ena apústuleana.

⁵Taka'e, tikutikakanapa eta napanereruana ena apawasana énapa ena israelítana énapa ena nákenuriana, eta nakajachiraya ena apústuleana, nawara'apa nakapakaya natupisikaya te márija'iana.

⁶Émasera ema Pablo émapa ema Bernabé, te nasamairikapa, tijunanapa nakaiju'epa taye'e eta awasare Listra, étapa te awasareana Derbe, eta te provincia tikaijare Licaonia.

⁷Etaichuware ánaki eta nakametarairuiya'i eta tiurina maechejiriruwa.

⁸Te jena awasare tikaijare Listra, matiari'i'i ema émana achane masari'i eta máitaresira'i, wa'i táuri'ini tipaika, taicha máimiuchure'i eta mamásariwa'i. Ema maka achane tejaka'i,

⁹maka'eipa tikasamara'i'i ema eta mametarairu'i ema Pablo, taka'e, ema Pablo máesenikapa, máimatiakapa eta makasiñawaira'i ema masari maye'e ema Viya makanarasirayare'i.

¹⁰Taka'e, ema Pablo mapiarakapa muraka: — ¡Péchepuka pétumecha eta piápeana! Ema achane titupi'apa, tepamawapa tipaikapa.

¹¹Eta náimaira'i ena achaneana eta maichakene'i ema Pablo, náramine'i ichape. Taka'e tipiarakanapa te náechejiriruwaichu Licaonia: — ¡Víyana ena nani, achanema'iana'iséra eta náima'i'i eta náukupauchira'avi'i!

¹²Ema tikaijare Bernabé, émara Viya Zeus, ema maka apana tikaijare Pablo, émara Viya Hermes, taicha ema tikametarairura'i.

¹³Tatiari'i eta peti te tasiaparaku eta awasare, mayujarasirare'i ema achane yujarakara'i'i taye'e eta nasiñaraji tikaijare Zeus, taka'e, máepanapa eta turu, maye'e'eakapa eta flure, tási'a ema, enapa ena achaneana nawara'a'i nakapakayare'i náejirayare'i ena nani.

¹⁴Étasera te nasamairikapa ena apústuleana eta náichirayare'i, ichape eta náeñamirawa. Tiúchukanapa, nasiapamuri'apa ena achaneana, tipiarakanapaipa:

¹⁵— Tátanaveana, ¿taja'a takayema icha eta juka? Víti'ichu ekutikeneana achaneana. Tímiteka'avi'i vimetapana'e ínajika eta juka eye'erepiana'i, e'ikayaresera ema Viya, ema yátupikene'i tisama'avi, ema tépiyaka'i eta anuma, eta apake'e, eta ichape une, tétupirika'i tamutu eta víma'akeneana'i.

¹⁶Ánakiapaipa eta makamichira'i ema Viya eta náichira'i eta nawara'akeneana ena achaneana,

¹⁷máimereka'inéni eta émaira'i tépiyaka eta juka táurikeneana, tíjaraka'avi'i eta tikiwa, tiúrinacha'i eta sukurekana vinikakeneana. Máijarasira'avi'i tamutu eta vikamunukeneana, tikurisamurecha'aviware.

¹⁸Tasi'asera, nametakaipa'ineni eta tamauriwa'i eta juka nawara'akene'i naicha. Énasera tikamesawanaichucha eta nawaraira'i tikaparekana eta túruana.

¹⁹Títekapanapa ena israelítana tiási'ana'i te Antioquía te Pisidia, étapa te Iconio. Nayurukawakapa ena achaneana, náimiyusemakawakapa. Natupisisi'apa te márija'iana, nákipaikapa. Eta náimaira'i eta mákipaisirawa'i, náimijachaipapuka tépena'i, nachururupaikapa nákijikayare'i te tachachaku eta awasare.

²⁰Tasi'a, tiyananapa ena machamuriana ema Pablo, náima'apanayare'i. Te náitekapauchapa, náurujiakaipa, émasera técharara'aipa téchepukapa. Te apanapa sache, tiyananapa ema Pablo émapa ema Bernabé te awasare Derbe.

²¹Taka'e te titawanapa eta nakametarairuira'i eta tiurina maechejiriruwa taye'e eta awasare Derbe, kamuriana ena tisuapana'i té'ikana'i ema Jesús, te tamutupa eta náimitusirawaka'i, tiyananawarepa tichawanapaipa eta te awasareana Listra, te Iconio, étapa te Antioquía.

²²Eta te juka awasareana, náimitukawarepa ena té'ikanaripa ema Jesús. Náetumechawakapa eta nakasiñawairaina, eta náe'isiraya ema Viya, tási'a náichawarepa. Échawa eta esiapiraya eta máwasa ema Viya, wa'i maejerarena taicha natiari'ya ena katianaka'eanayare ekatajiwayare táichavene eta é'isira ema Viákenu.

²³Éneichuware, natanukapa nawakurechapa ema naiyakarayare'i te naurujisirarewana náijamuripachu'i, tási'a te taekenepa eta nayujarasira'i tási'a etapa naijimaira'i, nayaseakapa ema Viákenu, eta majaneasiraina táuriwaina eta náe'isiraya namutu ena tikasiñanaipa ema Viya.

²⁴Taka'e, tiyananapa ema Pablo émapa ema Bernabé, tétawajikanapa eta te awasarechichana taye'e eta Pisidia. Náitekapirapa taye'e eta awasare Perge táunawa'i eta provincia Pamfilia.

²⁵Tikametarairuanapa eta máechejiriruwa ema Viya naye'e ena achaneana tikawasana taye'e eta awasare Perge, te tamutupa eta nakametarairuira'i, tiyananawarepa nakaiju'epa eta Atalía;

²⁶étapa náwakuine'i eta nánuesiraya eta ichapeama une, nakaiju'epa eta awasare Antioquía, tichawanapa taye'e eta juka awasare náuchusine'i te tikawana'ianapa maye'e ema Machanewa Viya, étaichuware nayujarauchine'i ena nachamuriana eta majaneasirayare ema, puiti eta juka náitauchakeneipa eta náematane'i.

²⁷Eta náitekapiraipa, nakurujikapa ena nachamuriana, nametakapa tamutu eta máimikatasirawaka'i ema Viya taye'e eta napaisirapa'i, étapa eta najakapirawaka'i ema Viya ena apawasana eta nasuapirawaka'i nakasiñaira'i ema.

²⁸Taka'e, ema Pablo émapa ema Bernabé, tiyere'i eta nanasira'i nakachanerawaka'i ena nachamuriana.