Read Ignaciano Hechos 18 Bible Online

Hechos 18 - Ignaciano bible

Hechos 18

¹Te táekenepa eta juka, ema Pablo, tiúchukapa te taye'e eta awasare Atenas, tási'a makaiju'epa eta te apanaware awasare tikaijare Corinto.

²Ánaki makainunapa ema émana juriyu tikaijare'i Áquila, ema maka máuchusine'i te tinapaika te Ponto. Ema Áquila, tási'a ésupa esu mayena Priscila naitekapirawa'i, násinepa'i te Italia, taicha ema akenuka emperador Claudio makawanairipipa náuchuka namutu ena juriyuana eta te Roma, taka'e ema Pablo tiyanapa maejirapana'i

³tási'a énapa máwayechawaka'i, tikutikakana'i eta náematanerepiana tálabarteroana, tímikatakakanapa eta nakaematanera'i.

⁴Tási'a, tamutu sáwaruana ema Pablo tiyana'i taye'e eta peti náurujisirarewa ena juriyuana, maechejirikawaka'i ena achaneana, makajimuyaka'i eta nasamureana ena israelítana énapa ena apawasana.

⁵Te titekapanapa ema Silas, tási'a émapa ema Timoteo, nasi'apa'i te Macedonia, ema Pablo tépanawapa tikametarairu'i eta máechejiriruwa ema Viya, mawara'apa makajimuyakawakaya ena israelítana ema Jesús émaira'i Cristo ema nakuchapakene'i.

⁶Natiari'isera ena masuapajiraira'ana'i, napanararachapa, tási'a tétatajiakawapa ema Pablo eta táikutiara'i eta namaimitukakarewa'i ena tási'a, máichawakapa: — Étipa ekatapirawayare, taye'e eta ekuñaraki te apana vítaresira, waipa necha nuti. Puiti nuyanainapa nímiturekaya naye'e ena apawasana.

⁷Taka'e, tiúchukapa taye'e eta peti náurujisirarewa ena juriyuana'i, tiyanapa te mapena ema achane tikaijare Ticio Justo, ema tipikaura'i'i me Viya, ema kapena'i te tachakaya eta peti náurujisirarewa ena juriyuana.

⁸Tási'a ema Crispo, ema'i tachutiri'a'i taye'e eta peti náurujisirarewa ena juriyuana, ema masuapa'i ema Viya, ésupa esu mayena, ena machichanaveana, énapa ena tikawasana'i taye'e eta awasare Corinto, eta nasamira'i eta máechejiriruwa ema Viya, namutupa tikaikachasiana'i.

⁹Jena yati, ema Pablo kaimairurujipa, máechejikapa ema Viya, ánipa maicha'i: “Wa'i pikupika, pímiyanawachucha pikametarairu wa'i pikumatina.

¹⁰Taicha kamuriana ena nuchanerana te juka awasare, nuti nutiari'iya te pichakaya, tájina náicharakavima'i ena piánarana.”

¹¹Taka'e ema Pablo manasipa, étana añu y medio maka'e'i taye'e eta awasare Corinto, tímitureka'i naye'e ena achaneana eta máechejiriruwa ema Viya.

¹²Étasera jena sácheana matupi'aira'i ema tuparairuka Galión, akenuka'i ema taye'e eta Corinto tinapaika te Acaya, taka'e tikurujikakanapa ena juriyuana nakaratakapa ema Pablo, námapa te mamira'u ema akenuka, nametauchayare'i

¹³tási'a náichapa ema akenuka: — Ema maka achane ma'apapika'i eta viye'erepi, ema máimitukawaka eta náitsiwachayare eta véjirairaya ema Viya.

¹⁴Téchejiuchawayarepaini ema Pablo, émasera ema Galión makachurikapa, máichapa ena israelítana: — Tiuri, esamanucha'a eti, te tíñe'i'ipuka eta máejekapirawa'i ema maka, tikapareka'ipuka, nuti apana nímisiapawa'ini juésenuina'ini eta eye'e eta nusamira'ena'ini,

¹⁵étasera echéjirirukawanachucha te máijare ema mákani apana, étapa eta eye'erepiana eti, tájina táiñe'ikarena eta juka, wa'i nímisiapawaima'i nuti, taye'e eta juka, íma'ainepa eti.

¹⁶Tási'a máewatakawakapa náuchuka te mamira'u.

¹⁷Taka'e namutu ena apawasana nakaratakapa ema Sóstenes, ema tachutiri'a'i eta peti naurujisirarewa ena juriyuana, náestakapa te mamira'u ema tuparairuka Galión. Émasera wa'i máimisiapawa'ini, wá'iware makatiucha'ini.

¹⁸Manasiraicha'a'i ema Pablo taye'e eta Corinto. Te taekenepa tiyanayapa tichawa'i, tikametawapa naye'e ena machamuriana, makachanepaipa ema Áquila ésupa esu Priscila, tiawaku'anapa tiyananapa te tinapaika te Siria. Te Cencreas, tiane'ipa eta nawakuiraya, charusikawapa eta machuti, eta maitauchirayare'i eta maechejiriruwa.

¹⁹Te titekapanapa te Éfeso, ema Pablo manakikapa ema Áquila esupa esu Priscila, tási'a tiyanapa taye'e eta peti naurujisirarewa ena juriyuana, maechejikawarepa ena juriyuana.

²⁰Ena nawara'apa náiminasicha, émasera wa'i máisapawa'ini,

²¹taka'e tikametawapa naye'e, máichapa: “Te máwara'a ema Viya takuijaichu nichawa, nuchawayare níma'apana'eyare.” Taka'e tíawaku'apa ema Pablo, majunijikapa taye'e eta Éfeso.

²²Te títekapapa taye'e eta awasare Cesarea, tiánuku'apa taye'e eta Jerusalén, máechejipanawakapa ena machamuriana, te táekenepa, tiyanapa te Antioquía.

²³Tiyere'i eta kajeana manasiranuma'i taye'e eta awasare Antioquía, taka'e, tiápechawaware tipaika'i, máejirawakapa'i ena machamuriana taye'e eta awasarechichana te Galacia étapa eta Frigia, maechejirikawakapaipa ena te'ikana ema Viya.

²⁴Te jena sácheana'i, títekapa'i te awasare Éfeso ema émana juriyu tikaijare Apolo, ema máuchure'i te awasare Alejandría. Máituka'i tikametarairu ema, máimatiware yátupi tamutu eta Takapika'ukene Ajureka.

²⁵Tamutu'i maituka maimatiekene'a'i eta maechejiriruwa ema Viákenu, mawapina'i eta timitureka eta maitaresira ema Jesús, etachuchaneni maimati'i eta maimiturapi ema Juan tikachasirikara'i.

²⁶Ema Apolo tepanawapa techejirikawa taye'e eta peti naurujisirarewa ena juriyuana, taka'e te nasamapa ema Áquila esupa esu Priscila, nañajichapa namapa makarichu naimitukapa eta mamaimatikene'i eta yátupikene mache'u ema Viya.

²⁷Manasipanapa ema Apolo, taka'e te mawara'apa tiyanayare'i te tinapaika te Acaya, ena machamuriana náimikatakapa, tikajureanapa naye'e ena nachamuriana'i taye'e eta awasareana makaiju'eyare'i, apaesa táuri eta najakapiraina. Te títekapapa ema taye'e eta Acaya, ichape eta máimikatasirawaka'i ena machamuriana, taicha ema Viya máijaraka'i eta máitupajijiasirawa'i,

²⁸taka'e te namira'u namutu máimituka'iware ena juriyuana, máiminekapaekene'awaka'i taye'e eta Takapika'ukene Ajureka ema Jesús éma'i ema Cristo.