Read Ignaciano Hechos 19 Bible Online

Hechos 19 - Ignaciano bible

Hechos 19

¹Manasipa ema Apolo eta te awasare Corinto, ema Pablo tianukupaikapa eta te máriripa'i, taka'e títekapapa te awasare Éfeso, te jena awasare natiari'i ena apamuriana tisuapajira'iana'i.

²Mayaserekawakapa: — ¿Ejachapaipa eti ema Machanewa Viya, te esuapapa ema Viya? Ena najikapapa: — Wicha'a visamairika'ini eta matiari'ira'i ema Machanewa ema Viya.

³Ema Pablo mayaserekawarepa: — ¿Tája'asika takayema'i eta ekaikachasira'i eti? Tasi'a ena najikapapa: — Eta vikaikachasira'i vé'ika'i eta máimiturapiana'i ema Juan Tíkachasirikara'i.

⁴Ema Pablo mametakawakapa: — Yátupi ema Juan máikachasikawaka'i ena achaneana eta náitsiwachiraya eta náitaresirana, étasera maicha'i, esuapayaresera ema maka té'iekene'apa'i ema Juan tikaijare Jesús émakeneipa'i ema Cristo.

⁵Te nasamapa eta juka, tikaikachasianapa, te máijare ema Viákenu Jesucristo;

⁶Taka'e, manakapa eta mawa'u te nápusiana ena achaneana. Tási'a, tiúkupaikapa ema Machanewa ema Viya, máwa'akawakapa. Témuna'irikawanapa apaechejiriruwana. Tikametarairuanapa eta máechejiriruwa ema Viya.

⁷Eta nasimutuwa'i ena nani, dúseana'i ena ajairana.

⁸Tamutu'i sáwaruana tiyana ema Pablo te peti náurujisirarewa ena juriyuana. Mapana kaje tikametarairu naye'e ena achaneana. Wa'i mapikakarakawa'ini eta makametarairuira'i. Maechejikawaka'i ena achaneana, eta mawasa ema Viya akenuka te anuma.

⁹Natiari'isera ena apamuriana murákasamureana, te jákani náurujisirawana, nakaeka'ichucha eta Arairu máimiturapi'i ema Jesús. Taka'e, ema Pablo térajikawapa eta naye'e, máiputsimuri'apa ena tisuapajira'iana'i, mámamuri'apa taye'e eta escuela máimituresirare'i ema Tirano. Ánaki, tímiyanawapa tímitureka tamutu sacheana,

¹⁰Apina añu eta máimituresira'i, eta maechejiriruwa ema Jesús. Taka'e'i eta máechejiriruwa ema, naye'e ena achaneana tikawasana'i eta te awasarechichana táunawana'i eta Efeso, tinápaika eta Asia. Tási'a, nasamairíkapa, ena israelítana énapa ena griegoana eta maechejiriruwa ema Viakenu Jesús.

¹¹Ema Viya máimikataka'i ichape ema Pablo eta máichirayare eta tiáramikareana,

¹²Ichapemuriana ena achaneana makanararuanapa'i taye'e eta páñuana, kamisapuka makaratajiruanapa'i. Máijarakaware nakaitekapaya naye'e ena nakajumakeneana, tási'a takanarakapaipa. Éneichuware tákijikapa'i ena éreanana.

¹³Tasi'asera natiari'i ena israelítana tipaikanapa'i te calleana tikanararerekana tive'ana eta itiriji nachanewa ena ereanana, nawara'a'i titsamarekawana'i kanararekana ena nawa'aruana ena ereanana te maijare ema Tata Jesús; taka'e, te napauchapa ema makajumakene'i, náichapa: “¡Piti éreana, viwanekavi te máijare ema Jesús máechejisi'akenepa'i ema Pablo, piúchuka te máke'e ema maka makajumakene!”

¹⁴Eta'i eta juka naematane'i ena machichanaveana ema juriyuana tikaijare Esceva, ema maka ema nakenumuri'i ena tiyujarakara'iana. Ena tichana'i eta juka.

¹⁵Tási'a, ema éreana majikapapa: “Nímati ema Jesús, émapa ema Pablo; étisera wa'i nímati'e, ¿nája'a'epuka?”

¹⁶Taka'e, ema achane máwa'aru'i ema éreana majunauchawakapa ena, máe'awakapa mákipapaikawakapa namutu ena siétekeneana, tiyananapa tijunana, najunijikapa eta mapena ema makajumakene, mamuiriareanapaipa, tikajaranapaipa.

¹⁷Tási'a, téchakare'i eta juka naye'e namutu ena tikawasana'i taye'e eta awasare Éfeso, énaipa ena juriyuana enapa ena apawasana, te nasamairirikapa, tipikanarine'i. Taka'e timiyanawa tijuruka eta maichakeneana eta maijare ema Tata Viákenu Jesús.

¹⁸Taka'e, ena té'ikanapaipa ema Jesús, te náurujisirawana te tiyujarakana, timetaurekawanapaipa tamutu eta náejekapirawana eta náitaresira'i,

¹⁹tási'a natiari'i ena apamuriana tikaratakana'i eta iápemarekare, námawakapaipa eta náitukakeneanaini nasiñarajianaini'i, naye'epuka libro, náijukechawakapaipa te namira'u ena nachamuriana. Natupaekene'apasera eta tawachana'i te nawacharekainapa takapayaka'i cincuenta mil moneda eta taplatane.

²⁰Taka'e, ichape eta nasuapira ena achaneana eta máechejiriruwa ema Viya. Kamurianapaipa ena té'ikanapa'i etapa timereka'i eta maitupajijiasirawa.

²¹Te táekenepa eta juka, ema Pablo mawara'apa maejirapanaya eta Macedonia etapa eta Acaya, timiyanawayarepa eta mapaisiraya titekapayare taye'e eta Jerusalén. Taka'e maka'ewarepa te nasi'apa te Jesusalén takamunu'i nuyanayarewa taye'e eta Roma.

²²Taka'e, máewatakawakapa náinapuka ena apinana machamuriana ema Timoteo émapa ema Erasto, tiyananapa taye'e eta Macedonia, émasera manasipanaricha'a taye'e eta Asia.

²³Taka'e, te jena sácheana'i, tisemamurianapa ena apamuriana achaneana taye'e eta Éfeso taicha kamurianapaipa ena té'ikanapa'i ema Viákenu Jesús eta Arairu Achene,

²⁴matiari'i'i ema achane tikaijare Demetrio, ema maka achane, émaini'i plateru'i. Ema maka achane tepiyarekara'i'i eta suye'e tróno esu nasiñaraji tikaijaru Diana maikutipa'i eta taima'i eta templo, eta'i naviya'i eta naplatane ena tímikatakana kamuri'i eta nawachasa'i.

²⁵Makurujikapa ena apamuriana plateroana, tási'a, máichawakapa: “Tátanaveana, eti ímati'i eta juka vématanerepiana'i, eta viviyi'a'i eta vikamunukeneana.

²⁶Íma'aichu'i eti, esama'iware ema Pablo eta máechejiruwa'i ena nani visiñarajiana vépiyaruana viti achaneana, wá'iji yátupina'ini vénaina'ini; ichapemurianaipa ena tisuapana'i, ena achaneana tikawasana'i te juka viáwasa Éfeso, éneichu'iware ena tikawasana'i te awasarechichana táunawana eta Asia.

²⁷Eta juka tikauyayakare'i táemitiekene'a eta táuriwa'i eta vematanerepi. Étaipa eta templo suávi'a'i esu visiñaraji Diana, témitiekenenapapuka, nakuijapapuka nakuecha'i. Náemitisikainapapuka eta táuriwaini'i, náejiraira'i namutu ena achaneana te juka apake'e.”

²⁸Eta nasamira'i ena apamuriana, tisemanaine'i, tipiarakanapa: “¡Tetavikawa eta suichapewa esu Diana visiñaraji viti efesiuana!”

²⁹Taka'e, tisemamurianapa ena achaneana, apanapa eta napanerecha. Natiari'i ema Gayo émapa ema Aristarco, machamuri ema Pablo. Taka'e, ena achaneana nakaratakapa nachururupairikapa ena nani apinana. Námapa taye'e eta náurujisirarewa.

³⁰Ema Pablo mawara'apa masiápamuri'ayare'ini máechejikawakayare'i, énasera ena machamuriana wa'i náisapa'ini.

³¹Éneichuware natiari'iware ena apamuriana tuparairukana'i taye'e eta Asia, majiriareana'i ema Pablo, nakametarapipa wa'i makuímisiapawa.

³²Taka'e, eta náurujisirawa'i tijajamuri'ana'i. Namutuyareni ena achaneana apápipijiwakachucha eta nakayemakeneana'i. Wa'iware náimatiekene'a'ini tája'apuka takayema'i eta naúrujisirawa'i.

³³Tási'a ena apamuriana israelítana náichu'apa ema Alejandro. Nametakapa eta táicharakawa'i eta náurujisirawa'i. Taka'e, nawanekapa eta maechejirikawaka, ena achaneana, tási'a ema titupi'apa te namira'u, máimikutiarachapa te mawa'u namatinacha'a.

³⁴Tási'a, náimatiwanepa ema émaichu'i israelita'i, tépanawanawarepa tipiarakana. Apina ura naka'e eta napiarareresira'i: “¡Tétavikawa eta suichapewa esu Diana visiñaraji viti efesioana!”

³⁵Taka'e, títekapanecha ema taye'e'i Alcalde eta awasare, makamatinakawakapa, maéchejikawapa ena achaneana, maka'epa: “Tátanaveana, emutu eti tachichanaveana eta juka viáwasa Éfeso. Nájina émanáina achane, wa'i makuecha'ini eta véchapajirisira eta templo suávi'a'i esu visiñaraji Diana, taicha eta suáke'e táemiriru'i te anuma.

³⁶Nájina tépuruina eta juka. Ésamirikawachucha, wa'i ekuijaja'uchawa. Epanerechinawa te tiúriyarepuka.

³⁷Taicha nani ajairana iámakeneanapa'i, tájina natapirawaina'ini. Wa'i nakaeka'i esu visiñaraji, wá'iware námeyecha esu eta suyereruwana.

³⁸Tiuri puiti, ema Demetrio, tási'a énapa ena machamuriana, te nawara'apuka timetaurekana, narari'i ena juéseana. Nakaune'i nákani timetaurekanaya, táuchusi'ayare eta natapirawana.

³⁹Té'eserapuka apana jákani ewara'akene, tikaechakasiyare'i takamunu'i eta iúrujikawa taurini.

⁴⁰Tíñe'ikare eta juka íchakene'i, náimijachaipa ena achaneana vícha'i eta revolución puiti jena sache. Tijurikati, tiyasereka'avianaya eta táicharakawa'i eta juka.” Te tamutupa eta máchejisira'i, mawanekapa téjanerekana ena achaneana.

⁴¹Te tamutu eta maechejiriruwa, mawanekapa téjanerekana ena achaneana. Titawapa eta náurujisirawa. Taka'e téjanerekanapa ena achaneana, tamutupa eta nasemira'i.