Read Ignaciano Hechos 2 Bible Online

Hechos 2 - Ignaciano bible

Hechos 2

¹Te títekapapa eta piesta tikaijare'i Pentecostés. Tiúrujikawanapa ena te'ikana'i ema Jesús.

²Taka'e, tiáramikarepa eta tikaema'i te anuke'e, tiási'a'i te anuma takutipa'i eta muraka tékatikawa, tikaemapa muraka te táina'u eta peti návi'a'i ena.

³Tási'a, tiáramikarepa tímerekawa'i eta takuti eta tanene eta yuku, tijara'iwakapa te nápusiana namutu ena náurujiruwana'i.

⁴Tási'a ena, máwa'akawakapaipa ema Machanewa Viya, tiáramikareanapa apaechejiriruwawakapa, taicha eta máwa'asirawakaipa'i ema.

⁵Te jena sacheana'i, natiari'i'i ena juriyuana te Jerusalén, tiási'ana'i te tamutu awasareana, tipikaura'iana'i taye'e eta naye'e religión.

⁶Te nasamapa eta takaemaira'i te anuke'e, tikurujikakanapa ena achaneana, náramine'i ichape, táichavene'i eta nasamira'i ena te naechejiriruwa, ena apánapanenejiana achaneana, apaechejiriruwana.

⁷Ichapeine'i nárami'i, taka'e, náichakakapa: — ¿Wa'i Galileoanaina namutu ena nakana techejikana'i?

⁸¿Tási'asera, naituka'iware eta véchejiriruwapachu vímiuchure'i víti?

⁹Eta te juka ani natiari'i'i ena achaneana nasi'a'airuana'i te apánapanenejiana awasareana, ena tiási'ana'i te Partia, te Media, te Elam, te Mesopotamia, te Judea, te Capadocia, te Ponto, té'epa te tinapaika te Asia,

¹⁰te Frigia, te Panfilia, te Egipto narari'iware ena tiási'ana te Libia tachakaya eta Cirene. Narari'iware ena tiási'ana te Roma, ena tikawasana ani,

¹¹narari'iware ena juriyuana naimiuchure'i ani, énapa ena tepiyakawana'i juriyuana. Éneichuware ena tiási'ana'i te Creta, étapa te Arabia. ¡Tási'a vimutu'isera visama eta véchejiriruwapachu eta táurikakarekeneana tási'akeneana'i me Viya!

¹²Namutupa napanerekene'a'i, tási'a tiyaserejirikakanapa: — ¿Tája'apuka takayema eta juka?

¹³Natiari'isera ena apamuriana nakaeka'ichucha, ánipa naka'e'i: — ¡Nakawa'akeneana ena nani!

¹⁴Taka'e, titupi'apa ema Pedro makachanewaka'i ena únsekeneana apústuleana te namira'u ena achaneana. Téchejikapa muraka, ánipa maka'e'i: “Tátanaveana nujaneanana juriyuana, emutu eti ekawasana te juka Jerusalén, ekatajikanu esamanucha'a, ákaikutiarakenena eta juka nukayemayare.

¹⁵Eti, ímijachawaka'i nakawa'akeneana ena nani, tapaenumawa las nuéverawa yátikara'i.

¹⁶Eta juka íma'akene'i iáramikene'i puiti, mametarapi'i ema profeta Joel, te maka'epa:

¹⁷‘Jarari'iya eta sacheanaya, maka'e'i ema Viya, níjarakayare eta Nachanewa naye'e namutu ena achaneana, ena echichanaveana, ajairana énapa ena esenana, nakametarairuinapa eta néchejiriruwa, ena amaperuana, káimairurujianayare, ena ichávikachichana tikametakasianayare te nawapure.

¹⁸Éneichuware ena nuwanarana níjarakayare eta Nachanewa, máwa'aka'e eta juka sacheana, tási'a, nakametarairuinapa eta néchejiriruwa tási'akene'i nuye'e.

¹⁹Te anuma nímerekayare eta tiáramikareana, tási'a tépusaikawayare eta íti, nukamirikayare eta yuku étapa eta kijare, te juka apake'e.

²⁰Eta sache, tema'ayare eta tajaraiwa mapikuinapa, tási'a ítimeyare eta táima'i eta kaje, eta masacherayare machaviraya ema Tata, jena sacheyare, ichapeyare eta makunachakarewaya.

²¹Énasera ena techejikana'i eta maijare Viya, makuchuku'awakayare.’

²²“Esamacha'a puiti, eti israelitana, eta juka nukayemaya: Emutu eti écha'i eta taichararakawa'i, ema Viya maimereucha'i te emira'u eti, eta émaira'i técha'e ema Jesús Nazareno, máitauchiraya eta maye'e ema eta taurinakene étapa eta tiaramikareana ekutiarareana.

²³Emara ema maka achane, eta taitauchirawaya eta mapanereruana mawara'akene maicha ema Viya, eta taka'e, máisapa'i eta íjararesira'i ema Machicha naye'e ena wínarajikeneana achaneana, ema, émetataru'i te crusu, ema, ímikaparu'i.

²⁴Émasera ema Viya makaechepuka'i ema Machicha, makaitareka'i taye'e eta máepenira'i, taicha wa'i máwara'a'ini mánasi'ini máepena'ini.

²⁵Ema rey David timetaka'avi'i, eta maicharakawa'i ema Jesús, ánipa maka'e: ‘Tata, piti pímararakanu'i eta pikáchaneranu'i; Piti pijaneakanu'i te nuwaure, tajinapa tiakipaikanuima'i.

²⁶Eta Taka'e, tiúrisamure ichape nusamure, Nuwara'aware nujirauchaviyare taicha ichape eta nurisamurewa. Tamutu eta nake'e eta nitaresira nukasiñawa'i piye'e,

²⁷Taicha wa'i pinakikanuima'i eta te nekari wa'iware pisapaima'i naima'a eta tamaurikeneana eta viake'e viti pinerejiruana piwanarana.

²⁸Pímechanu'i eta achene tikaiju'e eta vitaresira, tási'a, nuwapinawayare eta nutiari'irayare te pimira'u.’

²⁹“Nuparapenaveana, vécha'i vimutu eta máepenira'i makaekarasira'i ema viáchukaini David, taicha víma'aicha'a puiti eta máekari.

³⁰Ema David, yátupikene'i profetaini'i ema, makuchapa'i eta táitauchirawayare eta mametakasiwa'i me Viya, eta matiari'irayare'i ema rey, émana mámariekeneyare'i ema.

³¹Ema Viya máimecha'i ema David eta máicharakawayare'i ema Cristo, eta máechepusirayare'i te máekari, wá'iware témitiekene'aima'i eta máke'e.

³²Puíticha, ema Viya makaechepuka'i ema Jesús, tási'a, viti véchejisi'a'i eta juka víma'akene'i.

³³Taka'e, ema Maiya makayapapa te anuma ema Machicha, makaejakapa te mawaure. Taka'e, máijarakapa eta Machanewa ema Viya, ema máitsiwayare'i, taicha ema matupara'aichu'i. Étara eta juka puiti, esamakene'i eta máukupaisira'i eta Machanewa ema Viya te vitaraku.

³⁴Táicha wa'i émaina'ini ema David mápana'ini te anuma; éma'isera téchejisi'a'i: ‘Ema Viya máichapa ema Tata Nákenu: Yare, péjaka te nuwaure,

³⁵eta pikuchapi'ayare eta nukaepuyusiraya te pimira'u ena tikatianakaviana'i.’

³⁶“Tiuri puiti, emutu eti nujaneanana israelítana, nuwara'a ímatiyare ema Jesús émetataru'i, émaira'iware ema Cristo.”

³⁷Taka'e, eta nasamira'i eta juka ena achaneana, ichapeine'i eta náeñamirawa'i te nasamureana. Tási'a, nayaserekapa ema Pedro énapa ena apamuriana apústuleana: — Viparapenaveana, ¿tája'apuka vícharakawaya víti?

³⁸Ema Pedro majikapapa: — Ítsiwacha eta ítaresiraina te mamira'u ema Viya. Eta íjarasirawaya maye'e ema Jesucristo, ekaikachasiya emutu eti. Tási'a, ema Viya makaepa'ainapa eta epekaturana. Tíjaraka'enawarepa eta Machanewa ema Viya.

³⁹Taicha ema mawara'a'i tíjaraka'eyare emutu eti, énapa ena echichanaveana énapa ena apawasana, namutupa nákani manerejiruana'i máichu'akeneana'i ema Viya.

⁴⁰Taka'e'i eta juka máechejiriruwana'i ema Pedro. Ichape eta maecheirikawaka'i, ániwarepa máichawaka'i: — Ínajika eta ewínarajiwana. Érajikawa naye'e ena tíchana eta tamaurikeneana.

⁴¹Taka'e, natiari'i ena tisuapana'i eta máechejiriruwa'i. Enewanepa tikaikachasiana ena. Mapanakeneana mil ena tisuapajira'iana'i.

⁴²Eta nasamararasira'i eta náimiturapiana ena apústuleana, ichapeine'i nasuapa. Tamutu sácheana tikurujikakana'i eta nayujarasirayare'i, étapa eta nanisirayare'i eta pan.

⁴³Ichape eta náramira'i ena achaneana, taicha náima'aipa eta tiáramikareana náichakeneana ena apústuleana.

⁴⁴Namutu ena tisuapajira'iana tiúrujikawanaparaka'i tikajikakana'i eta náima'akeneana.

⁴⁵Náijarareka'i eta náima'akeneana. Tási'a, náijarakapa eta plata ema tikamunuwa'i.

⁴⁶Tamutu sácheana tiúrujikawana'i eta te templo. Tási'a, te napenana tíchu'akakana'i ténikakana'i. Tikachanekakana'iware eta nanisira'i eta pan, náurisamurewa'i.

⁴⁷Najiraucha nakunacha'i ema Viya. Taka'e, namutu ena apamuriana achaneana napikaucha'i ena. Tási'a, tamutu sácheana ema Viya máichu'awaka'i ena apamuriana tisuapanaware.