Read Ignaciano Hechos 20 Bible Online

Hechos 20 - Ignaciano bible

Hechos 20

¹Taka'e, te táekenepa eta jákani sácheana, ema Pablo máichu'awakapa ena machamuriana, maechejimuri'awakapa ena, tási'a, tikametawapa naye'e. Tiyanapa tiánueka te Macedonia.

²Máejirawakapa'i namutu ena machamuriana tikawasanapa'i te awasarechichana. Máetumechawakapa'i eta maechejirisirapa'i, eta máitekapirapa taye'e eta awasare Grecia,

³ánaki manasipanapa, mapana kaje eta mávi'aira'i. Tási'a, mapanerechaipa eta mánuesirayare máe'ikayare'i eta ichape pakure, makaiju'erayare'i te Siria, étasera te máechapa eta nawaraira'i nakapaka ena israelítana, tékekawapa eta mapanereru. Tiyanapa tipaika tichawapa.

⁴Náe'ikapa ena machamuriana, ema Sópatro machicha ema Pirro, tikawasa'i te Berea, ema Aristarco émapa ema Segundo tikawasa'i te Tesalónica, ema Gayo tikawasa'i te Derbe, ema Timoteo, ema Tíquico émapa ema Trófimo, tikawasana'i te tinapaika te Asia.

⁵Taka'e, títekapanapa tínapukana'i, eta te vianuereku tikaijare Tróade.

⁶Víti, te táekenepa eta Pascua vinisira'i eta pan maye'ere lewadura, vipaenumawapa viúchuka taye'e eta Filipos vikapakurepaipa. Sinku sache eta viánuesira. Vikapayamurí'apa te Tróade. Vinasipanapa taye'e, siete sache vika'e.

⁷Te jena tínapuka sache taye'e eta semana, tiúrujikawanapa ena vichamuriana. Viyuvetukayare, vinikayare eta pan táikutiara'i eta máepenira'i ema Viákenu Jesucristo. Taka'e, ema Pablo maechejirikawakapa jena yati, taicha tiúchukayare'i te jena yátikara'i. Tiúna'i eta máechejisiráwaka'i, te enumu'upa yati mapaenumawapa títapirika'i.

⁸Eta viúrujisirawa'i te anuke'e peti te mapanakene piso, tatiari'i kamuri eta namika'uana,

⁹matiari'i ema amaperu tikaijare Eutico, téjaka'i ema te ventanachakaya. Taka'e, eta táunawa'i eta máechejisira'i ema Pablo, ema amaperu téyukaipa'i. Eta máimasira'i, témirikapa te anuke'ekene peti. Taka'e, tiúkupaikawaneanapa nakaechepupánayare'i, ema tépenaipa'i.

¹⁰Taka'e, ema Pablo tiúkupaikapa, mapauchapa ema amaperu, mayuratanauchapa majupa'akapa. Taka'e, máichapa ena machamuriana: — Wa'i ekueñamawa; achaneicha'a.

¹¹Taka'e, tichawawarepa tiápana'i. Taka'e, mayuvetumekapa eta pan tinikanapa. Tímiyanawapa maechejirikawaka'i, tijárara'inechasera eta máechejirísirawaka'i. Te títapirikapa, tiyanapa.

¹²Taka'e, námapa ema amaperu máitareru'i, ichape eta náurisamurewapa'i.

¹³Viti viáwaku'aripa, viyanapa vikainapukawa'i taye'e eta apanaware puerto Aso, eta máwakuiyayare'i ema Pablo, émasera ema Pablo tipaikayare'i tímitupiruchawapa.

¹⁴Te vítekapapa te Aso tiáwaku'apa ema taka'e, viyanapa vikaiju'e'i eta apanaware puerto Mitilene.

¹⁵Te viúchukawarepa taye'e, viánuku'apa te tachakaya eta tiúrupu'i tikaijare'i Quío, te apanawarepa sache, vítekapapa te apanaware tiúrupu'i tikaijare'i Samos. Víchekapa taye'e, vinarakanumapa eta te puerto tikaijare'i Trogilio. Te apanapa sache viyanawarepa, vítekapapa te puerto tikaijare'i Mileto.

¹⁶Wáipa maetawajika'ini te Éfeso, taicha ema Pablo waipa máwara'a'ini máyererejipa'ini eta mapaisirapa'i te táunawa'i te Asia, taicha mawara'a'i títekapawaneyare te Jerusalén, eta máimaiyayare'i eta napiestara tikaijare Pentecostés.

¹⁷Etasera eta mávi'aira'i te Mileto, ema Pablo máimichu'awakapa ena náiyara'ana taye'e eta awasare te Éfeso.

¹⁸Te títekapanapa ena, máichawaka: “Eti ímatinu'i eta taichararakawa'i eta nítaresira'i eta jena sácheana te nítekapaucha'enapa taye'e eta Asia.

¹⁹Tamutu'i sacheana nukaemataneaka'i ema Viákenu, wa'i nusemaima'i taye'e tamutu eta níchawakenewana'i naicha ena nujaneanana israelítana, nawaraira'i títaekene'anuana, tasapi'a tikaiyakanu naicha eta namásuapajiraiwana.

²⁰Tasi'a wa'i nákainajiruwa'ini eta nimitusira'e'i eti eta táurikeneana tiúricha'eyare'i nukajaraika'i eta nimitusira'e'i te epenana.

²¹Namutu ena juriyuana enapa ena apawasana numetakawaka'i namutu eta náeñauchirawaina me Viya, étapa eta nasuapiraina nakasiñairaina ema Viákenu Jesucristo.

²²Puítisera nuyanainapa te Jerusalén, taicha nuwanekasiwa'i maye'e ema Machanewa Viya, wa'i necha nuti tája'apuka nícharakawaya eta ánaki.

²³Takarichu necha eta mametasiranuana ema Machanewa Viya, tamutu eta awasareana nupaisi'anapa'i, timetakanupa'i ema eta nukatajiwairaya, naeratasiranuya taye'e eta nakaeratairare te Jerusalén.

²⁴Tájinasera wa'i nupikakawa, tayanapaneine népenapuka, wa'i néñama eta nítaresira. Nuwara'a nímiyanawaya eta núriwa'i maye'e ema Viya, nuwapinawa'i eta nítauchiraya eta nutuparakasiwa'i maye'e ema Viákenu Jesucristo. Taicha ema tituparakanu'i nukametarairuya eta máemunasira'avi'i ema Viya vimutu viti achaneana.

²⁵Numetaka'e puiti juka nuyaniraya, waipa iápechawaima'i íma'anu, eti ínapureana'i nímitureana'i emutu eti te iáwasanapachu'i, nímituka'e'i tamutu eta vé'isiraya ema Viákenu Jesucristo.

²⁶Eta taka'e, numetaka'e puiti, waipa nútiparakaina te natiari'inapuka téjekapawanaya te etaraku eti,

²⁷tamutu'i numetaka'e eta mawara'akeneana ema Viya, tájina wa'i nuyumurupika'ini.

²⁸Tiuri puiti, ejaneakawayare eti, éneichuware ejaneakayare ena iúmuriwana, taicha etupara'aipa maye'e ema Machanewa Viya eta ejaneasirayare ena manerejiruana'i ema Viákenu, énavene'i tépena'i ema, máepusaika'i eta máitine.

²⁹Taicha nuti necha'i te nuyanapa te juka narajapainapa, nawara'aya tikajanereka'eanaya takutiyare eta ichini kaiturewa, nawarairaina'i nakamitiekene'a ena te'ikana ema Jesús.

³⁰Énaipa ena vichamuriana te etaraku, natiari'iyare ena tímiturekanaya na'apapikayare témejekapawachanaya ena nákani apamuriana vichamuriana, nawarairaina'i é'ikayare eta napanereruana.

³¹Tási'a, ekaunewaicha yátupina, échawayare eta mapanakene añu eta nutiari'ira'i eye'e, tamutu'i sacheana, yátiana nechejirika'e'i, émanapachu'i numetaka, níya'asamure'i taicha eta nímaira'e'i.

³²“Puítisera, nuparapenaveana, nuyanainapa, nuyáseucha'eyaresera me Viya etapa eta maechejiriruwana eta maemunasira'avi'i. Ema titupajijiakawa'i eta maijarasira'eyare eta etumewayare ejurusiraya eta itaresira maijarasira'eyare tamutu eta ikuchi'i, te mawasa anuma.

³³Eta návi'aira'i eye'e, wa'i nujamuracha'ini eta emuiri'ana étaipa eta plata íjarakanu'ini,

³⁴ímararakanu'i eti eta táichararakawa'i eta nukaematanera, nukaematane'i tiási'ana'i te nuwa'uana, nuviya'i eta nukamunukeneana, énapa ena tímikatakanuana'i.

³⁵Tamutu nímituka'e'i taka'eyare eta vikáemataneraya, vímikatasirayarewa ena tikamunuwana, nakajumakeneana. Véchawayare tatiwa eta máechejiriruwa'i ema Viákenu Jesús: ‘Viúripanaya me Viya, te vikajirika eta víma'akeneana naye'e ena apamuriana, wa'i vikujamuracha náijarakasicha'avi.’ ”

³⁶Te tamutupa eta juka maechejirisirawaka'i ema Pablo, tépuyukanapa namutu, tiyujarakapa mayaseuchawakapa me Viya.

³⁷Tási'a, tíya'anapa namutu, najupakapa náetserarekapa ema Pablo.

³⁸Tipanererekanaipa taicha eta mametasirawaka'i eta wáipa tiápechawanaima'i náima'a ema, tási'a, tiyananapa nanapana eta te máwakuiyayare'i.