Read Ignaciano Hechos 22 Bible Online

Hechos 22 - Ignaciano bible

Hechos 22

¹“Tátanaveana, nuparapenaveana. Esamanucha'a eta néchejisira'eya eta nukatiuchirawaya.”

²Eta nasamira'i eta máechejisirawaka'i te hebreo, tésamuriawanapa tikasamara'ianapa. Tina'akawapa téchejika ema Pablo, máichawakapa:

³“Nuti'ichu'i juriyunu. Eta núchusine te Tarso te Cilicia. Ánipasera nujurusine'i te juka Jerusalén. Ema tímitukanu'i ema Gamaliel. Nujurucha'i eta nupikauchira'i yátupi eta viye'erepi náijararu'avi'i ena viáchukanaveanaini. Eta nítaresira'i, nímikapikaucha'i ema Viya, takuti'i puiti eta ímikapikauchira'i eti te juka sácheana.

⁴Eta nítaresira'i, nukatianakawakaini'i ena té'ikana'i ema Jesús. Nemeratakawaka'i nukasiapawaka'i te nakaeratairare ena ajairana énapa ena esenana. Nímikapakawaka'i ena.

⁵Tímatinuichu'i ema nakenumuri ena akenukara'ana, taicha ena tíjarakanuana'i eta ajureka naye'eya ena vijaneanana tikawasana'i te Damasco, náimikatasiranuyare eta nukaratasiraya ena té'ikana'i ema Jesús, taka'e nuyanapa népanawakayare'ini ena, tikaemechara'ianayare'i taye'e eta awasare Jerusalén.

⁶“Taka'e, eta nupaisirapa'i te achene, náne'ipa te Damasco, te jena las dósekeneyarepa eta sache, tiáramikarepa eta tijara'i timíkauchanu'i tiási'a te anuma,

⁷nákipaikawapa te apake'e. Nusamapa ema téchejikanu'i, máichanupa: ‘Saulo, Saulo, ¿tája'a takayema pikatianakanu'i pipánajirikanu?’

⁸Taka'e, nuyaserekapa: ‘¿Nája'avi piti tata?’ Tási'a, tijikapanupa: ‘Nuti Jesús Nazareno, nuti pikatianaru'i, eta pipánajirisirawaka'i ena té'ikanuana'i.’

⁹Éneichuware ena té'ikanuanapa'i náima'a'i eta tijara'i timíkauchanu'i, wá'isera násama'ini ema téchejikanu'i.

¹⁰Taka'e, nuyaserekapa núti: ‘¿Tája'asika níchayare, Tata?’ Tási'a, ema Tata máichanupa: ‘Péchepuka, piyana pítekapa te Damasco. Ánaki timetakaviyare eta pématanerepiyare.’

¹¹Tási'a, púchukinupa taicha eta tijara'i, taka'e, ena nuchamuriana'i tiámanuanapa tichurukanuanapaipa te nuwa'u, nakaitekapiranupa te Damasco.

¹²“Eta ánaki, matiari'i'i ema achane tikaijare Ananías, títaura'i ema taye'e eta mawanairipiana, namutu'i ena vijaneanana tikawasana'i te Damasco nakunacha'i ema.

¹³Ema Ananías títekapa, tíma'apananu'i, te títekapauchanupa, máichanupa: ‘Nuparape Saulo, tachawa eta pímairirisira.’ Taka'e, tíja'uchawapa nímairika, níma'apa ema.

¹⁴Taka'e, timiyanawapa máichanu'i: ‘Ema Viya nakasiñakene'i ena viáchukanaveanaini, píti manerejiruvi'i, taicha mawara'a'i tímimatichaviya eta mapanereru, éneichuware mawara'apa tímimatichavi ema máurikene Cristo, apaesa pisama eta tasi'akene te majaka eta ma'u.

¹⁵Péchejisi'ayare ema eta pikametarairuirayare naye'e namutu ena achaneana pikainunakeneanaya, pimetakayare eta juka pímaira'i étapa eta pisamira'i ema.

¹⁶Puiti, enewane pikaikachasiya te máijare ema Viákenu, piyaseaka maye'e eta takasipairaya eta pipekaturana’

¹⁷“Te nuchawapa te Jerusalén, nuyanapa te mapena ema Viya nuyujarapana'i, tási'a tiápechanuwarepa nukaimairuruji'i.

¹⁸Eta nímaira'i ema Viya, máichanupa: ‘Piyayauchawayare eta piúchusiraya te juka Jerusalén, taicha wa'i tisuapavianaima'i eta péchejisi'airanuya.’

¹⁹Taka'e, nuti níchapa: ‘Tiuri, Tata, énasera, tímatinuana'i eta néstarasirawaka'i nemeratakawaka'i ena té'ikaviana'i, tamutu'i te peti náurujisirarewa ena juriyuanana nutanusi'awakapa'i ena,

²⁰Énerichuware, te nakapakapa ema Esteban ema piwanaraini'i, nutiari'i'iware, nímikataka'iware ena tikapakana'i, nujaneasirawaka'i eta namuiri'ana.’

²¹Émasera ema Viákenu tipamikanuichucha: ‘Piyanayaresera, nuti nuwanekavi pipaikayare naye'e ena apawasana tikawasana'i te tayere'ikeneana.’ ”

²²Taka'e, ena achaneana, eta nasamira'i eta juka, waipa náwara'a'ini nasamararaka; tisemanapaicha tipiarakanapa: “¡Tiúripana máepenachucha ema maka achanetataji! ¡Waipa táurika'ini máitarekaricha'a'ini te juka apake'e!”

²³Murakapanapa eta napiarasira, tivejamu'iakawanapa eta nakamisana eta nasemanewa'i, nave'aware eta máteji, nákijikapa te anuke'e naikutiara'i eta namawaraira'i,

²⁴taka'e, ema nákenumuri ena suntaruana makawanairipipa nakasiapa ema Pablo te taju'e eta cuartel, makawanairipiware náestaka, mawaraira'i máimikaecherachaya ema Pablo eta maviurewa'i, tája'apuka takayema'i eta nasemira'i ena achaneana eta maye'e.

²⁵Étasera te náitiakayarepa eta náestasirayare'i, téchejiuchawanumapa ema Pablo eta maye'e ema nakapitara ena suntaruana: — ¿Tiuripuka estaca ema tikawasa te Roma, wicha'a táimatikare'ini eta matapirawapuka?

²⁶Te masamapa ema nakapitara eta juka, tiyanapa mametakapa ema nakenumuri'i ena, suntaruana máichapa: — ¿Taja'a pikayemaya piti? Ema maka achane tikawasa'i te Roma.

²⁷Taka'e, ema nakenumuri ena suntaruana tiyanapa mapaucha'i ema Pablo, máichapa: — ¿Yátupisareji pikawasa eta te Roma? Ema Pablo majikapapa: — Yátupi.

²⁸Tási'a, maka'epa ema nakenumuri ena suntaruana: — Nuti, ichapemuri plata nákijika eta nusiapirayare eta nukawasairaya eta te Roma. Ema Pablo máichawarepa: — Taicha nuti nimiuchure naye'e ena tikachichanuana.

²⁹Taka'e, térajijikawanapa ena téstakanayare'ini ema Pablo, émaipa ema nákenumuri ena kapitana, te máechapa eta mawasa'i eta Roma, tipikaine'i eta máitiasira'i.

³⁰Te apanapa sache, ema nákenumuri ena suntaruana mawara'apa máechayare tája'apuka eta maviurewa'i ema Pablo eta naye'e ena majaneanana, mavejapuakapa eta cadena máiti'ana'i, makurujikapa ema tachutiri'a énapa ena akenukara'ana. Tiyanapa máma'i ema Pablo, makatupi'apa te namira'u.