Read Ignaciano Hechos 23 Bible Online

Hechos 23 - Ignaciano bible

Hechos 23

¹Taka'e, ema Pablo máesenimuri'apa ena akenukara'ana, máichawakapa: — Nuparapenaveana, nuti eta nítaresira'i puíticha juka nuka'e'i, tájina níchirawaina'i eta nusamirawa'i te mamira'u ema Viya.

²Ema nákenumuri Ananías, tisemapa eta masamira'i eta máechejiriruwana ema Pablo. Makawanairipipa ena titupi'ana'i te machakaya ema Pablo, naesapajakacha.

³Émasera ema Pablo majikapapa: — ¡Pítira té'aviyare ema Viya, táichavene eta apimirairavi! Te juésvi'ipuka píti eta péjasira'i eta te jara, tatuparakavi pímatinuma te tatiari'ipuka eta néjekapirawa apaesa péme'anu. ¿Tája'a takayema wa'i pitaucha eta takayemakene eta viye'erepiana?

⁴Ena apamuriana achaneana natiari'ikeneana'i náichapa: — ¿Tája'a takayema piákapaemacha ema, makapika'ukene'i tiyujarakara'i maye'e ema Viya?

⁵Ema Pablo majikapapa: — Tátanaveana, ákatajikanu ajapanunu, wa'i nécha'ini eta émaira'ipuka, makapika'ukene'i tiyujarakara'i; tájina nímatiya nukajachareka ena tuparairukana, taicha nusuapa eta máechejiriruwa ema Viya, ani taka'e: “Wa'i pikukajacha mákani tuparairuka taye'e eta piáwasa.’

⁶Taka'e, ema Pablo máimatiwakapa ena akenukara'ana, natiari'ira'i ena saduceoana, énapa ena apamuriana fariséuana, tási'a, tijaranupa eta máechejisira'i: — Nuparapenaveana, núti'ichuware fariseonu, éneichuware ena tikachichanuana fariseoana'iware, ekatupiakanu'i te juka emira'u táichavene'i eta nukuchapira'i eta véchepusiraya te táekenenapa eta vépenira.

⁷Te nasamapa eta juka, ena fariséuana énapa ena saduceoana típutsimuriawanapa, napanerekene'apa.

⁸(Taicha ena saduceoana, wa'i nasuapa eta náechepusiraya ena náepenakeneana; wá'iware nasuapa eta natiari'ira'i ena ángeleana; wá'iware nasuapa eta tatiari'ira'i eta náchanewa ena náepenakeneana, énasera ena fariséuana nasuapa tamutu eta juka.)

⁹Taka'e, téchejikanapa muraka; taka'e, te nataraku ena fariséuana, natiari'i'i ena escriwánuana, techepukana, naka'epa: — Ema maka achane, tájina matapirawaina; éneserapuka táechejika'i ema máchanewa ema Viya, ángelepuka mákani, wa'i vikukanara ema Viya.

¹⁰Taka'e, ichape eta semanere, tíñepipa náicha, taka'e, ema nákenumuri ena suntaruana, eta máimaira'i eta nasemawa'i, tipikanecha tája'apuka náicharaka'ini ema Pablo, tási'a máimichu'awanepa ena suntaruana nave'apa ema Pablo, náimijunijikapa te namira'u ena mánarana'i, náimichawawarepa ema Pablo te cuartel.

¹¹Tási'a, te jena yátikene'i máechejikapa ema Viya ema Pablo, máichapa: “Túmevinachucha, Pablo. Taicha tiúri'i eta péchejisi'aira'i eta níjare te juka Jerusalén. Puiti piyanayare eta te Roma, éneyareichu taka'eyare eta péchejisiraya.”

¹²Te apanakenepa sache, natiari'i'i ena juriyuana nakaejakapa eta nakapasiraya ema Pablo, tási'a puiti, víti vinakaya eta juka víkutiaraya, wicha'a vinikaima'i, vuícha'aware veraima'i, tiámainukawa te víturukapa vikapaka ema maka.

¹³Náetavika'i kuarentana ena ajairana, ena tíjarakawana'i, tikaechejiriruwana'i eta juka.

¹⁴Taka'e, tiyananawarepa naye'e ena tuparairukana. Náichapa: — Víti víjarakawapa eta wicha'a vinikaima'i, wa'iware veraima'i, tiamainukawa te vítaekene'apa ema Pablo.

¹⁵Taka'e, puiti eti tuparairukana eyaseakayare ema nakenumuri ena suntaruana mama achichu te emira'u, etanuka eta etseraruina makayasere'i ema Pablo eta juka máichawakenewa'i. Tási'a, víti vitsekawayare eta vikapasirayare ema te víma'apa máuchuka.

¹⁶Tasi'asera ema suchicha esu maparape ema Pablo. Masamairikapa eta juka. Tiyanapa te cuartel mametapana ema Pablo.

¹⁷Taka'e, ema Pablo máichu'apa ema nakapitara ena suntaruana, máichapa: — Piáma ema maka amaperu te mamira'u ema iákenumuri. Jukari'i eta juka mametakaya.

¹⁸Tási'a, ema nakapitara mámapa ema amaperu maye'e ema nakenumuri ena suntaruana. Máichapa: — Ema máena makaeratakene Pablo tiyaseakanu'i nama eta piye'e ema maka amaperu. Juka'iji eta timetakaviya.

¹⁹Taka'e ema nakenumuri ena suntaruana, makaratawauchapa ema amaperu, mámapa máiputsiakapa. Tási'a, mayaserekapa: — ¿Tája'asika eta pimetakanuya?

²⁰Ema amaperu máichapa: — Ena nujaneanana nawara'a'i nakapaka ema nékuka. Achichu tiyaseakavianayare piama ema te namira'u ena tuparairukana. Nakaetseraruya eta tikayasesere'iya eta juka máichawakenewa'i.

²¹Wá'isera pikusuapawaka taicha kuarentana'i ena ajairana tikuchapana'i te pikuchukapa ema. Taicha naitauchayare'i eta nakapasiraya ema Pablo, tási'a napaenumawainapa tinipananainapa. Puiti, pítinecha nakuchapa'i te pisuapayarepuka ena.

²²Taka'e, ema nakenumuri ena suntaruana maewatakapa ema amaperu maichapa eta nakuija makumetaka eta mamétaru'i.

²³Taka'e, ema nakenumuri ena suntaruanana máichu'apa ena apinana makapitarana. Máichapa, eta natsekawa ena dosientuana ena suntaruana tipaikanayare, dosientuanaware ena tiámanaya eta lanza, setentana ena tikaperanayarepa'i. Enápanayare ema Pablo te Cesarea. Iúchuka puiti te las nueve yati.

²⁴Éneichuwa makawanairipipa eta natsekayare étanaina kawayu maperainapa'i ema Pablo. Matuparakawakapa táurina eta nakaitekapiraina maye'e ema Prefecto Félix.

²⁵Enaichu'iware tiamana'i eta májure'i. Taka'e'i eta táechejiriruwapa'i eta májure:

²⁶“Nuti Claudio Lisias nímiamareka eta juka ajureka piye'e piti piúrikene ichapekene piurikene akenuka Félix: néchejikavinuma.

²⁷Ena juriyuana nakarataka'i ema maka achane, nawara'a'i nakapakaya, étasera te néchapa nuti eta makawasairai'i eta te Roma, nuyanapa náma'i ena nusuntarurana nukatiuchapanapa.

²⁸Eta nuwaraira'i necha eta maviurewa, námapa te namira'u ena tuparairukana juriyuana te juka,

²⁹níma'apa tájina matapirawaina'ini táimikapaka'ini táemerataka'ipukaini te, etachuchanenipuka tímikaticha'i eta naye'erepiana.

³⁰Tási'a, nusamairirikawarepa eta nakamesairayare'i nakapaka, taka'e, nímiamarekapa puiti eta piye'e, éneichuware nuwaneka'i ena timetauchana'i náyana ara piye'e; étaina makayasere'iya.”

³¹Taka'e, ena suntaruana náitaucha'i eta wanairipi, námapa ema Pablo te jena yati, namapa te awasarechicha tikaijare Antípatris.

³²Étapa nachavine'i te apanapa sache ena suntaruana ena tipaikanapa'i, énasera ena tikaperana tímiyanawanapa eta nanapaniraya ema Pablo.

³³Taka'e, te títekapanapa te Cesarea, náijarakapa ema akenuka eta ajureka, émapa ema Pablo.

³⁴Te tamutupa eta máechejikuira'i eta ajureka, ema akenuka mayaserekapa ema Pablo távi'a eta maúchusine; te maechapa eta mauchusine'i taye'e te Cilicia,

³⁵Taka'e, ema Akénuka máichapa: — Tiuri, véchayare te náitekapa ena piánarana. Tási'a, makawanairipipa makajane'a te palacio maepiyaruini'i ema ichavikaini Aluresi.