Read Ignaciano Hechos 24 Bible Online

Hechos 24 - Ignaciano bible

Hechos 24

¹Te táekenepa eta sinkukene'i sache, títekapanapa te Cesarea ena tuparairukana. Matiari'i ema Ananías, énapa ena apamuriana náiyakarana'i. Marari'ipa'i ema abogado tikaijare Tértulo. Tiyananapa maye'e ema tuparairuka, timetaurekanapa.

²Taka'e, náepanapa ema Pablo. Te títekapapa, tépanawapa téchejikapa ema Tértulo: — Vi'asulupayachavi, tatachicha tuparairuka, eta viúriwa'i pícha. Pijaneaka'avi eta juka akenukairavi'i eta viye'e.

³Vimutu viti achaneana te awasareana, vikunachavi'i. Vi'asulupayachavi'i, tátachicha Félix, eta piúriwa'i.

⁴Pikatajika'avi, tata, pisama'avi, wa'i pikuyakuji'avi eta juka viyasearuvianaya.

⁵Puiti vímatipa ema maka achane, ti'apapira'i ema, tamutu awasareana te jákani navi'aipa'i ena vijaneana israelítana, mayurukawaka ena, émaichuwa tachutiri'a'i naye'e ena té'ikana ema Jesús Nazareno.

⁶Éneichuware mawara'apa máechipejikayare eta takapika'ukene mapena ema Viya, eta taka'e'i vikaratakapa, víkuñakayare'i taicha taka'e'i eta tawanesira'avi'i eta viye'e ley.

⁷Émasera ema nakenumuri ena suntaruana makatiuchapa, maverejimirauchawakapa te namira'u.

⁸Tiuri, puiti vitupiruwa'i víti eta vimetasiravi. Te piwara'a, pikayasesereru ema eta yátupira'i eta máichawakenewa'i ema maka eta vimetauchira'i puiti.

⁹Taka'e, ena apamuriana natiari'ikeneana'i, éneichuware naka'e'i eta yátupira'i eta juka máechejiriruwana'i.

¹⁰Ema prefecto máimikutiarachapa eta máechejiuchawa ema Pablo. Tépanawapa téchejika ema Pablo, ánipa maka'e: — Tájina táichawa néchejiuchawaya te pimira'u, taicha nécha'i nuti ánakiapaipa eta juéseravi'i taye'e eta viáwasa.

¹¹Tiúripana pikayasesereru, nuti, dóserawa'i sache eta nítekapira'i te jena viáwasa Jerusalén eta néjirairayare'i ema Viya.

¹²Nájina nukajachakenena, nájinaware nímiyusemaruina te taju'e eta templo, étaipa te peti náurujisirarewa ena juriyuana, té'epukaini calleana nukajachareka'ini.

¹³Ena nani tikatianakanuana, tájina naviya náetseraruina'ini eta nametauchiranu'i, waipa tisuapakareana.

¹⁴Nútisera nusuapa takuti'i eta nasuapira'i namutu ena viáchukanaveanaini, émaichu'i nukasiña'i ema Viya, ema nakasiñakene'iware ena viáchukanaveanaini, nuti nusuapa'i tamutu eta táechejiriruwa eta Takapika'ukene Ajureka.

¹⁵Nemeteaka ema Viya makaitarekawakaya ena naepenakeneana'i, viti matapirawareana'i, énapa ena tikatapirawana, puiti, énaipa ena timetauchanuana'i tikutinuana'i eta nasuapira'i eta makaechepusiraya ema Viya ena náepenakeneana.

¹⁶Nuti, eta nusuapira'i tamutu eta juka, wa'i náwara'a'ini néjekapawa'ini te mamira'u ema Viya, wá'iware náwara'a'ini néjekapawa te namira'u ena achaneana.

¹⁷“Tiuri, kamuripa añuana nupaisira'i, taka'e, nuchawapa te náwasa Jerusalén, náminapa'iware eta nanikawachaya ena nujaneanana páureana, éneichuware nukamawa'upa'iwa me Viya.

¹⁸Te tamutupa eta takasipaira'i eta náchanewa étapa eta nuwa'uana, nuyanapa te templo eta nunapanayare'i eta námawa'uana me Viya, eta návi'aira'i te templo, tichimapanuanapa ena nujaneanana tiási'ana'i te tinapaika te Asia, nájinasera achanena'ini nachimapa'ini te nuchakaya, enachucha tichana'i eta semanere.

¹⁹Ena nani nujaneanana, énara títekanayare'ini timetaurekana, te tatiari'ina'ipukaini eta nuviurewa.

²⁰Te wa'ipuka piyasereka ena nani natiari'ikeneana'i te juka, te náimikaecherachapuka eta nuviurewa'i te tikatupiakanuanapa te namira'u ena tuparairukana.

²¹Té'eserapuka eta tíviuchanu'i eta numetasirawaka'i ena ánipa nichawaka'i: ‘Puiti juka sache ekatupi'anu'i te juka emira'u táichavene'i eta nusuapira'i eta véchepusiraya te táekenenapa eta vépenira.’

²²Émasera ema tuparairuka Félix máechaipa'i tamutu eta náe'isira'i ena achaneana ema Jesús, énewanapa makaichepaika eta naurujisirawa'i eta náechejirisirawa'i, máichawakapa: — Tiuri, táka'eine achichupaine vécha eta juka, te máitekapa ema nákenumuri ena suntaruana Lisias, nuyaserekaya ema eta juka íchawakenewa'i eti.

²³Taka'e, ema tuparairuka Félix mawanekapa ema maye'e kapita máimichawa te naerataka ema Pablo, makawanairipiware makaitikaparaka ánipina mauchuka, tási'a naisapachucha majakapa ena tichimarachana, maemunakasareana.

²⁴Tayerewa'i eta sacheana te tichawapa ema Félix, mámapa esu mayena tikaijaru Drusila, ésuichu'iware juriyu'i, náimichu'apa ema Pablo, téchejirikawanayare, taka'e ema Pablo mametakawakapa eta táicharakawa'i eta máe'isira'i ema Jesucristo.

²⁵Eta máechejirisirawa'i ema Pablo, mametakapa eta maitaresira wa'i maichaima'i eta tamaurikeneana etapa eta nakaikuñairaya ena masuapajiraira'ana te apana naitaresira, taka'e ema Félix tiáramekaine'i maichapa: — Puiti'ichu piyana. Nimichu'avine te nitujikawa.

²⁶Ema Félix tikuchapawa'i te máijarakayarepuka eta plata ema Pablo eta máuchukuiraya, eta taka'e'i máimichu'aparaka'i téchejirikawanayare'i maye'e ema.

²⁷Apina añu eta tayerewa'i; tási'a kaitsiwapa ema Félix eta Akenukaira'i, tisiapapa ema maitsiwa'i Porcio Festo. Tasi'asera ema Félix mawaraira'i tiuriyare'e naye'e ena juriyuana maiminasichapa tikaerata ema Pablo.