Read Ignaciano Hechos 26 Bible Online

Hechos 26 - Ignaciano bible

Hechos 26

¹Taka'e, ema Agripa máichapa ema Pablo: — Tiuri, níma'a péchejiuchawapa. Taka'e, ema Pablo makanukechapa eta mawa'u, tépanawapa téchejika'i:

²“Tiúrisamurekare eta nítujisirawa'i néchejika te pimira'u piti rey Agripa, eta nukatiuchirawaya nuti apanawa eta juka nametauchiranu'i ena nujaneanana,

³taicha píti pímati'i tamutu eta juka viye'erepiana viti juriyuana, eta taka'e nuyaseakavi pisamanu eta nukayemaya, nuwara'asera pakamichawa nuye'e.

⁴“Namutu ena juriyuana naimati'i eta namaperuwa, te nuti amuyanuicha'a. Naecha'i ena eta nujurusine'i te nawasa, étapa te Jerusalén.

⁵Éneichuware naecha'i ena eta né'ika'i eta viye'erepiana viti israelítana eta nítaresira'i. Nukachanewaka'i ena fariséuana ena tipíkauchakareanapana.

⁶Puiti tikatupiakanuana'i, táichavene eta vikuchapirawa'i eta mametarapi'i ema Viya, taicha taka'e'i eta máechejiriruwa'i naye'e ena viáchukanaveanaini.

⁷Vimutu viti tachichanaveana'i eta viawapairu Israel, vikuchapawa'i eta juka táitauchirawaya eta máijararu'aviya ema Viya. Eta taka'e'i, rey Agripa, tamutu'i sacheana, yátiana vítati'i ema Viya, táichavene'i eta nukuchapirawa'i, timetauchanuana'i puiti.

⁸¿Taja'a takayema eti wa'i esuapa ema Viya, eta makaitarekawakaya ena naepenakeneana'i?

⁹“Núti'ipa akane nímijacha'i nétupikawa'i eta níchakeneana'i, nukatianasirawaka'i ena té'ikana'i ema Jesús Nazareno,

¹⁰eta juka níchira'i te Jerusalén. Tímikatakanuana'i ena tachutiri'ana naye'e ena tiyujarakara'iana, eta nukaratasirawaka'i ena té'ikana'i ema Jesús, nímisiapirawaka'i te nakaeratairare. Eta nímaira'i eta nakapasirayarepa'i, né'ika'i eta napanereru ena.

¹¹Ichapemuri'i eta némecharekawakapa'i ena nétupiaruanapa'i te peti náurujisirarewa ena juriyuanana. Níminajikawakapaipa eta náe'isira'i ema Jesús. Nékati'aware eta náepuruiraya. Tamutu'i nutanusi'awaka te apanakeneana awasareana tayere'ikeneana.

¹²“Étaichuware tímiyananu'i te awasare Damasco, tiwanekanuanapa ena tachutiri'ana naye'e ena tiyujarakara'iana, tíjarakanuana'i eta wanairuka.

¹³Taka'e tata rey, te achene, te jena sache las dósekenepa, tíja'uchawapa timíkauchanu'i eta majaraiwa ema Viya, tiási'a'i te anuma, tijara'ipana taye'e eta sache, timíkauchanupa, tási'a énapa ena té'ikanuanapa'i.

¹⁴Vimutupa, viákipaikawapa, tási'a nusamapa eta ma'u ema Viya, téchejikanu'i te hebreo, maka'epa: ‘Saulo, Saulo, ¿tája'a takayema pikatianakanu'i? Pésamirikawa, taicha pítijiwaichucha píchawa'i.’

¹⁵Tasi'a, nuka'epa: ‘¿Nája'avi, piti Tata?” Ema Tata tijikapanupa: ‘Nuti ema Jesús, ema pikatianaru'i, ema pi'ikarairu'i.

¹⁶Péchepuka, pitupi'a, nímerekawa'i eta piye'e, taicha nunerejiruvi'i nuwanaraviya. Puiti numetakaviya eta juka pématanerepiyare eta nuye'e, péchejisi'ayare eta níjare naye'e ena achaneana eta juka pímairanu'i puiti, tási'a étapa eta apamuriana nímereruanayare.

¹⁷Puiti nuwanekaviya péchejisi'anuya naye'e ena israelita, tási'a énapa ena apawasana, nuti nukatiuchaviya te taja'ainapuka nawara'a naicharakavi.

¹⁸Puiti nuwanekavi pímitukawakayare eta mawanairipiana maye'e ema Viya. Nakaiju'e ema, apaesa náitujikawa náima'a eta majaraiwa, náinajikapa eta náichakeneasana te timapiku, waipa nakue'ika ema Wínaraji. Nae'ikapa ema Viya, apaesa majapanu'e eta epekaturana. Apaesa nasiapamuri'aya ena náinapureana'i manerejiruana'i.’

¹⁹“Taka'e, tata rey Agripa, nusuapa'i nuti ema Jesús eta mawanesiranu'i,

²⁰nukametarairupa tatiwa'i naye'e ena tikawasana'i te Damasco, te nuchawapa, étapa te Jerusalén, nekekawapa te awasarechichana te Judea. Tási'a núchukapa taye'e eta awasareana tayere'ikeneana naye'e ena apawasana. Numetakawakapa'i eta nákaiju'eraina ema Viya, tási'a náeñauchirawaina náitsiwachiraina eta náitaresiraina.

²¹Étara eta juka tiviuchanu'i naye'e ena juriyuana, eta nakaratasiranu'i te templo, nawaraira'i tikapakanuana.

²²Tasi'asera ema Viya tímikatakanu'i, puíticha. Tási'a, wa'i nucháwakuejechawa'ini nimiyanawa'i nukametarairu'i maye'e ema Viya, namutu ena achaneana. Tájinasera wa'i nu'apapika'ini eta táechejiriruwana'i eta Takapika'ukene Ajureka, eta táitauchirawayare'i:

²³émayare'i ema Cristo tínapuka eta maepenirayare'i, tási'a téchepukayare'i te máekari, te mapanakene sache. Timikaucha'aviyarepa eta majaraiwa, eta tikuchuku'awakaya ena juriyuana, tási'a énapa ena apawasana.”

²⁴Tímiyanawaicha'a téchejika'i ema Pablo, eta máechejiuchirawa'i, témechejikawapa muraka ema Festo: — ¡Máurishivipa, piti Pablo! Táichavene eta piwayuchirawapa pikarawa'u, étapa timaurishichavi'i.

²⁵Émasera ema Pablo majikapapa: — Wá'iya máurishinuina, akenuka Festo, nutupiruwa'i eta juka nukayemakeneana'i. Jé'eware eta yátupikeneana'i.

²⁶Émaipa ema maka rey Agripa máimatiware tamutu eta juka, eta taka'e'i wa'i nupikakarakawa'ini eta néchejisira'i te mamira'u, taicha nukasiñawa'i eta máimatira'i ema. Namutu'iware ena achaneana náecha'i, taicha tájina wa'i tayumurukawa'ini.

²⁷¿Pisuapa'i piti rey Agripa eta nakayemakeneana'i ena profetanaini? Nuti németeaka'i pisuapa'i píti.

²⁸Ema rey Agripa majikapapa: — ¿Pikajimuyakayareni eta nusamure. Nuti apanaware né'ikayare jákani ema Jesús?

²⁹Ema Pablo máichapa: — Tiúripana pisuapawane puítinaichu, yátupina. Éneichuware nuyaseakayare eta esuapiraina emutu eti apamuriana esamararakanuana'i, e'ikawane ema Jesús, tákuti'ini eta né'isira'i nuti. Wa'i ekukutinu eta né'isira'i, namapa'i eta juka cadena.

³⁰Taka'e téchepukapa ema rey, tási'a éneichuware esu Berenice, namutu ena natiari'ikeneana'i náejaruana'i,

³¹tási'a, tiyananapa típutsiakawanapa, náechejisi'ayare'i eta juka. Naichakakapa: — Ema maka achane, tájina maviurewaina táimikapaka'ini. Wá'iware táurika'ini makaerata'ini te nakaeratairare.

³²Tási'a ema Agripa máichapa ema Festo: — Tiúri'ini pikaitika'ini ema maka achane te wa'i makúyasesereka'ini eta mayaniraya te mamira'u ema emperador.