Read Ignaciano Hechos 27 Bible Online

Hechos 27 - Ignaciano bible

Hechos 27

¹Taka'e te tiúripa eta napanereru'i eta náewatasira'aviya te Italia, ema Pablo énapa ena apamuriana nakaeratakeneana'i, natuparakapa ema nakapitara'i ena suntaruana tikaijare Julio, ema akenukaini taye'e eta batallón Augusto.

²Viáwaku'apa te ichape pakure tiási'a'i te anuereku Adramitio. Tiyanayare'i te apanaware anuereku te Asia. Té'ika'avipa'i ema Aristarco tikawasa'i te Tesalónica, tinapaika te Macedonia.

³Te apanapa sache, vítekapapa te anuereku Sidón, taka'e, ema Julio majapanuine'i ema Pablo, máisapapa tiyana máejirapanawaka ena majiriareana, apaesa náechapajirika ena.

⁴Te viási'awarepa te Sidón, vétavikapa eta tiúrupu'i Chipre tinápaikapa'i te sapa, wáipasare viákapapa'ini eta tékatikawa.

⁵Taka'e, vijuchecherekapaipa eta ichapeama une te tachakayapa'i eta Cilicia, étapa eta Pamfilia, vítekapirapa te awasare Mira taye'e eta Licia.

⁶Taka'e, viáwaku'awarepa taye'e eta apanapa pakure máechejiaru'i ema vikapitara Julio, eta juka pakure tiási'a'i te awasare Alejandría, puiti takaiju'eyarepa te Italia.

⁷Te jena sacheana wa'i vijurikatipa'ini eta vipaisirapa'i, muraka'i eta tékatikawa eta viákapirapa'i. Wuekene eta vikaemataneasirapa'i, vítekapirapa te tánara eta anuereku Cnido. Taka'e, vétavikawarepa eta anuereku Salmón te tasumuki eta apanaware tiúrupu'i tikaijare Creta. Viávikupuichapa eta tiúrupu'i, étapa tiávicha'avipa;

⁸Tikajerapa'i eta vipaisirapa'i, vítekapirawarepa taye'e eta apanaware anuereku Buenos Puertu'iji eta tikaijare te tachakaya eta awasarechicha Lasea.

⁹Tikachurika'avipa eta sacheana, taicha viyérerejiwapa'i, tíñe'ipa eta tapaisirawa te ichape une, taicha tinakuchawaipa eta murakana tékatikawa, eta taka'e'i ema Pablo maechejirikawakapa, namutu ena tiavi'anapa'i te pakure:

¹⁰— Tátanaveana, wáipara tiuri vímiyanawa'ini vipaika, taicha tíñe'ikarepa vécharikawa eta vipakure, machu vikamitiaka eta viámakeneana, vítipa machu vérikariana.

¹¹Émasera ema nakapitara ena suntaruana wa'i masuapa'ini ema Pablo, masuapapanapa ema tikaye'e eta pakure.

¹²Taicha wa'i táuri'ini eta anuereku, tájina naicha'ini, napanerechaichucha tiyananayare, taye'e eta apanaware anuereku Fenice taye'e eta juka Creta. Tinapaika'i te kaja'a etapa tauchusine eta sache.

¹³Tépanawapa eta tékatitikawa'i te wana. Tiápajuekawanapa ena, náimijachapa tímiyanawanayare'i tiuri eta náe'isirayarepa'i eta tékatikawa, taka'e tiapajuekawanapa, tijuchecherekanapa eta tiúrupu'i te Creta.

¹⁴Tíja'uchawapa tékekawa eta muraka tékatikawa siripuku, tiási'a te kaja'a tae'achekapaipa eta pakure,

¹⁵tási'a tepanawapa tachurupaikapa eta pakure. Nawara'ainipa náimichawa eta pakure te tachausi, wá'isera nárata'a'ini, tási'a, náisapapa tiáma'avi eta tékatikawa.

¹⁶Témetavika'avipa te apachakaya eta tiúrupu'ichicha tikaijare Cauda, étapa tiávicha'avi'i taye'e eta tékatikawa. Étapa víturusine vijataka eta étasi pakure vichururepa'i. Ichapesera eta vikaemataneasirapa'i.

¹⁷Taka'e, náinunuakapa eta pakure te enureana, apaesa wa'i takuvejiajuecha eta táepakuru'a. Nakamirikapa eta ichapepana tawanterame téwatajikapa'i eta pakure taicha napika'i táma'ini eta tékatikawa, táeja'apaika'ini eta pakure te tajeperuine. Taka'e, táewatajikapaipa eta tékatikawa eta vipakure.

¹⁸Te apanapa sache, tíñe'ichucha eta táepakuru'ana, eta napisira'i ena, náepu'ekawakapa te ichapekene une eta támakenepa'i eta pakure;

¹⁹te mapanakenepa sache, nave'awarepa eta apamuri támakeneanapa'i tayereruwanapaichu'i eta pakure, naechipaikawarepa.

²⁰Ichapemuri'i eta sácheana wa'i takaechera'ini eta sache, étapa eta jarairikiana, eta vímaira'i wa'i tarasa'ini eta tamurakawa eta tépakuka, waipa vémeteakawa'ini viúchuku'a'ini.

²¹Ichapemuri'i eta sácheana wa'i vinika'ini, taka'e, ema Pablo titupi'a te namira'u, máichawakapa: — Tátanaveana, tiúripanaichu'ipukaini esuapanu'ini te wícha'a viúchuka'ini taye'e eta Creta; puiti wa'i vikukatajiwa'ini.

²²Puítisera, wa'i ekupika, taicha nájina tépenaima'i, técharikawayaresera eta pakure, témitiakaya.

²³Taicha yati téchejikanu'i ema ángele mawaneru'i ema Viya, ema nákenu'i nukaematanearu'i,

²⁴Ema maichanu'i: ‘Wa'i pikupika, Pablo, énaipa ena pikachanekeneanapa'i, wá'iware tépenanaima'i táichavene'i eta pitiari'irapa'i eta naye'e, pikamesawayare pítekapaucha ema emperador pitupi'amiraureya.’

²⁵Eta taka'e, tátanaveana, túme'enachucha, taicha nuti nukasiñawa'i maye'e ema Viya. Nusuapa'i eta mametarapiana ema ángele eta nuye'e.

²⁶Tiáma'aviyaresera eta tékatikawa taye'e eta tiúrupu'i, taeja'apaisi'aya eta pakure.

²⁷Apinakenepa semana eta támira'avipa'i eta muraka tékatikawa te ichape une tikaijare Adriático. Te jena enumu'ukenepa yati, ena suntaruana náimatiakapa eta tiáne'ianaipa eta tiájipa'i.

²⁸Náikutiekapa eta táupenawa eta une, máima'apa treinta y seis metro eta táupenawa'i. Te tiyerere'aware, náikutiekawarepa, veinte y siete metro eta táupenawa.

²⁹Taka'e, nakajuchuchukapa eta kuatrukene anclana te ta'ivu eta pakure, taicha napika'i táemestaki'a'ini eta pakure taye'e eta máriana, nayaseakaipa'i ema Viya eta táija'uchawa'ini tijara'i.

³⁰Ena suntaruana nawara'apa tijunanayare'ini, nakukupaikapa eta étasi pakure vikawakure'i. Nakaetserarupa nakajuchuchukayare eta apana anclana te tasumu eta pakure.

³¹Ema Pablo máimatiakawakapa eta nawaraira'i tijunana, taka'e, mametakapa ema nakapitara Julio énapa ena masuntarurana, máichawakapa: — Te wa'i nakunasi te juka pakure ena nani, erikayare eti wa'i iuchuku'aima'i.

³²Taka'e, ena suntaruana náechupikawakapa eta enureana táiti'apa'i eta étasi pakure, náinajikapa te une.

³³Te tijarara'ipa, ema Pablo mawanekapa namutu nanikanuma, máichawakapa: — Enikanumapa apaesaina, taicha apinapa semana eta juka tajina enika'ini taichavene eta éñamirawa'i.

³⁴Tatuparaka enikanuma apaesa táetumecha'e eta iáwaresirayare, nájinasera témitiakaima'i te vitaraku.

³⁵Te tamutupa eta mawanesirawaka'i, ema Pablo mave'apa eta pan; ma'asulupayachapa ema Viya te namira'u. Mavejekapa, tinikapa.

³⁶Tasi'a tétumechawanapa namutu, tinikanapa ena apanaware.

³⁷Kamuri'avipa'i viti támakeneanapa'i eta pakure, docienta setenta y seis eta visimutuwapa'i.

³⁸Te títanesianapa eta nanisira'i, nave'apa ena eta apamuri trigo, nákijikapa te ichape une, nawaraira'i téchakayare eta támakene eta pakure.

³⁹Te tijara'ipa, ena suntaruana wa'i náimatiwa'ini távi'a'ipuka eta návi'a'i, náima'apasera eta tachausi eta tajeperuine, nawara'apa náimikachayacha eta pakure.

⁴⁰Taka'e, náechuakawarepa eta enureana tikaratakana'i eta anclana, tanasiwakapa te ama'e ichape une, nakaesimukawarepa eta taye'eana leme eta pakure, taka'e, nakanukechapa eta étana tawanterame tikarataka eta tékatikawa tiávi'apa'i te tasumu. Táimikatakapa eta napauchiraya eta tajeperuine.

⁴¹Támapasera te taseyereku eta vipakure tekarasumuchawapa te tawaparupa'i tachuchukapa, waipa tayamurika'ini, taka'e, eta tamurakawa'i eta taepaku eta une, takawarakapa eta ta'ivu.

⁴²Ena suntaruana nawara'apa nakapakayare'i ena nakaeratakeneana, napisira'i náitujikawa'ini najuna eta náwaresiraya.

⁴³Émasera ema nakapitara Julio wa'i máisapa'ini, taicha mawara'a'i makuchuku'ayare'i ema Pablo, makawanairipipa ena náitukana'i tiáwarekana napaucha eta tiajipa'i,

⁴⁴Ena apamuriana máitukara'ana'i tiáwarekana nayuratamekawakapa eta tabla, nakuchukuiyawa'i te tiájipa'i. Taka'e'i eta naúchukuira'i namutu.