Read Ignaciano Hechos 3 Bible Online

Hechos 3 - Ignaciano bible

Hechos 3

¹Tiuri, étana sache, te las trespa kápere'i, ema Pedro émapa ema Juan tiyananapa tisiapanayare'i te templo. Te jena ura'i, eta nayujarasira ena israelítana.

²Matiari'i ema achane masari. Máimiuchure'i eta mamásariwa. Tamutu sácheana nanapana te templo. Nanakika te ichapepana tapaja mayaseseresi'ayare'i eta limosna naye'e nákani achaneana tisiapanapa'i.

³Taka'e, ema masari, te máima'awakapa tisiapanayare'i ema Pedro ema Juan, mayaseakawakapa eta limosna.

⁴Taka'e ena, náesenikapa ema masari, tási'a máichapa ema Pedro: — Pímararaka'avi.

⁵Taka'e, máimararakaipa'i, máimijachaipa náijarakayare'i eta plata.

⁶Tási'a, ema Pedro máichapa: — Tájina nakaye'e eta plata uruinapukaini níjarakavi'ini, juka'isera eta juka nukaye'ekene nijarakaviyare: nukanarakaviyare táichavene eta máitupajijisiarawa ema Jesucristo ema Nazareno, nuwanekavi, péchepuka, pipaika.

⁷Taka'e, ema Pedro machuruwauchawanepa te mawa'u waure, makaechepukapa. Énewaneine'i túmewaka eta mapaikeana eta mayukarana etapa eta mamarinapiki.

⁸Taka'e, ema masarini tíja'uchawapa titupi'a, tipaikapa, taka'e, tisiapanapa te templo máe'ikawakapaipa ena, máeteresinapaipa eta mapaisirapa'i, makunachapaipa ema Viya, ma'asulupayachaware eta makanarasira'i.

⁹Namutu ena achaneana náimararaka'i eta mapaisiraipa'i, makunacharine'i ema Viya,

¹⁰te náimatipa ena achaneana ema masarini, ichapeine'i eta náramira'i ánakiapaipa eta mayaseseresira'i eta limosna ema maka, máejasiraparaka te tapaja tikaijare Tiúrinapana taicha eta mamásariwa'i, puítisera tipaikapa, téterekawarepa.

¹¹Taka'e, ema masarini waipa máinajiakawaka'ini ema Pedro ema Juan. Taka'e, náurujiakapa namutu ena achaneana te návi'a'i ena apústuleana te taju'e eta templo, te taye'e eta alar máepiyaru'i ema rey-ni Salomón.

¹²Taka'e, eta máimaira'i ema Pedro ena achaneana náramira'i eta juka, máichawakapa: “¿Taja'a takayema tátanaveana, nujaneanana israelítana? ¿Iárami'i eti eta juka víchira'i víti, ímijachapa vítijiwa'i vikanaraka ema maka achane masarini?

¹³Taicha ema Viya tíjaraka'i eta tamutuirayare marata'a ema Machicha Jesús. Émara ema maka Jesús ema épurukene'i eti, íjarareru'i maye'e ema akenuka apawasajueku Pilato.

¹⁴Ema, mawara'a'ineni makaitika ema Jesús, étisera wa'i áwara'a'ini máuchuku'a'ini ema máurikeneni'i yátupikene'i santu. Masapi'apa eyasesereka'i máuchuku'a ema tikapa'i.

¹⁵Tási'a, émapa ímikapaka'i ema tikaitareka'avi'i. Émasera ema Viya makaechepuka'i te máekari. Véchejisi'a'i víti ema taicha víma'akene'i eta mápechirawa'i títareka.

¹⁶Puiti, ímararaka'i eta manarasira'i ema maka masarini. Eta juka eta tímikaecheracha'i eta machavira'i títareka ema Jesús. Taicha éma'i tíjaraka'avi'i eta vítupajijiasirawa'i eta vikanarasira'i ema maka achane, táichavene'i eta vikasiñaira'i ema.

¹⁷“Tiuri puiti, nuparapenaveana, eti ímikapaka'i ema Jesús taicha wa'i ímati'ini eta émaira'i ema Cristo ema vikuchapakene'i. Énaipa ena tuparairukana eye'e, wá'iware náimati'ini ema.

¹⁸Étasera taka'eyare'i eta juka taicha máechejiriruwaichu'i ema Viya nametakasiwa'i ena profetana eta makatajiwairayare'i ema Cristo.

¹⁹Tási'a puiti, éñauchawainapa ekáiju'enapa ema Viya, apaesa makaepa'a ema tamutu eta epekaturana

²⁰ene eka'e'i etsekawa ejakapayare ema Jesucristo te machawapa. Ema, iákenuyare taicha manerejiru'i ema Viya te tépanawainapa tamutu.

²¹Ema Jesucristo, puiti téjaka'i te anuma. Jarari'iyaresera eta sache eta machavirayare, máetupirikayarewa tamutu. Ánakiapaipa, eta juka mametarapi'i ema Viya naye'e ena maye'eana santu profetanaini eta náimitusirayare ena achaneana.

²²Ema víyara'aini profeta Moisés, mametaka'i ena viáchukanaveanaini: ‘Ema Viya tiwanekanu'i nuti numetaka'eyare eta máechejiriruwa. Títekayare ema apanayare profeta. Ema, tatuparaka nasuapayare tamutu eta mawanairipianayare.

²³Taicha ema Viya máimikapakayare namutu ena masuápajiraira'anayare maye'e ema profeta máiteruyare'i.’

²⁴“Namutu ena apamuriana profetana, émaipa ema Samuel énapa ena náekenereruana profetana, náechejisi'a'i eta juka víma'akeneana'i puiti juka sácheana.

²⁵Ánakiapaicha'a, ema Viya mametakaipa ema viáchukaini Abraham, ánipa maka'e: ‘Nunerejikayare ema émana piámariekene tiúchukayare. Ema, tíjarakaya eta táuriwaya eta náitaresiraya namutu ena achaneana te juka apake'e.’ Puiti títauchawaipa eta juka máechejiriruwa'i ema Viya. Tási'a puiti, eti tituparaka'e'i ínapukayare ejákapa eta máijararu'eya ema.

²⁶Tási'a, eta makaechepusira'i ema Viya ema Machicha Jesús, mawanekapa mametaka'e eti. Te ekasiñawapuka eta maye'e, mákijisina'eyare eta ewínarajiwana. Tíjaraka'enapa eta iúrikakarewayare.”