Read Ignaciano Hechos 7 Bible Online

Hechos 7 - Ignaciano bible

Hechos 7

¹Ema nakenumuri ena tiyujarakara'iana mayaserekapa ema Esteban, te yátupi'ipuka eta nametarapiana'i,

²tási'a, ema majikapapa: “Tatanaveana, nuparapenaveana, esamanucha'a: Eta akane, ema Viya tiúkupaika'i mási'a'i te máwasa anuma. Tímerekawapa maye'e ema viáchukaini Abraham. Ema mávi'aicha'a'i te Mesopotamia, wícha'a mayana'ini makawasa'ini te Harán,

³tási'a maicha'i: ‘Pijunijika eta juka piáwasa, tási'a énapa ena pijaneanana. Piyana eta te apana apake'e, nuti nímechaviyare.’

⁴Taka'e, ema Abraham tiúchukapa eta te Caldea, tási'a tiyanapa te Harán. Te táekenepa eta máepenira'i ema máiyaini, ema Viya mámapa ema Abraham eta te juka apake'e viávi'a'i puiti víti.

⁵Tájinasera máijaraka'ini maye'ena'ini apake'e, ánikuchichaina'ipukaini. Mametaka'isera eta máijarasirayare'i eta apake'e eta naye'eyare'i ena machichanavekeneana te maépenapa ema Abraham. (Nájinaicha'asera machichanaveanaina'ini te jena añuana'i).

⁶Éneichuware ema Viya, ánipa maicha'i, ena pichichanavekeneanayare tikawasarekanaya naye'e ena apawasajuekuana. Tikatajiwanayaresera naicha ena napaureanaya. Nakajireyare. Cuatrociento añuyare eta náichirayare.

⁷Nútisera, níjarakayare eta náikuñayare ena achaneana te jena awasare, nákani tikajireanayare ena pichichanavekeneanayare. Tási'a, te táekenenapa, nukuchuku'awakainapa. Títekanainapa ani te juka najirauchi'anuyare.’

⁸Ema Viya mafirmachapa eta matratune, eta máitauchirayare'i eta juka máechejiriruwa'i maye'e ema Abraham eta manasirayere'i eta maikutiara, eta taka'e'i te úchukenepa sache eta máuchusira'i ema Isaac machicha ema Abraham, manakapa eta maikutiara, éneichuware, máicha'i ema Isaac te makachichapa ema Jacob. Ema Jacob, éneichu'iware máichawakapa'i ena dósekeneana machichanaveana, ena víyanaveanaini.

⁹“Ena machichanaveana ema Jacob, éna'i ena viáchukanaveanaini'i, nakapinarupa ema naparape José, tási'a náijararekapa, apaesa nama'ini te Egipto, émasera ema Viya majaneaka'i ema José,

¹⁰makatiucha'i taye'e eta makatajiwairana, máijaraka'iware eta máitukakeneyare. Ema rey taye'e eta Egipto makajupa'a'i ema José, eta majaneasira'i tamutu eta máima'akeneana, akenuka'i máicha naye'e ena tikawasana te Egipto, tási'a énapa ena maparapenaveana.

¹¹“Taka'e, te jena añuana'i, táitekapauchapa eta eku'a tamutu eta awasareana taye'e eta táunawa'i eta Egipto, tási'a étapa eta Canaán, tási'a, ena viáchukanaveanaini, tájina naviya'ini eta nanikakene.

¹²Émasera ema Jacob te masamairirikapa eta tatiari'ira'i eta tinikakare te Egipto, máewatakapa ena machichanaveana eta nawacharepana eta tinikakare. Eta juka, eta tainapuaraki'i eta nayanira'i.

¹³Te api'ekenénapa eta nachavira'i, ema José tímimatichawapa naye'e ena maparapenaveana, tási'a ema rey mapaenumawapa máimati'i eta énaira'i maparapenaveana ema José.

¹⁴Taka'e, ema José máimichu'apa ema maiya Jacob, tási'a énapa ena natiari'ikeneana'i te mapena, setenta y sínkuana'i eta nasimutuwa'i, ena mamapa namutu te Egipto.

¹⁵Taka'e'i eta mayanira'i ema Jacob makawasaira'i taye'e eta te Egipto, étapa maepeni'a'i, te táekenepa, étaichuware náepeni'a'i ena viáchukanaveanaini.

¹⁶Eta máperánaini ema Jacob, námapa eta te ekari te Siquem eta juka mawachareru'i te maplatane ema Abraham, naye'e ena machichanaveanaini ema Hamor te Siquem.

¹⁷“Te, tiáne'ipa eta máitauchirayare'i eta máechejiriruwa'i ema Viya maye'e ema Abraham. Ena nachichanaveana ena viáchukanaveanaini, ichapemuripa'i eta náejapasira'i te Egipto,

¹⁸tási'a, titupi'apa ema apana rey te Egipto. Waipa makapayaka'ini máimati'ini ema José.

¹⁹Ema maka rey, masapi'apa makatianakawaka'i ena viáchukanaveanaini, makaetemajirikawakapa, makawanairipipa eta wa'i nakueperajika ena amuyana ajairachichana náuchusirawana'i.

²⁰Taka'e, te jena sácheana'i, tiúchukapa ema Moisés, máemunaka'i ichape ema Viya, ema maka amuya, mapana kaje eta nakajurusira'i ena tikachichana.

²¹Te nanakikapa te tachausi eta kajakure, esu machicha ema rey suíchimawapa, suve'apa, ésupa tikajuruka'i suchichakeneyare'i.

²²Taka'e ema Moisés tikaimitukasipa tamutu eta náitupajijiasirawana'i ena tikawasana'i te egipto. Ichape eta máitupajijiásirawa'i eta máechejisirapa'i, étapa eta máematanerepiana'i.

²³“Te tikaye'epa cuarenta añu ema Moisés, mawara'apa tiyana máejirapanawaka ena majaneanana israelítana. Taicha mawasakene'i eta juka awasare.

²⁴Te títekapapa ema Moisés, máima'apa ema émana achane tikawasa te egipto té'arareka'i, máe'a'i ema majaneana ema Moisés. Taka'e, makatiuchapa ema majaneana. Émapa títsirijiekene'a'i. Makapakapa ema tikawasa te egipto.

²⁵Tási'a eta mapanereru'i ema Moisés, mawara'a'i nakaikutiarayare ena majaneanana eta mawaneruira'i ema Viya eta makuchukuirawakayare'i eta te nakatajiwaira'i. Wá'isera nákaikutiara'ini ena.

²⁶Te apanawarepa sache, ema Moisés máima'awarepa ena té'akakana'i, ena apinana ena israelítana. Mawara'apa makaichepaika. Máichapa: ‘Eti echamurikaka'i, ¿tája'a takayema e'akaka eti, ima'a eparapekaka'i?’

²⁷Taka'e, ema túmepana'i maye'e ema apana, máewatajikapa ema Moisés, máichapa: ‘Tája'a takayema pímisiapawa píti eta viye'e ¿Nája'apuka tiwanekavi'i juez viyare'i eta viye'e?

²⁸¿Piwara'apapuka pikapakanuyarewa, takutiyarepuka eta pikapasira'i kape ema egipcio?’

²⁹Te masamapa ema Moisés eta náichira'i, tiyanapa tijuna'i eta te apake'e tikaijare Madián. Ánakipa eta machichaiya'i ena apinana'i.

³⁰Te cuarenta añupa eta mávi'aira'i ánaki, te jena sache, tipairirika'i te máwapa'iana apake'e tachakaya eta mari tikaijare Sinaí. Taka'e, tiúkupaikapa ema ángele eta te távi'a'i eta chéyarajiana yukukiana. Timurujirine'i eta yukukiana.

³¹Eta máimararasira'i ema Moisés, máramine'i. Tiyanapa mapaucha, máimatiyare'i, makachakayapa, masamapa eta ma'u ema Viya. Ánipa máicha'i:

³²‘Nútichucha Viya nakasiñakene'i ena piáchukanaveanaini. Núti'ichu makasiñakeneni ema Abraham, ema Isaac, émapa ema Jacob.’ Taka'e, ema Moisés tiyayakareine'i eta mapisira'i. Waipa mapatsikawa'ini máimaraka'ini.

³³Tási'a, ema Viya máichawarepa: ‘Pivejuchupewachawa eta péparupewa, taicha santu eta juka apake'e piávi'a'i piákatayapairu'i.

³⁴Nímararaka'i eta nakatajiwaira'i ena nuchanerana tiáviana'i te Egipto. Nusama'i eta náiyaira'i, nuwara'a nukatiuchawakayare. Eta taka'e, núkupaika'i numetapanaviya. Nuwanekaviyare piyana taye'e eta Egipto.’

³⁵“Ena israelitana naepuru'i ema Moisés te naichapa: ‘¿Nája'a tiwanekavi'i eta viákenumuriviyare?’, ema Viya mawaneka'i akenukayare'i katiura'iyare'i, eta maimeresirawa'i ema ángele taye'e eta ánipu'iana yukukiana.

³⁶Tási'a, émaichu'i ema maka Moisés makuchuku'awakapa namutu ena majaneanana tiási'ana'i te Egipto. Eta makuchukuirawaka'i, máimereka'i eta tiáramikareana te jena awasare Egipto, étapa eta te tikaijare Mar Rojo étapa te máwapa'iana wáma'i, cuarenta añu maka'e'i ema Moisés eta máichira'i eta juka.

³⁷Émaichuwa ema Moisés tikaechejiriruwa'i naye'e ena majaneanana israelítana: ‘Ema Viya mákaechepukayare ema apanayare mawaneruyare ema Viya, takutiyare eta mawanesiranu'i nuti.

³⁸Émaichuware ema Moisés, ema máichu'akene'i ema ángele tiápanaya eta te jena mari tikaijare'i Sinaí, nakuchapira'i ena achaneana machamuriana te wáma'i. Tasi'a, máechejika'i ema Viya ema Moisés. Te títapirikapa ema Viya, ema Moisés tiúkupaikapa, mametakawakapa ena achaneana tamutu eta mametakasiwana'i me Viya.

³⁹“Eta mávi'aira'i ema Moisés te mari, waipa náima'a'ini ena viáchukanaveanaini. Tási'a, waipa náwara'a'ini náe'ika'ini ema, nawara'apa tichawanayare'i te Egipto.

⁴⁰Taka'enapa, te náichapa ema Aarón: ‘Viwara'a pépiyasina'avi eta visiñarajina táinapumiraucha'avi, taicha waipa vecha tája'apuka máicharakawa'i ema Moisés, ema tikuchuku'a'avi'i taye'e eta viávineni'i te Egipto.’

⁴¹Taka'e, náepiyakapa eta nasiñarajiyare'i, tawasima'i eta chikeru'e. Napiestachawarepa eta náepiyaru'i nasiñaraji. Taka'e, tikaparekanaware eta waka; náijarakasicha'i eta nasiñaraji eta námawa'u'i.

⁴²Émasera ema Viya, eta máimaira'i eta juka, waipa majaneakawaka'ini ena. Máisapapa eta, naéñauchirawa'i te tamira'u eta nasiñarajiana. Tási'a, tamutupa nakasiñaraji eta jarairikiana. Taicha taka'e'i eta Takapika'ukene Ajureka nájure'i ena profetana: Émitisikanu'i nuti, eti israelítana. Waipa nútina'ini ákasiña eta jena kuarentakene'i añu te máwapa'i wáma'i.

⁴³Étasera, ekasiña'i épuyumiraucha'i eta esiñarajiana tikaijare Moloc eneichuware ekasiña'i eta jarairikiana tikaijare Refán, taima'i eta ekasiñakene'i eti naepiyaka'i eta nasiñarajiyare'i. Eta taka'e eti nákijika'eya ánaki te iávine'i ánakipana te Babilonia.’

⁴⁴“Ena viáchukanaveanaini nakaye'e'i te jena máwapa'i wáma'i eta mapenayare'i máukupaisirareyare'i ema Viya. Naitaucha'i naepiyaka'i eta mawara'akene ema Viya eta mawanesira'i ema Moisés te maichapa maepiyakayare'i tawasi eta maima'akene'i.

⁴⁵Ena viáchukanaveanaini najachapapa eta mapena máukupaisirare ema Viya naikuchi'i, tási'a nae'ikapa ena te'ikanapa'i, ema Josué, emapa techa'i eta mapena máukupaisirare ema Viya. Nakaiju'epa te apake'e natupara'a'i te apana awasareana, ema Viya makijikawakapa ena tikawasanaini taye'e. Étapa machimappne'i ema David.

⁴⁶Taicha ema maka rey David máemunaru'i ema Viya, taka'e, ema David mawara'apa tépiyarekaya eta mapenaya ema Viya navi'ayare'i ena mamariekeneana;

⁴⁷Émapa títaucha'i ema machicha tikaijare Salomón, émapa tépiyaka'i eta mapenayare'e ema Viya eta tikaijare templo.

⁴⁸Tiuri puiti, numetaka'eware, ema Viya tikawasa'i te anuke'ekene anuma. Wa'i títekaima'i makapena te templuana vépiyaruanasami viti páureanasami achaneana. Titauchawa'i eta maechejiriruwa ema wanairuka'i:

⁴⁹‘Te anuma távi'a eta nuye'e trono néjasi'a'i, Eta apake'e étapa tavirare eta níwape. ¿Tajaima'ipuka eta peti nepiyakayare nupenayare?, maka'e ema Tata; ¿távi'apuka eta nunarasirareyare,

⁵⁰wá'ipuka échawa eta nútira'i népiyaka tamutu eta juka íma'akeneana'i te juka apake'e?’

⁵¹“Puíti'ipa eti — Timiyanawapa, maka'e ema Esteban — enanakana maepiyaichu'i maiturereana, makiñasi'e, murakasamure'eware ekuti ema kapekaturara'iana. Epiyaichu eta emasuapira'i ema Machanewa Viya. Eti, eta epanereruana takuti eta napanereruana ena iáchukanaveanaini eta nawinarajiwana.

⁵²¿Naja'apukaini ena wanairukana wa'i náemekatajiwacha'i ena iáchukanaveanaini eti? Ena nakapapajika'i nákaini kametarairuanapa'i eta maitekapirayare'i ema yatupikene eta mauriwa, puitisera ema maka titekapaipa'i, etisera ekatichapa ekapakapa.

⁵³Etisera, eta ejachapira'i eta nawanairipiana naye'e ena ángeleana, wa'isera esuapa'ini.

⁵⁴Te nasamapa ema Esteban eta máichira'i, tisemanaine'i, tinikawanaine'i eta nasemanewa.

⁵⁵Émasera ema Esteban wa'i mapikarakawaka'ini taicha máwa'aru'i ema Machanewa Viya, máesenikapa te anuma, máima'aine eta majaraiwa ema Viya, émapa ema Jesús titupi'a'i te waure tinapaika'i eta majaraiwa ema Viya.

⁵⁶Taka'e, ema Esteban máichawakapa ena achaneana natiari'ikeneana'i: — Ésenika te anuke'e, nuti níma'a'i eta anuma téjiaka'i, émapa ema Jesucristo, máena'i titupi'a'i te mawaure ema Maiya.

⁵⁷Énasera eta nasemanewa'i, tichujikiña'awanapa, tijajamuri'anapa náetereuchapa namutu ema.

⁵⁸Nakaratakapa, námapa te tachachaku eta awasare, ánaki eta natupisisi'ayare'i nakapasi'ayare'i te márija'iana; ena té'ana'i nanakikapa eta náepaku'ana, natuparakapa ema amaperu tikaijare'i Saulo.

⁵⁹Taka'e, nana'akaipa natupisika'i, ema Esteban, tiáne'iripa nakapaka, émasera tiyujarauchawaicha'a. Ánipa maka'e'i: “Tata Nákenu Jesús, pijakapinanu eta náchanewa.”

⁶⁰Eta mákipaisirawa'i, tépuyukapa tipiarakapa muraka. Ánipa maka'e: “¡Tata, wa'i pikuikuñakawaka ena nani eta juka náichiranu'i napekatura'i!” Te títapirikapa eta mayujarasira'i, tépenapa.