Read Ignaciano Romanos 1 Bible Online

Romanos 1 - Ignaciano bible

Romanos 1

¹Nuti Pablo, mawanaranu'i ema Viákenu Jesucristo, manerejirunu'iware eta maye'enuyare'i apústule, tituparakanu'i eta nukametarairuirayare eta mapanerechira'i ema Viya eta mawaraira'i makuchuku'aya namutu ena tikasiñawanaya maye'e ema Machicha.

²Ema Viya, ánakiapaipa'i eta juka mametasirawaka'i ena víyara'anaini profetana eta mapanerechira'i eta makuchukuiraya ena achaneana, taye'e eta Santukene Ajureka.

³Eta Takapika'ukene Ajureka, táechejisi'aipa ema Machicha ema Viya, eta máukupaisirayare'i te juka apake'e ema Jesucristo, ema achanekene'i eta máima'i.

⁴Émasera ema Machanewa Viya, maimikacherachapa eta émaira'i Machicha ema Viya eta maitupajijiasirawa'i, etapa eta maechepusirayare'e te maekari.

⁵Puiti ema Viákenu Jesucristo tijapanunu'i eta matuparasiranu'i eta nuyaniraya nupaikaya te tamutu awasareana, nukametarairuyare'i eta najakapakarewayare'i me Viya namutu ena tisuapanayare ema.

⁶Te namuri ena nasimutukeneana, etiari'iware eti apanawa, tíchu'a'e'iware ema Viya, machanerayare'i ema Machicha Jesucristo, mawara'a tauri eta ekaemataneasiraya ema.

⁷Emutu eti ekawasana te Roma, maemunarukene ema Viya manerejiru'ekene'i machaneranayare'i santuana: Nu'asulupayacha ema Tata vikaiyakene eta iuriwaina eta itaresira te maijare ema Viakenu Jesucristo.

⁸Nuti, tétavikawa'i eta nukunachira'i ema Viákenu Jesucristo, nu'asulupayacha'i ema Viya íchavene'i emutu eti, namutu ena achaneana te awasareana téchejisia'eana'i eta yátupira'i ekasiñawaira'i maye'e ema Viya.

⁹Nuti nuwapinawa'i te nusamure eta nukaemataneasira'i ema Viya, eta nukametarairuira'i eta máimiturapiana ema Machicha Jesucristo, ema Viya tímararakanu'i eta néñamirawa'i eye'e eti, nuti, tamutu sácheana te nunarasirana, te néchepusirana, nuyaseucha'e'i me Viya.

¹⁰Nuyaseuchawa'iware eta me Viya te nuyujarasirana eta máisapiranuina'íni nítujisirawaina nupaipiucha'e.

¹¹Ichape eta nuwaraira'i níma'a'e, nímikataka'e'ini eta tajurusiraya eta iáchanewana apaesa murakakenénapaini eta é'isiraya ema Viya,

¹²eti apanawa ímikatakanu'ini wakutikaka'ini, vétumejirikaka'ini eta vikasiñawaira eta vé'isira'i ema Viákenu.

¹³Nuparapenaveana, nuwara'a numetaka'e apaesa echa, ichapemuri'i eta nuwaraira'i níteka níma'apana'e, puíticha, wícha'asera nítujikawa. Eta nuwaraira nuyana eye'e etavene eta nimimaticha'e'ini eta Arairu maechejiriruwa ema Viya, tákuti'ini te nupaikainapa te apana awasareana.

¹⁴Taicha ichape eta néñamirawa'i nuti eta nukatupara'aira'i nukametarairuirayare naye'e namutu ena achaneana te ichapeana awasareana énapa ena tiávi'ana te wáma'iana, ena tiávi'ana te isanitiana, nájina nunerejiruima'i, namutuyare numetakawaka, ena kráyanana ríkuana énapa ena páureana;

¹⁵Taka'e, nuti nutserereakawa'i eta nupaipiuchira'eya te iawasa Roma, nuwaraira'i nímituka'e eta máechejiriruwa ema Viya taye'e eta vé'iru'i.

¹⁶Wa'i nimitsiriawa'ini eta nukametarairuira eta juka Arairu maechejiriruwa, taicha eta juka maitupajijiasirawa'i ema Viya, namutu nákani tisuapanaya najachapaya eta makatiurapi, natiwayare ena juriyuana enepa ena apawasana.

¹⁷Taicha eta Arairu maechejiriruwa timecha'avi eta taichararakawa'i eta makatiuchira'avi'i eta vitápirawanaini: taichavene'e eta vikasiñawaira'i etachuchasera eta vikasiñawaira'i me Viya. Eta taka'e'i eta taechejiriruwa eta Takapika'ukene Ajureka: “Ema matapiraware eta makasiñawaira'i me Viya eta tikaitarekaya.”

¹⁸Taicha vimati eta taiñe'iwa eta maikuñaraki ema Viya, tasi'akene te anuma, naye'eya nanutu ena achaneana wínarajiana eta napanereruana, taichavene eta nawinarajiwa wa'i naisapa'ini eta takaechera'ini eta yatupikene suapakare.

¹⁹Taicha tamutu eta techakarena maye'e ema Viya, ena achaneana naimatiekene'a'i tamutu, taicha emakene ema Viya timecha'i;

²⁰máima'asi'ineni ema Viya Eterno eta viye'e, vécha'isera eta matiari'ira'i, taicha tamutu víma'a eta máepiyaruana'i, etaipa eta apake'e étapa eta tatiari'ikeneana'i, émaichu'i ema Viya téchapajirika'i tamutu eta táepanirawa'i eta juka apake'e, puíticha eta juka viáwakure'i, eta taka'e tajina naetseraruima'i.

²¹Tamapuruji'isera eta náimatira'i ema Viya, wa'i náwara'a'ini nasuapa'ini; wá'iware napikaucha'ini, wá'iware na'asulupayacha'ini ema, tétavikawa'i eta táejekapirawa'i eta napanereruana, étachucha napanerecha'i eta tájiparakana, tajinapa naechakenena taichavene eta namurakasamurewana.

²²Tikasiñawawaikana'i taicha tímijachawana'i títupajijiakawana, tétavikawa'isera eta namaiturerewana'i.

²³Waipa najiraucha'ini ema Viya máepenakaka'i, wáipaware mapikauchakare'ini naye'e, tási'a, náemitisikaipa ema, nasapi'apa najiraucha'i eta nasiñarajiana achanemirana matumeraira'ana'i náipunechucha ena achaneana, tamutuchucha nakasiñarajipa'i kayurepuka, kicharepuka, sáraremirapuka.

²⁴Taka'e, eta máimaira'i ema Viya eta náichira'i eta júkana, máisapapa ema, máinajiakawakapa, naichapa eta natu'usiwana titsiri'akareana'i, tawayuaka'iware eta najamuraraiwana tamaurikeneana, tétavikawa'i eta namaeperajisirakaka'i.

²⁵Tétavikawa'iware eta náepuruira'i ema Viya, émayare'i najiraureyare'ini, tasapi'apa téjekapawana'i, eta náimijachira'i tiúripana eta najirauchira eta nasiñarajiana náepiyaruana'i, tási'a, náemitisikapa ema yátupikene'i tepiyaka'vi'i, jé'ewarekene'i máichekuarakireyare'i eta majirauchakarewa. Amén.

²⁶Eta taka'e, ema Viya makaerajikawakapa, waipa máwara'a'ini máemechawaka'ini, máisapapa náicha'i eta nawara'akeneana'i, tási'a, tétavikawa'i eta náichakeneana'i, narari'i ena esenana, énajikakapa náichakaka'i eta napekaturana, waipa náwara'a'ini ema ajaira;

²⁷énaipa ena ajairana, narari'iware énajikaka'i náichakaka'i eta pekatuana, waipa nákamesa'ini esu esena, nawayuchaipa eta najamurachirakaka'i, wá'ikene nátsiri'a'ini, táichavene'i eta náejekapirawa'i, énajiwapa tímitaekene'awana taye'e eta náikuñayare.

²⁸Taichavene eta namawaraira'i naimati'ini ema Viya, taka'e ema mainajikapa naichapa eta tamaurikeneana napanereruana, apaesa naikutichawa naicha eta nawara'akeneana.

²⁹Tétavikawa'i eta náepiyaresira'i eta napekaturana tamaurikeneana, nave'a'i esu esena apayena, ena amaperuana náicha'i eta natu'usiwana'i, té'ara'iana naye'e nákani matapirawareana'i, tamutupa nawara'a nakaye'e, káetemara'iana, tikapinarura'iana, tikapa'iana, tipiararekana te tisemana, tiwayuarekana, sémarairi'iana, técheji'iana,

³⁰Tíñema'i eta náechejisirana naye'e ena apana achaneana, nakatichaware ema Viya, tiákapaemara'iana, kájamurawana, pínkanillana, tisiñawawairikana, tisipanere'iana eta náichirayare eta apana pekatu nawara'akeneana, masuapajiraira'anaware naye'e ena tikachichana,

³¹wa'ikene nawara'a samara'iana wa'i nawara'a naitaucha eta naichakeneana, tiwayuara'iana eta náechejirisirawana, wa'i témunara'iana, wá'iware japanura'iana, nájina najapanukenena.

³²Náecha'ineni ena eta tamauriwa'i eta júkana me Viya, náecha'iware ena, eta táimikapakasirawakayare'i, tímiyanawanarichuchasera eta náichira'i, náimiakipaika'i nákani apamuriana, émasera ema Viya máitauchayare'i eta náikuñayare.