Read Ignaciano Romanos 10 Bible Online

Romanos 10 - Ignaciano bible

Romanos 10

¹Nuparapenaveana, tétavikawa'i eta néñamirawa'i naye'e ena israelítana. Eta nuyaseserepi me Viya te nuyujarasirana, nuwara'a'i náuchuku'a'ini.

²Nukunachawaka'i ena eta napikauchira'i ema Viya. Téjekapawana'isera ena eta táichararakawa'i eta vijakapakarewa me Viya. Ena, tímiuriakawana'i tiúriana'i.

³Vuícha'asera náimati'ini eta táichararakawayare'i eta najakapakarewa eta nakasiñawairaya me Viya.

⁴Taicha ema Cristo makaepa'aipa eta tasuapakarewa'i eta viye'e eta mawanairipiana ema Moisés. Takarichu eta vikasiñawaira'i maye'e ema, vijakapakareyare me Viya.

⁵Émaichu'i ema Moisés, muraka'i eta matuparasira'i eta majure'i: “Eti, tapamiruana'i ítauchirayare'i tamutu eta wanairipiana. Te yátupipuka ítaucha'i ejákapakarenapa me Viya”

⁶Máejerarepanasera eta vijakapakarewa'i me Viya táichavene'i eta vikasiñawaira eta maye'e: “Wa'i tákamesa'ini: ‘Vitanupana'ini ema te anuma’ — taicha tiúkupaucha'avipa — ;

⁷‘Wá'iware tákamesa'ini vitanupana'ini te máekari’ ” — taicha téchepukaipa'i ema, takamunu'isera eta vikasiñawairaina maye'e ema Cristo te visamureana.

⁸¿Taja'asika eta juka takayemakeneana?: “Eta Takapika'ukene Ajureka tatiari'i'ite pichakaya, etaipa te pijaka etapa te pisamure” Etajuka Maechejiriruwa'i eta juka vikasiñawaira'i me Viya eta vikametarairuira'i.

⁹Te'esera te numetaurekawa te nujaka eta nimatira'i eta émaira'i ema Tata Jesús tási'a nusuapayare'i yatupi te nusamure eta emaira'i yatupi ema Viya tikatiuchanu'i eta nikuñayare'ini, je'ewaresera puiti nujakapainapa eta makatiurapi.

¹⁰Taicha te yatupina visuapa te visamure je'ewarenapa ema Viya tijachapa'aviyare, tási'a vimetaurekawainapa eta vimatira'i eta émaira'i ema Jesucristo, je'ewaresera puiti vijachapainapa eta makatiurapi ema Viya.

¹¹Eta Takapika'ukene Ajureka, ani taka'e'i: “Nákani timetaurekawanayare maye'e ema nuwaneruyare, tájina náichirawaima'i, tamutu tiúriyare eta náitaresira.”

¹²Ema Viya, wa'i máepuruima'i nákani tikasiñawana'i maye'e, tikutikakayare'i eta majakapirawaka ena israelítana énapa ena apawasana, taicha émaichu'i ema Viákenu'i vimutu, tétavikawa eta majapanuira'avi'i, taicha tetavikawa eta mauriwa viye'e vimutu viti vipiarakana eta viyaseasira eta viwara'akeneana.

¹³Taicha ániware taka'e'i eta Takapika'ukene Ajureka: “Ema Viákenu makuchuku'awakayare namutu nákani tipiarakana'i eta máijare táichavene'i eta nakasiñawaira'i maye'e.”

¹⁴Tási'a, ¿Waipaine'i napiarakaima'i taicha ena wa'i nasuapa'ini ema Viya? ¿Waipane'iware nasuapaima'i ema, taicha wa'i nasama'ini eta maechejiriruwa ema, tási'a waipaine'i nasamaima'i taicha najina nakametarairu'ini eta maechejiriruwa ema Viya?

¹⁵¿Tasi'a waipaine'iware kametarairuanaima'i, taicha ena wa'i maewataruina'ini ema Viya? Eta Takapika'ukene Ajureka ani taka'e: “¡Tétavikawa'i eta náurisamurewana ena achaneana eta nasamira'i eta táurikene'i máichuarapi ema Viya eta majakapirawakaya, tási'a tiúriyare eta majakapira'avi'i viti mawaneruana ema Viya!”

¹⁶Wá'isera námutu'ini nasuapa'ini eta juka arairu'i vé'iru'i vímitukakene'i. Ema Isaías, ani maka'e'i: “Tata Nákenu, ¿ánimurianaichu ena tisuapana'i eta juka nímiturapiana nuwana'iana piye'e?”

¹⁷Té'esera te táuri'ini nasama ena achaneana eta vímiturapiana maye'e ema Cristo, titupiruwanayare'i tikasiñawana maye'e.

¹⁸Nutisera nuyasereka'e ¿Wa'ipuka esama'ini eta maechejiriruwa ema Viya? ¡Tiuriesama'ineni! Taicha eta Takapika'ukene Ajureka ani taka'e: “Tamutuipa'i te juka apake'e tikasama'u'i, eta máechejiriruwa ema Viya tamutuipa'iware takaitatapa'i'i te juka takiñakukujiana te apake'e.”

¹⁹Puiti napecha'eware nuyasereka'e ¿Wa'ipuka nakaikutiara'ini ena israelitana? Eta májure'i ema Moisés, ani maka'e'i: “Íma'a, eti israelítana nasapi'aya nujakapawakayare nuti ena apamuriana achaneana énaipa ena máesenikanura'ana'i.”

²⁰Tasi'a jarari'iware eta máechejiriruwa'i, ema Isaías, ani maka'e'i: Tichimawanuana'i ena, wa'ineni napanerecha'ini natanukanu'ini; “nímerekawaipa naye'e ena nani wá'ikene'i náesenikanu'ini, wá'iware nakayasesereru'ini.”

²¹Etasera eta awasare Israel, ániware maka'e ema Viya: “Tamutu'i sacheana eta níchuirawaka'i ena nani israelítana. Tétavikawa'isera eta namasuapajiraiwa'i. Wa'i náwara'a'ini nachawa'ini eta nuye'e.”