Read Ignaciano Romanos 11 Bible Online

Romanos 11 - Ignaciano bible

Romanos 11

¹Puiti nuyasereka'e ¿Émapuka ema Viya makaerajikawaka'i ena machanerana? ¡Wá'i táka'e'ini! Núti'ichu'i israelitanu'i, mámariekenenu'iware ema Abraham, émapa ema apanaware náchuka Benjamín.

²Eta akane, tétavikawa'i eta máemunasirawaka'i ema Viya ena israelítana, puíticha wa'i mainajiakawaka'ini. Échawa eti eta takayema'i eta Takapika'ukene Ajureka eta máichawakenewa'i ema profeta Elías. Ani taka'e'i eta mametauresirawa'i me Viya eta mayujarasira'i:

³“Tata Nukaiyakene, nakapapajikawaka'i namutu ena piye'eana profetana. Puiti nawara'a'iware tikapakanuana. Navetataikaipaware eta pipena. Nukarine'i nuti nítareka'i.”

⁴Tási'a, ema Viya majikapapa: “Narari'i siete mil ena ajairana. Ena wa'i náepuyumirauchaima'i ema nasiñaraji Baal.”

⁵Ene taka'e'i, wa'i námutu'ini ena israelítana masuapajiraira'ana'i me Viya. Natiari'icha'a ánimuriana'i ena manerejiruana'i majapanukene'i.

⁶Emasera ema Viya, manerejikawaka'i, taicha tetavikawa'i eta majapanuirawaka'i. Tajina wa'i étaparakaina eta víchira'ipuka eta táurikeneana. Jé'esare, tijapanu'avi'i táichavene'i eta táetaviuchira'i eta máemunasira'avi'i yatupi.

⁷¿Taka'e, takayema? Ena juriyuana wa'i naituruka'ini eta nawara'akene, emasera ema Viya eta manerejiru'i je'eware eta naituruka'i. Enasera ena apamuriana masuapajiraira'anapa,

⁸Títauchawapa'i eta táechejiriruwa'i eta Takapika'ukene Ajureka: “Émaichu'i ema Viya tikamitisikawaka'i apaesa wa'i nakukaikutiara eta máimiturapiana ema Cristo, maetu'ukiñachapa waipasare samara'iana, mapuchukichapa waipasare timairirikana. Puíticha ene naka'e'i.”

⁹Ema víyara'aini David, ániware maka'e'i: “Eta naima'akeneana ena nani tikasiñawawaikana tenirijirikakana, titsiwachawainapasera etainapa timikuñakayare takutinapa eta yuta'e etainapa tikaratakaya, Apaesa etainapa tiakipaikawakaya tikaikuñanayarepa.

¹⁰Taka'e púchukianainapa wa'ipa nakuimairika; Takaetipapaikainapa eta napaisirayare, pajara'inapa eta nakatajiwairayare tájinapa nanarasiraima'i.”

¹¹Puiti nukayesesereru: ¿Yatupiuka ena juriyuana, eta nakayutetera'i, nanasipa eta nakipaisirawa'i? ¡Wá'ikene énena táka'e! Puítisera nasapi'a ena apawasana najakapakare'i ema Viya, taicha mawara'a máimikatsiriakawaka ena israelítana, apaesa náeñeuchawayare eta maye'e.

¹²Etasera, eta nakipaisirawa'i naejekapirawa'i ena juriyuana etapasera eta tijakapakareana'i me Viya namutuipa ena apánapanenejikeneana achaneana te juka apake'e, ¡Taicha eta nákipaisirawaipa ena juriyuana, puiti eti apawasana, tétavikawa'i eta iúrikakarewaipa!

¹³Németeaka ímatinu'i nuti eta nukatupara'airapa eta nímitusira'eyare eti apawasana. Táitusiawa puiti tétavikawa'i eta nukunachirawa'i eta nukaemataneasira'e'i.

¹⁴Numetakawaka'i ena nujaneanana eta yátupira'i eta ejákapakareira'i me Viya, apaesa níma'a'ini ena, te najamurachayarepuka eta najakapakarewa'i ena apanawa, tikuti'eanayarepuka eti, nuwara'a nanerejikawa'ini nákani náeñauchawa'ini, apaesa náuchuku'a.

¹⁵Páureanasami ena eta nákipaisira'i, esapi'a'i eti apawasana te juka apake'e, tétavikawa'i táuriwa eta ejákapakarewa'i me Viya, ¿Jé'esaresera, tétavikawapa eta tajaraiwaina'ini te visamure te nachaviraina'ini, náeñeuchawapaini? ¡Tímikutijirikawapaini eta makaechepusiraya namutu ena náepenakeneana!

¹⁶Tímikutijirikawa'i nákani tepiyarekana eta pan naijaraka'i ema Viya eta tainapure taimakikene, eta nakamawa'uira'i, tamutu eta taumuriwa kapika'uyare'i. Takutikene nákani tikamawa'uana eta tapare eta yukuki tamutuyare'i eta tatawawajiana tikapika'uyare'i te mamira'u ema Viya.

¹⁷Eta yukuki ulivu, ena'i ena juriyuana, taka'e naechukapa eta tatawana maurira'ana, taka'e nave'apa eta tatawa eta ulivu tikawasa te simena, naemewachakapa naipistakapa eta tatawa, eti'ineni eta apawasana, eta taka'e'i eta machanera'epa ema.

¹⁸Puiti étipawaipa'i machanera'e'i ema Viya, nutuparaka'esera, wa'i ekukasiñawawaika eta ítujisirawa'i esiapa taye'e eta náikuchi'i ena nujaneanana israelítana, taicha wa'i ekachuriakawakaima'i ena eta iúriwa'ineni eta ejákapakarewa'i me Viya, wa'i ekuemitisika eta esiapira'i taicha'i eta nákipaisirawa'i ena masuapajiraira'ana, eti máetumechakeneana ema Viya; wa'i étina étumecha'ini ema.

¹⁹Wá'iwaresera ekupanerecha te esamureana: “Yátupi, ena mákijikawaka'i ema Viya eta namasuapajiraiwa'i, tási'a, tinerejika'avipa víti, taicha viúripana'i víti eta máimaira'avi'i ema Viya.”

²⁰Taka'e, échapawa eti apanawa, machu ákutiriana ena nujaneanana, ena eta nákipaisirawa'i tímikutijirika'i tikaechuana'i, táichavene'i eta namakasiñawaira'i me Viya, puiti étipa náitsiwa'i ena eta ekasiñawaira'i maye'e, wá'isera ekukasiñawawaika, ekuneuchawa eti apanawa, epikaucha ema Viya.

²¹Taicha ema Viya wa'i majapanu'ini eta naechusira eta tatawa eta yatupikene ulivu, eti apanaware wa'i tijapanu'ema'i eta éjekapirawana.

²²Taka'e, tikaecherawapa eta máuriwa'i ema Viya, étapa eta matupiruwa'i. Tétavikawa'i eta matupiruwaira'i eta náerajisirawaka'i ena masuapajiraira'ana. Tétavikawa'iware eta máuriwa'i eta eye'e, eta ímiyanirawa'i eta ekasiñawaira'i eta máuriwa'i. Nákanisera wa'i nakasiñaima'i, makaerajikawakayare.

²³Puiti, te náeñauchawapuka me Viya ena nujaneanana, nakasiñawa'iwarepuka maye'e, ema majakapawakayare'i ena, machichanaveanawarepa. Taicha ema, tétavikawa'i eta majapanuira'i.

²⁴Taicha kape juka eta ítaresira, masuapajiraira'e'i, emaesenisira'i ema Viya, tási'a, tájina'ineni ejákapakarewaina'ini. Esapi'asera eti esiapamuri'aipa ena apamuriana machanerana'i ema Viya. Ene naka'eyare'i ena israelítana. Ena, te náesenikapa ema Viya, kamurikeneanayare'i ena tikasiñawanaya maye'e. Tisiapanayarewa taye'e eta náikuchi'i.

²⁵Nuparapenaveana, nuwara'a numetaka'e eta juka tayumururewaini'i, máimimatichakenenu ema Viya. Eta namurakasamurewa'i ena nujaneanana. Té'esera námutupa nasiapa ena apawasana manerejiruana'i, napaenumawainapa ena nujaneanana náesenikayare ema Viya.

²⁶Te taekenenapa eta juka, ema Viya makuchuku'aya eta mawasa Israel. Taka'e'i eta Takapika'ukene Ajureka: “Ema tikatiura'iyare'i títekayare te Jerusalén masipa'akawakayare eta nawinarajiwana.

²⁷Nuti nítauchayare eta nechejiriruwa naye'e ena te népachiasirawakayare eta napekaturana.”

²⁸Taka'e, ena nujaneanana nakatianakapa puiti eta juka vé'iru'i. Étasarepa ítujisiawayare eti. Émasera ema Viya máemunakawakaichucha, taicha manerejiruana'i ena náchukanaveanaini.

²⁹Taicha ema Viya, tamutu eta máijararuana'i, wa'i máemepururekaima'i. Máitauchayare'iwa tamutu eta máichuarapiana.

³⁰Eti akane eta ítaresirana, wa'i áwara'a'ini esuapa'ini ema Viya. Puítisera eta namasuapajiraiwa'i ena israelítana, ichapeipa'i eta majapanuira'e'i ema.

³¹Éneichuware ena, te jena sácheyare, majapanuwakayare'i ena, takuti eta majapanuira'e'i eti puiti.

³²Taicha ema Viya máimati'i eta emutuira'i emasuapajiraiwa'i, mawara'asera vikutikakayare'i eta majapanuira'avi'i vimutu.

³³¡Ema Viya, tétavikawa'i eta majapanuraiwa'i eta viye'e, tétavikawa'iware eta máitupajijiasirawa'i! Najina naechaima'i eta mawara'akene maicha, apaesaina'ipukaini naimatiekene'a'ini eta mayani'apa'i.

³⁴Taicha “¿nájina tímatiekene'aima'i eta mapanereruana ema Viya? ¿Nájinaware náimituka'ini ema?

³⁵¿Nájinaware náijarakasicha'ini, tája'aina'ipukaini, étanaina'ipukaini máitsirijikawa'ini eta máijarasira'i ema?”

³⁶Taicha tamutu eta tatiari'ikeneana'i, takarichu tási'akeneana'i maye'e ema Viya. ¡Máitawakaka'i eta vikunachira'i ema Viya! Amén.