Read Ignaciano Romanos 13 Bible Online

Romanos 13 - Ignaciano bible

Romanos 13

¹Eti, emutu esuapajira'iyare naye'e ena tuparairukana, taicha ena manakakeneana'i ema Viya eta náwakureana'i. Nájina émanaina máemunasirikawa'ini.

²Eta taka'e, nákani tiákapauchawana'i naye'e ena tuparairukana, tímikutijirikawa'i nákapaemacha'iware ema Viya. Jé'esare, tikaikuñanayare'i ena téjekapawanaipa'i.

³Taicha ena tuparairukana, wa'i étaina tíminakawaka'i ena eta náipikararesiraya nákani tíchana'i eta táurikeneana. Nákanisera tikaviurewana'i, táurika'i tipikanayare'i. Te ewara'a'ipuka iúri naye'e, esuapajira'iya naye'e, tási'a, ena tikunacha'eanainapa.

⁴Taicha ema Viya, éma'i makaejakawaka te náwakureana'i, náurichayare'i ena achaneana. Té'esera ekaviurewa'i, epikayare'i taicha ena wa'i támapurujima'i eta nakatupara'aira'i. Natuparakasiwa'i me Viya eta náikuñasirayare ena tikaviurewana.

⁵Eta taka'e, tawara'aichu esuapajira'iyare naye'e ena tuparairukana, apaesa wa'i nakuikuñaka'e. Tavetijipa esuapajira'iyare taicha eti etuparakasiwa'i me Viya.

⁶Takutikene tatuparaka'e'i eta ewachachirayare eta impuesto. Taicha ena tuparairukana, natuparakasiwaichu'i maye'e ema Viya, náitauchiraya eta nakaemataneasira ema.

⁷Tási'a, ítaura'iyare te jákani nayaseasira'eana eta eyase'ana étapa eta ewachachiraya eta eyase'ana. Epikauchaware nákani tipikauchakareana'i. Émunakaware nákani témunakakareana'i.

⁸Nakuija ekantevéya. Tituparaka'eware émunakakayare naye'e ena apamuriana. Nákani títauchana'i eta juka náemunasirakaka'i, náitauchaipa'i eta tawanairipi'i eta wanairipi.

⁹Eta wanairipiana taka'e'i: “Wá'i pive'aima'i esu apana esena mayena ema apana achane, wá'iware pikaparekaima'i, wá'iware piámerekaima'i, wa'i pipanerechaima'i pikapinaru”, étasera eta juka apamuriana wanairipiana kaikutiarakarepa eta te echéjirirukawa: Pémunakayare ema piparaepiya, tikutiyare eta pémunasirawa'i píti.”

¹⁰Mákani témunara'i'i, wa'i makaetemaima'i ema maparaepiyana. Eta taka'e te vémunakaka, máejerare eta taítauchirawa eta wanairipi.

¹¹Eta taka'eyare eta ítaresirayare. Waipa véjekaracha eta sácheana. Wa'i vímakakarakawaima'i. Vitsekawayare'isera taicha viáne'ipaicha eta jena sácheyare eta máitekapiraya ema vé'iru'i.

¹²Eta vikuchapiraipa eta machavirayare ema Viákenu, takuti'i te vikuchapaipa te jena yati eta tijarara'i. Puiti víma'apa eta tajara'ikene. Tási'a, ínajikapa eta íchakeneanaini te timapiku. Puiti tiápajukawasera eta iúriwana, étapa eta íchakeneanaina te tijara'i.

¹³Ímikapikauchawayare eta ítaresirana. Iúrisiyare tamutu sacheana. Wa'i ekawa'aima'i. Wá'iware ímisiapawaima'i naye'e ena tikapiestarana'i. Wá'iware tú'usi'ema'i. Wa'i tiwayuaka'éma'i eta tájiparakana. Waipa iúme'arerekaima'i, wá'iware ekapinarura'ima'i.

¹⁴Tási'asera, ímereka eta iúriwaina. Ákuti ema Viákenu Jesucristo eta máuriwa'i ema. Waipa ekusuapa eta tajamurachakeneana'i eta iáke'eana. Wá'iware ekupanerecha eta íchiraya eta.