Read Ignaciano Romanos 14 Bible Online

Romanos 14 - Ignaciano bible

Romanos 14

¹Te napaucha'epuka nákani nawara'a'i tisiapamuri'a'eana, echamurianayare, wa'i ekuepuruwaka. Ejapanuwakasera eta ejakapiraya. Te jákani apaesaichu'i eta nakasiñawaira'i maye'e ema Viákenu, napikauchaicha'a eta naye'erepiana ichasiana, wa'i ekuakapaemacha'ini ena.

²Narari'i ena títuka nanika tamutu eta tinikakareana'i. Narari'iware ena apana'i eta naye'erepi, náimijacha'i wa'i tiuri nanika eta waka. Tási'a, máechejirechucha eta nanika. Ena, wicha'a murakanaina'ichaini taye'e eta vé'iru'i. Eti ítuka enika tamutu, wa'i ekuepuruwaka ena wa'i tinikana'i eta waka. Étipa eti máechejire'i eta enika, wá'iware ekuepuruwaka ena tinikana'i tamutu. Taicha majakapakene'ewakaipa'i ema Viya emutu.

⁴Wa'i ekuimijachawaima'i étina'i échawaka eyaseserekara'i ena machanerana'i ema Viya. Ema, téchawaka'i ena mawanarana'i. Máimararaka'i eta táuriwa'i náicha, makunachawaka'i ena. Te wá'ipuka, émaina'i techa eta máemechirawakaya.

⁵Takutikene wá'iware ekuepurukaka taye'e eta sache iúrujisirawana eyujarasirana. Narari'i náimijacha'i tiúripana te sáwarumu'uana. Narari'iware tiúripana'i nasama te luminkumu'uana. Narari'iware tamutuchucha sácheana tiúri'i eta náimaira'i. Étipa échinawa eta sache e'iruyare.

⁶Nákani tiyujarauchawana'i te jena sache, ena nawara'a'i napikaucha ema Viákenu. Ena apamuriana, wa'i tákamesa'ini nanerejika'ini eta sache, ena apanawa napikaucha'i ema Viákenu. Ena naka'e'i nákani tamutuchucha nanika'i, eta napikauchira'i ema Viákenu, na'asulupayacha'i ema. Nákanisera náepuru'i nanika eta jákani tinikakareana, táichavene'iware eta napikauchira'i ema Viya, na'asulupayachaware ema. Tamutu'i tiuri naicha.

⁷Eta vítaresira tási'a étapa eta vépenira, wa'i vítijiriruwaina'ini, émapa técha'avi'i ema Viya.

⁸Te vítarekapuka, te vépenapuka, eta vikunachirayare'i ema viákenu Jesucristo. Tayanapane vépena maye'e'avi'isera ema Viya.

⁹Eta taka'e máepenina'avi'i ema Cristo, tási'a tiapechawawarepa títareka'i, apaesa émainapa Viákenuya viti vítareruanaicha'a, tási'a énapa ena náepenakeneanaipa.

¹⁰¿Taja'a takayema epanararaucha'i ena echamuriana? ¿Taja'a takayema épuru'i? Échawaichu eta vimutuirayare vikayasesere'iya te mamira'u ema Viákenu.

¹¹Taicha eta Ajureka taka'e'i: “Níjarakawa'i eta nítaresira, maka'e'i ema Viákenu, Namutu tépuyumirauchanuanayare te numira'u tási'a namutuinapa najirauchaya ema Viya.”

¹²Taka'eyare'i, émanapachu'aviya vimetaurekawaya maye'e ema Viya.

¹³Eta taka'e waipa vipanararauchakakaima'i. Waipa vikukicha, machu ímiakipaikawaka ena echamuriana eta nakasiñawaira'i maye'e ema Viya.

¹⁴Nuti necha'i eta tamajinaira'i timaeperajika'avima'i eta tinikakareana. Narari'isera ena vichamuriana, tépuruana eta jákani tinikakareana, napisira'i eta tamaeperajisirawakayare'íji ena.

¹⁵Tási'a puiti, wa'i ekuimiyusemaka ena nani, wá'iware ekuakapaemacha'ini taye'e eta jákani tinikakare, machu ímikainajiruchawaka ena echamuriana mawachareruana'i ema Cristo eta máepenira'i.

¹⁶Máchuware émechejisiawa taye'e eta ímatikene'i tiúri.

¹⁷Taicha eta Mawasa akenuka ema Viya, wa'i étaparakaina jákani vinikakenerepiana, vérakeneana. Étaipa eta tikunachakare'i maye'e, eta víchirapaipa eta táurikeneana. Mawara'a'iware vítukawa'ini eta vikurujisirakaka'i, apaesa táimiyanawa'ini eta viúrisamurewa vimutu maicha ema Machanewa Viya.

¹⁸Mákani títati'i ema Cristo, tétavikawa'i eta ekurisamurechira'i ema Viya, tási'a ekunachakare'iware naye'e ena achaneana.

¹⁹Taka'e, vitanukayare eta viúriwaya, apaesa vétumechakaka.

²⁰Wa'i ekuemepurureka eta maepiyaru'i ema Viya, taichavene'i jákani tinikakare. Yátupikene eta táuriwa'i tamutu eta tinikakare. Tájina táimanena. Énasera nákani tépuruana'i jákani tinikakare, te nanikapuka, tikauyayakare táimiakipaika taye'e eta nakasiñawaira'i me Viya.

²¹Tiúripana wa'i ekunika eta waka, wá'iware ekuera eta vino, machu étaina táimiakipaika ena echamuriana.

²²Eti yátupira'i ekasiñawaira'i te mamira'u me Viya. Tétavikawa eta náurikakarewaya nákani náimati'i eta náuriwa'i te nasamure.

²³Nákanisera tísapawana'i tinikana, tiáwamira'uana'i, énajiwapa tímiakipaikawana'i eta nanisira'i, taicha wa'i tátupiruwa'ini eta nanisira'i. Tamutu jákani wa'i tátupiruwa'i eta víchira'i, pekatuana'i.