Read Ignaciano Romanos 15 Bible Online

Romanos 15 - Ignaciano bible

Romanos 15

¹Taka'e, viti vímatiana'i eta táuriwa'i eta vinisira'i eta jákani tinikakareana, tituparaka'avi'ipa véchapajirikawakaya ena vichamuriana tímijachana'i wa'i táuri'ini eta nanisirapuka. Wákaye'e pakamichawa naye'e. Waipa vipanerecha'ini étachucha vikurisamurechirawa vítijirikawa.

²Emutuchuchasera eti, ekurisamurechaya ena eparaepiyana. Éñamawa eti eta náurikakarewayare, apaesa tápajukawapaipa eta nasuapiraina eta vé'iru'i.

³Taicha ema Cristo, wa'i mákarichu'ini makurisamurechawa'ini. Ema, tikurisamurecha'i ema Maiya te tamutu. Eta taka'e, nakatianaka'i ena achaneana wínarajikeneana. Tási'a, títauchawa'i eta tametarapi eta Takapika'ukene Ajureka, ani taka'e'i: “Nuti nímiyanawa'i eta nítauchira'i eta piwanairipiana eta nuye'e, tayanapane eta náume'airanuana'i ena piánarana'i” taka'epa eta Takapika'ukene Ajureka.

⁴Ema Viya tiwaneka'i ena víyara'anaini profetana nájucha'i eta máechajiriruwana te Takapika'ukene Ajureka. Eta, tikamapurawakareyare'i eta táimitusira'aviyare'i, apaesa táetumecha'avi eta vé'isira, takurisamurecha'avinaware. Tímituka'avi'iware yátupina eta vikasiñawa me Viya eta máijarasiraparaka eta viúrikakarewaya.

⁵Puiti nuwara'a máijaraka'e'ini ema Viya eta ewaraira'i ekutiya ema Jesucristo eta mapanereruana, étaipa wa'i mákarichu'ini makurisamurechawa'ini. Ema Viya máetumecha'e'ini emutu, makurisamurecha'ewaréni te jákani íchararakawanapuka, apaesa táuri eta ekachanekakaira.

⁶Nuwara'aware ákutikaka'ini eta epanereru. Tási'a, te iúrujisirawana, étanainaichu'ini eta iá'uana eta ekunachirayare ema Viya, tási'a Makaiyakene ema Viákenu Jesucristo.

⁷Taka'e nuparapenaveana, ejákapakakayare eti echamurikakana'i, apaesa makunachakare'i ema Viya naye'e namutu ena achaneana. Ekutiyare ema Viákenu Jesucristo eta majakapira'avi'i víti.

⁸Échaichu'iware eta máukupaisira'i ema Cristo. Títeka'i maitatiwaka'i ena israelítana. Mawara'a'i máimimatichawaka ena eta máitauraiwa'i ema Viya tamutu eta máechejiriruwana máijararuwana'i naye'e ena viáchukanaveanaini.

⁹Éneichuware tímiteka'i máimimaticha'i ena apawasana eta majapanuirawaka'i, apaesa najiraucha ema Viya. Títauchawayare'i eta táechejiriruwa'i eta Takapika'ukene Ajureka, ani taka'e'i: “Eta taka'e vijirauchiravi'i eta vipikauchiravi'i nújirauchaviyare eta jirasare te píjare.”

¹⁰Te apanaware Ajureka ániware taka'e'i: “¡Iurisamure, awasareana, ákachane eta mawasa ema Viya!”

¹¹Tási'a te apanaware Ajureka, ániware taka'e'i: “Apawasana, tási'a étapa eta awasareana, ¡emutu ekunachiraya ema Viákenu!”

¹²Ema Isaías éneichuware tikajure'iware: “Tiuchukainapa ema Cristo, ema akenukayare naye'e ena apawasana, makarichuyare nakuneraya maye'e ema.”

¹³Ema Viya, tétavikawa'i eta makunekarewa'i, tikasiñakare'iware. Máijaraka'eni eti eta tawayuchiraina eta iúrisamurewaina, tawayuchirainaware eta ekasiñaira maye'e, apaesa tanarakaini tamutu eta epanereruana. Eta máwa'asira'e'i ema Machanewa Viya.

¹⁴Nuparapenaveana némunarukeneana, nukasiñawa'i nuti eta eye'e, eta étaviuchiraipa eta iúriwa étapa eta ímatiekene'aira'i tamutu eta máimiturapiana ema Viákenu. Yátupi'iware ítuka'i échejirika.

¹⁵Nukasiña'e'iware eye'e puiti juka eta níjarasirawa nukajure'e eta juka nukartane étapa eta juka táechejisi'akeneana'i, apaesa wa'i ekuemitisika, taicha nutupara'a'i me Viya eta nujaneasira'eya eti apawasana.

¹⁶Ema, tituparakanu'i eta nuyanirayare nupaipika te tamutu awasareana, nukametarairuiraya naye'e namutu ena achaneana eta najakapakareipa'i me Viya eta nakasiñawaira'i eta maye'e. Tituparakanu'iware eta nujaneasira'eyare emutu eti esuapana'i ema. Tási'a, nuwara'a nuti nímereka'eya te mamira'u ema Viya te jena sache tikutiyare'i námawa'u'e. Ema tiúrisamurenapa eta majakapira'eya, taicha máepachiaru'eipa'i ema Machanewa Viya.

¹⁷Eta mawanaranuira'i ema Jesucristo, nukunachawa eta nukaemataneasira'i ema Viya.

¹⁸Wá'isera nukasiñawaima'i, nukuneuchawaima'i taye'e eta jákani nakaemataneasirana'i ena apamuriana mawanarana. Nútisera nítaucha'i eta nukatupara'aira'i me Cristo eta nímimatichirawaka'i ena apawasana eta nasuapira'i ema Viya, náe'isirapaipa'i eta nímiturapi'i étapa eta núriwa'i eta naye'e.

¹⁹Nímechawaka'i ichape eta tiáramikareana eta nítupajijiasirawa maicha ema Machanewa Viya. Taka'e'i eta nítauchira'i tamutu eta nukametarairuira'i eta máimiturapiana ema Jesucristo. Tamutu'i nupaika, népanawa'i te Jerusalén, nícheku'apa taye'e eta tinapaika Iliria.

²⁰Taicha ichape eta nuwaraira'i nítekapauchaya tamutu awasare, te jákani nájinaicha'a nakametarairu'ini. Nuwara'aya nukametarairuyare naye'e ena achaneana tájina'i nasami'a'ini eta máijare ema Cristo,

²¹nítaucha'i eta táechejiriruwa'i eta Takapika'ukene Ajureka, ani taka'e'i: “Naima'ainapa eta namaima'akeneana'i akane nasamairikainapa ema, nakaikutiarainapa eta namakaikutiarakene'i, nasamakene'imaye'e ema.”

²²Takaimamaru'i eta juka, wa'i nitujikawa'ini nima'apana'e'ini, ichapemuri'i eta nuwaraira'i nima'a'e, puitisera nétumechawainapa.

²³Puítisera nítauchapa eta nupaisira'i taye'e eta awasareana, tási'a ichapemuri'i eta nuwaraira'i nupaipiucha'e.

²⁴Tási'a, puiti nupanerecha'i nétawaucha'eyare achichu juka, nuyaniraya te awasare España. Nuwara'a vikaurisamurechakakainapa. Te támutupa eta nukachanera'eya eta nétawauchira'eyare, németeaka ímikatakanuyare jákani eta nuyanirayarewa.

²⁵Nuyananumayaresera te Jerusalén. Núnapanayare eta nanakiruwana ena vichamuriana naye'eyare ena apamuriana vichamuriana'iware tikawasana'i ánaki.

²⁶Taicha ena vichamuriana te Macedonia, énapa tikawasana'i te juka Acaya, tinakikikawana'i eta náimikatasi'aya ena apamuriana vichamuriana páureana tikawasana'i te Jerusalén.

²⁷Tétavikawa'i eta náurisamurewa'i eta nanakisirawa'i, nawaraira'i títsirijikawanaya naye'e. Táurika eta juka náitsirijisirawaya, taicha ena nachamuriana israelítana tímimatichana'i ena apawasana eta máimiturapiana ema Viákenu. Tási'a puiti, enapawaya ena vichamuriana apawasanana, nakajiyare ena nachamuriana israelítana.

²⁸Taka'e, te támutupa eta níjarasirawakayare ena vichamuriana páureana eta nanakiruwana ena nuchamuriana te juka, nuyaninawarepa nukaiju'e te España. Nétawajikainapasera eta ara eye'e.

²⁹Németeaka eta nítekapauchira'eya, ichapeyare eta viúrisamurewaya eta vétumechirakakayare taicha eta vé'isira'i ema Cristo.

³⁰Nuparapenaveana, nuyaseaka'e te máijare ema Viákenu Jesucristo étapa eta vémunasirakaka'i maicha ema Machanewa Viya. Nuyaseaka'e ímikatakanu'íni eyaseuchanu me Viya te eyujarasirana.

³¹Eyaseaka'ini eta majaneasiranu'ini eta nítekapauchirawakayare ena masuapajiraira'ana'i tikawasana'i te Judea. Étapa eta juka námakeneyarepa'i nanakiruwana'i ena vichamuriana, táuri'ini eta najakapirayare ena vichamuriana tikawasana'i te Jerusalén.

³²Eyaseaka'iwaréni ema Viya máisapanu'ini eta núrisamurewaina'ini eta nítekapauchira'eya, ímikatasiranu'íni eta nítujisirawaina nukachane'e.

³³Ema Tata Vikaiyakene, tétavikawa eta makanarasira'i tamutu eta vipanereruana. Nuwara'a puiti yátupina esamawa eta makanarasira'e'i eti. Amén.