Read Ignaciano Romanos 2 Bible Online

Romanos 2 - Ignaciano bible

Romanos 2

¹Étiari'isera eti ímijacha'i tájina eviurewaima'i eta wa'i ákutima'i ena apamuriana. Ímijachawa'i tájina epekaturaina. Eti ekaeka'iwaka'i ena tíchana'i eta tamaurikeneana'i. Wá'isera étupikawa'ini eta ekaeka'ira'i, taicha éti'ichu'i nakutikeneana'i eta íchakeneana.

²Viti vécha'i matupiruwa'i ema Viya eta máikuñasirawakaya ena tíchana'i eta juka tamaurikeneana.

³Étipa, éjekapawa'i eta ímijachira'i tikaitika'eyare eta íkuñayare, eti íchara'iana eta tawasikeneana ekuti'ichu'inéni ena ekaeka'ikeneana.

⁴Émasera ema Viya, tétavikawa'i eta máuriwa'i eta eye'e, wa'i maíkuñaka'ewane'ini. Tikamicha'e'i, tikuchapa'e'iware, mawaraira'i éñauchawa'ini eta maye'e, ínajika'ini eta íchira eta tamaurikeneana.

⁵Taicha táiñe'ikeneyare eta íkuñayare eti, te wa'i ekueñauchawa, ínajikaware eta tamurakawa'i eta esamureana, taicha ewayuchapaichucha eta ekurumutusira'i eta etapirawana

⁶taicha ema, matupiruwa'i eta máijarasirayare eta táitsiwayare eta víchakenepachu.

⁷Ema maíjarakawakainapa, máichekuarakireyare eta naítaresiraya, ena tikuchapawanaya eta nasiapiraya eta te majaraiwa'i ema Viya, ena tepiyakana'i eta taurikene;

⁸murakainapasera eta máikuñasirawakaya namutu ena masuapajiraira'ana'i énaipa ena tikatianakana'i eta yátupikeneana, tasapi'a'i náurika'i eta tamaurikeneana'i. Nawayuchaipa eta náimiyusemasira'i ema Viya.

⁹Ichape eta nakatajiwairaya, tíya'a'akawanayare namutu ena tíchana'i eta juka tamaurikeneana. Tikutikakanayare namutu eta náikuñayare, ena israelítana énapa ena apawasana.

¹⁰Étisera eti íchana'i eta táurikeneana, tíjaraka'enapa ema Viya eta majaraiwa'i etapa eta iúriwaya. Namutu ena tichana'i eta taurinakene tétavikawaya eta ekunachakarewaya maye'e, ekutikakaya emutu eta iúrikakarewaya, eti israelítana. Wa'i ekachurikaima'i ena apawasana.

¹¹Ema Viya wa'i manerejikaima'i ena máikuñaruanaya.

¹²Nákani máimatira'ana'i eta mawanairipiana ema víyara'aini Moisés, tikaikuñanayare. Éneichu nákani náimati'inenipuka, tavetijinapa tikaikuñanayare taicha wa'i nasuapa'ini.

¹³Taicha wa'i tijakapakareanaima'i maye'e ema Viya nákani wa'i náitaucha'ini eta nasamakeneana'i. Tijakapakareanayaresera nákani títauchana'i tipikauchana'i eta wanairipiana.

¹⁴Narari'iware ena tinerejikawana'i ena apawasana, wá'ineni náimati'ini eta wanairipiana, nasapi'asera natupiruwa'i eta náichira'i eta táurikeneana'i, taicha yátupi'i eta nasuapira'i,

¹⁵ena náimereka'i eta manakasamurechira'i ema Viya eta wanairipi te nasamureana. Énajiwaya tisamawana te napanereruana eta táuriwa'i eta náichakeneana, eta tikatiuchawaka'i. Te téjekapawanapuka, tisamawana'iware eta tamauriwa'i eta náichakeneana

¹⁶járajapa eta sácheyare, tikayasesere'ianainapa namutu ena achaneana te mamira'u ema Viákenu Jesucristo. Ema, máimatiya tamutu eta náichakeneana tayumururewana'i. Étaichu'i eta numetarapi'i te nukametarairupa.

¹⁷Étisera eti israelítana, ímijachawa'i yátupi'i ítaucha eta wanairipiana, ekunachawaipa'i maye'e ema Viya.

¹⁸Ímijacha'iware ítuka eta mawara'akeneana'i ema Viya. Éneichuware eta wanairipi é'iru'i tímituka'e'i eta enerejisirayare icha eta táurikeneana.

¹⁹Tétavikawaipa'iware eta ekunachirawa'i taicha ímijachawaipa ekatupara'a eta ímitusiraya ena apawasana, apaesa náesenika'ini ema Viya,

²⁰náinajikayarewa eta napekaturana, wáipaware nanasima'i eta te timapiku. Ímijacha'iware ímatiekene'a tamutu eta wanairipiana, ítamuturusira'i tamutu eta taye'eana yátupikeneana.

²¹Eti ewara'a'ipuka ímitureka. Tituparaka'e'isera étiwaya ítaura'iya. Eti, ímitureka'i wa'i nakuamereka ena achaneana; étisera epanerecha'i eta iámeresiraya.

²²Takutikene wá'iware taúrika'ini nakaesenara'ini ena eparajairawana, étisera epanerecha'i eta ekaesenaraya. Ekatichaware eta nasiñarajiana; étisera eve'a'i eta táijarakasiana eta nasiñarajiana.

²³Ekunachawa'i eta ímijachirawa'i ítuka eta mawanairipiana ema Viya; étisera tétavikawa'i eta emapikauchira'i.

²⁴Taicha taka'e'i eta Ajureka: “Ena achaneana wa'i napikaucha'ini ema Viya, íchavene'i eti.”

²⁵Eti ekunachawaipa'i eta ikutiarana, takamunu'isera eta ítauchiraina'ini eta wanairipiana maye'e ema Moisés, taicha eta juka emaitauchira'i, tímikutijirikawaichucha tajina ikutiaraina.

²⁶Tikachurika'eanaipa nákani apawasana, nasapi'aipa náitaucha'i eta wanairipiana'i, ema Viya máima'a'i eta táuriwa'i eta náitauchira'i, tajina'ineni naikutiaraina'ini.

²⁷Ena apawasana tayanapane takuija naikutiaraina títaura'iana'i taye'e eta wanairipiana, ena tiyaseserekanainapa eta íkuñayare emutu eti emaitauchana'i, émepururekawaipa'i enaka eta ikutiarana, étapa eta ekarawa'uira'i eta wanairipiana.

²⁸Wá'iware ekunachakarema'i eta enaka eta ikutiarana te iáke'e eti juriyuana taicha tajina taichakenerepina, eta icha eta eye'erepiana.

²⁹Nákanisera yátupikene'i eta nasuapajiraiwa, jé'eware ena juriyuana wa'i tákamesaima'i nanaka eta naikutiarana te náke'eana, taicha ena yátupikene'i nama te nasamureana: Wa'i étaparakina eta naitauchiraya eta naye'erepiana, taicha eta juka tiasi'a me Viya, wa'i napanereruina ena achaneana.