Read Ignaciano Romanos 4 Bible Online

Romanos 4 - Ignaciano bible

Romanos 4

¹Vipanereikene'awa eta maichararakawa'i ema viáchukaini Abraham.

²Ewara'a ekunacha eta makaemataneasirana'i ema Viya, ímijachira'i eta tícha'i eta majakapakarewa'i me Viya. Ímijacha'iware táuri'a eta makasiñawawaisira'i ema. Wa'i étaina'ini táicha'ini eta makaemataneasira'i ema Viya.

³Eta Takapika'ukene Ajureka, taka'e'i: “Ema Abraham, tétavikawa'i eta makasiñawaira'i me Viya. Eta taka'e, tijakapakaréine'i tijakapakareine'i me Viya.”

⁴Tiuri puiti, mákani achaneana, tikaematanereka'i, tatuparaka'i ena vikaemataneyeruana'i eta nawachachirayare'i. Wa'i naíjarakasichaima'i, taicha eta maikuchichu'i.

⁵Émasera ema Viya tijapanu'avi'i, tijakapa'avi'i táichavene'i eta vikasiñawaira'i eta maye'e. Wa'i étaparakaima'i eta vikaemataneasira'i.

⁶Éneichuwa ema David máechejisi'a'i eta náurikakarewa'i ena tikapekaturara'iana eta majakapirawaka'i ema Viya, tájina étaparakaina eta nakaemataneasira'i.

⁷Maka'e'i ema David: “¡Tétavikawapa eta náurikakarewa'i nákani majapanukeneana'i ema Viya eta napekaturanaini!

⁸¡Tetavikawa mauriwaya mákani achane, taicha ema Tata wa'i maimaraka'ini eta mapekatura!”

⁹Taka'e, eta juka viúrikakarewa'i, wa'i wákarichu vikatupara'a'ini viti israelítana. Éneichu'iware tatuparaka'iware ena apawasana. Véchaipa'i eta majapanuira'i ema Viya ema Abraham. Tákarichu'i eta makasiñawaira'i, majakapa'i ema Viya.

¹⁰¿Ímijachaipapuka eti, eta majakapakarewa'i ema Abraham tási'akene'i eta te nanakapa eta maikutiara'i? Wá'ikene étaina'i táicha'ini eta maikutiara, akanewakaicha'a.

¹¹Taicha te taekenepa ema Abraham, majachapapa eta maikutiarayare'i te make'e Étapa táikutiarayare'i eta majakapiraipa ema Viya táichavene'i eta makasiñawaira'i, taka'e ema Viya majachapapa eta mauriwa'i taichavene'i eta makasiñawaira'i me Viya. Taka'e ema Abraham emapa naiyakara'i namutu ena tikasiñawana me Viya tayanapa tajina naikutiaraina éneichuwasera majachapa'i ema Viya ichape'i eta nauriwa te mamira'u.

¹²Taka'e ema Abraham émaichu'isera taiya'i namutu nákaini tikaye'eana eta naikutiara te nake'eana, taicha nae'ika'i ena viáchukanaveanaini eta nakasiñawaira'i me Viya, wicha'aneni najachapa'ini eta naikutiaraya te nake'eana.

¹³Ema Viya tíjarakawa'i eta máijarasirayare ema Abraham énapa ena mámariekeneana tamutu eta apake'e, náwapairuyare. Máijarakayare táichavene'i eta makasiñawaira'i ema Abraham, wa'i étaparakaina'íni eta masuapiraina'ini eta wanairipiana.

¹⁴Taicha te tatiari'ina'ini eta náikuchi'i ena títauchana'i eta wanairipiana, tamapurujipapukaini eta vikasiñawaira'i, tamapurujipawarepukaini eta máijarasirawa'i ema Viya eta majakapira'aviyare.

¹⁵Taicha eta wanairipiana, étachucha támaparaucha eta náikuña ena téjekapawana'i. Tási'a, vimutu vikaikuchiyare'ini eta víkuña, taicha vimutu véjekapawa'i, te'esera te takuija'ini eta wanairipi najina kaviurewaima'i.

¹⁶Ema Viya, tétavikawa'i eta majapanuraiwa'i, tási'a, yátupi máitauchayare eta máijarasirawana naye'e namutu ena mámariekeneana ema Abraham, wa'i nákarichu'ini ena té'ikana'i eta wanairipiana, naye'eyarewa namutu ena tikasiñawana'iware maye'e, tikutiana'i ema Abraham eta makasiñawaira'i, eta taka'e puiti, eta vikaiyaira'i vimutu víti ema Abraham.

¹⁷Taicha ema Viya, ánipa maicha ema Abraham: “Puiti nunakaviyare píti nakaiyakeneyare ena achaneana te kamurikene awasareana.” Tási'a, ema Abraham, masuapapa muraka ema Viya, émaichu'i ema Viya tijarakawaka'i eta nachaviraya titarekana ena naepenekeneana, etapa eta makuchusirayare eta arairuana vimaima'akeneana.

¹⁸Taka'e takutima'ipa wa'i titauchawaima'i eta maichakene'i ema Viya, taka'e ema Abraham masuapapa muraka taka'e makuchapapa, taka'e'i eta maítekapira'i “Taiyakara'i tamutu eta awasareana”, titauchawa'i eta maichakene'i ema Viya: “Taka'eyare eta nasimutuwayare ena mámariékeneanayare.”

¹⁹Ema Abraham wa'i taepa'a'ini eta makasiñawaira'i maye'e ema Viya, ichavikaipa'ineni ema, cien añu eta ma'añura, ésupa esu Sara, ichavikaipaware, macheru'iware, waipa náuri'a'ini eta nakachichairayare'i, wá'isera máeñamawa'ini ema Abraham eta makachichairayare'i.

²⁰Wa'isera maikutijikawa'ini wa'iware mapanereikene'a'ini eta maikuchi'i me Viya, tiapajupanawachucha eta makasiñawaira'i muraka me Viya. Eta makasiñawaira'i, tétavikawa'i eta makunachira'i ema Viya,

²¹tetavikawapa eta masuapira'i eta maitupajijiasirawa'i etapa eta maitauchirayare'i eta maijarasirawa'i.

²²Eta taka'e, ichape eta majakapakarewa'i me Viya táichavene'i eta makasiñawaira'i muraka.

²³Taka'e, eta vikarawa'uira eta Takapika'ukene Ajureka, vímatiekene'a wa'i mákarichu'ini ema Abraham majakapakare'ini me Viya;

²⁴puiti, víti apanawa vijakapakare'i me Viya eta vikasiñawaira'i maye'e. Taka'e ema Viákenu maimararaka'i eta vikasiñawaira'i maye'e, te yatupina visuapa maye'e makaini tikaechepuka'i ema Jesús Viakenu Tata Jesucristo,

²⁵Ema Viya Maíjarakapa ema Jesús eta maepenina'aviyare'i taichavene'e eta vipeketurana, tási'a techepukapa te maekari eta makatiuchira'aviyare'i taichavene eta viviurewana.