Read Ignaciano Romanos 7 Bible Online

Romanos 7 - Ignaciano bible

Romanos 7

¹Nuparapenaveana, échaichu eti eta yátupira'i tisuapakare'i eta wanairipiana naye'e ena achaneana, étachuchasera te títarekanaicha'a.

²Tímikutijirikawa'i súkani esena sukaimakene, tatuparaka'i suitauchayare eta wanairipi supikauchayere ema suima te achaneicha'a ema te'esera te tepenapa ema siuma esu esena esu tépa'apa eta takayemakene eta wanairipi eta supikauchira ema suimaini'i.

³Te'eserapuka te jákani achaneicha'a ema suima, te suve'apuka ema apana achane, tikapekaturaipa esu. Té'esera te tépenaipapuka ema suima, ésupa téchinawa. Tísapakare suápechawa suákaima maye'e mákani suwara'akeneyare suímayare, wa'i pekatuina eta suápechirawayare tikaima.

⁴Ene eka'e'i eti nuparapenaveana. Ema Cristo, máepenina'e'i te crusu, makaepa'aipa eta tapamisira'éni'i eta wanairipiana, puiti émapa técha'e'i ema Cristo. Puiti mawanara'eipa ema Cristo, ema máechepurekene'i te máekari. Mawara'a'i ichapeyare'i eta ekaemataneasiraina eta maye'e ema Viya.

⁵Taicha kape juka ítaresiraicha'a, te esamapa eta wanairipi tiápajukawa'i eta ewaraira'i ícha eta tamaurikeneana. Tási'a eta, tiámaparaucha'e'i eta íkuchi'i eta esiapirayare te infierno.

⁶Puítisera waipa tapamika'avi'ini eta wanairipiana. Puiti viúchukurepa eta ichasi vítaresiraini, taicha tépanawaipa eta arairu vítaresira eta máwa'asira'avipa ema Machanewa ema Viya.

⁷¿Etiari'ipuka eti ímijacha'i tipamika'e'i eta wanairipiana eta ekapekaturairaya? ¡Wá'ineni étaina! Víti'ipa wa'i vímatiekene'awane'ini eta tamauriwa'i eta vikapekaturaira'i, te wicha'a vímati'ini eta wanairipiana, vuicha'aware vímati'ini eta tamauriwa'i eta vijamurachirana eta apaye'e, eta wanairipi, ani taka'e'i: “Wa'i pikujamuracha eta apaye'e.”

⁸Té'esera te vímatipa eta juka wanairipi, viápajukawapa vijamuracha tamutu eta víma'akeneana tájiparakana, te takuija'ini eta juka wanairipiana, wá'ichu'ini vikujamuracha'ini eta apaye'eana.

⁹Eta viámaperuwaicha'a apaikape, wicha'a vímati'ini eta wanairipiana, té'esera te vímatiekene'apa, tási'a, véchapa eta vépenirayare, tatiari'ira'i eta víkuchi'i eta víkuñayare'i taichavene eta vipekaturana,

¹⁰taka'e, víti vímijachaipa'i viúchuku'ayare te vítauchapapuka eta wanairipiana, tájinachuchasera táijaraka'avi'ini eta viúchukuiraina'ini, étachucha tiámaparaucha'avi taye'e eta vépenirayare'i,

¹¹taicha eta pekatu takamapura'i eta wanairipi eta tawayuasira'avi'i, taka'e etaichu'isera eta wanairipi eta timikapaka'avi'i.

¹²Tási'a ánipa taka'e, eta wanairipi tiasi'a'i me Viya, eta tawanairipi'i tamu'i tiuri tatupiruwa'iware tetupikawa.

¹³Eta taka'e, ¿eta juka wanairipi tiuri'ineni eta taechejiriruwa tasi'asera tiama'avi'i eta vepenira? ¡Wa'ineni taka'e'ini! Németeaka eta pekatu, eta tawaraira'i timecha'avi eta yatupira'i pekatuira'i, eta taka'e'i tiviucha'avipa eta vepeniraya takamapuraipa eta tauriwa eta wanairipi. Eta taka'e taimerekapa eta wanairipi eta taiñe'iwa eta pekatu.

¹⁴Eta wanairipiana tawara'a'inéni tímitupirucha'avi, étasera eta veche máteji, tawayuararu'i eta tawaraira'i vichaya eta tamaurikeneana.

¹⁵Taicha nuti wá'ikene nímatiekene'a tája'apuka eta nícharakawaya, wa'i né'ika'ini eta nupanerechakene'i nuwara'akene nicha, tasapi'achucha nícha'i eta nukatichakene'i numawara'akene'i nicha.

¹⁶Taka'e tayanapane nicha eta numawara'akene nicha, taka'e yatupi nusuapa'i eta wanairipi yátupikene'i eta taetupisirawa.

¹⁷Tatiari'i te viáchanewa eta pekatu, tási'a, wáipaneni vítijirikawa'ini vícha'ini eta pekatu, étasera eta táwa'asira'avi'i te visamure eta pekatu, étapa tipamika'avi'i eta víchirayare'i eta tamaurikeneana.

¹⁸Necha'iware nuti eta tamauriwa'i eta taitaresira'i eta nake'e, tétavikawa'i eta tamasuapajiraiwaini'i, taicha wa'i nimiuchurena'ini eta tauriwaina'ini eta nitaresira; tayanapane nuwara'a nicha eta taurikeneana, wa'i sera narata'a nicha.

¹⁹Te nuwara'ainipa nicha eta táurikeneana, wa'i narata'aima'i nicha, étachucha nicha'i eta tamaurikeneana numawara'akene'i nicha.

²⁰Te nicha'ipuka jákani numawara'akene'i nicha, waipa nutina'ini tási'a'ini eta nichira'i, étapa eta pekatu tipamikanu'i taicha tiáwa'akanu'i nuti.

²¹Nechawawane eta nejekapirawana, tayanapane nuwara'a nicha eta taurikeneana, etachuchasera tiapajuakawa nicha eta tamaurikeneana.

²²Étasera eta viáchanewa, tétavikawa'ineni eta tajamurachira'i vícha'ini eta mawara'akeneana'i ema Viya.

²³Nimararaka'isera eta tatiari'ikene nuye'e eta ta'apapisiranu eta nurata'aira nichejikawa: etasera eta tiviuchanu'i eta wanairipi taye'e eta pekatu eta tiawa'akanu'i tikaratakanu'i.

²⁴¡Paurenusami nuti! ¿Naja'apuka tikatuichanuya eta taitekapiraya eta ekuñarakiya eta tiawa'akanu'i nuti te nake'e?

²⁵Marari'isera ema Nákenu Jesucristo makarichu ema marata'a tikuchuku'a'nu taye'e eta juka tamaurikeneana puíti'ipa nuti, ichape eta nu'asulupayachira'i ema Viya, tétavikawa'i eta nuwapinairawa'i eta níchira'i eta mawara'akeneana'i, étasera eta ichasikenetataji náke'e, tikawanaranuichucha taye'e eta pekatu.