Read Ignaciano Romanos 9 Bible Online

Romanos 9 - Ignaciano bible

Romanos 9

¹Taichavene eta nusuapira ema Viakenu Jesucristo, eta taka'e eta numetasira'e nutupiruwa'i nuti wa'i nepiya'ira'i'ini. Etaipa eta nupanereru maimitupirucha'i ema Machanewa Viya, ema tetumechanu'i eta numetasira'e'i:

²eta taka'e, ichape eta náimipanerechiranu'i nukatisamurewa'iware, wa'ikene tinajiakanu,

³táichavene'i eta namae'isira'i ema Viákenu Jesucristo. Táetaviucha eta néñamirawa'i eta naye'e, nuwara'aine'i níjararekawa'ini nuyana'ini nuti te jena yuku, apaesa wa'i nakuyana'ini ena. Énaina'ini náuri'ini ena maye'e ema Viakenu.

⁴Taicha manerejiruana'i ema Viya, máichavene'i ema náchukaekeneni Israel, mawaraira'i ema Viya machichanaveanayare'i. Ichapemuri'i eta makachanerawaka'i, máimechira'i eta majaraiwa. Máijarakawaka eta matratune eta majaneasirawakayare. Máimimaticha'iware eta mawanairipiana.

⁵Mametaka'iware eta máitesirayare'i ema tikatiura'iyare naye'e. Ena nani, tétavikawa'i eta táuriwa'i eta náikuchiyare'ini taicha manerejikawaka'i ema Viya ena máumuriwanaichu'i ema Cristo, najaneanaichu'i eta máukupaisira'i te juka apake'e. Puíticha émaipa técha'i tamutu. Máitawakakaipa eta vijirauchira'i. Amén.

⁶Wá'isera étaina'ini táicha'ini eta mamaitauchira'i eta maechejiriruwa ema Viya, naye'e ena juriyuana, etachucha eta wa'i namutu'ini yatupina'ini namairiekenena'ini ena tikawasana taye'e eta awasare Israel.

⁷Wa'isera namutu'ini ena mamariekeneana ema Abraham yatupina'ini machichanaveanaina'ini, emasera ema Viya Maichapa: “Ena piamairiekeneanayare piti tiasi'anayare maye'e ema Isaac.”

⁸Etajuka tímimaticha'avi'i, eta nájina emanaina machichaina'ini ema Viya, tayanapane nachichanaveanaina ena apánapanenejiana achaneana; wa'i etaparakaina, enasera ena yatupikeneana machichanaveana nákaini titauchana yatupi eta maechejiriruwa ema Viya. Enasera yatupikeneana mamairiekeneana.

⁹Eta mametakasiwa'i ema Abraham eta me Viya, ani taka'e'i: “Puiti juka kajeyare, níjarakaviyare píti ésupa esu Sara ema echichayare.”

¹⁰Numetaka'eyarewa eta táicharakawa'i. Ena apinakeneana suchichanaveana esu Rebeca emanaichu'i ema naiya'i, ema viachukaini Isaac,

¹¹Ánakiapaicha'a eta naichuiraina'ini ena apinakeneana, vuicha'a nakaikutiaraima'i naicha eta taurikeneana wicha'aware naimati'ini naicha'ini eta tamaurikeneana eta taitauchirawaya eta mawara'akene maicha ema Viya, eta manerejisiyayare nákani machichanaveanayare wa'isera etaparakaina eta vichira eta taurikeneana, ema'i ema Viya ema tichu'a'avi'i.

¹²Ema Viya mametakapa esu Rebeca: “Ema mainapure maechavi ema mawanarayare ema mati amuyapana.”

¹³Eta Ajureka takapika'ukene ani taka'e: “Nemunaka'i eñi Jacob tási'a nukaticha'i eñi Esaú.”

¹⁴¿Puiti, vimijachainapa wa'i tétupikawa ema Viya eta manerejisirawaka'i ena achaneana? ¡Wá'ikenesera enena táka'e!

¹⁵Ema Viya mametaka'iware ema Moisés, ani maka'e: “Nuti necha mákani nujapanukeneyare.”

¹⁶Taka'e, wa'i wámutu wákutikaka eta majapanuira'avi ema Viya máichuira'aviyare'i, ema técha'i eta manerejisirawaka'i nákani majapanukeneana máichu'akeneanayare, wa'i étaina'ini eta náimijachirawa'i tíchu'akareana taicha eta náuriwa'iji, napamisira'ipuka naicha eta táurikeneana.

¹⁷Ema Viya ániware maka'e'i eta te Takapika'ukene Ajureka maye'e ema rey te awasare Egipto: “Nuti nunakavi'i eta piáwakure'i pirreywayare'i, nuwaraira'isera nuti nímimatichaviyare eta tamutuira'i nurata'a nítupajijiasirawa, apaesa táimatikare eta níjare te tamutu eta juka apake'e.”

¹⁸Taka'e, ema Viya manerejika'i nákani mawara'akeneanayare máichu'a, máisapa'isera ena masuapajiraira'ana tajurukachuchaini eta namurakasamurewa'i.

¹⁹Németeaka, áninapapuka eka'eyare eti: “Ene taka'e jákani, ¿tája'apuka takayema eta vikaviurewa'i eta maye'e, taicha wa'i véchawa'ini eta víchira'i eta tamaurikeneana, émarichu'inéni tícha'avi'i?”

²⁰Piti achane, ¿Naja'avisika piti eta piyaseaka'ini ema Viya eta maicharakawa eta makaematanera? ¿Etasika eta ipúneka wa'i taicha'ini ema tepiyaka'i: “Taja'a takayema eta pepiyasiranu'i?”

²¹Esu típuarekara'i, esu téchinawa'i jákani táima'ianayare eta suípune, suíchayare'i eta sukachaparaya, tási'a suépiyakaware eta suawakuru'iyare te tajiparakana suicha'i eta suwara'akene'i taye'e eta tiuraji.

²²Tatuparaka'i ema Viya máikuñakawaneya namutu ena achaneana wínarajikeneana, máimitaekene'awakawane ena, tatuparaka'iware máimerekawane eta máitupajijiasirawa étapa eta masemira'i taye'e eta namauriwa'i, tétavikawa'isera eta makamichira

²³Víti apana, ene taka'e'i eta táetaviuchira'i eta majapanuira'avi'i, máimereka'i eta táichapewa eta makunachakarewa, akaneipa'i eta manerejisira'avi'i eta vikachaneraya ema taye'e eta majaraiwa.

²⁴Wa'i wákarichu'ini viti juriyuana manerejika'avi'ini, éneichu'i eti apawasana manerejiru'e'iware.

²⁵Eta Takapika'ukene Ajureka májure'i ema Oseas eta máechajiriruwa ema Viya, ánipa maka'e'i: “Nuti níchu'awakayare ena ichapemurikeneana ena achaneana apawasana, enainapa nuchaneranaya, esu numaemunaru nichu'ainapa taichavene eta nemunasira.

²⁶Etaichuware manasi'i eta te maichine'i: ‘Eti wa'i ekawasa eta te nawasa’, Puitisera nichu'a'enapa machicha'enapa ema Viya kaitarekara'i.”

²⁷Énasera ena nujaneanana juriyuana, ánipa maka'e ema Isaías: “Tayanapane natiari'inapuka ena namairiekenena taye'e eta awasare Israel tayanapane kamurianaina nakuti eta tawaparu te tachausi eta ichape une matupanavene, animurianayarechu'i ena tiuchuku'anayere,

²⁸ema Viya, waipa makamichaima'i eta náejekapirawana'i ena achaneana. Tíja'uchawayarepa eta máikuñasirayare eta apake'e. Máija'úchayare'i máitaekene'a tamutu.”

²⁹Ániware maka'e'i ema Isaías akane: “Taicha ema Tata maitupajijiakawakene wa'i makunakika'ini ena mamairiekeneana, Puiti wakutipa'ini ena tikawasanaini te awasareni Sodoma etapa eta awasare Gomorra.”

³⁰Nuwara'a numetaka'e eta juka. Ena apawasana nasapi'a'i tijakapakareana'i me Viya, wá'ineni náesenika'ini ema kape eta náitaresira'i. Táichavene'i eta nakasiñawaira'i eta maye'e, tijakapakareanaipa'i ena.

³¹Énasera ena israelitana, tímijachawana'i tijakapakareanayare'i me Viya táichavene'i eta nawaraira'i náe'ika eta wanairipiana, wá'isera najakapakare'ini.

³²Taicha ena, náemepurureka'i eta najakapakarewayare'ini me Viya. Ena tímijachawana'i étachucha nakunachiawa'i taye'e eta náitauchira'i eta nawanesirakakana'i. “Eta tiviucha'i eta nakatianasira'i murakakene'i ema Viákenu Jesús”

³³eta taichakene'i eta Takapika'ukene Ajureka: “Puiti néwatakaya ema Nuchicha naye'e ena israelítana níma'aya nája'apuka tikatianakanaya ema, nákanisera tikasiñawanayare eta maye'e ema, wa'i máinajiakawakaima'i.”