Read Ignaciano 1 Corintios 15 Bible Online

1 Corintios 15 - Ignaciano bible

1 Corintios 15

¹Nuparapenaveana, nuwara'a némecha'eyare eta numetarairu'i eye'e. Eta máechejiriruwa'i ema Viya taye'e eta viúchukuirayare, étara táemesiawa'i eta juka te esamainapa, etupiruwawane'i ejákapa, puíticha tanasi'i eta esuapira'i.

²Tási'a, puiti iuchuku'apaipa táichavene'i eta ímiyanirawa'i esuapa eta numetarairuana'i eye'e. Németeaka wa'i tamapurujima'i eta yátupira'i íjarasirawa'i eta é'isiraya eta juka esamakene'i.

³Échaichu'i eta nímiturapiana'i eye'e, étaichu'iware taka'e'i eta nímitukasiwa'i, eta júkana eta tisuapakarepana'i, yátupira'i máepenina'avi'i ema Cristo táichavene'i eta vipekaturana, émaira'i ema táechejisi'akene'i eta Takapika'ukene Ajureka;

⁴eta náimaira'i tépenapa ema, náekarapa, téchepuka'isera ema te mapanakenepa sache, taicha taka'e'i eta tametarapi'i eta Takapika'ukene Ajureka, timetaka'avi'i tamutu eta máichararakawayare'i ema;

⁵Tímerekawa'i maye'e ema vichamuri Pedro, énerichuware ena apamuriana apústuleana.

⁶Tási'apa tímerekawawarepa naye'e ena kinientukeneana eta nasimutuwana'i ena vichamuriana, puíticha narari'icha'a maverana ena tíma'ana'i, narari'ipasera ena tépenanapaipa'i.

⁷Te táekenewarepa, tímerekawawarepa maye'e ema Santiago, tási'a, tiápechawawarepa tímerekawa naye'e namutu ena apústuleana.

⁸Tási'a, te táekenewarepa eta júkana, tiápechawapa tímerekawa nuye'e, nútipawapa níma'a'i ema, ichape eta táramikarewa'i nuye'e eta máichuiranu'i nuti nékenereru'i maye'enuyare'i apústule, nukuti'ipa ema amuya naujure.

⁹Ichapemuri'inéni eta némepuruirawa'i nuti naye'e ena apamuriana apústuleana, wá'iware táurika'ini apústulenuina'ini eta nímairawa'i, taicha ichapemuri'i eta nupanajirisirawaka'i ena náinapureana'i machanerana'i ema Viya.

¹⁰Tíchu'anu'isera ema Viya, taicha eta máemunasiranusami'i apústulenu'i puiti eta maye'e, wa'isera némepururekawa'ini eta máemunasiranu'i. Jé'eware nuti, nukachurika'i ena apamuriana apústuleana, ichapemuripana'i eta nukaemataneasira'i ema, wa'isera nutijirikawa'ini eta nukaematanera'i, etasera eta máemunasiranu'i ema Viya, tímikatakanu'i, tíjarakanu'i eta nétumechirawa'i.

¹¹Tájinasera wa'i étaparakaina eta juka nája'apuka nákani ena tikaematanepana'i, étaichu'i eta vímiturapiana eye'e, eta esuapakene'i puiti.

¹²Víti vímituka'eipa eta máechepusira'i ema Cristo te máekari, ¿Natiari'icha'a ena tinerejikawana eye'e ena tika'eana, wa'i téchepukanaima'i ena náepenakeneana?

¹³Eti éjekapawa'i eta epanereruana, ímijachaipapuka wa'i márata'aima'i ema Viya mákaechepukawaka ena náepenakeneana, te wa'i makurata'a'ini, wá'iwarepukaini makukaechepuka'ini ema Cristo te máekari;

¹⁴taka'e, te wa'i makuechepuka'ini ema Cristo, wáipapukaini takusuapakare'ini eta vímiturapiana'i eye'e, tamapurujipapukaini eta esuapira'i.

¹⁵Te yátupina'ini wa'i takusuapakare'ini eye'e eta náechepusirayare ena náepenakeneana, wá'iware takusuapakare'ini eta makaechepusira'i ema Viya ema machicha Cristo. Tímikutijirikawaipa'ini vépiya'ira'i'ini viwayuarerekaipapukaini víti te máijare ema Viya, taicha eta vímitusira'e'i eta makaechepusira'i ema Viya ema Cristo.

¹⁶Te yátupinapuka wa'i tisuapakare'i eta náechepusirayare ena náepenakeneana, wáipawarepuka tásuapakare'i eta máechepusira'i ema Cristo.

¹⁷Éneichuware, te wá'ipuka tisuapakare'i eye'e eta máechepusira'i ema Cristo, tási'a éneichuware wáipapuka tisuapakare'iware eta makaepa'aira ema Viákenu eta epekaturana.

¹⁸Te yátupinapuka wa'i tisuapakare'i eta júkana, tímikutijirikawaipa témitiekeneanaipa ena náepenakeneana'i té'ikana'i ema Cristo te achaneanaicha'a'i.

¹⁹Te yátupinapuka wa'i tisuapakare'i eye'e eta júkana, tamapurujipa eta vijaneasirawa'i eta vítaresira'i puiti juka táichavene'i eta vikuchapirawa'i viwaraira'i vikachane ema Cristo te apana vítaresira. Te wa'i takuitauchawa eta juka, ichapeyare eta vikatisamurewairaya.

²⁰¡Yátupikene'isera eta máechepusira'i ema Cristo te máekari! Taka'e, ema ekutiarare'i viye'e eta véchepusirayare víti apanaware te vépenaipapuka.

²¹Taicha eta vépenira manakipairu'i ema máinapuiru'i ajaira te juka apake'e tikaijare Adán. Ene maka'e'i ema Cristo, ema tinakipaika'i eta máinapuisira'i taye'e eta véchepusiraya te vékari.

²²Táichavene'i eta mámariekenera'avi'i ema Adán, émapa tiáma'avi'i taye'e eta vépenira. Puítisera táichavene'iware eta vé'isira'i ema Cristo, émapa tiama'aviyare eta viápechirawayare vítareka.

²³Táejarurewa'i eta juka. Tínapuka'i ema Cristo téchepuka. Ema ekutiarare'i viye'e. Tási'a, te mápechawaware máiteka te juka apake'e, énainapa téchepukanayare ena náepenakeneanaipa machanerana'i.

²⁴Taka'e, tiáne'inapa eta táichekuiraya eta tamaurikeneana'i te apake'e. Taicha ema Cristo makamitiekene'ainapa tamutu eta náitupajijiasirawanaini'i ena tákenuru'anaini'i eta tamaurikeneana. Ema Viya máijarakayare'i eta matumewayare.

²⁵Taicha ema Cristo akenukaya te namirara'u ena manaraya. Makapakechayare namutu ena mánarana.

²⁶Eta taekenereruya manaraya maita'aruyare etaya eta muerte. Taka'e makaepa'ianapa eta vepenira.

²⁷Taicha ema Cristo matupara'aichu'i maye'e ema Maiya eta akenukairayare'i, émayare'i téchayare'i tamutu. Taicha ánipa maka'e'i ema Viya eta te Takapika'ukene Ajureka, ema nutuparaka'i téchayare'i tamutu.

²⁸Te máima'apa támutupa máetupirika, makuchapainapa eta wanairipianayare'i maye'e ema Maiya, taicha ema tíjaraka'i ema Machicha eta máitupajijiasirawa. Tási'a, ema Cristo máimereuchainapa étaira'i tási'a eta wanairipiana maye'e ema Maiya. Émaichu'i técha'i tamutu.

²⁹Tiuri puiti, narari'i ena apamuriana tikaikachasiana'i náitsiwa'i ena náepenakeneanaipa, namawaraira'i náemitiekene'a'ini taye'e eta náechepusirayare. Ena nani, muraka'i eta nasuapira'i eta yátupira'i eta náechepusirayare ena náepenakeneanaini.

³⁰Tayanapane ichape eta takauyayakarewa'i eta vépeniraina'ini puiti juka sácheana, vikamicha'isera tamutu.

³¹Núti'ipa, nuparapenaveana, tamutu'i sácheana tikauyayakare'i eta népeniraina'ini. Ichape eta tapikakarewa'i. Nukurisamurechawasera eta núrisamurewa'i icha eti eta iúriwaipa'i maye'e ema Viákenu Jesucristo.

³²Muraka'i eta nukanaramurira'i ena achaneana tikawasana'i te awasare Éfeso. Náetaviucha'i eta nawínarajiwana'i, nakuti'i ena eta sárareana táiñe'ikeneana'i. Tájinachuchasera táimaekenena'ini nuye'e eta nímiyanawayare eta nukatiuchira eta vé'iru'i, te takuija yátupina'ini eta véchepusirayare te vépena. Taicha ani naka'e'i: “¡Vikamapurawachucha puiti vera vinika, taicha achichupuka vépenakaru!”

³³Wa'i takuka'e eta epanereruana eti. Taicha ena, wa'i tétupikawa'i eta naye'erepiana'i. Tikauyayakare'i najarareka eta táurinawaipa'i eta eye'erepiana.

³⁴Tátupiruwapa táuri eta ítaresiraina eti, wáipaware ekukicha eta pekatuana. Taicha narari'i ena wícha'a náimati'ini ema Viya te emuri. Titsiri'akareipa'i eta nakasirikira'e'i eti machanerakeneana'i ema Viya.

³⁵Németeaka nuti narari'iya ena tiyaserekanuanaya: “¿Tája'apuka náicharakawayare eta náechepusirayare ena náepenakeneanaini? ¿Tájaima'inapapuka eta nakake'erayare?”

³⁶¡Ena tiyaserekanuanaya tájina náechakenena! Puiti, nuwara'a epanerekene'a, nímikutiarachina'eyare taye'e eta ewaraki, eta ewaraki wá'ira tímaruka te wa'i vémuriacha'ini te apake'e, ene vika'e viti achaneana. Tínapuka eta vépenira étapa eta náekaraira'avi. Tási'a, te táekenepa, vijakapaya eta viaske'eana arairuya.

³⁷Eta vewasira wa'i etaina'ini eta taenaki timarukaya, etamesayare'i eta taki eta tetusukayare'i, tamutuchucha eta apanapaneneji, takipuka eta sipani, eta arusu.

³⁸Táka'epachu'i eta táimarusira'i eta ewaraki maicha ema Viya, wa'i apaimamajína'ini eta táimaru.

³⁹Étaipa eta veche viti achaneana, wa'i táwasima'i'ini eta taeche eta sárare. Apana'i eta táima'i, eta taeche eta kayure, apana'iware eta táima'i, eta taeche eta jima, énerichuware apana'iware eta táima'i.

⁴⁰Éneichuware, eta nakake'era ena tiávi'ana'i te anuma, wa'i táwasi'ini eta vikake'era'i viti viávi'ana'i te juka apake'e. Apana'iware eta táurinawa'i eta nakake'era'i ena, víti, apana'iware eta táurinawa'i eta vikake'era'i.

⁴¹Énerichuware nuwara'a ákaikutiara eta tajaraiwa'i eta sache, apana'iware eta táima'i, wa'i táwasi'ini eta tajaraiwa'i eta kaje, étaipa eta tajaraiwa eta jarairikiana, apana'iware. Jarari'iware eta tijara'ipanawaka'i taye'e eta apamuriana.

⁴²Ene taka'eyare eta vikake'era víti te véchepukapa. Apanayare eta táima'i. Te vépenapapuka, tikaekarasiyare'i eta viáke'e, tépachaikawayare'i eta véche. Téchepukayare'isera eta apana viáke'eyare eta máepenakakainapa.

⁴³Tikaekarasiyare'i eta viáke'e, taicha tikajachakarepu'apa eta véche. Téchepukayare'isera eta tapachinakeneyare viáke'eyare, tikaekarasiyare'i eta viáke'e, matumeraira'a'i, téchepukayare'isera eta viáke'e, tétavikawainapa eta tatumewayare.

⁴⁴Tikaekarakasiyare'i eta ena'a viáke'e, téchepukayare'isera eta viáke'eyare apaima'inapa, tijara'inapa eta vikake'eraya vikutinapa eta makake'era'i ema Cristo eta máechepusiraipa. Tanasiyareichu'i eta táima'i eta viáke'e, viachanewainapasera.

⁴⁵Eta Takapika'ukene Ajureka, taka'e'i eta táechejiriruwa'i: “Ema Adán, máinapuiru'i ajaira'i máchaneru'i ema Viya”; emasera ema maekenereru Adán, emapa Machanewa Viya émapa tíjaraka'aviyare eta apanayare vítaresirayare, vikake'enapa eta máke'e.

⁴⁶Etasera wa'i tainapuka'ini eta Machanewa Viya: Eta tinapuka'i eta'i eta vechereji mateji.

⁴⁷Ema ajaira máinapuiru'i, te tikaepiyainapa, máteji eta máke'e'i, ema táwapa'iyare'i eta apake'e. Émasera ema apana ajaira, máwasaichu'i te anuma.

⁴⁸Viti achaneana vikawasana te juka apake'e, vikuti'i ema achane mainapure makaepiyakene mateji; enasera ena tikawasana te anuma nakuti'iware ema Viya tikawasa te anuma.

⁴⁹Éneichuware viti achaneana vikaepiyakene mateji viwasijirikaka'i, taka'e viwasi'iware ema Viya tikawasa te anuma.

⁵⁰Nuwara'a níminekapaekene'a'eyare, nuparapenaveana, eta veche máteji wa'i étaima'i tisiapayare te máwasa ema Viya. Tínapukayare'i tikaitsiwa eta veche máteji, máepenakakayare'i eta.

⁵¹Éneichuware nuwara'a níminekapaekene'a'eyare eta juka tayumururewaini'i: Wa'i wámutuima'i vépenayare viti vítareruanaicha'a, tikaitsiwayaresera eta viáke'e, víti énapa ena náepenakeneanaripa'i

⁵²Tikaemapa eta nachuja, tíchu'a'avinapa viti vé'ikana'i ema Cristo. Tíja'uchawainapa eta táitsiwachirawainapa eta viáke'e viti vítareruanaicha'a, takutiyarechucha viúmatsisina, tíja'uchawanawarepa téchepukanayare ena náepenakeneana, máepenakakanainawarepa ena.

⁵³Taicha tatupara'a'i eta viáke'e tikaitsiwayare, máepenakakainapa. Máichekuarakirenapa eta vítaresiraya.

⁵⁴Te tamutupa eta táitsiwachirawayare eta viáke'e, títauchawainawarepa eta tametarapiana'i eta Takapika'ukene Ajureka: “Ema Viákenu makaepa'aipa eta vépeniraini.”

⁵⁵¿Waipa tápikakare'i viye'e eta vépenirapapuka, taicha wa'i wánasima'i vépena, yátupi'i eta véchepusiraya te vékari?

⁵⁶Eta taka'e, eta pekatu etapa tinakucha'i eta vepeniraya, taka'e eta pekatu takamapurapa eta tatiari'ira'i eta wanairipi.

⁵⁷¡Vi'asulupayacha ema Viya, taicha ema tikatiucha'avi'i taye'e eta vépenira, émavene'i ema Viakenu Jesucristo!

⁵⁸Táitusiawa, eti némunarukeneana'i nuparapenaveana, ímiyanawachucha eta étumechirawaina taye'e eta juka vé'iru'i, wa'i takuekekérekawa eta epanereruana. Ekaemataneakakenena yátupina ema Viákenu, taicha écharichu'i eti wa'i támapurujima'i eta ekaemataneasira'i ema.