Read Ignaciano 1 Corintios 5 Bible Online

1 Corintios 5 - Ignaciano bible

1 Corintios 5

¹Jukari'iware eta juka téchakare'i eta matiari'ira'i ema émana echamuri téjekapawa'i. Mave'a'i esu máena'aruwa. ¡Wá'icha tiuri eta juka máichakene'i! Énaipa ena nawayurewakeneana tikapekaturara'iana wa'i náurikaima'i eta juka.

²Esapi'aichucha eti, ¡tétavikawa'i eta ekasiñawawaisira'i! ¡Iúri'aipa etsiri'apaini, táichavene'i eta máichakene'i ema echamuri! ¡Iúri'aipaware étupirika'ini ema maka! Taicha tituparaka'avi vikuchukayare te vimuri nákani téjekapawana'i.

³Nuti apanaware, tayanapane eta nuyere'i'e'i, étasera eta náchanewa tikachane'eya.

⁴Te uirujikawa eti, tikachane'eyare eye'e eta náchanewa, étapa eta maitupaijiasirawa ema Viákenu Jesús,

⁵taka'e ema maka achane máima'ainepa ema Wínaraji, émainapa téchayare. Viwara'a pínajikaini eta juka pimauriwa'i, apaesa táuchuku'aini eta piáchanewa te táitekapapa eta jena sácheyare machaviraya ema Viákenu Jesús.

⁶Eti, wa'i táurika'ini ekasiñawawaika'ini. Taicha eti ímatipa eta taechejiriruwa: “Ema makuti'ipa eta lewadura te nanaka te masa eta pan, tayanajika'i tamutu.”

⁷Étisera, nuwara'a ekutiya eta pan maye'ere levadura vinikasare te páscuamu'uana. Yátupikene'i arairu taicha wa'i tasisijika'ini. Taicha ema, tamutu'i mawachacha eta vímikapasira'i, makuti'i eta uvesa eta vímijararesira'i.

⁸Táitusiawa puiti, tamutusera sácheana vikuneuchawaya taye'e eta tamaurikeneana, wa'i pekatumare'avima'i. Tamutu sácheana eta juka vítaresira'i matapiraware'avina'i, tájinasarepa víchirawaima'i te mamira'u ema Viya.

⁹Kape eta najure'iware eye'e, nímimetaka'e'i eta tamauriwa'i eta ekachanewaka'ini ena tíchana'i eta juka pekatuana tive'ajirikakana'i: Súkani esena suve'a'i ema apana achane, mákani achane mave'a'iware esu apana esena.

¹⁰Wá'isera énaina nicha ena nani máe'ikara'anaicha'a ema Viya, ena nani tive'ana'i esu apana esena apayena, énapa ena tiámera'iana, énapa ena tikasiñarajiana. Takamunuipapuka vérajikawa'ini eta te juka apake'e, apaesa waipa nakuitekapaucha'avi'ini.

¹¹Mákanisera tímijachawa'i echamuri'i, wa'i nuwara'a ekachanejirika, ema tive'a'i esu esena apayena, émapa ema tawayuaru'i eta plata, émapa ema tikasiñaraji, émapa ema titupiara'i, émapa ema tikawa'arasi, émapa ema tiámera'i. Mákani echamuri, te ene maka'e'i, tájina wa'i táurika'ini ákachanewaka'ini eta enisirana.

¹²Wa'i nútina tatuparaka eta nakayasesere'iyayare te numira'u ena anekakeneana'i eta viye'e. Té'esera te mamira'u ema Viya eta nakayasesere'iraya. Ema techawaka'i ena.

¹³Étisera, écha'i ena echamuriana'i. Eti eyaserejirikakayare étijikakaya. Eta taka'e, ekaevuisi'ayare ema mákara téjekapawa'i te emuri.