Read Ignaciano 1 Corintios 9 Bible Online

1 Corintios 9 - Ignaciano bible

1 Corintios 9

¹Nuti, nájina nákenuina'ini te juka apake'e, yátupi apústulenu'i maye'enu'i ema Viákenu Jesucristo. Nukutinasiwaka'i eta náwakure'i naye'e ena apamuriana apústuleana, taicha níma'akene'i ema Viákenu Jesús, tási'a etipa etupiruwa'i esuapanu eta nímitusira'e'i, eta tímereuchanu'i eta táuriwa'i eta nukaemataneasira'i ema Viákenu.

²Tayanapane wa'i nakusuapanu eta apústulenuira'i ena apamuriana, étisera esuapanuyare'i, taicha etiari'i eti nímitureana'i, étira ímereuchanu'i eta yátupira'i apústulenuira'i maye'e ema Viákenu.

³Étara nukatiuchiawa'i eta juka naye'e ena tépurujirikanuana'i:

⁴Eti tatuparaka'e'inéni ítatinu'ini nuti taye'e eta nunikakenerepi táichavene'i eta apústulenuira'i,

⁵tási'a éneichuware tituparaka'e'i ítati'iwareni te sutiari'ina'ini esu esena nuyenaina'ini, súkani nukutikene'i tisuapajira'i, tákuti'ini eta ítatirawaka'i ena esenana nayenana'i ena apamuriana apústuleana, émaipa ema Pedro, énapa ena maparapenaveana'i ema Viákenu.

⁶¿Eti, ímijachaipapuka nuti émapa ema Bernabé, vikarichu'i wa'i tatuparaka'avi'ini eta ítatira'avina'ini eta vikametarairuira'i?

⁷¿Nájapuka makaini sunturu emajiwa tiwachachinawa eta makamunukeneana? ¿Nájapuka makaini achane kasukure eta uwa wa'i makunika'ini eta masukure? ¿Naja'apuka makaini achane tijaneareka eta uvesa wa'i makunika'ni eta majanearu?

⁸Eta juka níchira'e'i, wa'i nákarichu nuti nukapanereru'i eta júkana, énerichuware eta Takapika'ukene Ajureka májure'i ema Moiséini títametaka'avi'iware.

⁹Ánipa taka'e'i eta táechejiriruwa'i: “Wa'i pikuitisumucha eta pivuiyerana, te tikaematanepa'i, taicha téku'anapa'i eta.” Táitaurewakene ema Viya wa'i tákarichu'ini eta vuiye eta máechejisi'a'i,

¹⁰éneichuware víti mayunaka'i te máechejiriruwa'i. Mawara'a'i vikaenikasiyare vimutu viti vikaematanera'iana, takuti'i mákani achane tikaematanera'i, makaemataneaka'i muraka eta máesane, mawaraira'i máimaekene'ayare eta táwameana'i eta máesane.

¹¹Ene vika'e'i víti eta véwasira'i eta máechajiriruwa ema Viya te esamureana. Eta tiúricha'e'i. Tási'a, eti ekutinapa eta sukureka tímekawa'i eta ta'i. Tájina táichawa eta ítatira'aviyare'i víti.

¹²Ena apamuriana tikasiñawana'i eta eye'e. Tási'a eti, tiúri'i eta ítatira'i. Vivetijipa víti vítatikare'i. Wa'isera wáwara'a'ini vikasiñawa'ini víti eta eye'e, viyaseaka'e'ini eta ítatira'avina'ini. Vikamicha'i tamutu, vimawaraira'i tatiari'ina'ini jákani apanaina'ini ta'apapirika'ini eta esamirayare'i eta máechejiriruwa ema Cristo.

¹³Échaichu'i eti eta mawanairipi ema Viya naye'e ena téchapajirikana eta maye'e templo, nanikayare'i eta tinikakare námakeneasana ena achaneana náijarakasiruana'i ema Viya. Káijarakasianayarewa ena eta táeche eta waka námawa'uana'i ena achaneana.

¹⁴Ene taka'e'i eta mawanairipi'i ema Viákenu eta viye'e viti vikametarairuana'i eta tapachinakene máechejiriruwa, tituparaka'avi'i vijakapayare'i eta vinikakene taicha eta vikametarairuira'i.

¹⁵Nútisera tájina nímatiya'ini nuyaseaka'e'ini eta ítatiranuina'ini. Étaipa puiti te juka najureana'i, wá'iware nuyaseaka'e íjarakanu'ini, nukamicha'i tamutu. ¡Tiúripanapukaini népenawane'ini, machu tachimarakanukaru táitawa eta juka núrisamurewa'i nuti tamajinaira'i nuyaseaka'e'ini!

¹⁶Nuti wa'i étaparakaina nukasiñawa'ini eta nukametarairuira'i. Nutupara'aichu'i eta juka. ¡Páurechichanusami te némuna'akawa nínajika eta juka nukametarairuira'i!

¹⁷Taicha nuti, wa'i nútijiwaina'ini níjarakawa'ini maye'e ema Viákenu eta nukametarairuiraya, étapapukaini nujakapi'a'ini eta nuwachayare'i eta maye'e. Nuwanekasiwa'isera me Viya eta matuparasiranu'i eta juka némataneyare'i.

¹⁸Ichapesera eta nuwaraira'i eta nukametarairu, tamajinaira'iware nuyaseaka'e'ini eye'e eti. Wa'i nupamika'e'ini eta ítatiranuina'ini táichavenena'ini eta nukatupara'aira'i eta apústulenuira'i.

¹⁹Nájina'ineni te juka apake'e napamikanu'ini eta nukaemataneasiraina'ini. Nútisera níjarakawa'i nítauchayare'i tamutu eta nukamunukarewa'i naye'e ena achaneana, apaesa étaina'ipukaini níturusi'awaka'ini ena nasimutuwakeneana, machaneranaina'ini ema Cristo.

²⁰Te nítekapauchawakapa ena israelítana, ichapeine'i eta nupikauchirawaka'i ena, apaesa najimuyasamure'ini eta náe'isiraina'ini ema Cristo, étainapapukaini níturusi'awaka'ini ena. Ena nani, ichape eta nasuapira'i eta maye'erepiana ema Moiséini. Tási'a, tájinaware wa'i nukaeka'i'ini eta naye'erepi'i, nupikaucha'iware ena apanawa. Wá'ineni nútiparakaina'ini taye'e eta náe'iru'i.

²¹Tatiari'isera eta yátupikene'i né'iru'i nuwana'i'i maye'e ema Viya, máijararunu'i ema Cristo. Énerichuware te nukainunawaka nákani apawasana máe'ikara'ana'i eta maye'erepiana'i ema Moiséini, wá'iware nukaeka'iwaka. Nupikaucha'iware ena, nuwaraira'i nukajimuyasamurechawaka'ini ena apanawa.

²²Te nukainunapuka ena vichamuriana nákani wícha'a'i náimatiekene'a'ini yatupina eta nakasiñairawaya maye'e ema Viya, wá'iware nukaeka'iwaka eta namaimatiekene'aira'icha'a, nímikatakawakapa, nuwaraira'i náimatiekene'apaini yátupina'ini eta vé'iru'i. Namutu ena achaneana, nujapanuwaka'i. Nutanuka'i eta nukajimuyasi'ayare eta nasamureana apaesa nauchuku'a nanerejikawa.

²³Nuti nítaucha'i tamutu eta júkana apaesa najakapa eta tapachinakene máechejiriruwa ema Viya, apaesa wákutikakapaini wámutu'ini vijakapa eta viúriwayare maicha ema Viya.

²⁴Échaichu'i eti, ena tijunapanaya kamuriana, tasi'asera wa'i namutu'ini naita'areka'ini emanaichu ema tita'arekaya tijachapaya eta máikuchi. Ene eka'eyare eti apanaware ejunapayare apaesa ejachapa eta ikuchi'i.

²⁵Enapa ena tikavijaruanayare eta peluta tijaneakawanayare'i muraka, ichape eta tikarawa'unumanayare apaesa túmeanainapa eta narata'airaya navereasi'aya ena nánaranayare'i, najakapainasarepa eta naikuchi'i, wa'ineni tayerema'i eta, vitisera ichape eta vétumechirawayare apaesa tauri eta vikaemataneasiraya ema Viákenu, vijakajakapasarepa eta vikuchi'i maye'e.

²⁶Nútiipa eta nukaemataneasira'i ema Viákenu, ichape eta nupamisirawa'i, taicha eta nímatira'i eta mawara'akene. Wa'i némepururekawaima'i.

²⁷Nukaratakawa'i muraka, wa'i nusuapa'ini eta tajamurachakeneana'i eta náke'e, nupamika'i eta táemitisisiraina'ini eta tamaurikeneana, machu néjekapawapapukaini, tási'a wáipapukaini nukujakapa'ini eta níkuchi'i, ichape eta nutsiri'akarewapapukaini, tavetijipa eta kamurianaira'i ena nímitureana taye'e eta vé'isira ema Cristo.