Read Ignaciano 2 Corintios 11 Bible Online

2 Corintios 11 - Ignaciano bible

2 Corintios 11

¹Tiuri puiti, nuwara'a ekamicha'ini eta juka nukayemakeneanayare eta eye'e. Tikutiyare mauritsinuina'ini. Nuwara'asera ítasama'ini.

²Puiti, tétavikawa'i eta néñamirawa'i ícha eti, tási'akene'isera me Viya. Taicha nuwara'a táuri'ini eta majakapira'eyare ema Cristo. Ákuti'ini súkani esena amaperu te sutupiruwa'i eta sukaimaira, tájinasarepa makayema'ini ema suima.

³Eta néñamirawa'i eye'e, nuwara'a'i ekuija'ini iákipaikawa, ekukamitiekene'a'ini eta táuriwa'i eta é'isira'i ema Cristo. Wa'i ekukuti eta suákipaisirawa'i esu Eva, maicha ema Wínaraji.

⁴Ímikatisamurechanu'i eta esuapirawane'i ena tépiya'ira'iana, apápipa'i eta nametarairu taye'e eta náuchukuiraya. Nuti, éma'i ema Jesucristo ema néchejisi'asa'i, ena, apana'i ema náechejisi'a'i. Émaipa ema Machanewa Viya, wá'iware émaina'ini náechejisi'a'ini, eti ejákapaipa'i ema.

⁵Nuti németeaka wa'i tikachurikanuanaima'i eta nukametarairuira, ena tímijachawana'i apústulekeneana tikametarairura'iana'i náichawa.

⁶Tayanapanepuka táepurukare'i naye'e eta néchejisira, étasera eta nítupajijiasirawa, tamutu'i nímatiekene'a. Ímatinu'i eti taye'e tamutu jákani nímitusira'eana níchakeneana'i.

⁷Etiari'iserapuka eti ímijacha'i néjekapawa eta némepaurechirawa'i. Táitusiawa népurukare'i eye'e, ichapeipa'isera núricha'eipa'i eti.

⁸Wá'isera nuyaseaka'e'ipukaini eta nunikakenerepi eta nímitusira'e'i. Yátupi tíjarakanuana'i ena apamuriana vichamuriana eta nénisiawayare.

⁹Tási'a, te níta'apa eta plata, wá'iware nuyaseaka'e'ini eta nunikakene. Taicha ena vichamuriana tikawasana'i te Macedonia náimiamareka'i eta nukamunukeneana'i. Taka'e, nujaneakawa'i, wa'i nuyaseaka'e'ini eti.

¹⁰Jé'esare, nájina tirata'aima'i ti'apapika eta nukunachakarewa'i taye'e eta, tájina nuyaseaka'ini eta nímitusira'e'i emutu eti ekawasana'i te Acaya, taicha yátupi'i eta nímatiekene'aira'i tamutu, eta yátupikeneana'i máimiturapiana ema Cristo.

¹¹Eta juka nukayemakeneana, wa'i ímijachaima'i étaina'ipukaini taichanu eta numaemunasira'ena'ini. Ema Viya máimati'i eta yátupira'i némunaka'e.

¹²Énesera nuka'eyare, wá'ikene nuyaseaka'ema'i. Nímiyanawaya eta nujaneasirawa, apaesa takuija naviya eta taviuchanu naye'e ena tímijachawana'i tímitura'iana. Taicha nawara'a'i tikunachakareanayare'i, tímikutichawanayare'i eta nukunachakarewa'i nuti;

¹³ena, tépiyakawana'i apústuleana. Tiwayuara'ianasera eta náitaresira'i. Wá'ikeneware wanairukanaima'i me Viákenu Jesucristo.

¹⁴Ena nani, wa'i tiáramikareana eta nawayuaraiwa'i, taicha ema Wínaraji, tépiyakawa'i makuti ema ángele,

¹⁵Ene naka'eyare'i ena nani mawanarana'i ema Wínaraji, tépiyakawanapa'i pastoreana náurikeneana. Jarajapayare'isera eta sácheyare najakapirayare eta náikuñayare táichaveneyare eta juka náimiakipaisira'e'i.

¹⁶Wa'i ekusuapa eta náimijachiranu'i máurishinu. Te etiari'ipuka eti ímijachanu máurishi, ekaye'e. Ekamichanu eta juka nukunachirawaya, apaesa nákutipaini eta nakunachirawa'i ena apamuriana,

¹⁷Tájina mawanairipina ema Viákenu taye'e eta vikunachakarewa'i. Tíchanu'isera nukunachawa, taicha eti ímijachanu máurishinu'i.

¹⁸Táichavene'isera eta nusamairisira'i eta nakunachirawa'i eye'e eta náitupajijiasirawa'i, énenapa nuka'eyare nuti eta nukunachirawa.

¹⁹Eti, ímijachawa'i ichape eta échemaraiwawaka'i. Ewapinawa'isera eta esuapira'i eta nayaseasira'e'i ena máurishiana,

²⁰ekamicha'iware tamutu eta napamisira'e ítaucha eta tivitakareana wanairipiana. Tiverejika'eana'i eta ekaye'ekeneana. Tasapi'apa eti ekamicha'i tamutu eta juka.

²¹Tétavikawa'i eta nutsiri'a'i náka'e'ini. Te ímijacha'ipuka tiúri'i tamutu eta juka náichira'e'i. Ena nani tikunachawana'i eta náuriwa'i. Nuti apanawa núri'a eta nukunachirawayare'i, tayanapane ímijachanupuka máurishinu'i.

²²Ena tikunachawana'i énaira'i hebreo israelítana. Nuti apana hebreonuware, israelitanuware. Éneichuware nuti mámariekenenu ema Abraham, nukuti'ichu'iware ena.

²³Ena, tímijachawana'i mawanarana ema Cristo. Nútisera, jé'ewarekenenu'i mawanaranu'i ema. Eta juka nukaemataneasira'i me Viya, témestakanu'i, témeratakanu'iware. Éneichuware ichapemuri'i eta táimikapasiranuyare'ini.

²⁴Takutikene sínku'eware nukaesta'i naicha ena nujaneanana israelítana te jákani nupaisiranapa'i. Mapana arruwa eta náestasiranu'i.

²⁵Mapa'eware tépuchirikanuana'i. Eta'eware tiyukararakanuana'i te márija'iana. Mapa'eware térika eta pakure tiámanupa'i. Tási'a, etanaware sache etanapa yati nuka'e'i te táina'u eta ichape une.

²⁶Ichapemuri eta nupaisirana'i. Níma'aware eta táiñe'ikarewa'i eta tamurakawa tajunapira'i eta ichape une étapa te kajakureana. Nupikakawa'iware naicha ena tiámera'iana. Tipanereuchanuanapa'i tikapakanuana ena nujaneanana, énapa ena apawasana. Tamutu'i náemauchianupa'i te awasare, té'epa te wáma'i, étapa te jákani nupaisirana te pakure. Éneichuware témauchanuana ena tímijachawana'i nuchamuriana.

²⁷Ichapemuri eta nukaematanera'i. Nukatajiwa'i muraka. Ichapemuri'iware eta numakaimarasirawa'i. Nukatajiwa'iware taye'e eta nékuawa étapa eta numaunewa. Ichapemuri'iware eta nukamichira eta níjimaira'i. Nukatajiwa'i taicha eta tikasara'i, taicha néchuri'a'i eta numuiri'arapi.

²⁸Tayanapaneinesera eta nukatajiwaira'i ichape, nímiyanawa'isera eta néñamirawa'i ícha emutu eti nuchamuriana te tamutu awasareana, nuwaraira'i takuija'ini ta'apapirika'e'ini taye'e eta é'isira'i ema Viakenu.

²⁹Te etiari'ipuka eti wa'i túme'ena'ini eta é'isira'i ema Viákenu, ichapeine'i eta néñamirawa'i nuti. Takutikene te etiari'ipuka eti náimiakipairu'e'i, tétavikawa'i eta nutsirira'iware, nusemasamureware.

³⁰Té'esera tatiari'ipuka eta nakunachirawa'i, nuti apanaware nukunachawaware. Étasera numaitupajijiasirawa'i.

³¹Émasera ema Tata Vikaiyakene, Maiya ema Jesucristo, máimati'i ema eta tatupiruwaira'i eta nukayemakeneana'i.

³²Takutikene te návi'aipa'i te Damasco, ema tuparairuka'i taye'e, majupa'a'i ema rey Aretas, máimiwanereka'i ena sentinélana te tapajana taye'e eta awasare, mawaraira'i tikaratakanuana;

³³Énasera ena nuchamuriana tinakaku'anuanapa taye'e eta ichape saye túme'i, tikuchukanuanapa te ventana, tikajuchuchukanuanapa te tiupi enure te apachakaya eta yúchama taye'e eta awasare. Taka'e'i eta núchukuira'i. Waipa nakaratakanu'ini.