Read Ignaciano 2 Corintios 12 Bible Online

2 Corintios 12 - Ignaciano bible

2 Corintios 12

¹Yátupi tájina nuve'aima'i eta nútijiwaira'i nukunachawa. Numetaka'eyesera eta nímaira'i te nuwapure máechejisiranu'i ema Viákenu.

²Nimati ema emana achane suapajira'i maye'e ema Cristo, katurse'añupa eta mamira'i ema Viya te anuma. Wa'isera necha te mama'ipuka eta make'e, wa'ipukasera etachuchaserapuka eta machanewa mama'i eta makawapurera'i, émasera ema Viya techa.

³Necha'isera ema maena achane (etachuchapukasera eta make'e, wa'ipuka etapuka eta machanewa eta makawapurera'i)

⁴necha'isera eta mamira'i ánaki te anuma taurikakarekene, eta masami'a'i eta techakareana tayumururewana'i, wá'isera táisapakare'ini naecha'ini ena achaneana.

⁵Étapapukaini nukunachirawa'ini taye'e eta níma'akene'i nusamakene'iware, taicha tímimatichanu'i ema Viya, wá'isera nukunachawaima'i taye'e, nuti nukunachawa'i taye'e eta numáitupajijiasirawa'i, étachucha nukasiñawaiya'i taye'e.

⁶Yátupi'ineni eta nukunachakarewa'i, wá'isera nukajamurawa'ini, taicha tájina nímati'ini nutanuka eta nakunachiranu'ini ena achaneana, nuwara'asera nanekapaekene'a'ini eta táuriwa'i eta nítaresira'i,

⁷tétavikawa'i eta tiáramikare eta níma'akeneana te anuma. Tási'a, ema Viya wa'i máwara'aima'i nukasiñawawaika'ini eta nímaira'i, máisapa'i ema wínarajikene tékajumachanu'i, kúti'ine tatiari'ina'ini itape tayuwaraka te neche, taicha ema Viya mawara'a wa'i nukuwayuchawa eta nukunachakarewaina.

⁸Mapa'e eta nuyaseasira'i ema Viya eta makanarasiranuina'ini eta nukatiru'awa'i;

⁹émasera ema Viya, ánipa máichanu'i: “Wicha'a nukanarakavima'i. Nujapanuvisera, níjarakaviyare ichape eta pitumewaya, tayanapane eta pimaitupajijiasirawa'i, taicha nuwara'a náimatiyare'i ena achaneana eta nítupajijiasirawa'i piye'e.” Eta taka'e, núrisamureichucha puiti eta tamajinaira'i eta nítupajijiasirawaina'ini apaesa máimerekawa'ini ema Cristo eta máijarasiranu'i eta máitupajijiasirawa'i.

¹⁰Tási'a, nuwapinawa'i puiti eta napanajisiranu'i, nukatajiwaira'i náicha, náume'airanu'iware táichavene'i eta mawanarairanu'i ema Cristo, nuwapinawa'iware eta numaitupajijiasirawa'i étapa eta néchuriasirana, taicha eta nímairawa'i tamajinaira'i nítupajijiasirawaina'ini, nútisera nusamawa'i eta nutumewapaipaicha maicha ema Viákenu.

¹¹Yátupi puiti eta néchejisiawaira'i nukatiuchirawa'i, tímikutijirikawaipa máurishinuina'ini, íchavene'isera eti. Taicha eti tatuparaka'i imereuchanuyare'eni, nukutinasiwaka'i ena nainapureana chapekeneana apústuleana. ¡Wicha'asera nakutinasima'i ena!

¹²Tayanapane kamuri eta nukatiru'awana, nukamicha'isera tamutu. Nímecha'eipa'ineni eta tiáramikareana níchakeneana'i, maicha ema Viya. Eta tímikaecherachanu'i eta yátupikenenuira'i apústulenu.

¹³Ena apamuriana vichamuriana te apana awasareana tikajinuana'i ena eta nukamunukeneana'i. Étisera, tájina wa'i nuyaseaka'e'ini étaina'ipukaini eta nunikakene, níteka'ipukaini íjarakanu'ini. ¡Wá'isera ekusema eta juka numaitekapauchira'i!

¹⁴Puiti nutserereakawaipa eta mapa'erayarepa níteka eta ara eye'e, nupaipiuchira'eya. Wá'iwaresera nákamunuima'i ítatinu'ini. Wá'isera étaina nutanukapa'ini eta ekaye'ekeneana. Étikenesera nukamunu'epa'i eta esuapiranuina'ini. Taicha nuchichanave'e'i eti. Nuti nítati'eyare taicha nuti ekaiyakenenu'i.

¹⁵Wá'isera néñamia'ema'i eta nukaye'ekene'i eta nítatira'eyare. Wá'isera nuyakujima'i eta nukaemataneasira'eyare táuriwayare eta iáchanewana. Tayanapane wá'ipuka ekuemunanajikanu'i, nútisera tétavikawa'i eta némunasira'e'i.

¹⁶Narari'iware ena, taka'e'i eta náechejiriruwa'i. Yátupi tipaipiucha'avi ema, wá'inenikacha tiyaseaka'avi eta makamunukene. Máitukasera eta mavereasira'aviya eta viplatane.

¹⁷Eti ímati'i, wa'i énewanerekaina'ipukaini ena néwataruasana'i eye'e, énaina'ipukaini navereaka'e'ini níchavenena'ini nuti.

¹⁸Te nuwanekapa ema Tito, émapa ema makachanekenepa'i, téjirapana'eanayare'i, ¡tájinaware mayaseaka'e'ini ema! Taicha vikutikaka'i víti eta viúriwa'i eta eye'e, táichavene'i eta vémunasira'e'i ichape.

¹⁹Eti ímijachaipapuka nutanuka'i eta nukatiuchirawayare'i eta eye'e. Wá'isera táka'e'ini. Wa'i táka'e'ini, taicha nuti nutupiruwa'i eta néchejisira'e'i te mamira'u ema Viya étapa te máijare ema Cristo, nuwaraira'i tajuruka'ini eta táuriwaina eta iáchanewana, eti némunarukeneana'i nuchamuriana.

²⁰Nuti, te níteka eta ara eye'e, nupika'i wa'i núrikaima'i áka'ema'i'ini eta nuchimapira'eya, e'ajirikaka, ekapinarukaka, esemajirikaka, íputsimuriákaka, épiyekenerejirikaka, iúme'ajirikaka, ekasiñawawairika, wá'ipuka takuakejirikaka'i eta epanereruana.

²¹Nupika'isera nátsiri'akare'ini nuti maye'e ema Viya ichavenena'ini eti, wicha'a étupirikawa'ini eta nuchimapira'eyare. Wa'i nuwara'a ekaiyakanu eti enerejikawana éjekapawana'i, taicha eta ánakiapaipa'i eta emáinajisiraicha'a eta ekapekaturairana. Ímiyanawaichucha eta esenamarera'e'i, étapa eta emapikaura'iwaichucha.